1 Ināianei ahau, a Moronai, kua tuhia ngā kupu kua whakahaua nei ahau, e rite ana ki tōku mahara; ā, kua kōrerohia atu e au ki a koutou ngā mea kua hīria ake e au; nō reira kaua e whakapā atu ki ērā mea kia whakamāoritia ai e koutou; nā te mea kua whakahaua koutou kia kaua, engari taihoa ake ka pērātia e te mātauranga o te Atua.

2 Ā nana, tērā pea ka tukua koutou kia whakakite atu i ngā papa ki te hunga e āwhina ai ki te whakaputa i tēnei mahi;

3 Ā, ka whakakitea atu ki tētahi tokotoru e te mana o te Atua; nā reira ka tino mōhio rawa atu rātou he pono ēnei mea.

4 Ā, mā te māngai o ngā kaiwhakaatu tokotoru e whakapūmautia ai ēnei mea; ā, ko te whakaaturanga o te tokotoru, me tēnei mahi, i konā whakakitea atu ai te mana o te Atua me tana kupu anō hoki, e whakaaturia mai nei e te Matua, e te Tama, e te Wairua Tapu anō hoki—ā, ka tū atu ēnei mea katoa hei kaiwhakaatu ki te ao hei te rā whakamutunga.

5 Ā, ki te rīpenetā rātou me te haere mai ki te Matua i runga i te ingoa o Ihu, ka whakawhiwhia rātou ki roto ki te kīngitanga o te Atua.

6 Ināianei ā, mehemea kāore aku mana i runga i ēnei mea, whakawākia e koutou; nā te mea ka mōhio koutou kei ahau te mana ina kite koutou i ahau, ā, ka tū atu tātou i te aroaro o te Atua hei te rā whakamutunga. Āmine.