Karaipiture
Mōhia 13


Upoko 13

E tiakina ana a Apinati e te mana o te Atua—Ka whakaako ia i ngā Whakahaunga Tekau—Kāore te whakaoranga e puta ai i te ture a Mohi anake—Ka meatia e te Atua anō tētahi whakamārietanga me te hoko i Tana iwi. Takiwā 148 M.K.

1 Ināianei ā, i te rongonga o te kīngi i ēnei kupu, ka kī atu ia ki ana pirihi: Mauria atu te tangata nei, ā, whakamatea ia; nā te mea he aha tana painga mā tātou, nā, he pōrangi ia.

2 Ā, ka whakatika atu rātou me te ngana kia pā atu ai ō rātou ringaringa ki runga i a ia; engari i kaha tana tū atu ki a rātou, ā, ka kī atu ki a rātou:

3 Kei pā mai koutou ki ahau, nā te mea ka patua koutou e te Atua mēnā ka pā mai ō koutou ringaringa ki runga i ahau, nā te mea kāore anō kia tukuna atu e au te karere i tonoa ai au e te Ariki ki te whakapuaki; kāore anō rānei kia kōrerohia atu e au tāu i tono mai ai kia kōrerohia atu nei; nō reira, Kāore te Atua e tuku kia whakangaromia au i tēnei wā.

4 Engari me whakatutuki e au ngā whakahaunga kua whakahau mai nei te Atua ki ahau; ā, nā te mea kua kōrero pono atu au ki a koutou kei te riri koutou ki ahau. Hei āpiti anō, nā taku kōrero atu ki a koutou i te kupu a te Atua kua kīa au e koutou he pōrangi au.

5 Nā, i pahawa ake i muri iho i te kōrero a Apinati i ēnei kupu, nā, kīhai i māia te iwi o kīngi Noa ki te whakapā i ō rātou ringaringa ki runga i a ia, nā te mea kei runga i a ia te Wairua o te Ariki; ā, i tino whēriko te kānapatanga o tōna mata, e rite tonu ana ki tō Mohi i a ia i te maunga o Hinai, e kōrero ana ki te Ariki.

6 Ā, i kōrero ia i runga i te kaha me te mana o te Atua; ā, ka haere tonu ana kōrero, e mea ana:

7 E kite ana koutou kāore ō koutou kaha ki te whakamate i ahau, nō reira māku taku karere e whakaoti. Āe rā, kua kite hoki ahau e werohia ana ō koutou ngākau nā te mea e kōrero pono ana ahau ki a koutou e pā ana ki ō koutou hara.

8 Āe rā, e kikī ana koutou i te māharo, i te mīharo hoki, i te riri anō nā aku kupu.

9 Engari ka whakaoti au i taku karere; ka mutu, kāore he tikanga ki hea au haere ai, ki te mea ka whakaorangia au.

10 Engari ka kōrero tēnei au ki koutou, ko tā koutou e mea ai ki ahau, a muri ake nei, ka ai hei ritenga, ā, hei ātārangi mō ngā mea e puta mai ai.

11 Ā, ka pānui atu au ki a koutou ināianei te toenga atu o ngā whakahaunga a te Atua, nā te mea kei te kite au kāore ērā i tuhia ki roto i ō koutou ngākau; kei te kite au, nā, kua rangahau, kua whakaako hara koutou mō te wāhi nui o ō koutou oranga.

12 Ināianei ā, e mahara ana koutou nāku i kōrero atu ki a koutou: Kaua koe e hanga mōu tētahi whakapakoko, tētahi ritenga rānei o ngā mea i te rangi kei runga, i te whenua rānei kei raro, i te wai rānei i raro i te whenua.

13 Hei āpiti anō: Kaua koe e tuohu iho ki ēnā mea, e mahi rānei ki ēnā mea; nā te mea he Atua hae ahau te Ariki tō Atua, e torona atu ana i ngā hara o ngā tūpuna ki runga i ngā tamariki, ki ngā whakatipuranga tuatoru me te tuawhā o te hunga e mauāhara ana ki ahau;

14 Ā, e whakaatu aroha ana ki ngā mano o te hunga e aroha ana ki ahau me te pupuri i aku whakahaunga.

15 Kaua koe e whakahua noa i te ingoa o te Ariki tō Atua; nā te mea kāore te Ariki e mea ai he harakore te tangata e whakahua noa i tōna ingoa.

