1 Ā, ka pahawa ake, ki te whakarongo ngā Tauiwi ki te Reme a te Atua i taua rā ka whakakite atu ia i a ia anō ki a rātou i roto i te kupu, ā, i roto i te mana anō hoki, i roto i te mahi pū anō, tae atu ana ki te tangohanga atu i ō rātou tūtukitanga waewae—

2 Ā, ki te whakapakeke kore rātou i ō rātou ngākau ki te Reme a te Atua, ka tatauria rātou i waenganui i ngā uri o tō matua; āe rā, ka tatauria rātou i waenganui i te whare o Iharaira; ā, ka meinga rātou he iwi manaakitia i runga i te whenua whakaari mō āke tonu atu; kua kore anō e whakaraua iho ki roto i te hereherenga; ā, kua kore anō te whare o Iharaira e whakapōauautia.

3 Ā, ko taua rua nui, kua kēria nei mō rātou e taua hāhi nui mōrikarika, kua hangaia e te rēwera rātou ko ana tamariki, me kore pea ia e arataki iho i ngā wairua o te tangata ki te ao rēwera—āe rā, ko taua rua nui kua kēria mō te whakangaromanga o te tangata ka whakakīa ki te hunga nāna ia i kēri, e ai tā te Reme; ehara i te whakangaromanga o te wairua, engari ko te makanga iho i a ia ki roto i taua ao rēwera koia kāore tōna mutunga.

4 Nana rā, e ai tēnei ki te hereherenga a te rēwera, ā, e ai anō hoki tā te Atua tika, i runga i te hunga katoa e mahi whakarihariha me ngā mahi mōrikarika i tōna aroaro.

5 Ā, i pahawa ake, i kī mai te anahera ki ahau, a Nīwhai, e mea ana: Kua kite nei koe ki te rīpenata ngā Tauiwi ka pai te tukunga ihotanga ki a rātou; ā, e mōhio ana anō koe e pā ana ki ngā kawenata a te Ariki ki te whare o Iharaira; ā, kua rongo anō koe ko ia e rīpenata kore, me mate.

6 Nō reira, auē te mate ki ngā Tauiwi mēnā ka ai tā rātou whakapakeke ngākau ki te Reme a te Atua.

7 Nā te mea kei te haere mai te wā, e ai tā te Reme a te Atua, nā, māku e mahi tētahi mahi nui whakamīharo i waenganui i ngā tamariki a te tangata; he mahi pūmau tonu, kei tēnei ringa, kei tērā atu ringa rānei—ki te whakapakepaketanga i a rātou rānei ki te rongomau me te oranga mutunga kore, ki te tukunga rānei i a rātou ki te pakeketanga o ō rātou ngākau me te kāpōtanga o ō rātou hinengaro tae atu ana ki tō rātou whakarauhanga iho ki roto i te hereherenga, ā, ki roto i te whakangaromanga anō hoki, ā-tīnana, ā-wairua tahi, e ai ki te hereherenga a te rēwera, mōna kua kōrerotia e ahau.

8 Ā, i pahawa ake, i oti i te anahera te kōrero ēnei kupu, ka kī mai ia ki ahau: E mahara ana rānei koe i ngā kawenata a te Matua ki te whare o Iharaira? Ka kī atu ahau ki a ia, Āe rā.

9 Ā, i pahawa ake, i kī mai ia ki ahau: Titiro, ā, tirohia taua hāhi nui mōrikarika, koia te whaea o ngā mōrikarika katoa, ko tōna kaihanga ko te rēwera.

10 Ā, ka kī mai ia ki ahau: Nana e rua tonu ngā hāhi anake; ko tētahi ko te hāhi a te Reme a te Atua, ko tētahi atu ko te hāhi a te rēwera; nā reira, ko ia ehara nō te hāhi a te Reme a te Atua nō taua hāhi nui, koia te whaea o ngā mōrikarika; ā, ko ia te wahine pūremu o te ao katoa.

11 Ā, i pahawa ake, i titiro ahau, ā, ka kite i te wahine pūremu o te ao, ā, ka noho ia ki runga i ngā wai maha; ā, kua whaimana ia ki runga i te ao katoa, i waenganui i ngā iwi katoa, ngā hapū, ngā reo, me ngā tāngata.

