1 Ināianei ahau, a Moronai, e haere tonu atu ana taku whakaoti i taku tuhinga e pā ana ki te whakangaromanga o te iwi kua tuhia nei e au.

2 Nana rā, i whakaparahako rātou i ngā kupu katoa a Ētere; nā te mea he pono tāna kōrero atu ki a rātou mō ngā mea katoa, mai i te tīmatanga o te tangata; ā, i muri iho i te hekenga atu o ngā wai i te mata o tēnei whenua kua meinga ia he whenua pai ake i ngā whenua katoa, ā, he whenua kōwhiria nā te Atua; nā reira e hiahia ana te Ariki kia mahi ngā tāngata katoa e noho ana ki runga i tō reira mata ki a ia;

3 Ā, koia te wāhi o te Hiruharama Hou, e heke iho mai i te rangi, ā, ko te haumarutanga tapu o te Ariki.

4 Nana, i kite a Ētere i ngā rā o te Karaiti, ā, i kōrero ia e pā ana ki tētahi Hiruharama Hou ki runga i tēnei whenua.

5 Ā, i kōrero anō ia e pā ana ki te whare o Iharaira, me te Hiruharama e puta mai ai a Rīhai i reira—whai muri iho i tōna whakangaromanga ka hangaia ake anō, hei pā tapu ki te Ariki; nā reira, e kore e āhei tēnei hei Hiruharama Hou nā te mea nō te wā onamata ia; engari ka waihanga ake anō ia, ā, ka meinga hei pā tapu mā te Ariki; ā, ka hangaia ake mō te whare o Iharaira—

6 Ā, ka hangaia ake tētahi Hiruharama Hou ki runga i tēnei whenua, mō ngā mōrehu o ngā uri o Hōhepa, nā te mea kua waiho iho tētahi ritenga mō aua mea.

7 Nā, e pērā ana i tā Hōhepa hari iho i tōna matua ki roto i te whenua o Ihipa, waihoki ka mate ia ki reira; nā reira, i haria atu e te Ariki ētahi mōrehu o ngā uri o Hōhepa ki waho i te whenua o Hiruharama, kia atawhai ia ki ngā mōrehu o ngā uri o Hōhepa kei ngaro rātou, e rite ana ki tana atawhai ki te matua o Hōhepa kei ngaro ia.

8 Nā reira, ka hangaia ake ngā mōrehu o ngā uri o Hōhepa ki runga ki tēnei whenua; ā, ka meinga hei whenua tuku iho mō rātou; ā, ka hangaia ake e rātou tētahi pā tapu ki te Ariki, e rite ana ki te Hiruharama tawhito; ā, e kore tonu rātou e whakapōauautia tonutia, tae noa atu ki te mutunga ina pahemo atu te ao.

9 Ā, ka ai he rangi hou me tētahi whenua hou; ā, ka rite ki ngā mea o mua engari kua pahemo atu ngā mea tawhito, ā, kua hou ngā mea katoa.

10 Kātahi ka puta mai te Hiruharama Hou; ā, ka manaakitia te hunga e noho ai i reira, nā te mea ko rātou te hunga e mā ana ō rātou kākahu mā roto i te toto o te Reme; ā, ko rātou te hunga e tatauria ngātahitia ana ki waenganui i ngā mōrehu o ngā uri o Hōhepa, ko rātou nei nō te whare o Iharaira.

11 Kātahi ka puta mai anō hoki te Hiruharama tawhito; me ō reira tāngata, kua manaakitia rātou, nā te mea kua horoia rātou i roto i ngā toto o te Reme; ā, ko rātou anō te hunga kua whakamararatia atu, ā, kua whakakaongia mai i ngā takiwā e whā o te ao, ā, mai i ngā whenua whakateraki, ā, ko rātou te hunga nō te tutukitanga o te kawenata i kawenata ai te Atua ki tō rātou tūpuna, a Aperahama.

12 Ā, ina puta mai ēnei mea, ka pahawa ake te karaipiture e mea ana, kei reira te hunga tōmua, e meinga ai hei mea tōmuri; ā, kei reira te hunga tōmuri, e meinga ai hei mea tōmua.

13 Ā, whano au ka tuhi atu anō, engari kua whakahaua au kia kaua; engari he nui whakamīharo ngā poropititanga a Ētere; engari i whakaarotia ia e rātou hei mea rukenga, ā, ka makaia ia ki waho; ā, ka hunaia ia e ia anō ki roto i te ana o tētahi toka i te awatea, ā, ka haere atu ia i te pō e tirohia ana ngā mea e tau ai ki runga i te iwi.

14 Ā, i whakaotia e ia te roanga atu o tēnei tuhinga i a ia e noho ana i roto i te ana o tētahi toka, e tirohia ana ngā whakangaromanga i tau ai ki runga i te iwi, i te pō.

