Ko te Pukapuka a Ētere
Ko te tuhinga mō ngā Iarere, kua tīkina atu i ngā papa rua tekau-mā whā i kitea ai e te iwi o Rimihii ngā rā o Kīngi Mōhia.
Upoko 1
Ka whakarāpopoto a Moronai i ngā tuhituhinga a Ētere—Ka whakatakotohia iho ngā whakapapa o Ētere—Kīhai te reo o ngā Iarere i whakapōauautia i te pourewa o Pāpera—Ka whakaaria e te Ariki kia ārahina atu rātou ki tētahi whenua taurikura, ā, ka whakatupuria rātou hei iwi nui.
1 Ināianei ka tīmata ahau, a Moronai, ki te tuku i tētahi tuhinga mō aua tangata whenua onamata i whakangaromia e te ringa o te Ariki i runga i te mata o tēnei whenua.
2 Ā, ka tīkina mai taku tuhinga mai i ngā papa e rua tekau mā whā i kitea rā e te iwi o Rimihi, i karangatia nei ko te Pukapuka a Ētere.
3 Ā, ki ōku whakaaro kei ngā Hūrai te wāhanga tuatahi o tēnei tuhinga, e kōrero ana e pā ana ki te hanganga rā anō o te ao, mō Arama anō hoki, ā, he tuhinga anō mai i tērā wā tae noa iho ki te pourewa nui, me ngā mea katoa i heipū ake nei i waenganui i ngā tamariki a te tangata tae noa ki taua wā.
4 Nō reira kāore au e tuhituhi i aua mea i heipū ake nei mai i ngā rā o Arama tae noa ki taua wā; engari kei runga i ngā papa; ā, ko te tangata e kitea ai ērā mea, ko ia anō te mea e whaimana ana kia riro i a ia te roanga katoa o te tuhinga.
5 Engari nana, Kāore au e tuku i te roanga katoa o te tuhinga, engari ka tuku au i tētahi wāhi o te tuhinga, mai i te pourewa tae noa iho ki te wā i whakangaromia ai rātou.
6 Ā, ka pēnei taku tuhituhi i runga i tēnei āhuatanga. Ko te tangata nāna nei tēnei tuhinga i tuhituhi, arā, ko Ētere, ā, he uri ia nō Koriatoro.
7 He tama a Koriatoro nā Morono.
8 Ā, he tama a Morono nā Eteme.
9 Ā, he tama a Eteme nā Ahaha.
10 Ā, he tama a Ahaha nā Heta.
11 Ā, he tama a Heta nā Hipirona.
12 Ā, he tama a Hipirona nā Koma.
13 Ā, he tama a Koma nā Koriatumu.
14 Ā, he tama a Koriatumu nā Amanikara.
15 Ā, he tama a Amanikara nā Arona.
16 Ā, he uri a Arona nō Hete, he tama ia nā Heatomo.
17 Ā, he tama a Heatomo nā Ripi.
18 Ā, he tama a Ripi nā Kihi.
19 Ā, he tama a Kihi nā Koroma.
20 Ā, he tama a Koroma nā Rewi.
21 Ā, he tama a Rewi nā Kimi.
22 Ā, he tama a Kimi nā Moriatono.
23 Ā, he uri a Moriatono nō Ripakihi.
24 Ā, he tama a Ripakihi nā Heha.
25 Ā, he tama a Heha nā Hete.
26 Ā, he tama a Hete nā Koma.
27 Ā, he tama a Koma nā Koriatumu.
28 He tama a Koriatumu nā Emera.
29 Ā, he tama a Emera nā Omere.
30 Ā, ko Omere te tama nā Hure.
31 Ā, he tama a Hure nā Kipi.
32 Ā, he tama a Kipi nā Oriha, he tama ia nā Iarere;
33 Ko taua Iarere i haere mai ai i te pourewa nui, rāua ko tana teina, me ō rāua whānau, me ētahi atu me ō rātou whānau, i te wā i whakapōauau te Ariki i te reo o te iwi, ā, ka oati i runga i tōna riri kia whakamararatia atu rātou i runga i te mata katoa o te whenua; ā, i whakamararatia atu te iwi e rite ana ki te kupu a te Ariki.
34 I te mea he tangata kaitā te teina a Iarere, ā, he tangata i whakamakautia nuitia e te Ariki, ka kī ake a Iarere, tana tuakana ki a ia: Karanga ake ki te Ariki, kia kaua rā ia e whakapōauau i a tātou kei kore tātou e mārama ki ā tātou kupu.
35 Ā, i pahawa ake, nā, ka karanga ake te teina a Iarere ki te Ariki, ā, ka aroha te Ariki ki a Iarere; nō reira kāore ia i whakapōauau i te reo o Iarere; ā, kāore a Iarere rāua ko tana teina i whakapōauautia.
36 Kātahi a Iarere ka kī atu ki tana teina: Karanga ake anō ki te Ariki, e tahuri atu ai ia i tōna riri i te hunga ko rātou nei he hoa nō tāua, kei kore ia e whakapōauau i tō rātou reo.
37 Ā, i pahawa ake, nā, ka karanga ake te teina a Iarere ki te Ariki, ā, ka aroha anō te Ariki ki ō rāua hoa me ō rātou whānau anō hoki, nā, kāore rātou i whakapōauautia.
38 Ā, i pahawa ake, nā, ka kōrero atu anō a Iarere ki tana teina, e mea ana: Haere, ā, ui atu ki te Ariki mēnā rānei ka āia atu tātou e ia ki waho i te whenua, ā, mēnā rānei ka āia atu tātou e ia ki waho i te whenua, karanga ake ki a ia ko hea haere ai tātou. Ā, ko wai e mōhio ana ko hea tātou kawea atu ai e te Ariki ki tētahi whenua e pai ake nei i ngā whenua katoa? Ā, ki te pēnei, tukua tātou kia ū ki te Ariki, kia whiwhi ai tātou ki taua mea hei whenua tuku iho mō tātou.
39 Ā, i pahawa ake, nā, ka karanga ake te teina a Iarere ki te Ariki e rite ana ki taua mea i kōrerotia nei e te māngai o Iarere.
40 Ā, i pahawa ake, nā, ka rongo te Ariki i te teina o Iarere, ā, ka aroha ia ki a ia, ā, ka kī ake ia ki a ia:
41 Me haere me te whakawhāiti ngātahi i ā koutou kāhui, toa mai, uwha mai o ia āhua o ia āhua; i ngā kākano o te whenua anō hoki o ia āhua, o ia āhua; me ō whānau; me Iarere tō tuakana anō hoki me tōna whānau; me ō hoa anō hoki me ō rātou whānau, me ngā hoa o Iarere me ō rātou whānau.
42 Ā, ina oti i a koe tēnei mea ka haere iho koe i mua i a rātou ki roto i te raorao kei te raki. Ā, ka tūtaki au ki a koe i reira, ā, ka haere atu au i mua i a koe ki roto i tētahi whenua e pai ake ana i ngā whenua katoa o te ao.
43 Ā, ka manaaki au i a koe i reira me ōu uri, ā, ka whakatupuria ake he iwi nui mōku i ōu uri, i ngā uri anō o tō tuakana, ā, ka haere ngātahi rātou me koe. Ā, kāore tētahi iwi nui ake i te iwi māku e whakatupu ake i ōu uri, i runga i te mata katoa o te whenua. Ā pēnei tāku ki a koe nā te mea kua roa te wā kua karanga ake nei koe ki ahau.