1 Ā, he pono tāku e mea atu nei ki a koutou, ka hoatu e au he tohu ki a koutou, kia mōhio ai koutou hei āhea te wā e tū ai ēnei mea—kia kohikohia mai e au, mai i tā rātou mararatanga roa, tōku iwi, E te whare o Iharaira, me te whakapūmau anō i tōku Hīona ki waenganui i a rātou.

2 Ā nana, anei te mea e hoatu nei e au ki a koutou hei tohu—nā te mea he pono tāku ki a koutou, nā, ina whakamōhiotia atu ēnei mea e whakapuaki atu nei au ki a koutou, ā, mōku ake anō ngā mea e whakapuaki atu nei au ki a koutou, me te mana o te Wairua Tapu e hoatu ai ki a koutou e te Matua, ka whakamōhiotia atu anō ki ngā Tauiwi e mōhio ai rātou e pā ana ki tēnei iwi, ko rātou nei he mōrehu nō te whare o Hākopa, ā, e pā ana anō hoki ki tēnei tōku iwi e whakamararatia atu ai e rātou;

3 He pono, he pono, tāku e mea atu nei ki a koutou, ina whakamōhiotia atu ēnei mea ki a rātou e te Matua, ā, mā te Matua ki a rātou, mā rātou ki a koutou;

4 Nā, he mātauranga nui nō te Matua kia whakapūmauhia rātou i tēnei whenua, ā, kia whakaritea hei iwi herekore i runga i te mana o te Matua, kia puta mai ai ēnei mea i a rātou ki ngā mōrehu o ōu uri, kia whakatutuki pai i te kawenata a te Matua nāna nei i kawenata ki tana iwi, E te whare o Iharaira;

5 Nō reira, ina puta mai ēnei mahi me ngā mahi e tau ai ki runga i a koutou a muri ake nei i ngā Tauiwi, ki ō koutou uri e memeha atu ai i te whakapono kore he mea nā tō rātou kino;

6 Nā, he tikanga hoki tēnei ki tā te Matua kia puta mai ai ēnei mea i ngā Tauiwi, kia whakakitea atu e ia tōna kaha ki ngā Tauiwi mō tēnei take, arā, ki te kore ngā Tauiwi e whakapakeke i ō rātou ngākau, kia taea ai e rātou te rīpenetā me te haere mai ki ahau, ā, kia rumakina i runga i tōku ingoa me te mōhio ki ngā tikanga tūturu o taku akoranga, kia tatauria ai rātou i waenganui i tōku iwi, E te whare o Iharaira;

7 Ā, ina pahawa ake ēnei mea e tīmata ai ōu uri ki te mōhio ki ēnei mea—ka tū ai hei tohu ki a rātou, kia mōhio ai rātou kua tīmata kē te mahi a te Matua ki te whakatutuki i te kawenata i kawenata ai ia ki te iwi ko rātou nei te whare o Iharaira.

8 Ā, ina tae mai taua rā, ka pahawa ake, nā, ka kopi ngā kīngi i ō rātou māngai; nā te mea ka kite rātou i ērā mea kīhai noa i kōrerotia ki a rātou; ā, ka whakaarohia e rātou ērā mea kīhai noa i rangona.

9 Nā, hei taua rā, ka mahi te Matua i tētahi mahi mōku te take, he mahi nui whakamīharo ki waenganui i a rātou; ā, ki waenganui i te hunga e kore nei e whakapono, ahakoa ka whakapuakina e tētahi tangata ki a rātou.

10 Engari nana, kei tōku ringa te oranga o taku pononga; nō reira e kore nei rātou e whakamamae i a ia, ahakoa ka hakokengia ia e rātou. Heoi māku ia e mahū, nā te mea ka whakakite atu au ki a rātou he nui ake tōku mātauranga i tō te rēwera tinihanga.

11 Nō reira ka pahawa ake, nā, ko ngā tāngata e kore nei e whakapono ki aku kupu, ko ahau nei a Ihu Karaiti, ko tērā e meinga ai e te Matua kia whakaputaina mai ai ki ngā Tauiwi, ā, ka hoatu mana ki a ia kia whakaputaina mai ai ki ngā Tauiwi, (ka meatia pērā i tā Mohi i kī ai) ka hātepea atu rātou i tōku iwi, nō te kawenata rātou.

