1 Ā, i pahawa ake i pēnei te pahemotanga atu o te tau iwa ngahuru mā rima anō hoki, ā, ka tīmata tā te iwi wareware ki aua tohu me aua mea whakamīharo i rongo ai rātou, ā, ka iti haere, ka iti haere tō rātou whakamīharo ki tētahi tohu, ā, ki tētahi mea whakamīharo mai i te rangi, nā konā ka tīmata tā rātou whakapakeke i ō rātou ngākau, ā, tā rātou kāpō i ō rātou hinengaro, ā, ka tīmata tā rātou whakapono kore ki ērā mea kua rangona, ā, kua kitea e rātou—

2 E whakaaro horihori ake ana i tētahi mea tekateka noa i ō rātou ngākau, nā, kua mahia mai e te tangata, e te mana rānei o te rēwera, hei whakakōtiti kē atu, ā, hei tinihanga i ngākau o te iwi; ā pēnei rapu ai a Hātana i ngā ngākau anō o te iwi, nā konā whakakāpō ai ia i ō rātou karu, ā, ka ārahina atu rātou kia whakapono ai he mea heahea, ā, he mea tekateka te akoranga a te Karaiti.

3 Ā, i pahawa ake, nā, ka tīmata tā te iwi pakari haeretanga i te whakarihariha me ngā mōrikarika; ā, kāore rātou i whakapono me homai anō he tohu anō, he mea whakamīharo anō rānei; ā, ka hāereere a Hātana, e ārahina atu ana ngā ngākau o te iwi, e whakawai ana i a rātou, ā, e mea ana i a rātou kia mahi ai i te whakarihariha nui i te whenua.

4 Ā pēnei pahemo atu ai te tau iwa ngahuru mā ono; ā, me te tau iwa ngahuru mā whitu; me te tau iwa ngahuru mā waru anō hoki; me te tau iwa ngahuru mā iwa anō hoki;

5 Ā, kua pahemo atu anō hoki ngā tau kotahi rau mai i ngā rā o Mōhia, koia te kīngi i runga i te iwi o ngā Nīwhai.

6 Ā, kua pahemo atu ngā tau e ono rau mā iwa mai i te wā i wehe atu ai a Rīhai i Hiruharama.

7 Ā, kua pahemo atu ngā tau e iwa mai i te wā i tukuna mai nei te tohu, i kōrerotia nei e ngā poropiti, e pā ana ki tā te Karaiti haere maitanga ki te ao.

8 Nā, ka tīmata ngā Nīwhai ki te tatau i tō rātou wā mai i tēnei takiwā i tukuna mai nei te tohu, mai i te haerenga mai rānei o te Karaiti; nō reira, kua pahemo atu ngā tau e iwa.

9 Ā, ko Nīwhai, te matua o Nīwhai, i a ia ngā tuhinga e tiaki ana, kāore i hoki atu ki te whenua o Harahemara, ā, kāore i kitea i roto i te whenua katoa.

10 Ā, i pahawa ake, nā, i te noho tonu te iwi i te whakarihariha, hei aha koa te nui o te kauhautanga me te poropititanga i tonoa atu ai ki waenganui i a rātou; ā pēnei pahemo atu anō te tau ngahuru anō hoki; ā, ka pahemo atu anō te tau ngahuru mā tahi i runga i te kino.

11 Ā, i pahawa ake i te tau ngahuru mā toru ka tīmata ētahi pakanga me ētahi tautohetohenga puta noa i te whenua; nā te mea kua tokomaha rawa ngā kaipāhua Karianato, ā, ka patua ngā tāngata tokomaha rawa o te iwi, ā, ka whakahoro anō i ngā pā maha, ā, ka horapa atu te mate me te kōhuru puta noa i te whenua, nā konei puta anō te tikanga ki ngā tāngata katoa, ki ngā Nīwhai me ngā Rāmana, kia hāpai patu ki a rātou.

12 Nō reira, ka whakakotahi ngā Rāmana katoa i whakatahuritia atu ki te Ariki ki ā rātou teina, ngā Nīwhai, he whakaaro tēnei ki te haumarutanga o ō rātou oranga me ā rātou wāhine me ā rātou tamariki, kia hāpai patu ki aua kaipāhua Karianato, āe rā, kia tiaki anō hoki i ō rātou tikanga me ō rātou ritenga o tō rātou hāhi me tō rātou koropikotanga, me tō rātou herekoretanga.

13 Ā, i pahawa ake, nā, i mua i te pahemotanga atu o te tau ngahuru mā toru ka whakawehingia ngā Nīwhai ki te whakangaromanga rawatanga nā tō rātou pakanga, kua tino nanakia rawa tōna āhua.

14 Ā, i pahawa ake, nā, ka tatauria ngātahitia me ngā Nīwhai aua Rāmana i hono mai ai ki ngā Nīwhai;

15 Ā, ka murua atu tō rātou kanga i a rātou, ā, ka kiritea haere ō rātou kiri pērā i ngā Nīwhai;

16 Ā, ka meinga ā rātou tama me ā rātou tamāhine hei mea tino ātaahua, ā, kua tatauria ngātahitia rātou i waenganui i ngā Nīwhai, ā, ka karangatia he Nīwhai. Ā pēnei mutu ai te tau ngahuru mā toru.

17 Ā, i pahawa ake i te tīmatanga ake o te tau ngahuru mā whā, ka hono tonu te whawhai i waenganui i ngā kaipāhua me te iwi o Nīwhai, ā, ka nanakia haere; hei aha koa, ka whaikaha te iwi o Nīwhai i runga i ngā kaipāhua, nā konā āia atu anō rātou e rātou ki waho i ō rātou whenua ki roto i ngā maunga, ā, ki roto i ō rātou wāhi huna.

18 Ā pēnei mutu ai te tau ngahuru mā whā. Ā, ka whakaeke mai rātou ki te iwi o Nīwhai i te tau ngahuru mā whā; ā, nā te whakarihariha o te iwi o Nīwhai, me ā rātou tautohetohenga tītorehanga maha, ka rapu kaha maha ngā kaipāhua Karianato i runga i a rātou.

19 Ā pēnei mutu ai te tau ngahuru mā rima, ā pēnei tā te iwi noho i roto i tētahi āhuatanga whakamamaetanga maha; ā, ka werewere ake te hoari o te whakangaromanga i runga i a rātou, nā konā whano rātou ka haua iho e ia, ā pēnei nā tō rātou kino.