1 Ināianei ā i pahawa ake, nā, e ai ki tā mātou tuhinga, ā, e mōhio ana mātou he pono tā mātou tuhinga, nana rā, nā tētahi tangata tika tēnā i tuhi—nā te mea he maha ngā merekara i mahia ai e ia i runga i te ingoa o Ihu; ā, kāore i reira tētahi tangata e taea ana e ia te mahi merekara i runga i te ingoa o Ihu ki te kore ia e whakamākia katoatia i ōna hara—

2 Ināianei ā i pahawa ake, mehemea kāore i mahia tētahi hapa e tēnei tangata i te tatauranga o tō mātou wā, kua pahemo atu te tau toru ngahuru mā toru;

3 Ā, ka tīmata tā te iwi titiro atu i runga i te ngākau nui mō te tohu kua homai nei e Hamuera te poropiti, te Rāmana, āe rā, mō te wā e kore nei e tau mai te pōuritanga mō te takiwā o ngā rā e toru i runga i te mata o te whenua.

4 Ā, ka tīmata te rangirua nui me ngā tautohetohenga nui i waenganui i te iwi, ahakoa te nui o ngā tohu kua homai nei.

5 Ā, i pahawa ake i te tau toru ngahuru mā whā, i te marama tuatahi, i te rā tuawhā o te marama, ka ara ake tētahi marangai nunui, kīhai i mōhiotia tētahi mea pērā i te whenua katoa.

6 Ā, i reira tētahi tūpuhi nui whakawehi anō hoki; ā, i reira tētahi whatitiri whakamataku, nā konā ngāueue katoa te whenua me te mea nei whano ka weheruatia ki waenganui.

7 Ā, i puta anō ngā hikohikonga uira kokoi rawa, kīhai rawa i mōhiotia ngā mea pērā i te whenua katoa.

8 Ā, ka mura te pā o Harahemara.

9 Ā, ka paremo iho te pā o Moronai ki roto i ngā rire o te moana, ā, ka tōremi anō ō reira tāngata.

10 Ā, ka kahakina ake te onepū ki runga i te pā o Moronaihā, kia meinga ai i te wāhi i tū ai te pā tētahi maunga nunui.

11 Ā, ka ai anō tētahi whakangaromanga nui whakawehi i te whenua whakatetonga.

12 Engari nana, i reira tētahi whakangaromanga nui whakawehi ake i te whenua whakateraki; nana rā, kua panonitia te mata katoa o te whenua, nā te tūpuhi me ngā āwhiowhio, me ngā whatitiri me ngā hikohikonga uira, me ngā whakangāueuetanga nui rawa o te whenua katoa;

13 Ā, ka pākarukaru ake ngā huanui, ā, ka kikino haere ngā huarahi papatairite, ā, he maha ngā wāhi māeneene i meinga ai kia taratara.

14 Ā, ka paremo iho ngā pā nui maha, ā, he maha ngā mea i wera i te ahi, ā, he maha ngā mea i whakangāueuetia kia hingahinga iho ō reira whare ki te whenua, ā, ka whakamatea ō reira tāngata, ā, mahue ana kia takoto kau noa aua wāhi.

15 Ā, ka tū tonu ētahi pā; engari i nui rawa ōna aituātanga, ā, he tokomaha anō ngā mea i mate ai i roto rā.

16 Ā, ka kahakina atu ētahi e te āwhiowhio; ā, kāore te tangata e mōhio ana ki hea rātou haere ai, hāunga tā rātou mōhio kua kahakina atu rātou.

17 Ā pēnei ka rerekē te mata katoa o te whenua, nā ngā tūpuhi, me ngā whatitiri, me ngā hikonga uira, me te whakangāueuetanga o te whenua.

18 Ā nana, i wāwāhia ngā kōhatu ki waenganui; kua wāwāhia ake ki runga i te mata katoa o te whenua, nā konā kua kitea ērā mea kua kongakongatia, kua haehaea, ā, kua matata i runga i te mata o te whenua.

19 Ā, i pahawa ake, nā, i te mutunga ake o ngā whatitiri, me ngā hikonga uira, me te marangai, me te tūpuhi, me ngā whakangāueuetanga o te whenua—nana rā, ka haere tonu ērā mea mō te takiwā o ngā haora e toru; ā, kua kīa ake e ētahi kua roa ake te wā; hei aha koa, kua heipū ēnei mea katoa i te takiwā o ngā haora e toru—kātahi rā, nana, ka tau iho te pōuritanga ki runga i te mata katoa o te whenua.

20 Ā, i pahawa ake, nā, he pōuri kerekere i runga i te mata katoa o te whenua, nā konā ka rangona te kapua pōuri e ō reira tāngata kīhai nei i hinga iho;

21 Ā, kore rawa he māramatanga i reira, nā te pōuritanga, kāore rānei he kānara, kāore rānei he rama; kāore rānei i taea te tahu ahi ki ā rātou wāhie whakakā maroke rawa, nā, korekore rawa he māramatanga i reira;

22 Ā, kāore i kitea he maramatanga, he ahi rānei, he mura rānei, te rā rānei, te marama rānei, he whetū rānei, nā te nui o ngā kohu o te pōuritanga i runga i te mata o te whenua.

23 Ā, i pahawa ake, nā, i mau ai tēnā mō te takiwā o ngā rā e toru, nā, kāore i kitea he māramatanga; ā, he nui te uhunga, me te auē, me te tangi i waenganui tonu i te iwi; āe rā, he nui ngā auē o te iwi, nā te pōuritanga me te whakangaromanga nui i tau ai ki runga i a rātou.

24 Ā, ka rangona ake rātou i tētahi wāhi e karanga ana, e mea ana: Auē me i rīpenetā tātou i mua i tēnei rā nui whakawehi, kātahi ka tohua ō tātou huānga, ā, kua kore rātou i tahuna i taua pā nui o Harahemara.

25 Ā, ka rangona ake rātou i tētahi atu wāhi e karanga ana, ā, e tangi ana, e mea ana: Auē me i rīpenetā tātou i mua i tēnei rā nui whakawehi, me i kore hoki tā tātou whakamate me tā tātou āki i ngā poropiti ki te kōhatu, me tā tātou peinga atu i a rātou ki waho; kātahi ō tātou whaea me ā tātou tamāhine ātaahua, me ā tātou tamariki ka tohua, kua kore i tāpuketia ake i taua pā nui o Moronaihā. Ā pēnei he nui, ā, he whakawehi ngā auē o te iwi.