12 Ā, ka noho i waenganui tōku iwi ko rātou nei he mōrehu o Hākopa ki waenganui i ngā Tauiwi, āe rā, kei waenganui i a rātou anō nei he raiona i waenganui i ngā kararehe o te ngahere, anō nei he kūao raiona i waenganui i ngā kāhui hipi, koia, ki te haere ia ki roto rā, ka takahia, ā, ka haehaea, ā, kāore e taea e tētahi te whakaora.

13 Ka hikina ake tō rātou ringa ki runga i ō rātou hoariri, ā, ka hātepea atu ō rātou hoariri katoa.

14 Āe rā, auē te mate mō ngā Tauiwi ki te kore rātou e rīpenetā; nā te mea ka pahawa ake i taua rā, e ai tā te Matua, ka hātepea atu e au ōu hōiho i tō aroaro, ā, māku ōu hāriata e whakangaro;

15 Ā, ka hātepea atu e au ngā pā o tōu whenua, ā, ka whiua iho ōu pākaha katoa;

16 Ā, ka hātepea atu e au ngā mākutu i roto i tōu whenua, ā, kua kore anō ō tohunga matakite;

17 Ka hātepea atu anō e au ō whakapakoko, me ō pou whakaahua i tōu aroaro, ā, e kore tonu atu koe e koropiko i ngā mahinga o ōu ringaringa;

18 Ā, ka hutia ake e au ō uru rākau i tōu aroaro; ka whakangaromia anōtia e au ō pā.

19 Ā, ka pahawa ake, nā, ka whakakorengia atu āu rūkahu, me āu tinihanga, me āu pūhaehae, me āu tautohetohenga, me āu mahi tohunga teka, me āu mahi pūremu,

20 Nā te mea ka pahawa ake, e ai tā te Matua, ko ngā tāngata e kore nei e rīpenetā me te haere mai ki taku Tama Aroha, ko rātou nei ngā mea e hātepea atu ai e au i tōku iwi, E te whare o Iharaira;

21 Ā, māku e rapu utu me te riri ki runga i a rātou, ka rite anō ki te mea i runga i ngā tangata mātauranga kore, he mea kīhai i rangona noatia e rātou i mua.

22 Engari ki te rīpenetā rātou me te whakarongo ki aku kupu, ā, ka kore hoki e whakapakeke i ō rātou ngākau, ka whakapūmau au i tōku hāhi ki waenganui i a rātou, ā, ka uru mai rātou ki te kawenata, ā, ka tatauria ki waenganui i tēnei ngā mōrehu o Hākopa, kua hoatu e au ki a rātou tēnei whenua hei mea tuku iho mō rātou;

23 Ā, ka āwhina rātou i tōku iwi, ngā mōrehu o Hākopa, ā, i te hunga katoa anō hoki nō te whare o Iharaira e haere mai ai, kia hangaia ake he pā, e karangatia nei ko te Hiruharama Hou.

24 Kātahi rātou ka āwhina i tōku iwi kia whakahuihui mai anō i a rātou, ko rātou nei ngā mea kua whakamararatia atu i runga i te mata katoa o te whenua, ki roto ki te Hiruharama Hou.

25 Kātahi ka heke iho te mana o te rangi ki runga i a rātou; ā, ko au anō hoki kei tō rātou aroaro.

26 Kātahi ka tīmata te mahi a te Matua i taua rā, ina kauhautia atu tēnei rongopai ki waenganui i ngā mōrehu o tēnei iwi. He pono tāku e mea atu nei ki a koutou, hei taua rā tīmata ai te mahi a te Matua ki waenganui i te hunga o tōku iwi katoa kua whakamararatia atu nei, āe rā, ki ngā hapū anō kua ngaro atu nei, kua ārahina atu nei e te Matua ki waho atu i Hiruharama.

27 Āe rā, ka tīmata te mahi ki waenganui i te hunga o tōku iwi katoa kua whakamararatia atu nei, mā te Matua te huarahi e whakarite mā konā haere mai ai rātou ki ahau, kia karanga ake rātou ki te Matua i runga i tōku ingoa.

28 Āe rā, kātahi ka tīmata te mahi a te Matua i roto i ngā iwi katoa e whakarite ana i te huarahi mā konā whakahuihui mai anō tōna iwi ki tō rātou whenua tuku iho.

29 Ā, ka haere atu rātou i ngā whenua katoa; ā, kua kore rātou e haere kaikā atu, kāore rānei e tūāoma, nā te mea ka haere ahau i mua i a rātou, e ai tā te Matua, ā, māku anō hei hiku mō rātou.