1 Ā, i pahawa ake, nā, ka haere iho a Iarere rātou ko tana teina, me ō rāua whānau, me ngā hoa anō hoki o Iarere rāua ko tana teina me ō rātou whānau, ki roto i te raorao whakateraki, (ā, ko Nimirota te ingoa o te raorao, he mea huaina mō te kaiaru kararehe kaha) me ā rātou kāhui i whakawhāitihia nei e rātou, toa mai, uwha mai, o ia āhua, o ia āhua.

2 Ā, ka whakatakoto anō rātou i ngā māhanga, ā, ka hopu i ngā manu o te rangi; ā, ka whakarite anō rātou i tētahi oko, i mau ai i a rātou ngā ika nō ngā wai.

3 Ā, ka mau mai anō i a rātou he tehoreta, koia, ko tōna whakamāoritanga, he pī mīere; ā, pēnei tā rātou kawe mai i a rātou ngā heke pī, me ngā āhua katoa o ngā mea i runga i te mata o te whenua, ngā purapura o ia āhua katoa.

4 Ā, i pahawa ake, nā, i te wā i heke iho ai rātou ki roto i te raorao o Nimirota ka heke iho te Ariki ki raro, ā, ka kōrero tahi me te teina a Iarere; ā, kei roto ia i tētahi kapua, ā, kāore te teina a Iarere i kite atu i a ia.

5 Ā, i pahawa ake, nā, ka whakahau te Ariki i a rātou kia haere atu rātou ki roto i te koraha, āe rā, ki roto ki taua takiwā kāore anō kia tae atu te tangata i reira. Ā, i pahawa ake, nā, ka haere atu te Ariki i mua i a rātou, ā, ka kōrero tahi me rātou i a ia e tū ana i tētahi kapua, ā, ka tuku tohutohu ko hea haere ai rātou.

6 Ā, i pahawa ake, nā, ka haere rātou i roto i te koraha, ā, ka waihanga kaipuke, nā konā whakawhiti atu rātou i ngā wai maha, e tohua tonutia ana e te ringa o te Ariki.

7 Ā, kāore te Ariki i tuku kia noho rātou i tua atu i te moana i te koraha, engari i hiahia ia kia haere mai ai rātou tae noa ki te whenua i whakaaria, he mea pai ake i ērā atu whenua katoa, kua tiakina mai nei e te Ariki te Atua mō tētahi iwi tika.

8 Ā, i oati anō hoki ia i runga i tōna riri ki te teina o Iarere, nā, me mahi te tangata e noho mai nei i tēnei whenua i whakaaria, atu i taua wā haere ake nei, ā, mō āke tonu atu, ki te Atua kotahi, ka tahia atu rātou rānei ina puta mai te raneatanga o tōna riri ki runga i a rātou.

9 Ināianei ā, ka taea e tātou te kite i ngā tikanga whakatakoto a te Atua e pā ana ki tēnei whenua, nā, he whenua tēnei nā te kupu whakaari; ka mahi te iwi e nōhia ai taua whenua ki te Atua, ka tahia atu rātou rānei ina puta mai te raneatanga o tōna riri ki runga i a rātou. Ā, ka puta mai te raneatanga o tōna riri ki runga i a rātou ina pakari tō rātou kino.

10 Nana rā, he whenua tēnei e pai ake ana i ērā atu whenua katoa; nā reira me mahi te tangata e nōhia nei te whenua ki te Atua, ka tahia atu rānei; nā te mea koinā te tikanga takoto mutunga kore a te Atua. Ā, kāore rātou e tahia atu kia puta mai te raneatanga o te kino i waenganui i ngā tamariki o te whenua.

11 Ā, ka puta mai tēnei ki a koutou, E koutou e ngā Tauiwi, kia mōhio ai koutou ki ngā tikanga whakatakoto a te Atua—kia rīpenetā ai koutou, ā, kei kore koutou e haere tonu atu i runga i ō koutou kino kia puta rā anō mai te raneatanga, kei kore koutou e tō iho mai i te raneatanga o te riri o te Atua ki runga i a koutou pēnā i ngā tāngata whenua i mea ai i mua.

12 Nana, he whenua taurikura tēnei, ka herekore te iwi e nōhia nei e rātou tēnei whenua i te hereheretanga, me te mauheretanga, mai i ngā iwi katoa i raro i te rangi, ki te mahi noa rātou ki te Atua o te whenua, ko Ihu Karaiti ia, kua whakakitea mai nei e ngā mea kua tuhia mai nei e mātou.

13 Ināianei ā, ka haere tonu taku tuhituhinga; nana rā, i pahawa ake, nā, i kawe mai nei te Ariki i a Iarere rāua ko tana teina ki te moana nui pū anō e whakawehewehe nei i ngā whenua. Ā, ka whakatūria ō rātou tēneti i tā rātou taenga atu ki te moana; ā, ka karangatia ake e rātou te wāhi rā ko Morianakumere; ā, ka noho tēneti rātou, ā, ka noho tēneti rātou i te takutai moana mō te takiwā o ngā tau e whā.

