1 Nā, i reira tētahi wāhi i Hemerona he rite tonu te huihui tahi a ngā tamāhine a ngā Rāmana ki te waiata me te kanikani, me te whakakoa i a rātou anō.

2 Ā, i pahawa ake, nā, kua huihui tahi ētahi torutoru nei o rātou ki te waiata me te kanikani.

3 Ināianei ā, he whakamā nō ngā pirihi a kīngi Noa ki te hoki atu ki te pā o Nīwhai, āe rā, he mataku anō kei patua rātou e te iwi, nō reira kīhai i māia rātou ki te hoki atu ki ō rātou hoawāhine me ā rātou tamariki.

4 Ā, i te mea kua noho rātou i te koraha, ā, kua kite anō i ngā tamāhine a ngā Rāmana, ka tīraha iho rātou, ā, ka mātakitaki i a rātou;

5 Ā, i te wā he ruarua noa iho o rātou e hui tahi ana ki te kanikani, ka puta atu rātou i ō rātou wāhi huna, ā, ka mau ki a rātou kātahi ka kahakina atu rātou ki roto i te koraha; āe rā, neke atu i te rua tekau mā whā o ngā tamāhine a ngā Rāmana i kahakina atu ai ki roto i te koraha.

6 Ā, i pahawa ake, nā, i te wā i kite ai ngā Rāmana kua ngarongaro ā rātou tamāhine, ka riri rātou ki te iwi o Rimihi, nā te mea i pōhēhē rātou nā te iwi o Rimihi.

7 Nō reira rātou i tuku atu ai i ō rātou ope tauā; āe rā, i haere pū anō te kīngi ake i mua i tōna iwi; ā, ka haere ake rātou ki te whenua o Nīwhai kia whakangaromia ai te iwi o Rimihi.

8 Ināianei ā, i kitea atu rātou e Rimihi mai i te pourewa, i kitea pū anō e ia ā rātou whakaritenga katoa mō te pakanga; nō reira, ka huihuia ngātahitia tōna iwi e ia, ā, ka tatari ki a rātou i roto i ngā whīra, i roto anō i ngā ngahere.

9 Ā, i pahawa ake, nā, i te wā i haere mai ngā Rāmana, nā, ka tīmata te iwi o Rimihi kia taka iho ki runga i a rātou mai i ō rātou wāhi i tatari ai rātou, ā, ka tīmata ki te patupatu i a rātou.

10 Ā, i pahawa ake, nā, i tino nanakia rawa atu te pakanga, nā te mea i whawhai rātou me te mea nei ko ngā raiona e whawhai ana mō te pārurenga.

11 Ā, i pahawa ake, nā, ka tīmata te iwi o Rimihi ki te peipei atu i ngā Rāmana i ō rātou aroaro; heoi, kīhai i eke tō rātou tokomaha i te haurua noa iho o tō ngā Rāmana. Engari i whawhai rātou mō ō rātou oranga, me ā rātou hoawāhine, me ā rātou tamariki; nō reira rātou i whakatīeke ai, ā, i whawhai rātou anō nei he tarakona.

12 Ā, i pahawa ake, nā, ka kitea e rātou te kīngi o ngā Rāmana i waenganui i ō rātou mate; heoi, kāore anō ia kia mate, kua taotūngia ia, ā, kua mahue iho i runga i te papa, nā te tere hoki o te whatinga o tana iwi.

13 Ā, ka mau rātou ki a ia, ā, ka tākaia ake ōna taotūnga, ā, ka mauria ki te aroaro o te kīngi, ā, ka mea: Nana, anei te kīngi o ngā Rāmana; kua taotūngia ia, ā, kua hinga iho ia ki waenganui i ō rātou mate, ā, kua mahue ia i a rātou; ā nana, kua mauria mai ia ki mua i tō aroaro; ināianei ā, me whakamate tātou i a ia.

