1 Ā, i pahawa ake i te pito whakamutunga o te tau ngahuru mā waru kua whakaritea aua tauā kaipāhua mō te pakanga, ā, ka tīmata tā rātou heke iho kia putaputa mai i ngā puke, ā, i ngā maunga, ā, i te koraha, ā, i ō rātou pā kaha, ā, i ō rātou wāhi huna, ā, ka tīmata tā rātou whakanohonoho i ngā whenua, ngā mea i te whenua ki te tonga me ngā mea i te whenua ki te raki, ā, ka tīmata tā rātou whakanohonoho i ngā whenua katoa i mahue iho ai i ngā Nīwhai, me ngā pā kua mahue kia takoto kau ana.

2 Engari nana, kāore he kararehe mohoao, he mea rānei hei patunga i aua whenua kua mahue iho i ngā Nīwhai, ā, kāore he patunga mā ngā kaipāhua hāunga kei te koraha anake.

3 Ā, kāore he oranga mō ngā kaipāhua atu i te koraha, nā te kore kai; nā te mea kua mahue i ngā Nīwhai te whenua kia takoto kau noa ana, ā, kua whakakotahitia e rātou ā rātou kāhui o ia tū, o ia tū me ā rātou rawa katoa, ā, kei te wāhi kotahi ērā.

4 Nō reira, kāore he huarahi pāhua mō ngā kaipāhua e whiwhi kai ai rātou, hāunga ko te haere ake ki te whawhai kanohi ki te kanohi ki ngā Nīwhai; ā, i te mea i te noho tōpū ngā Nīwhai, ā, he nui hoki tō rātou tokomahatanga, ā, kua rāhuitia he ō mō rātou anō, me ngā hōiho me ngā kau, me ngā kāhui o ia tū, o ia tū, kia ora ai rātou mō ngā tau e whitu, i runga i te manako ka whakangaro rātou i ngā kaipāhua i te mata o te whenua i taua wā; ā pēnei pahemo atu ai te tau ngahuru mā waru.

5 Ā, i pahawa ake i te tau ngahuru mā iwa ka kite a Kirianahi e tika ana kia whakaeke atu ai rātou ki te whawhai ki ngā Nīwhai, nā te mea kāore he huarahi e ora tonu ai rātou hāunga ko te pāhua me te whānako me te kōhuru.

6 Ā, kāore rātou i māia kia whakawhānui atu tā rātou noho i runga i te mata o te whenua e āhei ai rātou ki te whakatupu kākano, kei whakaeke ai ngā Nīwhai ki runga i a rātou me te whakamate i a rātou; nō reira ka tukuna atu e Kirianahi te whakahau kia haere ake rātou i tēnei tau ki te whawhai ki ngā Nīwhai.

7 Ā, i pahawa ake, nā, i haere ake rātou ki te whawhai; ā, i te marama tuaono; ā nana, he nui whakawehi te rā i haere mai ai rātou ki te whawhai; ā, i te kākahutia rātou i runga i te ritenga o ngā kaipāhua; ā, he kiri-reme tō rātou whītiki i ō rātou hope, ā, i pania hoki rātou ki te toto, ā, kua heua ō rātou māhunga, ā, he ārai māhunga kei runga rā; ā, he nui, ā, he weriweri hoki te āhua o ngā tauā a Kirianahi, nā ō rātou kākahu whawhai, me tā rātou paninga ki te toto.

8 Ā, i pahawa ake i te kitenga o ngā Nīwhai i te āhua o te tauā a Kirianahi, kua hinga iho rātou katoa ki te whenua, ā, ka hikina ake ā rātou karanga ki te Ariki tō rātou Atua, kia tohu ia i a rātou, ā, kia whakaputaina rātou e ia i ngā ringaringa o ō rātou hoariri.