14 Ā, i pahawa ake i te mutunga o ngā tau e whā, nā, ka haere mai anō te Ariki ki te teina o Iarere, ā, ka tū i tētahi kapua, ā, ka kōrero tahi me ia. Ā, ka kōrero tahi te Ariki ki te teina a Iarere mō te takiwā o ngā hāora e toru, ā, ka kohetehia ia nā te mea kīhai ia i mahara ki te karanga ake ki te ingoa o te Ariki.

15 Ā, ka rīpenetā te teina a Iarere mō te kino i mea ai ia, ā, ka karanga ake ki te ingoa o te Ariki mō ana teina i tōna taha. Ā, ka kī atu te Ariki ki a ia: ka muru au i a koutou ko ō teina i ō koutou hara; engari kaua koutou e hara tonu anō, nā te mea ka mahara koutou e kore taku Wairua e totohe tonu ki te tangata; nā reira, ki te hara koutou kia pakari rawa koutou ka hātepea atu koutou i te aroaro o te Ariki. Ā, koinei ōku whakaaro mō te whenua e hoatu nei e au ki a koutou hei whenua tuku iho mō koutou; nā te mea ka meinga hoki tērā hei whenua e pai ake ana i ērā atu whenua katoa.

16 Ā, ka kī ake te Ariki: Me haere ki te mahi, ā, hangaia, i runga i te ritenga o ngā kaipuke kua hangaia i mua. Ā, i pahawa ake, nā, ka haere te teina a Iarere ki te mahi, me ana teina anō hoki, ā, ka waihanga kaipuke i runga i te ritenga o ngā mea i hangaia ai e rātou i mua, e rite ana ki ngā tohutohu a te Ariki. Ā, he mea iti ērā, ā, he mea māmā i runga i te wai, e rite tonu ana ki te māmātanga o tētahi manu i runga i te wai.

17 Ā, i hangaia ērā mea i runga i tētahi ritenga e piri kaha nei ērā, kua taea te mau ki te wai e rite tonu ana ki tētahi ipu; ā, he rite tonu tō reira taha whakararo ki tētahi ipu; ā, he piri kaha tō reira taha whakararo; ā, he piri kaha anō tō reira tahataha e rite ana ki tētahi ipu; ā, he mea koikoi ngā pito; ā, he piri kaha anō tō reira taha whakarunga kia rite tonu ki tētahi ipu; ā, ko tō reira roa he rite tonu ki te roa o tētahi rākau; ā, ko tō reira tatau, i te wā kua katia, he piri kaha kia rite tonu ki tētahi ipu.

18 Ā, i pahawa ake, nā, ka karanga ake te teina a Iarere ki te Ariki, e mea ana: E te Atua, kua meatia e au ngā mahi nāu anō i whakahau mai ki ahau, ā, kua hangaia ngā kaipuke kia rite ki tāu i tohutohu mai nei.

19 Ā nana, E te Ariki, kāore he māramatanga kei roto i aua mea; me urungi atu mātou ki hea? Waihoki ka mate mātou, nā te mea kāore e taea te ngā, hāunga ko te hau kei roto rā; nō reira ka mate mātou.

20 Ā, ka kī atu te Ariki ki te teina a Iarere: Nana, māu e hanga tētahi koroputa i te taha whakarunga, me te taha whakararo anō hoki; ā, ina mate koutou i te haukore ka whakatūwhera i te koroputa, ā, ka whaihau. Ā, ki te rere iho mai te wai ki runga i a koutou, nana, ka katia te koroputa, kia kore koutou e mate i te waipuke.

21 Ā, i pahawa ake, nā, ka meatia e te teina a Iarere, e rite ana ki tā te Ariki i whakahau ai.

22 Ā, ka karanga ake anō ia ki te Ariki e mea ana: E te Ariki, nana kua mea au i tāu i whakahau mai ki ahau; ā, kua whakarite au i ngā kaipuke mō tōku iwi, ā nana kāore he tūramatanga kei roto rā. Nana, E te Ariki, māu rā e tuku kia whakawhiti atu mātou i te wai nui i roto i te pōuritanga?

23 Ā, ka kī atu te Ariki ki te teina a Iarere: He aha tāu e pai ai hei meatanga māku kia whai māramatanga i roto i ō koutou kaipuke? Nana rā, kāore e āhei ana i a koutou te whai matapihi, nā te mea ka pākarukaru hoki ēnā; kāore rānei koutou e hari ahi atu, nā te mea e kore koutou e haere atu i runga i te māramatanga o te ahi.

24 Nana rā, ka rite koutou ki tētahi tohorā i roto i te moana; nā te mea ka akiaki ngā ngaru maunga ki runga i a koutou. Hei aha koa, māku koutou e whakaputa ake anō i ngā hōhonutanga o te moana; nā te mea kua rere atu ngā hau i tōku māngai, ā, nāku anō ngā ua me ngā waipuke i tuku atu.

25 Ā nana, ka whakarite au i a koutou mō ēnei mea; nā te mea e kore nei e āhei i a koutou te whakawhiti atu i tēnei hōhonutanga nui ki te kore au e whakarite i a koutou mō ngā ngaru o te moana, ā, ko ngā hau kua rere atu, me ngā waipuke e puta mai ai. Nō reira he aha tāu e pai ai hei whakaritenga māku kia whai māramatanga ina horomia ake koutou i ngā hōhonutanga o te moana?