1 Ināianei ā, i pahawa ake, nā, i te whakakapinga a Apinati i ēnei kīanga, nā, ka whakahaua e te kīngi ana tohunga kia haria atu ia, ā, kia whakamatea ia.

2 Engari i reira tētahi i waenganui i a rātou ko Arami tōna ingoa, koia hoki tētahi uri no Nīwhai. Ā, he taitama ia, ā, i whakapono ia ki ngā kupu i kōrerotia ai e Apinati, nā te mea i mōhio ia e pā ana ki ngā hara kua whakaatuhia ki a rātou; nō reira ka tīmata ia ki te inoi atu ki te kīngi kia kaua ia e riri ki a Apinati, engari kia tukuna ia kia wehe atu ai i runga i te rangimārie.

3 Engari i te pukuriri te kīngi, ā, ka meatia kia makaia atu a Arami i waenganui i a rātou, ā, ka tonoa āna pononga kia whai atu i a ia kia patua ai ia.

4 Engari, ka tahuti atu ia mai i tō rātou aroaro, ā, ka hunaia ia e ia anō nā konā kīhai rātou i rapu i a ia. Ā, i a ia e huna ana mō ngā rā maha ka tuhia e ia ngā kupu katoa kua kōrerotia e Apinati.

5 Ā, i pahawa ake, nā, ka mea te kīngi kia karapotia a Apinati e ana kaitiaki, ā, kia kahakina atu ia; ā, ka herea ia, ā, ka makaia ia ki roto i te whareherehere.

6 Ā, nō muri iho i ngā rā e toru, kua rūnanga tahi me āna pirihi, ka mea ia kia haria mai anō ia ki mua i tōna aroaro.

7 Ā, ka kī atu ia ki a ia: E Apinati, kua kite mātou i tētahi whakahē mōu, ā, e tika ana kia whakamatea koe.

8 Nā te mea kua kī ake koe ka heke mai te Atua pū anō ki waenganui i ngā tamariki a te tangata; ināianei ā, mō tēnei take ka whakamatea koe ki te kore koe e whakakāhore i ngā kupu katoa kua kōrerotia kinotia nei e koe e pā ana ki ahau me tōku iwi.

9 Nā, ka kī atu a Apinati ki a ia: Ko taku kupu tēnei ki a koe, e kore au e whakakāhore i ngā kupu kua kōrerotia ki a koe e pā ana ki tēnei iwi, nā te mea he pono ērā; ā, kia mōhio anō koe ki ōna pono kua tukuna au e ahau anō kia taka iho ki ō ringaringa.

10 Āe rā, ka mamae au tae atu pū anō ki te mate, ā, kua kore au e whakakāhore i aku kupu, ā, ka tū tonu ēnā hei whakaaturanga ki ō koutou hē. Ā, mēnā ka whakamate koe i ahau kua whakahekea ngā toto hara kore, ā, ka tū anō tēnei hei whakaaturanga ki ō koutou hē hei te rā whakamutunga.

11 Ināianei ā, whano ka tukuna atu ia e kīngi Noa, nā te mea i wehi ia ki tana kupu; nā te mea i wehi ia kei tau iho ngā whakawākanga a te Atua ki runga i a ia.

12 Engari ka whakanuia e ngā tohunga ō rātou reo ki a ia, ā, ka tīmata ki te whakahē i a ia, e mea ana: Nāna te kīngi i taunu. Nō reira te kīngi i whakaohokia ake kia riri ki a ia, ā, ka tukuna ake ia kia whakamatea ai ia.

13 Ā, i pahawa ake, nā, ka kahakina atu ia, ā, ka herea ia, ā, ka wepua tōna kiri ki ngā paihere rākau ahi, āe rā, tae atu ana ki te mate.

14 Ināianei ā, i te wā i tīmata ngā mura ki te ngau i a ia, ka karanga atu ia ki a rātou, e mea ana:

15 Nana, e pērā ana tā koutou i mea ai ki ahau, ka pahawa pērā ake, nā, ka meatia e ōu uri kia mamae ai te tokomaha i ngā mamaetanga e mamae nei ahau, ko ngā mamae pū anō o te matenga ki te ahi; ā, ka pēnei anō nā tō rātou whakapono ki te whakaoranga o te Ariki tō rātou Atua.

16 Ā, ka pahawa ake, nā, ka whakamamaetia koe ki ngā tūmomo mate katoa nā ōu hara.

17 Āe rā, ka patua koutou i tētahi taha, i tētahi taha, ā, ka āia atu, ā, ka whakamararatia atu ki wīwī ki wāwā anō nei tētahi kāhui mohoao e āia ana e ngā kararehe horetītī mohoao.

18 Ā, i taua rā ka aruarumia koutou, ā, ka kahakina atu e ngā ringaringa o ō koutou hoariri, kātahi koutou ka whakamamaehia, pērā i ahau e mamae ana, ko ngā mamae o te matenga ki te ahi.

19 Ka whakahaere pēnei te Atua kia rapu utu ai ia ki te hunga e whakangaromia ana tana iwi. E te Atua, whakawhiwhia mai tōku wairua.

20 Ināianei ā, i te wā i kōrero ai a Apinati i ēnei kupu, ka hinga ia, kua whakamatea nei ki te ahi; āe rā, kua whakamatea ia nā te mea kīhai ia i whakakāhore i ngā whakahaunga a te Atua, kua hīria āna kupu pono e tōna matenga.