1 Ināianei ā i pahawa ake i te tau ngahuru mā ono mai i te haerenga mai o te Karaiti, ko Rakoneu, te kāwana o te whenua, ka whiwhi i tētahi pukapuka mai i te rangatira me te kāwana o tēnei ope kaipāhua; ā, koinei ngā kupu i kōrerotia nei, e mea ana:

2 E Rakoneu, e te kāwana ariki, e te kāwana matua o te whenua, nana, kei te tuhi atu nei au i tēnei pukapuka ki a koe, ā, kei te tuku mihi tino nui atu ki a koe nā tō ū, me te ū o tōu iwi, i te tiakanga i ērā e whakaaro nei koutou ko tō koutou tika me tō koutou herekoretanga; āe rā, ka nui tō koutou kaha ki te tū, me te mea nei kua tautokona koutou e te ringa o tētahi atua, i te tiakanga o tō koutou herekoretanga, me ō koutou rawa, me tō koutou whenua, me taua mea e kī ake nei koutou ko tō koutou whenua.

3 Ā, he mea pōuri tēnā ki ahau, e Rakoneu, e taku whakatiketike, tā koutou whakaaro kuare tekateka noa e whakaaro ana ka taea e koutou te tū atu ki ngā tāngata māia tokomaha e noho nei i raro i tōku reo whakahau, e tū ana tēnei wā anō i ō rātou kākahu whawhai, ā, e whanga ana i runga i te ngākau nui mō te kupu—Haere iho ki runga i ngā Nīwhai ki te whakangaro i a rātou.

4 Ā ko au, e mōhio ana ki tō rātou wairua e kore nei e taea te whakapēhi, i te mea kua oti te whakamātau i a rātou i runga i te papa pakanga, ā, e mōhio ana ki tō rātou mauāhara mutunga kore ki a koutou nā ngā hē maha kua meatia e koutou ki a rātou, nō reira mehemea ka whakaeke iho rātou ki runga i a koutou, ka torona atu ki a koutou i runga i te whakangaromanga katoatanga.

5 Nō reira nāku tēnei pukapuka i tuhi, e hīri ana ki tōku ake ringa, he whakaaro nōku ki tō koutou painga, nā tō koutou ū ki te whakaaro he tika koutou, me tō koutou wairua māia i runga i te papa pakanga.

6 Nō reira kei te tuhi atu nei au ki a koe, e hiahia ana kia tukuna mai ki tēnei tōku iwi, ō koutou pā, ō koutou whenua, me ō koutou rawa, me pēnei kia kaua rātou e toro iho nei ki runga i a koutou ki te hoari kia tau iho ai te whakangaromanga ki runga i a koutou.

7 Kia pēnei kē rānei te kōrero, tukuna ake koutou e koutou anō ki a mātou, ā, kia whakakotahi mai koutou ki a mātou, ā, kia mātau haere ki ā mātou mahinga huna, ā, kia meinga koutou hei teina ki a mātou kia rite koutou ki a mātou—ehara i te mea hei taurekareka, engari hei teina, ā, hei hoa i runga i ō mātou rawa katoa.

8 Ā nana, kei te oati au ki a koe, ki te pēnei koutou, i runga i te oati, e kore koutou e whakangaromia; engari ki te kore koutou e pēnei, kei te oati au ki a koutou i runga i tētahi oati, nā, hei tērā atu marama ka heke atu aku tauā ki a koutou, ā, e kore e puritia e rātou tō rātou ringa, ā, e kore e tohua tētahi, engari ka whakamatea koutou, ā, ka tukuna kia taka iho te hoari ki runga i a koutou kia mate moa katoa koutou.

9 Ā nana, ko Kirianahi au; ā, ko au te kāwana o tēnei huinga huna o Karianato; ko taua huinga me āna mahinga o reira e mōhio nei au he pai; ā, he mea nō whakapata ērā, ā, he mea tuku iho ki a mātou.

10 Ā, kei te tuhi atu au i tēnei pukapuka ki a koutou, e Rakoneu, ā, e manako ana ahau ka tukuna ake e koutou ō koutou whenua me ō koutou rawa, i runga i te whakaheke toto kore, kia riro mai anō i tēnei tōku iwi ō rātou tikanga me tō rātou kāwanatanga, kua tītore atu nei i a koutou nā tō koutou whakarihariha i tā koutou kaiponu i a rātou ō rātou tikanga kāwanatanga, ā, ki te kore koutou e pēnei, māku ō rātou hē e ngaki. Ko Kirianahi au.

11 Ināianei ā i pahawa ake i te whiwhinga a Rakoneu i tēnei pukapuka ka tino ohorere rawa atu ia, nā te māia o Kirianahi ki te tono i te whenua o ngā Nīwhai, i tana whakaweti anō hoki i te iwi me te ngaki i ngā mate o te hunga kāore i tūkinotia, hāunga tā rātou tūkino i a rātou anō nā tā rātou tītore atu ki aua kaipāhua whakarihariha, ā, ki aua kaipāhua mōrikarika.

12 Nana ināianei, ko tēnei Rakoneu, te kāwana, he tangata tika ia, ā, tē taea te whakamataku e ngā tono me ngā whakaweti o tētahi kaipāhua; nō reira kīhai ia i aro atu ki te pukapuka a Kirianahi, te kāwana o ngā kaipāhua, engari ka mea ia kia karanga ake tōna iwi ki te Ariki kia whakakahangia mō te wā e heke iho ai ngā kaipāhua ki a rātou.

