Karaipiture
3 Nīwhai 22


Upoko 22

Hei ngā rā whakamutunga, ka whakapūmauhia a Hīona me ōna pou, ā, ka whakahuihui mai a Iharaira i runga i te aroha me te atawhai—Ka toa rātou—Whakatauritetia a Ihāia 54. Takiwā T.A. 34.

1 Kātahi ka pahawa ake ērā mea kua tuhia: Waiatatia, E te pakoko, te mea kīhai i whakawhānau; whatia iho mai ki te waiatatanga, ā, karangahia nuitia, te mea kāore i mamae i te whakawhānautanga; nā te mea he tini ake ngā tamariki a te mea whakarere i ngā tamariki a te mea whaihoa, e ai tā te Matua.

2 Whakarahi ake i te tūranga o tō tēneti, ā, tukua rātou kia kūtorongia ngā ārai o ōu nohoanga; kaua e kaiponuhia, whakaroahia āu taura kia ū ai ō pou;

3 Nā te mea ka whatia iho i te ringa matau me te taha mauī, ā, ka riro mai ngā Tauiwi i ōu uri, ā, ka nōhia ngā pā kua ururuatia.

4 Kaua e wehi, nā te mea e kore koe e whakamā; kaua rānei koe e numinumi, nā te mea e kore koe e whakamāhia; nā te mea ka wareware koe ki te whakamā o tō taiohinga, ā, e kore e maumahara ki te kino o tōu taiohinga, ā, e kore koe e maumahara ki te kino o tō pouarutanga.

5 Nā te mea ko tōu kaihanga, ko tō hoatāne, te Ariki o ngā Mano tōna ingoa; ā, ko tōu Kaihoko, te Mea Tapu o Iharaira—ka karangatia ia ko te Atua o te ao katoa.

6 Nā te mea kei te karangatia koe anō nei he wahine kua oti te whakarere, ā, kua pōuri hoki tōna wairua, ā, he hoawahine taiohi, i te wā i whakakorea koe, e ai tā te Atua.

7 He wā poto noa taku whakarere i a koe, engari ka whakahuihui ahau i a koe i runga i te aroha nui.

8 I huna au i tōku mata i a koe i runga i te riri iti mō te wā poto, engari ka whakaaroha au ki a koe i runga i te aroha mutunga kore, e ai tā te Ariki tō Kaihoko.

9 Mō tēnei, ngā wai o Noa ki ahau, nā te mea kua oati au kia kaua anō ngā wai o Noa e tau mai nei ki runga i te whenua, waihoki ka oati nei au kia kore ai au e riri ki a koe.

10 Nā te mea ka wehe atu ngā maunga, ā, ka tangohia atu ngā hiwi, engari e kore nei tōku aroha e wehe atu i a koe, e kore hoki e tangohia atu te kawenata o tōku rangimārie, e ai tā te Ariki e atawhai ana i a koe.

11 E koe te mea whakamamaetia, kua puhia nei e te hau kaha, kāore anō kia whakaāiotia! Nana, māku ō kōhatu e whakatakoto i ngā tae kānapa, me te whakatakoto i ōu tūāpapa ki te hāpira.

12 Ka hanga anō ahau i ō wini ki te akahati, me ō tatau ki te karapanaka, me ō rohe katoa ki te kōhatu whakapaipai.

13 Ā, ka whakaakona āu tamariki katoa e te Ariki; ā, ka nui te rangimārie ki āu tamariki.

14 Ka whakapūmauhia koe i runga i te tika; ka mamao atu koe i te tūkino, nā, e kore koe e wehi, me te pāwera nā te mea e kore nei e tata mai ki a koe.

15 Nana, kāore e kore ka whakakotahi atu rātou ki a koe, ehara i te mea nāku; ka hinga ngā tangata katoa e whakakotahi atu ki a koe mōu te take.

16 Nana, nāku te parakemete i hanga e pupuhi ana i ngā waro i roto i te ahi, ā, e kawea mai ana tētahi taputapu hei mahi māna; nāku anō te kaiwhakangaro i hanga hei whakangaro atu.

17 E kore tētahi patu e hanga ana mōu e whaikaha; ka whakahē koe i ngā arero katoa e taunu ai ki a koe i runga i te whakawā. Koinei tā ngā pononga a te Ariki, ā, nōku anō tō rātou tika, e ai tā te Ariki.