1 Ā, i pahawa ake, nā, ka whai pai a Amurona i roto i ngā karu o te kīngi o ngā Rāmana; nō reira, ka tukuna rātou ko ana teina e te kīngi o ngā Rāmana kia whakatauhia rātou hei kaiako i runga i tana iwi, āe rā, i runga anō i te iwi e noho ana i te whenua o Hemerona, ā, i roto i te whenua o Hīroma, ā, i te whenua o Amurona.

2 Nā te mea i raupatuhia ēnei whenua katoa e ngā Rāmana; nō reira, kua whakatauhia e te kīngi o ngā Rāmana ngā kīngi i runga i ēnei whenua katoa.

3 Ināianei ā, ko Rāmana te ingoa o te kīngi o ngā Rāmana, kua whakaingoatia ia ki te ingoa o tōna matua; nō reira ia i karangatia ai ko kīngi Rāmana. Ā, he kīngi ia i runga i tētahi iwi nunui.

4 Ā, i whakatauhia e ia ngā kaiako nō ngā teina a Amurona ki roto i ia whenua, ia whenua kua nōhia e tōna iwi; ā, i pēnei te whakaakoranga a te reo o Nīwhai ki waenganui i te iwi o ngā Rāmana.

5 Ā, he iwi atawhai rātou tētahi ki tētahi; hei aha koa kāore rātou i mōhio ki te Atua; kāore rānei ngā teina a Amurona i whakaako i tētahi mea ki a rātou e pā ana ki te Ariki tō rātou Atua, ki te ture rānei a Mohi; kāore rānei rātou i whakaako i ngā kupu a Apinati ki a rātou;

6 Engari i whakaako rātou ki a rātou kia tuhia tā rātou tuhituhinga, ā, kia tuhituhi anō rātou tētahi ki tētahi.

7 Ā, i tīmata pēnei te nui haeretanga o ā ngā Rāmana taonga, ā, ka tīmata ki te hokohoko tētahi ki tētahi me te tupu kia nui, ā, ka tīmata hei iwi tinihanga, ā, hei iwi mōhio, e pā ana ki ngā mōhioranga o te ao, āe rā, he iwi tino tinihanga, e āhuareka ana ki ngā tūmomo mahinga whakarihariha katoa me ngā mahinga pāhua, hāunga ia te pāhua i waenganui i ā rātou ake teina.

8 Ināianei ā, i pahawa ake, nā, ka tīmata a Amurona ki te whakahaere i tōna mana ki runga i a Arami me ana teina, ā, ka tīmata ki te tūkino i a rātou me te mea anō i ana tamariki kia tūkino i ā rātou tamariki.

9 Nā te mea i mōhio a Amurona ki a Arami, koia anō tētahi o ngā pirihi a te kīngi, ā, koia hoki i whakapono ai ki ngā kupu a Apinati, ā, ka āia atu i te aroaro o te kīngi, ā, nā konā i pukuriri ia ki a ia; nā te mea i raro ia i a kīngi Rāmana, heoi, i whakahaeretia tōna mana ki runga i a rātou, ā, ka whakamau pikaunga ki runga i a rātou, ā, ka whakarite kai-akiaki ki runga i a rātou.

10 Ā, i pahawa ake, nā, i tīmata rātou ki te kaha karanga ki te Atua nā te nui o ō rātou whakamamaetanga.

11 Ā, ka whakahau a Amurona i a rātou kia mutu ā rātou karanga; ā, ka whakatūria e ia he kaitiaki i runga i a rātou ki te mātakitaki i a rātou, nā, mehemea ka kitea tētahi e karanga tonu ana ki te Atua ka whakamatea ia.

12 Ā, kīhai a Arami me tana iwi i whakaara ake i ō rātou reo ki te Ariki tō rātou Atua, engari ka ringihia iho ō rātou ngākau ki a ia; ā, i mōhio ia ki ngā whakaaro o ō rātou ngākau.

