1 Ā, i pahawa ake, nā, ka rangona tētahi reo ki waenganui i ngā tāngata katoa o te whenua, ki runga i te mata katoa o te whenua, e karanga ana:

2 Auē, auē, auē te mate mō tēnei iwi; auē te mate mō ngā tāngata o te ao katoa ki te kore rātou e rīpenetā; nā te mea kei te katakata te rēwera, ā, kei te hari āna anahera, nā te whakamatenga o ngā tama me ngā tamāhine ātaahua o tōku iwi; ā, nā tō rātou kino me ō rātou mōrikarika i hinga ai rātou!

3 Nana, nāku taua pā nui o Harahemara i tahu nei ki te ahi, me ngā tāngata e noho ana i reira.

4 Ā nana, nāku anō te pā nui o Moronai i mea kia paremo iho ki roto i ngā rire o te moana, ā, kia tōremi anō ō reira tāngata.

5 Ā nana, nāku taua pā nui o Moronaihā i uhi ki te onepū, me ngā tāngata anō i reira, kia huna atu ai i ō rātou kino me ō rātou mōrikarika i mua i tōku kanohi, kia kore ai e tae ake ngā toto o ngā poropiti me te hunga tapu anō ki ahau hei whakahē i a rātou.

6 Ā nana, nāku te pā o Kirikara i mea kia paremohia, ā, kia tanumia iho anō ngā tāngata o reira ki roto i ngā rire o te whenua;

7 Āe rā, me te pā o Oniha me ōna tāngata i reira, me te pā o Mokumu me ōna tāngata i reira, me te pā o Hiruharama me ōna tāngata i reira; ā, nāku anō ngā wai i mea kia paripari mai ai ki ērā wāhi i reira, kia hunaia ō rātou whakarihariha me ō rātou mōrikarika i mua i tōku kanohi, kia kore ai e tae tonu ake ngā toto o ngā poropiti me te hunga tapu ki ahau hei whakahē i a rātou.

8 Ā nana, ko te pā o Karianari, me te pā o Kariomona, me te pā o Hākopa, me te pā o Kimikimino, nāku katoa ēnei i mea kia paremo iho ai, ā, kua meatia he pukepuke, he raorao i ō reira wāhi; ā, kua tanumia iho ngā tāngata i reira ki roto i te whenua, kia hunaia ake tō rātou whakarihariha me ō rātou mōrikarika i mua i tōku kanohi, kia kore ai e tae tonu ake ngā toto o ngā poropiti me te hunga tapu ki ahau hei whakahē i a rātou.

9 Ā nana, ko taua pā nui o Hākopukata, i nōhia nei e te iwi o kīngi Hākopa, nāku anō i mea kia tahuna ai ki te ahi nā ō rātou hara me tō rātou whakarihariha, i runga katoa i te whakarihariha o te ao katoa, nā ō rātou kōhurutanga huna me ā rātou whakakotahitanga huna; nā te mea nā rātou te rangimārie o tōku iwi me te kāwanatanga o te whenua i whakangaro; nō reira nāku rātou i mea kia tahuna ai, kia whakangaromia ai rātou i mua i tōku kanohi, kia kore ai ngā toto o ngā poropiti me te hunga tapu e tae tonu ake ki ahau hei whakahē i a rātou.

10 Ā nana, ko te pā o Rāmana, me te pā o Hōhua, me te pā o Kara, me te pā o Kihikumene, nāku i mea kia tahuna ai ki te ahi, me ōna tāngata i reira, nā tō rātou whakarihariha ki te pei atu i ngā poropiti, me tā rātou ākinga ki te kōhatu i taua hunga nāku anō i tono ki a rātou ki te whakapuaki atu ki a rātou e pā ana ki tō rātou whakarihariha me ō rātou mōrikarika.

11 Ā, nā te mea i pei atu rātou i a rātou ki waho, nā konei kāore he tangata tika i waenganui i a rātou, nāku te ahi i tono iho kia whakangaro i a rātou, kia hunaia ai tō rātou whakarihariha me ō rātou mōrikarika i mua i tōku kanohi, kia kore ai ngā toto o ngā poropiti me te hunga tapu nāku noa nei i tono atu ki waenganui i a rātou e tae tonu ake ai ki ahau i te whenua hei whakahē i a rātou.

12 Ā, nāku anō ngā whakangaromanga nui maha i mea kia tau ai ki runga i tēnei whenua, i runga anō i tēnei iwi, nā tō rātou whakarihariha me ō rātou mōrikarika.

13 E koutou katoa kua tohungia nā te mea i tika ake koutou i a rātou, e kore rānei koutou e hoki mai ai ki ahau ināianei, me te rīpenetā i ō koutou hara, ā, kia whakatahuritia ai, kia mahu au i a koutou?

14 Āe rā, ko taku kōrero pono tēnei ki a koutou, ki te haere mai koutou ki ahau ka whiwhi koutou ki te oranga tonutanga. Nana, kua torona atu tōku ringa aroha ki a koutou, ā, ko te tangata e haere mai ai, ka whiwhi au i a ia; ā, ka manaakitia te hunga e haere mai ai ki ahau.

15 Nana, ko Ihu Karaiti au, ko te Tama a te Atua. Nāku i hanga ngā rangi me te whenua, me ngā mea katoa kei roto rā. I te Matua ahau mai i te tīmatanga. Kei roto au i te Matua, ā, kei roto te Matua i ahau; ā, nā te Matua i whakakorōria tōna ingoa i roto i ahau.

16 I haere mai au ki tōku ake, ā, kīhai tōku ake i whakawhiwhi i ahau. Ā, kua tutuki ngā karaipiture e pā ana ki taku haerenga mai.

17 Ā, ko te hunga katoa i whakawhiwhi i ahau, nāku rātou i mea kia tū ai hei tama nā te Atua; ka pērā anō au ki te hunga katoa e whakapono nei ki tōku ingoa, nana rā, ka puta mai te hokonga i ahau, ā, ka tutuki anō te ture a Mohi i roto i ahau.

18 Ko au te māramatanga me te oranga o te ao. Ko au te Arepa me te Omeka, te tīmatanga me te whakamutunga.

19 Ā, ka mutu ake tā koutou tāpae ake ki ahau i ngā whakahere whakaheke toto; āe rā, ka whakamutua atu ā koutou whakahere me ā koutou tāpae tahu, nā te mea e kore au e aro atu ki ā koutou whakahere me ā koutou tāpae tahu.

20 Ā, ko te whakahere e tāpae ai koutou ki ahau ko tētahi ngākau marū me tētahi wairua iro. Ā, ko te tangata e haere mai ai ki ahau me tētahi ngākau marū me tētahi wairua iro, māku ia e rūmaki ki te ahi me te Wairua Tapu, pērā i ngā Rāmana, nā tō rātou whakapono ki ahau i te wā o tā rātou whakatahuritanga mai, i rūmakina ai ki te ahi me te Wairua Tapu, ā, kīhai anō rātou i mōhio.

21 Nana, kua haere mai au ki te ao ki te kawe mai i te hokonga ki te ao, ki te whakaora i te ao i te hara.

22 Nō reira, ko te hunga katoa e rīpenetā ai, ā, e haere mai ai ki ahau me he tamaiti nohinohi, māku ia e whakawhiwhi, nō ngā mea pēnei te kīngitanga o te Atua. Nana, he whakaaro ki ngā mea pēnei tāku i whakatakoto iho i tōku oranga, ā, kua mau ake anō; nō reira kia rīpenetā, me te haere mai ki ahau, e koutou e ngā tōpito katoa o te ao, ā, kia whakaorangia ai.