14 Engari, ka kī atu a Rimihi ki a rātou: E kore koutou e whakamate i a ia, engari mauria mai ia ki konei e kite ai au i a ia. Ā, ka mauria atu ia. Ā, ka kī atu a Rimihi ki a ia: He aha te take i haere mai ai koutou ki te pakanga ki tōku iwi? Nana, kāore taku iwi i takahi i te oati i oati ai au ki a koe; nō reira, me aha koe e takahi ai i te oati i oati ai koe ki tōku iwi?

15 Ināianei ā, ka kī atu te kīngi: Kua takahi au i te oati nā te mea i kahakina atu ngā tamāhine o tōku iwi e tō iwi; nō reira, i haere mai tōku iwi ki te pakanga ki tō iwi i runga i tōku riri.

16 Ināianei ā, kīhai a Rimihi i rongo i tētahi aha noa e pā ana ki tēnei take; nō reira ka kī atu ia: māku e kimi i roto i tōku iwi, ā, ka mate te tangata nāna nei tēnei mea i mahi. Nō reira, ka meatia e ia tētahi kimihanga i roto i tōna iwi.

17 Nā, i te rongonga a Kiriona i ēnei mea, ko ia hoki te kāpene o te kīngi, ka haere atu ia, ā, ka kī atu ia ki te kīngi: E inoi nei au ki a koe kia taihoa, ā, kia kaua e kimi i roto i tēnei iwi, ā, kia kaua e whakatakotohia tēnei mea hei whakahē i a rātou.

18 Nā te mea kāore koe i te mahara ki ngā pirihi a tō matua, kua whāia e tēnei iwi ki te whakangaro? Ā, kāore rānei rātou e noho ana i te koraha? Ā, kāore rānei rātou ngā mea nāna nei ngā tamāhine a ngā Rāmana i whānako?

19 Ināianei ā, nana, me kōrero atu i ēnei mea ki te kīngi, kia kōrero atu ia ki tōna iwi kia whakararatatia ai rātou ki a tātou; nana rā, e whakarite kē ana rātou ki te whakaeke mai ki a tātou; ā, tirohia anō hoki he tokoiti noa iho tātou.

20 Ā, nana, kei te haere mai rātou me ō rātou ope manomano; ā, ki te kore e whakararatatia rātou e te kīngi ki a tātou ka mate tātou.

21 Nā, kāore anō rānei kia tutuki ngā kupu a Apinati, i poropititia ai e ia ki a tātou—ā, koinei mea katoa nā te mea kīhai tātou i whakarongo ki ngā kupu a te Ariki me te tahuri atu i ō tātou hara?

22 Ināianei ā, me whakararata tātou i te kīngi, kātahi ka tutuki te oati i oati ai tātou ki a ia; nā te mea he pai ake kia noho herehere ai tātou i te ngaronga o ō tātou oranga; nō reira, me whakamutu e tātou te whakahekenga o ngā toto nui.

23 Ināianei ā, ka kōrero atu a Rimihi i ngā mea katoa ki te kīngi e pā ana ki tōna matua, me ngā pirihi kua tahuti atu ki roto i te koraha, ā, ka whakairia atu te kāhakinga o ā rātou tamāhine ki a rātou.

24 Ā, i pahawa ake, nā, i whakararatatia te kīngi ki tōna iwi; ā, ka kī atu ia ki a rātou: Me haere atu tātou ki te tūtaki i tōku iwi, rākau whawhai kore; ā, ko taku oati e oati nei au ki a koe e kore rawa taku iwi e patupatu i tō iwi.

25 Ā, i pahawa ake, nā, ka whai atu rātou i te kīngi, ā, ka haere rākau whawhai kore atu ki te tūtaki ki ngā Rāmana. Ā, i pahawa ake, nā, i tūtaki rātou ki ngā Rāmana; ā, ka tuohu iho te kīngi o ngā Rāmana ki mua i a rātou, ā, ka inoi atu ia hei māngai mō te iwi o Rimihi.

26 Ā, ka kite ana ngā Rāmana i te iwi o Rimihi, nā, kāore ō rātou rākau whawhai, ka aroha rātou ki a rātou, ā, kua whakararatatia ki a rātou, ā, ka hoki tahi atu rātou ko tō rātou kīngi ki tō rātou ake whenua i runga i te rangimārie.