16 Me maumahara ki te rā hāpati, kia whakatapua.

17 E ono ngā rā e mahi ai koe, me te mahi i āu mahi katoa;

18 Engari ko te rā tuawhitu, te hāpati o te Ariki tō Atua, kaua e mahia tētahi mahi e koe, e tāu tama rānei, e tāu tamahine rānei, e tō pononga-tāne, e tō pononga-wahine, e ō kararehe rānei, e tō tangata kē rānei kei roto i ō kēti;

19 Nā te mea i hangaia e te Ariki te rangi me te whenua, me te moana i ngā rā e ono, me ngā mea katoa kei roto rā; nā reira i whakapaingia e te Ariki te rā hāpati, ā, whakatapua ana.

20 Whakahōnoretia tō matua me tō whaea, kia roa ai ōu rā i runga i te whenua e homai nei e te Ariki tō Atua ki a koe.

21 Kaua koe e whakamate.

22 Kaua koe e pūremu. Kaua koe e tāhae.

23 Kaua koe e whakapae teka ki tō kiritata.

24 Kaua koe e kaiapo i te whare o tō kiritata, kaua koe e kaiapo i te hoawahine o tō kiritata, i tana pononga-tāne rānei, i tana pononga-wahine rānei, i tana ōkiha rānei, i tana kaihe rānei, i tētahi mea rānei o tō kiritata.

25 Ā, i pahawa ake, nā, whai muri iho i tā Apinati whakaoti i ēnei kōrero ka kī atu ia ki a rātou: Kua whakaako koutou i tēnei iwi kia ū rātou ki te mahi i ēnei mea katoa kia pupuri ai i ēnei whakahaunga?

26 Ko taku kupu tēnei ki a koutou, Kāo; nā te mea mehemea i pērātia, kua kore te Ariki i mea kia haere mai au ki te poropiti i te kino e pā ana ki tēnei iwi.

27 Ā, kua kī mai ianei koutou ka puta te whakaoranga i te ture a Mohi. Ko taku kupu tēnei ki a koutou e tika pū anō kia pupuri koutou i te ture a Mohi mō nāianei; engari ko taku kupu tēnei ki a koutou, ka tae mai te wā kāore e tika tonu ana kia pupuri i te ture a Mohi.

28 Ā, waihoki, ko taku kupu tēnei ki a koutou, kāore te whakaoranga e puta mai i te ture anake; ā, me i kore te whakamārietanga e meatia ai e te Atua ake anō mō ngā hē me ngā hara o tana iwi, nā, kua tino ngaro rawa atu rātou, ahakoa te ture a Mohi.

29 Ināianei ā, ko taku kupu tēnei ki a koutou, na, i tika pū anō kia hoatu ai tētahi ture ki ngā tamariki o Iharaira, āe rā, he ture tino uaua pū anō; nā te mea he iwi kakī mārō rātou, he tere ki te hara, ā, he pūhoi ki te maumahara ki te Ariki tō rātou Atua;

30 Nō reira tētahi ture i hoatu ai ki a rātou, āe rā, he ture mahi, ā, he ture whai tikanga, he ture kia āta whaiwhai kaha atu mai i tētahi rā ki tētahi rā, kia mau ai ēnā kia mahara ai ki te Atua me tō rātou haepapa ki a ia.

31 Engari nana, ko taku kupu tēnei ki a koutou, nā, he ritenga katoa ēnei mō ngā mea e puta mai ai.

32 Ināianei ā, i mārama rātou ki te ture? Ko taku kupu tēnei ki a koutou, Kāo, kāore rātou katoa i mārama ki te ture; ā, i pēnei nā te pakeketanga o ō rātou ngākau; nā te mea kāore rātou i mārama korekau tētahi tangata e whakaorangia ai hāunga mā roto i te hokonga a te Atua.

33 Nana rā, kīhai rānei a Mohi i poropiti atu ki a rātou e pā ana ki te haerenga mai a te Mīhaia, ā, ka hoko anō te Atua i tana iwi? Āe rā, ko ngā poropiti katoa kua poropititia mai i te orokohanganga rā anō o te ao—kāore rānei rātou i kōrero nui, i kōrero iti rānei e pā ana ki ēnei mea?

34 Kāore rānei rātou i kī ai ka heke iho mai te Atua ake anō ki waenganui i ngā tamariki a te tangata, me te mau ki runga i a ia te āhua o te tangata, me te haere whakamua i runga i te mana nui ki runga i te mata o te whenua?

35 Āe rā, kāore rānei rātou i kī ai anō hoki, nā, māna e whakaputa te aranga o te hunga mate, ā, ka tūkinotia, ā, ka whakamamaetia ia anō?