13 Āe rā, i tuku whakapuakitanga ia ki waenganui i te iwi katoa, kia whakahuihui ai i ā rātou wāhine, me ā rātou tamariki, ā rātou kāhui o ia tū, o ia tū, me ā rātou rawa katoa, hāunga ko ō rātou whenua, ki te wāhi kotahi.

14 Ā, ka mea ia kia hangaia ngā pā tūwatawata huri noa i a rātou, ā, me nui hoki tō reira kaha. Ā, ka mea ia kia whakanohoia iho ngā tauā, a ngā Nīwhai me ngā Rāmana, o te hunga katoa rānei kua tatauria ngātahitia me ngā Nīwhai, ā, kia whakatūria hei kaitiaki huri noa i a rātou, hei tiaki i a rātou i ngā kaipāhua i te ao, i te pō.

15 Āe rā, ka kī atu ia ki a rātou: E ora ana te Ariki, ki te kore koutou e rīpenetā i ō koutou hara, me te karanga ake ki te Ariki, e kore rawa koutou e whakaputaina ake i ngā ringaringa o aua kaipāhua Karianato.

16 Anō te kaha me te mīharo o ngā kupu me ngā poropititanga a Rakoneu, nā konā tau ai te wehi ki runga i te iwi; ā, ka whakapau i ō rātou kaha ki te mahi kia rite ai ki ngā kupu a Rakoneu.

17 Ā, i pahawa ake, nā, ka whakatūria e Rakoneu he kaiwhakahau matua ki runga i ngā tauā katoa o ngā Nīwhai, kia whakahau i a rātou hei te wā e heke iho mai ai ngā kaipāhua i te koraha ki a rātou.

18 Nā, ka whakataua te rangatira nui o ngā rangatira katoa, ā, ko te kaiwhakahau nui o ngā tauā katoa o ngā Nīwhai, ā, ko Kikironi tōna ingoa.

19 Nā, he tikanga nō ngā Nīwhai ki te whakatau i ō rātou kaiwhakahau matua, (hāunga i ngā wā whakarihariha) he tangata i a ia te wairua o te whakakitenga me te poropititanga anō hoki; nō reira, he poropiti nui tēnei Kikironi i waenganui i a rātou, he pērā anō te kaiwhakawā matua.

20 Nā, ka kī atu te iwi ki a Kikironi: Kia inoi ake ki te Ariki, ā, tukua kia haere ake tātou ki ngā maunga ki roto i te koraha, kia taka iho ki runga i ngā kaipāhua hei whakangaro i a rātou i ō rātou ake whenua.

21 Engari ka kī atu a Kikironi ki a rātou: Kāore e whakaae ana te Ariki; nā te mea ki te haere ake tātou ki a rātou ka tukuna atu tātou e te Ariki ki roto i ō rātou ringaringa; nō reira ka whakarite tātou i a tātou anō ki roto i te pokapū o ō tātou whenua, ā, ka whakahuihui kotahi mai tātou i ā tātou tauā katoa, ā, kāore tātou e whakaeke atu ki a rātou, engari ka whanga tātou kia whakaeke mai rātou ki a tātou; nō reira e ora ana te Ariki, ki te pēnei tātou ka tukuna mai rātou e te Ariki ki roto i ō tātou ringaringa.

22 Ā, i pahawa ake i te tau ngahuru mā whitu, i te pito whakamutunga o te tau, kua puta noa atu te whakapuakitanga a Rakoneu huri noa i te mata katoa o te whenua, ā, kua haria e rātou ō rātou hōiho, me ō rātou hāriata, me ā rātou kau, me ā rātou kāhui o ia āhua, o ia āhua, me ā rātou kākano, me ā rātou rawa, ā, ka hīkoi atu i runga i ō rātou mano tini me ō rātou mano rau kia tae katoa atu rātou ki te wāhi i whakataua koia te wāhi e huihui ngātahi ai rātou, hei tiaki i a rātou anō i ō rātou hoariri.

23 Ā, ko te whenua i whakaritea ai, arā, ko te whenua o Harahemara, me te whenua i waenganui i te whenua Harahemara me te whenua Mōmona, āe rā, ki te rārangi kei waenganui i te whenua Mōmona me te whenua Whakangaromanga.

24 Ā, i reira ngā tāngata mano tini nui i karangatia nei he Nīwhai, i whakahuihui ngātahi rātou i a rātou anō i tēnei whenua. Nā, i meatia rātou e Rakoneu kia hui tahi ai rātou i a rātou anō i te whenua whakatetonga, nā te kanga nui i runga i te whenua whakateraki.

25 Ā, i whakatūwatawatahia rātou e rātou anō ki ō rātou hoariri; ā, i noho tahi rātou i te whenua kotahi, ā, i te rōpū kotahi, ā, i wehi rātou i ngā kupu i kōrerotia ai e Rakoneu, nā konā rīpenetātia e rātou i ō rātou hara katoa; ā, ka tukuna ake e rātou ā rātou inoi ki te Ariki tō rātou Atua, kia whakaputaina rātou e ia i taua wā e whakaeke mai ai ō rātou hoariri ki a rātou ki te whawhai.

26 Ā, i te tino pōuri rawa rātou nā ō rātou hoariri. Ā, Ka mea a Kikironi kia hangaia e rātou ngā rākau whawhai o ia tū, o ia tū, ā, me matua kaha rātou i ō rātou kākahu whawhai, me ngā puapua, me ngā puapua iti, i runga i te ritenga o tāna i whakahau ai.