15 Ā, i pahawa ake i taua tau anō i makaia atu ia i waenganui i te iwi, ka tīmata ake tētahi pakanga nui ki waenganui i te iwi, nā te mea he tokomaha te hunga i tū ake, he tangata mārohirohi rātou, ā, i whai ki te whakangaro i a Koriatuma i runga i ō rātou rautaki whakarihariha huna, kua kōrerotia ake nei.

16 Ināianei a Koriatuma, kua rangahau ia anō, i ngā whakahaere katoa o te pakanga me ngā tinihanga katoa o te ao, nā reira i whaiwhai atu ia ki te hunga i whai nei ki te whakangaro i a ia.

17 Engari kāore ia i rīpenetā, kāore rānei āna tama ātaahua me āna tamāhine ātaahua; kāore rānei ngā tama ātaahua me ngā tamāhine ātaahua a Kohoro; ā, hei whakarāpopoto, kāore i runga i te mata katoa o te whenua he tama ātaahua, he tamāhine ātaahua rānei i rīpenetā i ō rātou hara.

18 Nā reira i pahawa ake, nā, i te tau tuatahi i noho ai a Ētere i roto i te ana o tētahi toka, he tokomaha ngā tāngata i patua iho ai e te hoari o ngā whakakotahitanga huna, e whawhai atu ana ki a Koriatuma kia riro i a rātou te kīngitanga.

19 Ā, i pahawa ake, nā, ka whawhai nui ngā tama a Koriatuma, ā, i nui anō te hekenga o ō rātou toto.

20 Ā, i te tau tuarua ka puta mai te kupu a te Ariki ki a Ētere, kia haere atu ia ki te poropiti atu ki a Koriatuma, nā, ki te rīpenetā ia, me tōna whare katoa, ka tuku atu te Ariki i tōna kīngitanga ki a ia, ā, ka tohua anōtia te iwi—

21 Ki te kore ka whakangaromia rātou, me tōna whare katoa hāunga ko ia. Ā, ka ora noa iho ia kia kite atu i te tutukitanga o ngā poropititanga kua kōrerotia ake nei e pā ana ki te rironga atu i te whenua ki tētahi atu iwi hei whenua tuku iho mō rātou; ā, mā rātou a Koriatuma e tanu; ā, ka whakangaromia ngā wairua katoa hāunga a Koriatuma.

22 Ā, i pahawa ake, nā, kāore a Koriatuma i rīpenetā, kīhai rānei tōna whare, kīhai rānei te iwi; ā, kīhai i mutu ngā pakanga; ā, ka whai rātou ki te whakamate i a Ētere, engari ka tahuti atu anō ia i tō rātou aroaro, ā, ka huna anō ki roto i te ana o te toka.

23 Ā, i pahawa ake, nā, ka tū ake a Harere, ā, ka whawhai atu anō ia ki a Koriatuma; ā, ka taea ia e ia, nā konā ka whakaraua atu ia i te tau tuatoru.

24 Ā, ka taea a Harere e ngā tama a Koriatuma, i te tau tuawhā, ā, ka whakahokia anōtia te kīngitanga ki tō rātou matua.

25 Nā. ka tīmata ake tētahi pakanga i runga i te mata o te whenua, tēnā tangata me tōna ope, tēnā tangata me tōna ope e whawhai ana mō tāna i hiahia ai.

26 Ā, i reira hoki ngā kaipāhua, hei whakarāpopoto, kei runga i te mata katoa o te whenua ngā tūmomo whakarihariha katoa.

27 Ā, i pahawa ake, nā, i te tino pukuriri rawa a Koriatuma ki a Harere, ā, ka haere atu ia ki a ia me āna tauā ki te pakanga; ā, ka tūtaki tahi rātou i runga i te riri nui, ā, ka tūtaki rātou i te raorao o Kirikara; ā, ka tino nanakia haere te pakanga.

28 Ā, i pahawa ake, nā, ka whawhai atu a Harere ki a ia mō te takiwā o ngā rā e toru. Ā, i pahawa ake, nā, ka taea ia e Koriatuma, ā, ka arumia ia kia tae atu ki ngā mānia o Heherono.

29 Ā, i pahawa ake, nā, ka whawhai atu a Harere ki a ia i runga i ngā mānia; ā nana, ka taea ia e Koriatuma, ā, ka āia atu ia ki roto i te raorao o Kirikara.

30 Ā, ka whawhai atu anō a Koriatuma ki a Harere i te raorao o Kirikara, ā, taea ana e ia a Harere, ā, ka patua ia.

31 Ā, ka taotū a Koriatuma i a Harere ki tōna kūhā, nā konā kāore ia i haere atu anō ki te whawhai mō te takiwā o ngā tau e rua, i taua wā e whakaheke toto ana ngā tāngata katoa i runga i te mata o te whenua, ā, kāore i reira tētahi hei pēhi i a rātou.