1 Ā, i pahawa ake, i kī mai te anahera ki ahau: Titiro, ā, tirohia ō uri, me ngā uri o ō tuākana. Ā, ka titiro ahau, ā, ka kite i te whenua whakaari; ā, ka kite ahau i ngā mano tini tāngata, āe rā, me te mea nei ko ngā onepū rā anō o te moana tōna tokomaha.

2 Ā, i pahawa ake, i kite ahau i ngā mano tini e huihui ana ki te whawhai, tētahi ki tētahi; ā, ka kite ahau i ngā pakanga, me ngā pūrongo pakanga, me ngā parekura nunui ki te hoari i waenganui i tōku iwi.

3 Ā, i pahawa ake, i kite ahau i ngā whakatipuranga maha e pahure atu ana, i runga i ngā ritenga o te pakanga me ngā tautohetohe i runga i te whenua; ā, ka kite ahau i ngā pā maha, āe rā, koia kīhai nei i tatauria e ahau.

4 Ā, i pahawa ake, i kite ahau i tētahi kohu pōuri i runga i te mata o te whenua whakaari; ā, i kite ahau i ngā uira, ā, ka rongo ahau i ngā whaitiri, me ngā rū, me ngā tūmomo turituri kikino; ā, ka kite ahau i te whenua me ngā toka, kua wāwāhia, ā, ka kite ahau i ngā maunga e tanuku iho ana kia kongakonga noa; ā, ka kite ahau i ngā mānia o te whenua, kua pākarukaru; ā, ka kite ahau i ngā pā maha kua toremi iho; ā, ka kite ahau he mea maha kua tahuna ki te ahi; ā, ka kite ahau he maha kua tanuku iho ki te whenua, nā ngā ngāueuetanga o reira.

5 Ā, i pahawa ake, i muri iho i taku kitenga i ēnei mea, ka kite ahau i te kapua pōuri, nā, ka mimiti atu mai i te mata o te whenua; ā nana, ka kite ahau i ngā mano tini kīhai i hinga nā ngā whakawākanga nui whakamataku a te Ariki.

6 Ā, ka kite ahau i ngā rangi e tūwhera ana, me te Reme a te Atua e heke iho ana mai i te rangi; ā, ka heke iho mai ia, ā, ka whakaatu atu ia i a ia anō ki a rātou.

7 Ā, ka kite anō ahau, ā, e whakaaturia ana anō hoki, nā, i tau iho te Wairua Tapu ki runga i ētahi atu tekau mā rua; ā, kua whakamanahia rātou e te Atua, ā, kua whiriwhiria.

8 Ā, ka kī mai te anahera ki ahau, e mea ana: Tirohia ngā ākonga a te Reme, kua whiriwhiria nei kia minita atu ki ō uri.

9 Ā, ka kī mai ia ki ahau: E mahara ana rānei koe ngā āpotoro tekau mā rua a te Reme? Nana ko rātou te hunga ka whakawā i ngā iwi tekau mā rua o Iharaira; nā reira, ko ngā minita tekau mā rua o ō uri ka whakawākia e rātou; nā te mea nō te whare o Iharaira koutou.

10 Ā, ko ēnei tekau mā rua e kite nei koe ka whakawā i ō uri. Ā, nana, he tika anō rātou āke ake ake; nā te mea nā tō rātou whakapono i te Reme a te Atua kua whakamākia ō rātou kākahu mā roto i ōna toto.

11 Ā, ka kī mai te anahera ki ahau: Titiro! Ā, ka titiro ahau, ā, ka kite i ngā whakatipuranga e toru e pahure atu ana i te tika; ā, kua mā ō rātou kākahu kia rite pū ki te Reme a te Atua. Ā, ka kī mai te anahera ki ahau: Kua whakamākia ēnei mā roto i te toto o te Reme a te Atua, nā tō rātou whakapono i a ia.

12 Ā ko au, ko Nīwhai, ka kite anō he tokomaha nō te whakatipuranga tuawhā i pahure atu ai i te tika.

13 Ā, i pahawa ake, i kite ahau i ngā mano tini o te ao kua huihuia tahitia.

14 Ā, ka kī mai te anahera ki ahau: Tirohia ō uri, me ngā uri o ō tuākana.

15 Ā, i pahawa ake, i titiro ahau, ā, ka kite i te iwi o ōku uri e huihuia tahitia ana i ngā mano tini e tū atu ana ki ngā uri o ōku tuākana; ā, kua huihuia tahitia rātou ki te whawhai.

16 Ā, ka kī mai te anahera ki ahau, e mea ana: Tirohia te mātāpuna o ngā wai poke kua kitea e tō matua; āe rā, ko te awa pū anō i kōrero ai ia; ā, ko ngā hōhonutanga o reira ko ngā hōhonutanga o te ao rēwera.

17 Ā, ko te kohu pōuri ko ngā whakawainga a te rēwera, nāna i whakakāpō ngā karu, me te whakapakeke i ngā ngākau o ngā tamariki a te tangata, me te ārahi atu i a rātou ki roto ki ngā huarahi whārahi, kia mate ai rātou, ā, ka ngaro.

18 Ā, ko te whare nui whakaharahara, i kite ai tōku matua, ko ngā whakaaro horihori me te whakapehapeha o ngā tamariki a te tangata. Ā, he tawhā nui whakaharahara e wehe ai i a rātou; āe rā, ko te kupu pū anō o te manatika a te Atua Ora Tonu, me te Mīhaia koia te Reme a te Atua, ko ia anō i whakaaturia e te Wairua Tapu, mai i te orokohanganga rā anō o te ao ā mohoa noa nei, ā, nō nāianei ā muri ake nei, ā, āke tonu atu.

19 Ā, i te anahera e kōrero ana i ēnei kupu, ka titiro ahau, ā, ka kite i ngā uri o ōku tuākana e whawhai ana ki ōku uri, e ai ki te kupu a te anahera; ā, nā te whakapehapeha o ōku uri, me ngā whakawainga a te rēwera, i kite ahau i taea e ngā uri o ōku tuākana ngā tangata o ōku uri.

20 Ā, i pahawa ake, i titiro ahau, ā, ka kite i ngā tangata o ngā uri o ōku tuākana kua taea e rātou ōku uri; ā, i haere whakamua atu i ngā mano tini i runga i te mata o te whenua.

21 Ā, ka kite ahau i a rātou kua huihuia tahitia i roto i ngā mano tini; ā, ka kite ahau i ngā pakanga me ngā tūrongo pakanga i waenganui i a rātou; ā, i roto i ngā pakanga me ngā tūrongo pakanga i kite ahau i ngā whakatipuranga maha i mate ai.

22 Ā, ka kī mai te anahera ki ahau: Nana ka memeha haere ēnei i te whakapono kore.

23 Ā, i pahawa ake, i kite ahau, i muri iho i tā rātou memeha haeretanga i te whakapono kore ka meinga rātou he uriuri, he weriweri, he iwi poke anō hoki, e kikī ana i te māngere me ngā tūmomo whakarihariha katoa.