Ko te Pukapuka a Moromona

1 Ināianei ahau, a Moromona, e tuhituhi nei i tētahi tuhinga mō ngā mea kua kitea, kua rangona e ahau, ā, ka karangatia nei ko te Pukapuka a Moromona.

2 Ā, e tata ana ki te wā i huna ake ai a Amarona i ngā tuhinga ki te Ariki, ka haere mai ia ki ahau, (e tata ana ki te tekau ōku tau, ā, ka āhua mātau haere au i runga i te ritenga o te mātauranga o tōku iwi) ā, ka kī mai a Amarona ki ahau: E kite nei au he tamaiti whaiwhakaaro koe, e kakama ana ki te tirotiro;

3 Nō reira, ina tata rua tekau mā whā ōu tau e hiahia ana au kia mahara ki ngā mea kua kite nei e pā ana ki tēnei iwi; ā, ina eke koe ki tērā pakeke me haere koe ki te whenua o Anatumu, ki tētahi puke e karangatia nei ko Himi; ā, i reira hoki i whakatakotoria ake ki te Ariki ngā whaowhaonga tapu e pā ana ki tēnei iwi.

4 Ā nana, ka mau koe ki ngā papa a Nīwhai ki a koe anō, ā, ka waiho ake te toenga i reira kia noho tonu ana; ā, ka whaowhao koe i runga i ngā papa a Nīwhai i ngā mea katoa kua kitea nei e koe e pā ana ki tēnei iwi.

5 Ā, he uri ahau, a Moromona o Nīwhai, (ā, ko Moromona te ingoa o tōku matua) i mahara ahau ki ngā mea i whakahaua ahau e Amarona.

6 Ā, i pahawa ake, ko au, kua tekau mā tahi ōku tau, i kawea atu e tōku matua ki roto i te whenua whakatetonga, ki te whenua pū anō o Harahemara.

7 Kua kapi te mata katoa o te whenua i ngā whare, ā, whano kua rite te tokomaha o te iwi ki te onepū o te moana.

8 Ā, i pahawa ake i tēnei tau anga ake ai tētahi pakanga i waenganui i ngā Nīwhai, ko rātou nei ngā Nīwhai me ngā Hākopa me ngā Hōhepa me ngā Hōrama; ā, i waenganui tēnei pakanga i ngā Nīwhai me ngā Rāmana me ngā Remuere me ngā Ihimaera.

9 Nā, i karangatia ngā Rāmana me ngā Remuere me ngā Ihimaera he Rāmana, ā, ko ngā Nīwhai me ngā Rāmana ngā rōpū e rua.

10 Ā, i pahawa ake, nā, ka tīmata te pakanga ki waenganui i a rātou i roto i ngā rohe o Harahemara, i te taha o ngā wai o Hairona.

11 Ā, i pahawa ake, nā, kua whakakotahitia mai nei e ngā Nīwhai ngā tāngata tokomaha rawa, kua eke ake i te toru tekau mano. Ā, i pahawa ake, nā, i tū ētahi whawhai i taua tau anō, nā konā patua e ngā Nīwhai ngā Rāmana i te nuinga o ēnā whawhai.

12 Ā, i pahawa ake, nā, ka whakarērea e ngā Rāmana tā rātou rautaki, ā, kua tau te rangimārie i runga i te whenua; ā, ka mau te rongo mō te takiwā o ngā tau e whā, nā, kāore he whakahekenga toto.

13 Engari ka kake te whakarihariha i runga i te mata katoa o te whenua, nā konā kahakina atu e te Ariki āna apōtoro aroha, ā, ka mutu ngā mahi merekara me ngā mahi mahu nā te kino o te iwi.

14 Ā, kāore he homaitanga i te Ariki, ā, kāore te Wairua Tapu i tau iho ki runga i tētahi, nā tō rātou whakarihariha me tō rātou whakaponokore.

15 Ā, i te mea kua tekau mā rima ōku tau, ā, kua āhua whaiwhakaaro au, nō reira au i torona mai e te Ariki, ā, kua rangona, ā, kua mōhio ki te painga o Ihu.

16 Ā, i ngana au ki te kauhau atu ki tēnei iwi, engari kua kopia tōku māngai, ā, kua whakahaua au kia kaua e kauhau atu ki a rātou; nana rā kua tino haututū mārire atu rātou ki tō rātou Atua; ā, kua kahakina atu ngā āpōtoro aroha i te whenua, nā tō rātou whakarihariha.

17 Engari i noho tonu au ki waenganui i a rātou, engari i whakahaua au kia kaua e kauhau atu ki a rātou, nā te pakeketanga o ō rātou ngākau; ā, nā te pakeketanga o ō rātou ngākau i kangaia ai te whenua mō rātou te take.

18 Ā, ka muia te whenua e ēnei kaipāhua o Karianato, kei waenganui nei i ngā Rāmana, nā konā tīmata ai ngā tāngata whenua o reira ki te huna ake i ā rātou taonga i te whenua; ā, ka meinga ēnā mea hei mea pāhekeheke, nā te mea kua kangaia te whenua e te Ariki, kia kore ai e taea e rātou ēnā mea te pupuri, te whakahoki anō rānei.

19 Ā, i pahawa ake, nā, he mahi makutu, he whaiwhaiā, he mangamangaiatua; ā, kua meatia te kaha o te mea kino ki runga i te mata katoa o te whenua, tae atu ana ki te whakatutukitanga i ngā kupu katoa a Apinari, a Hamuera te Rāmana anō hoki.