1 Ināianei ā i pahawa ake, nā, i te whakamutunga o Ihu i tana kōrerotanga i ēnei mea ka whiua reretia atu ōna karu huri noa ki runga i te whakaminenga, ā, ka kī atu ki a rātou: Nana, kua rangona e koutou ngā mea i whakaako ai au i mua i taku kakenga ake ki tōku Matua; nō reira, ko te tangata e maumahara ai ki ēnei kīanga āku me te mahi i ērā mea, māku ia e whakaara ake hei te rā whakamutunga.

2 Ā, i pahawa ake, nā, i te kōrerotanga ake a Ihu i ēnei kupu ka kite ake ia i reira ētahi i waenganui i a rātou e mīharo ana, ā, e whakaaro ana he aha tāna e pai ai e pā ana ki te ture a Mohi; nā te mea kīhai rātou i mārama ki te kīanga, arā, kua pahemo atu ngā mea tawhito, ā, kua hou ngā mea katoa.

3 Ā, ka kī ake ia ki a rātou: Kaua e mīharo i te mea nāku i kī atu kua pahemo atu ngā mea tawhito, ā, kua hou ngā mea katoa.

4 Nana, ko taku kupu tēnei ki a koutou, nā, kua whakatutukihia te ture i hoatu ai ki a Mohi.

5 Nana, ko ahau tērā nāna nei te ture i hoatu, ā, ko ahau anō tērā nāna nei i kawenata ki tōku iwi Iharaira; nō reira, kua tutuki te ture i roto nei i ahau, nā te mea kua haere mai au ki te whakatutuki i te ture, nō reira he mutunga tōna.

6 Nana, kāore au e whakangaro ana i ngā poropiti, nā te mea ko ngā mea kāore i tutuki i roto nei i ahau, he pono, tāku e mea atu nei ki a koutou, ka whakatutukihia katoatia.

7 Ā, nōku i mea atu ki a koutou, nā, kua pahemo atu ngā mea tawhito, kāore au e whakangaro ana i ērā mea kua kōrerotia nei e pā ana ki ngā mea e puta mai ai.

8 Nana rā, kāore anō kia whakatutukihia katoatia te kawenata nāku anō i mea ki tōku iwi; engari he mutunga tō te ture i hoatu nei ki a Mohi i roto nei i ahau.

9 Nana, ko au te ture, me te māramatanga. Titiro mai ki ahau, ā, kia ū ki te mutunga, kātahi koutou ka ora; nā te mea ka hoatu e au te oranga tonutanga ki te tangata e ū ai ki te mutunga.

10 Nana, kua hoatu nei e au ngā whakahaunga ki a koutou; nō reira puritia aku whakahaunga. Ā, koinei te ture me ngā poropiti, nā te me i pono tā rātou whakaaturanga mōku.

11 Ināianei ā i pahawa ake, nā, i te kōrerotanga a Ihu i ēnei kupu, ka kī atu ia ki aua tekau mā rua nāna nei i kōwhiri:

12 Ko koutou aku apataki; ā, he māramatanga koutou ki tēnei iwi, ko rātou nei ngā mōrehu o te whare o Hōhepa.

13 Ā nana, ko tō koutou whenua tuku iho tēnei; ā, nā te Matua tēnei i hoatu ki a koutou.

14 Ā, kāore anō te Matua kia whakahau mai ki ahau kia kī atu tērā ki ō koutou tuākana ki Hiruharama.

15 Kāore rānei te Matua i tētahi wā i homai whakahaunga ki ahau kia kōrero atu ai ki a rātou e pā ana ki ērā atu iwi nō te whare o Iharaira, nā te Matua i ārahi atu ki waho i te whenua.

16 Heoi anō tā te Matua i whakahau mai ki ahau, kia kī atu au ki a rātou:

17 He hipi anō āku ehara nei nō tēnei kāhui; me ārahi mai anō rātou e au, ā, ka rongo rātou i tōku reo; ā, ka kotahi te kāhui, ā, ka kotahi te hēpara.

18 Ināianei ā, kāore rātou i mārama ki taku kupu nā tō rātou kakī mārōtanga me tō rātou whakapono kore; nō reira i whakahaua au e te Matua kia kaua e kōrero atu anō e pā ana ki tēnei mea ki a rātou.

19 Engari, he pono, tāku e mea atu nei ki a koutou, nā, kua whakahaua au e te Matua, ā, kei te kōrero atu au i tēnā ki a koutou, nā, i whakawehea atu koutou i a rātou nā tō rātou whakarihariha; nō reira he kino nō rātou kāore nei rātou e mōhio ana e pā ana ki a koutou.

20 Ā, he pono, tāku e mea atu anō ki a koutou, nā, kua whakawehea atu ērā atu iwi i a rātou e te Matua; ā, he kino nō rātou kāore rātou e mōhio ana e pā ana ki a rātou.

21 Ā, he pono, tāku e mea atu nei ki a koutou, nā, ko koutou te hunga i kōrerotia ai e au: He hipi anō āku ehara nō tēnei kāhui; me ārahi mai anō rātou e au, ā, ka rongo rātou i tōku reo; ā, ka kotahi te kāhui, ā, ka kotahi te hēpara.

22 Ā, kāore rātou i mārama mai ki tāku, nā te mea i whakaaro rātou nā ngā Tauiwi; nā te mea kāore rātou i mārama, nā, ka whakatahuritia ngā Tauiwi i runga i te kauhautanga.

23 Ā, kāore rātou i mārama mai ki tāku, nā, i kī ake ai au, ka rongo rātou i tōku reo; ā, kāore rātou i mārama mai ki tāku i kī ai e kore rawa ngā tauiwi e rongo ai i tōku reo—e kore au e whakakite atu i ahau anō ki a rātou hāunga i runga i te Wairua Tapu.

24 Engari nana, kua rongo koutou i tōku reo, ā, kua kite hoki i ahau; ā, he hipi nāku koutou, ā, ka tatauria koutou i waenganui i te hunga i homai ai ki a au e te Matua.