Upoko 29
He tohu te putanga mai o te Pukapuka a Moromona mō te tīmatanga o tā te Ariki whakakotahi mai i a Iharaira me te whakatutuki i Āna kawenata—Ka kangaia te hunga e whakaparahako i Āna whakakitenga i ngā rā o muri me Āna koha. Takiwā T.A. 34–35.
1 Ināianei ā nana, ko taku kupu tēnei ki a koutou, nā, ina kite ai te Matua i runga i tana whaimātauranga, nā, ka tau atu ēnei kōrero ki ngā Tauiwi e rite ana ki tana kupu, kātahi koutou ka mōhio kua tīmata kē te whakatutukitanga o te kawenata i kawenata ai te Matua ki ngā tamariki a Iharaira, e pā ana ki tō rātou whakahokinga ki ō rātou whenua tuku iho.
2 Ā, e taea ana e koutou te mōhio ka whakatutukihia ngā kupu a te Ariki, kua kōrerotia ake nei e ngā poropiti tapu; ā, ehara i te mea me kōrero atu koutou, nā, kei te whakaroa atu te Ariki i tana haerenga mai ki ngā tamariki a Iharaira.
3 Ā, ehara i te mea me whakaaro ake koutou i ō koutou ngākau he mea teka noa iho ngā kupu kua kōrerotia ake nei, nana rā, ka mahara te Ariki ki tana kawenata i kawenata ai ia ki tōna iwi o te whare o Iharaira.
4 Ā, ina kite ake koutou i ēnei kōrero e puta mai ana ki waenganui i a koutou, kātahi ka kore koutou e whaitikanga ana kia whakaparahako i ngā mahinga a te Ariki, nā te mea kei tōna ringa matau te hoari o tōna tika; ā nana, hei taua rā, ki te whakaparahako koutou ki ana mahinga ka meinga kia rokohanga wawetia koutou e ia.
5 Auē te mate mō te tangata e whakaparahako ana i ngā mahinga a te Ariki; āe rā, auē te mate mō te tangata e whakakore atu i te Karaiti me āna mahinga!
6 Āe rā, auē te mate mō te tangata e whakakore atu i ngā whakakitenga a te Ariki, me te kī ake kāore te Ariki e mahi tonu ana i runga i te tikanga whakakitenga, i te poropititanga rānei, i te koha rānei, i ngā reo rānei, i ngā whakaoranga rānei, i te mana rānei o te Wairua Tapu!
7 Āe rā, auē te mate mō te tangata e kī ake ai hei taua rā, kia rapu taonga, kāore e taea ana te merekara kotahi te mea e Ihu Karaiti; nā te mea ka meinga te tangata e mahi pēnei ana kia rite ki te tama o te whakangaromanga, kāore he aroha mōna, e ai ki te kupu a te Karaiti!
8 Āe rā, ehara i te mea me whakahī tonu, me whakaparahako rānei, me whakahāwea rānei i ngā Hūrai, i ētahi rānei o ngā mōrehu o te whare o Iharaira; nana rā, kei te mahara te Ariki i tana kawenata ki a rātou, ā, ka meatia e ia ki a rātou kia rite ki tērā mea kua oati nei ia.
9 Nō reira ehara i te mea me whakaaro ake koutou, nā, ka taea e koutou te whakatahuri atu i te ringa matau o te Ariki ki te ringa mauī, kia kore ai e whakamahi i tana whakawākanga ki te whakatutukitanga i te kawenata kua kawenatahia e ia ki te whare o Iharaira.