1 Ā, i haere mai anō hoki i ngā rā o Komo ngā poropiti tokomaha, ā, ka poropititia mō te whakangaromanga o taua iwi nui ki te kore rātou e rīpenetā, me te tahuri atu ki te Ariki, me te whakarere i ō rātou kōhurutanga me tō rātou whakariharihatanga.

2 Ā, i pahawa ake, nā, i whakaparahakongia ngā poropiti e te iwi, ā, ka tahuti atu rātou ki a Komo hei tiaki i a rātou, nā te mea i whai te iwi ki te whakangaro i a rātou.

3 Ā, i poropiti atu rātou i ngā mea maha ki a Komo; ā, i manaakitia ia i te toenga katoa o ōna rā.

4 Ā, i ora ia ki tētahi pakeketanga tino kaumātua rawa atu, ā, nāna ko Hipiromo; ā, ka kīngi a Hipiromo i muri i a ia. Ā, ka haututū te teina a Hipiromo ki a ia, ā, ka tīmata tētahi pakanga tino nanakia i te whenua katoa.

5 Ā, i pahawa ake, nā, ka mea te teina a Hipiromo kia whakamatea ngā poropiti katoa e poropiti ai e pā ana ki te whakangaromanga o te iwi;

6 Ā, he nui te aituā i te whenua katoa, nā te mea kua whakaaturia e rātou, nā, ka tau mai tētahi kanga nui ki runga i te whenua, ki runga anō hoki i te iwi, ā, ka tau iho anō tētahi whakangaromanga nui ki waenganui i a rātou, tētahi mea kāore anō kia kitea ki runga i te mata o te whenua ki te kore rātou e rīpenetā i ō rātou whakarihariha.

7 Ā, kīhai rātou i whakarongo atu ki te reo o te Ariki, nā ō rātou whakakotahitanga whakarihariha; nā reira, ka tīmata ngā pakanga me ngā tautohetohenga i te whenua katoa, me ngā matekai maha me ngā urutā maha anō hoki, nā konā ka ai tētahi whakangaromanga nui, tētahi mea kāore i mōhiotia i runga i te mata o te whenua; ā, i pahawa ake ēnei mea katoa i ngā rā o Hipiromo.

8 Ā, ka tīmata tā te iwi rīpenetā i ō rātou kino; ā, ka aroha te Ariki ki a rātou ki te ritenga o tā rātou rīpenetātanga.

9 Ā, i pahawa ake, nā, ka whakamatea a Hipiromo, ā, ka mauheretia a Hete, ā, ka noho hereheretia ia i ōna rā katoa.

10 Ā, i pahawa ake i a Aha, tana tama, ka riro i a ia te kīngitanga; ā, i kīngi ia i runga i te iwi i ōna rā katoa. Ā, i mahi ia i ngā tūmomo kino katoa i ōna rā, nā konā mea ai ia i te whakahekenga toto nui; ā, i ruarua noa ōna rā.

11 Ā, ko Eteme, he uri nō Aha, ka riro i a ia te kīngitanga; ā, i mahi anō ia i ērā mea e whakarihariha ana i ōna rā.

12 Ā, i pahawa ake, nā, he tokomaha ngā poropiti i haere mai ai i ngā rā o Eteme, ā, ka poropiti atu anō ki te iwi; āe rā, i poropiti rātou, nā, ka whakangaromia rawatia rātou e te Ariki i te mata o te whenua ki te kore rātou e rīpenetā i ō rātou kino.

13 Ā, i pahawa ake, nā, ka whakapakeke rātou i ō rātou ngākau, ā, kīhai rātou i pai ki te whakarongo ki ā rātou kupu; ā, ka tangi ngā poropiti, ā, ka puta atu rātou i waenganui i te iwi.

14 Ā, i pahawa ake, nā, ka whakahaere whakawā a Eteme i runga i te kino i ōna rā katoa; ā, nāna ko Morono. Ā, i pahawa ake, nā, ka kīngi a Morono i muri i a ia; ā, ka mea a Morono i ērā mea e kino ana i te aroaro o te Ariki.

15 Ā, i pahawa ake, nā, ka ara ake tētahi tutūnga i waenganui i te iwi, nā taua whakakotahitanga huna i hangaia ake ki te rapu mana me ngā taonga; ā, ka tū ake tētahi tangata mārohirohi i waenganui i a rātou i runga i te kino, ā, ka whawhai atu ki a Morono, inā, ka turaki iho ia i te hauruatanga o te kīngitanga; ā, i puritia e ia te hauruatanga o te kīngitanga mō ngā tau maha.

16 Ā, i pahawa ake, nā, ka turaki a Morono i a ia, ā, ka riro i a ia anō te kīngitanga.

17 Ā, i pahawa ake, nā, ka tū ake tētahi atu tangata mārohirohi; ā, he uri ia nō te teina a Iarere.

18 Ā, i pahawa ake, nā, ka turaki ia i a Morono, ā, ka riro i a ia te kīngitanga; nā reira, ka noho hereheretia a Morono mō te toenga atu o ōna rā; ā, nāna ko Koriatoro.

19 Ā, i pahawa ake, nā, ka noho hereheretia a Koriatoro i ōna rā katoa.

20 Ā, ka haere mai ngā poropiti tokomaha i ngā rā o Koriatoro, ā, ka poropititia mō ngā mea nui whakamīharo, ā, ka karanga atu rātou i te rīpenetātanga ki te iwi, ā, ki te kore rātou e rīpenetā ka whakahaere whakawā te Ariki te Atua ki runga ki a rātou tae atu ana ki tō rātou whakangaromanga katoatanga;

21 Ā, ka tonoa mai, ā, ka mauria mai rānei e te Ariki te Atua tētahi atu iwi kia nōhia ai te whenua, mā tōna mana, i runga i te ritenga i mauria mai ai e ia ō rātou tūpuna.

22 Ā, i whakaparahako rātou i ngā kupu katoa a ngā poropiti, he mea nā tō rātou huinga huna me ō rātou mōrikarika whakarihariha.

23 Ā, i pahawa ake, nā, ka whānau ake tā Koriatoro i a Ētere, ā, ka mate ia, kua noho hereheretia ia i ōna rā katoa.