9 Ā, i pahawa ake, nā, i te kitenga o ngā tauā a Kirianahi i tēnei ka tīmata tā rātou hāmama i runga i te reo kaha, nā tō rātou hari, nā te mea i whakaaro rātou kua hinga iho ngā Nīwhai i te mataku nā te weriweri o ō rātou tauā.

10 Engari i nanu rātou i tēnei mea, nā te mea kāore i mataku ngā Nīwhai i a rātou; engari i wehi rātou ki tō rātou Atua, ā, i inoi ngākau iti ake ki tō rātou Atua mō tana tiakanga; nō reira, i te whakaekenga atu o ngā tauā a Kirianahi ki a rātou kua rite rātou ki te tūtaki ki a rātou; āe rā, ka whiwhi rātou i a rātou i runga i te kaha o te Ariki.

11 Ā, ka tīmata te pakanga i tēnei te marama tuaono; ā, he nui, ā, he weriweri tō reira pakanga, āe rā, he nui, ā, he weriweri tō reira parekura, nā konā kāore i mōhiotia atu he parekura pēnei te nanakia i waenganui i te iwi katoa o Rīhai mai i te wā i wehe atu a Rīhai i Hiruharama.

12 Ā, ahakoa ngā kupu whakawetiweti me ngā oati kua meatia nei e Kirianahi, nana, ka hinga rātou i ngā Nīwhai, nā konā whati atu rātou i mua i tō rātou aroaro.

13 Ā, i pahawa ake, nā, ka whakahau atu a Kikironi i āna tauā kia arumia rātou tae noa atu ki ngā rohe o te koraha, tae atu ana ki tā rātou whakatutuki i te whakahau a Kikironi.

14 Ā, i pahawa ake, nā, ka arumia a Kirianahi, nāna nei i whaiwhai i runga i te māia, ā, ka whakamatea i a ia e tahuti atu ana; ā, i te ngenge ia nā te nui o tana whawhai, nā, ka hopukina, ā, ka whakamatea. Ā pēnei te whakamutunga o te kaipāhua a Kirianahi.

15 Ā, i pahawa ake, nā, ka hoki atu anō ngā tauā Nīwhai ki tō rātou wāhi kaha. Ā, i pahawa ake ka pahemo atu tēnei tau ngahuru mā iwa, ā, kāore ngā kaipāhua i haere mai anō ki te whawhai; kāore rānei i haere mai anō i te tau rua ngahuru.

16 Ā, ka whakaeke mai anō rātou i te tau rua ngahuru ki te whawhai, engari i haere mai ai rātou i ngā taha katoa hei whakaeke āwhio noa ana i te iwi o Nīwhai; nā te mea i whakaaro rātou mēnā ka taea e rātou te hātepe atu i ngā Nīwhai mai i ō rātou whenua, me te pākaka i a rātou i ngā taha katoa, ā, mēnā ka taea e rātou te hātepe atu i a rātou i ō rātou tikanga katoa, ka meinga rātou e rātou kia tuohu iho i a rātou anō e rite ana ki ō rātou hiahia.

17 Nā, i whakatūria e rātou tētahi atu kaiārahi mō rātou, ko Temariha tōna ingoa; nō reira ko Temariha te tangata nāna nei i mea kia tū ai tēnei whakaekenga.

18 Engari nana, he painga tēnei ki ngā Nīwhai; nā te mea e kore nei e taea e ngā kaipāhua kia roahia rawatia te whawhai atu ki ngā Nīwhai, nā te nui o ō rātou ō kua whakapātakahia nei e rātou,

19 Ā, nā te iti o ngā ō i waenganui i ngā kaipāhua; nana rā, kāore ā rātou kai hāunga ko te kikokiko hei kai mā rātou, i hopukina ērā kikokiko i te koraha;

20 Ā, i pahawa ake, nā, ka iti haere ngā patunga i te koraha nā konā whano tata ka mate ngā kaipāhua i te matekai.

