Ko te Pukapuka a Haroma

1 Nana ināianei, māku, mā Haroma, e tuhituhi atu nei i ētahi kupu ruarua e ai ki te whakahau a tōku matua, a Enoha, kia puritia ai ō mātou whakapapa.

2 Ā, i te mea he iti ēnei papa, i te mea hoki kua tuhia ēnei mea he whakaaro hei mea pai mō ō mātou tuākana ngā Rāmana, nā reira, me tika pū taku tuhi iti; engari ka kore au e tuhi i ngā mea e pā ana ki aku poropititanga, aku whakakitenga rānei. Nā te mea he aha kē atu ngā mea hei tuhituhi māku i tua atu i ngā mea kua tuhia e ōku tūpuna? Nā te mea kīhai rānei i whakakitea mai e rātou te mahere o te oranga? E mea atu nei au ki a koutou, Āe rā; ā, kāti anō māku tēnei.

3 Nana, e tika ana kia maha ngā mea me mahi i roto i tēnei iwi, nā te pakeke o ō rātou ngākau, me te turi o ō rātou taringa, me te kāpō o ō rātou hinengaro, me te mārō o ō rātou kakī; hei aha koa, he nui te aroha o tō tātou Atua ki a rātou, ā, kāore anō kia tahia atu rātou i te mata o te whenua.

4 Ā, he tokomaha kei waenganui i a mātou he maha ā rātou whakakitenga, nā te mea kāore rātou katoa i te kakī mārō. Ā, ko te hunga kāore i te kakī mārō me te whakapono anō rātou, e piritata ana rātou ki te Wairua Tapu, e whakaatu mai nei ki ngā tamariki a te tangata, e ai ki tō rātou whakapono.

5 Ināianei nā, nana, kua pahemo atu ngā tau e rua rau, ā, kua kaha nei te iwi o Nīwhai i runga i te whenua. I ū rātou ki te pupuri ki te ture a Mohi me te whakatapu i te rā hāpati ki te Ariki. Ā, kīhai rātou i kanga; kīhai hoki rātou i takahi i ngā mea tapu. Ā, i uaua rawa atu ngā ture o te whenua.

6 Ā, kua whakamararatia rātou i runga i te nuinga o te mata o te whenua, me ngā Rāmana anō hoki. I tokomaha rawa ake rātou i ngā Nīwhai; ā, i aroha rātou ki te kōhuru, ā, inu ai rātou i ngā toto kararehe.

7 Ā, i pahawa ake, i maha ā rātou whakaekenga mai ki a mātou, ngā Nīwhai, ki te whawhai. Engari, he tangata mārohirohi ō mātou kīngi me ō mātou kaiwhakahaere i roto i te whakapono o te Ariki; nā reira, i taea e mātou ngā Rāmana, ā, ka whakamōtītia atu rātou i ō mātou whenua, ā, ka whakapaea ō mātou pā, ngā wāhi noho katoa rānei o ō mātou whenua tuku iho.

8 I tokomaha haere mātou hoki, i horapa haere mātou hoki, i whairawa haere mātou hoki i te kōura, te hiriwā hoki, i ngā mea utu nui hoki, i te whakamahinga rākau hoki, i ngā whare, i ngā mihīni hoki, i te rino me te kapa anō hoki, te parāhe me te tīra hoki, te hanganga o ngā tūmomo taputapu katoa hei ngaki i te whenua, ngā rākau whawhai hoki—āe rā, te pere mata koi, pūkoro pere hoki, te mātia hoki, te tao hoki, ngā whakaritenga whawhai katoa hoki.

9 Ā, nā te mea i pēnei tā mātou whakarite ki te tūtaki atu ki ngā Rāmana, kīhai rātou i kake ake ki runga i a mātou. Engari i mana te kupu a te Ariki, nāna i kōrero atu ki ō mātou tūpuna, e mea ana: Ina pupuri koutou i aku whakahaunga ka whaioranga koutou i te whenua.

10 Ā, i pahawa ake, nā, i whakatūpato ngā poropiti a te Ariki i te iwi o Nīwhai, e ai ki te kupu a te Atua, nā, ki te kore rātou e pupuri i ngā whakahaunga, engari ka taka iho ki te kino, ka whakangaromia atu i te mata o te whenua.

11 Nā reira, i tākare ngā poropiti, me ngā pirīhi, me ngā kaiako, ki te whakahauhau i te iwi i runga i te manawanui kia kaha ai te iwi; e whakaako ana i te ture a Mohi, me tōna pūtake i homai ai; e whakapakepake ana i a rātou kia titiro whakamua ki te Mīhaia, me te whakapono ki a ia me te mea nei kua tae kē mai ia. Ā, nō tēnei āhua tā rātou whakaako i a rātou.

12 Ā, i pahawa ake nā tēnei mahi i tiakina e rātou te iwi mai i te whakangaromanga atu i te mata o te whenua; nā te mea i werohia atu ō rātou ngākau ki te kupu, e whakaohooho tonu ana i a rātou ki te rīpenetātanga.

13 Ā, i pahawa ake, nā, i pahure atu ngā tau e rua rau toru tekau mā waru—i runga i ngā ritenga o te whawhai, me ngā tautohetohenga, me ngā tītorehanga, mō te wāhi nui o te taima.

14 Ā kāore au, a Haroma, e tuhi atu anō, nā te mea he iti ngā papa. Engari nana, e aku teina, e āhei ana koutou te aro atu ki ngā papa a Nīwhai; nā te mea nana, kua whaowhaoa i runga rā ngā kōrero mō ā tātou whawhai, e ai ki ngā tuhinga a ō tātou kīngi, ērā rānei i meinga ai e rātou kia tuhia.

15 Ā, ka tukuna atu e au ēnei papa ki roto i ngā ringaringa o taku tama a Ōmoni, kia puritia ai ēnā e ai ki ngā whakahaunga a ōku tūpuna.