13 Ā, i pahawa ake, nā, ka tau iho te reo o te Ariki ki a rātou i roto i ō rātou whakamamaetanga, e mea ana: E ara ake i ō koutou māhunga, ā, kia hari, nā te mea e mōhio ana ahau i te kawenata kua meatia e koutou ki ahau; ā, māku e kawenata ki taku iwi me te whakaputa i a rātou i te hereheretanga.

14 Ā, māku e whakamāmā ngā pīkaunga ka whakamaua ki runga i ō koutou pokohiwi, kia kore ai koutou e rongo i aua mea i runga i ō koutou tuarā, i a koutou e noho ana i te hereheretanga; ā, ka pēnei ahau kia tū ai koutou hei kaiwhakaatu mōku a muri ake nei, ā, kia mōhio pū ai koutou māku, mā te Ariki te Atua, e toro atu ki taku iwi i roto i ō rātou whakamamaetanga.

15 Ināianei ā, i pahawa ake, nā, i whakamāmāhia ngā pīkaunga kua whakamaua ki runga i a Arami me ana teina; āe rā, ka whakakaha te Ariki i a rātou kia tino taea ai e rātou ō rātou pikaunga te waha ake, ā, ka ngohengohe rātou i runga i te hari me te manawanui ki tā te Ariki i pai ai.

16 Ā, i pahawa ake, nā, ka tau iho anō te reo o te Ariki ki a rātou nā te nui o tō rātou whakapono me tō rātou manawanui, e mea ana: Kia hari, nā te mea hei āpōpō māku koutou e whakaputa atu i te hereheretanga.

17 Ā, i kī atu ia ki a Arami: Māu e haere ki mua i tēnei iwi, ā, ka haere tahi au me koe, ā, ka whakaputaina tēnei iwi i te hereheretanga.

18 I pahawa ianei ake, nā, ka whakahuihui tahi tana iwi i ā rātou kāhui me ā rātou kākano i roto i te pō; āe rā, i te whakahuihui tahi rātou i ā rātou kāhui mō te roanga ake o te pō.

19 Ā, i te ata ka meatia e te Ariki kia au ai te moe a ngā Rāmana, āe rā, i te tino au te moe a ō rātou kai-akiaki katoa.

20 Ā, ka wehe atu a Arami me tana iwi ki roto i te koraha; ā, i te paunga ake o te rā i a rātou e haere ana ka whakatūria ō rātou tēneti i te raorao, ā, ka huaina te raorao ko Arami, nā te mea i ārahi ia i a rātou i runga i tō rātou huarahi i te koraha.

21 Āe rā, i ringihia iho e rātou ā rātou whakawhetai ki te Atua i te raorao o Arami nā te mea i whakaaroha ia ki a rātou, ā, i whakamāmāhia ō rātou pikaunga, ā, i whakaputaina atu rātou i te hereheretanga; nā te mea i te hereheretanga rātou, ā, kāore i taea e tētahi ki te whakaputa i a rātou hāunga ko te Ariki tō rātou Atua.

22 Ā, ka tuku whakawhetai rātou ki te Atua, āe rā, ka ara ake te reo o ā rātou tāne katoa me ā rātou wāhine katoa me ā rātou tamariki katoa i taea te kōrero i runga i te whakawhetai ki tō rātou Atua.

23 Ināianei ā, ka kī atu te Ariki ki a Arami: Kia hohoro koe, ā, me puta atu koutou ko tēnei iwi i tēnei whenua, nā te mea kua oho ngā Rāmana ki te aruaru i a koe; nō reira, me puta atu koe i tēnei whenua, ā, māku ngā Rāmana e aukati i tēnei raorao kia kore ai rātou e aruaru tonu i tēnei iwi.

24 Ā, i pahawa ake, nā, ka wehe atu rātou i te raorao, ā, ka whakatika atu tā rātou haere ki roto i te koraha.

25 Ā, i muri iho i ngā rā tekau mā rua i te koraha ka tae rātou ki te whenua o Harahemara; ā, ka whakawhiwhia rātou e kīngi Mōhia i runga i te koa.