21 Ā, hono tonu ana te haere atu a ngā Nīwhai i te ao, i te pō, e taka iho ana ki runga i ō rātou tauā, ā, e haua iho ana rātou i ngā mano tini me ngā mano rau.

22 Ā pēnei ka hiahia anō te iwi o Temariha kia whakarērea tā rātou mahere, nā te nui o te whakangaromanga i tau ai ki runga i a rātou i te pō, ā, i te ao.

23 Ā, i pahawa ake, nā, ka tuku whakahau a Temariha ki tana iwi kia hoki atu rātou i te whawhai, me te hīkoi atu ki roto i ngā wāhi tawhiti rawa atu o te whenua whakateraki.

24 Ināianei ā, kua mōhio a Kikironi ki tā rātou mahere, ā, kua mōhio anō ia ki tō rātou ngoikoretanga nā te hiakai, me te parekura nui kei waenganui i a rātou, nō reira ia tono atu ai i ana tauā i te pō, ā, ka aukati atu i te huarahi e tahuti atu ai rātou, ā, ka whakatūria āna tauā i runga i tō rātou huarahi e tahuti atu ai rātou.

25 Ā, ka pēnei rātou i te pō, ā, ka tīmata atu tā rātou hīkoi i mua noa atu i ngā kaipāhua, nā konā ao ake te rā, i te wā i tīmata ngā kaipāhua i tā rātou hīkoi, kua tūtakina rātou e ngā tauā o ngā Nīwhai a mua, a muri anō hoki.

26 Ā, kua hātepea atu anō hoki ngā kaipāhua i te tonga i ō rātou wāhi haumaru. Ā, kua meatia ēnei mea katoa i runga i te whakahau a Kikironi.

27 Ā, he tokomaha anō te hunga i riro atu i a rātou anō hei mauhere ki ngā Nīwhai, ā, kua whakamatea te toenga atu o rātou.

28 Ā, ka kahakina atu tō rātou kaiārahi, a Temariha, ā, kua tāronatia i runga i tētahi rākau, āe rā, i runga pū anō i te kauru o reira kia mate rawa ia. Ā, i te wā i tāronatia ia kia mate rawa ia ka hinga iho rātou i te rākau ki te whenua, ā, ka karanga ake rātou i runga i te reo kaha, e mea ana:

29 Mā te Ariki e tiaki tana iwi i roto i te tika me te tapu o te ngākau, kia mea ai kia hinga ki te whenua i a rātou te hunga katoa e whai ai ki te whakamate i a rātou nā te mana me ngā whakakotahitanga huna, pēnei i tēnei tangata kua hinga nei ki te whenua.

30 Ā, ka hari rātou, ā, ka karanga ake i runga i te reo kotahi, e mea ana: Mā te Atua o Aperahama, me te Atua o Ihaka, me te Atua o Hākopa, e tiaki nei i tana iwi i roto i te tika, i ngā wā katoa e karanga ake ai rātou ki te ingoa o tō rātou Atua mō tana tiakanga.

31 Ā, i pahawa ake, nā, kotahi tonu tā rātou puakanga ake ki te waiata, me te whakamoemiti ki tō rātou Atua mō te mea nui kua mahia nei e ia mō rātou, i te tiakanga i a rātou kei taka iho ki roto i ngā ringaringa o ō rātou hoariri.

32 Āe rā, ka karanga ake rātou: Ohana ki te Atua Runga Rawa. Ā, ka karanga ake rātou: Kia whakapaingia te ingoa o te Ariki te Atua Kaha Rawa, te Atua Runga Rawa.

33 Ā, ka pupuhi ō rātou ngākau i te hari, tae noa atu ki te maringitanga iho o ngā roimata maha, nā te painga nui o te Atua i tana whakaputanga ake i a rātou i ngā ringaringa o ō rātou hoariri; ā, i mōhio rātou nā tō rātou rīpenetātanga me tō rātou whakaititanga i whakaputaina ai rātou i tētahi whakangaromanga rawatanga.