12 Ā, i pahawa ake, i kite ahau i te hāhi a te Reme a te Atua, ā, he ruarua noa āna tatauranga, nā ngā whakarihariha me ngā mōrikarika o te wahine pūremu ko ia e noho nei i runga i ngā wai maha; hei aha koa, i kite ahau ko te hāhi a te Reme, ko ia ngā hunga tapu a te Atua, i runga anō hoki rātou i te mata katoa o te ao; ā, ko ō rātou tōminiana i runga i te mata o te ao he itiiti, nā te whakarihariha o te wahine pūremu nui i kite ai ahau.

13 Ā, i pahawa ake, i kite ahau, nā, ka huihuia tahitia e te whaea nui o ngā mōrikarika ngā mano tini i runga i te mata katoa o te ao, i waenganui i ngā iwi o ngā Tauiwi, kia whawhai ai ki te Reme a te Atua.

14 Ā, i pahawa ake, nāku, nā Nīwhai, i kite i te mana o te Reme a te Atua, nā, i heke iho ai ki runga i ngā hunga tapu o te hāhi a te Reme, ki runga anō hoki i ngā iwi kawenata a te Ariki, kua whakamararatia nei ki runga i te mata katoa o te ao; ā, kua whakawhītikiria ki te tika me te mana o te Atua i runga i te korōria nui.

15 Ā, i pahawa ake, i kite ahau i te riri o te Atua i riringihia ai ki runga i taua hāhi nui mōrikarika, nā konā i maha ngā pakanga me ngā tūrongo pakanga i waenganui i ngā iwi katoa me ngā hapū o te ao.

16 Ā, i te tīmatanga o ngā pakanga me ngā pūrongo pakanga i waenganui i ngā iwi katoa koia nō te whaea o ngā mōrikarika, ka kī mai te anahera ki ahau, e mea ana: Nana, ko te riri o te Atua kei runga i te whaea o ngā kaikairau; ā nana, kei te kite nei koe i ēnei mea katoa—

17 Ā, ina haere mai te rā e riringi ai te riri o te Atua ki runga i te whaea o ngā kaikairau, koia te hāhi nui mōrikarika o te ao katoa, ko tōna kaihanga ko te rēwera, hei konā, hei taua rā, ka tīmata ngā mahi a te Matua, hei whakapai i te huarahi mō te whakatutukitanga o ana kawenata, koia kua mahia e ia ki tana iwi ko rātou nei te whare o Iharaira.

18 Ā, i pahawa ake, i kī mai te anahera ki ahau, e mea ana: Titiro!

19 Ā, ka titiro ahau, ā, ka kite i tētahi tangata, ā, kua kākahuria ki tētahi kahu mā.

20 Ā, ka kī mai te anahera ki ahau: Tirohia tētahi o ngā āpotoro tekau mā rua a te Reme.

21 Nana, ka kite ia me te tuhituhi i te toenga atu o ēnei mea; āe rā, me ngā mea maha anō hoki kua pahawa nei.

22 Ā, ka tuhituhi anō ia e pā ana ki te whakamutunga o te ao.

23 Nā reira, ko ngā mea ka tuhia e ia he tika, ā, he pono; ā nana kua tuhia ēnā i roto i te pukapuka i kite ai koe e puta atu ana i te māngai o te Hūrai; ā, i te wā i puta atu ai i te māngai o te Hūrai, i te wā rānei i puta atu ai te pukapuka i te māngai o te Hūrai, he mārama, ā, ko ngā mea kua tuhia he mārama, ā, he nanu kore, ā, he tino utu nui, he ngāwari anō ki tō te māramatanga o te tangata.

24 Ā nana, ko ngā mea ka tuhia e tēnei āpotoro a te Reme ko ngā mea kua kitea nei e koe; ko te toenga atu ka kitea e koe.

25 Engari ko ngā mea ka kitea e koe ā muri ake nei e kore koe e tuhi; nā te mea kua whakamana te Ariki te Atua i te āpotoro a te Reme a te Atua kia tuhituhi ai ia i ēnā mea.

26 Ā, ko ētahi atu anō kua ora, ki a rātou kua whakaatu ia i ngā mea katoa, ā, kua tuhia ēnā; ā, kua hīria ake kia puta whakamua ai i tō ēnā nanu koretanga, e ai ki te pono i roto nei i te Reme, i te wā e tika ana e ai ki tā te Ariki, ki te whare o Iharaira.

27 Ā ko au, ko Nīwhai, i rongo, ā, ka whakaaturia nei, ko te ingoa o te āpotoro a te Reme ko Hōani, e ai ki te kupu a te anahera.

28 Ā nana, ko au, ko Nīwhai, kua whakahaua kia kaua au e tuhi i te toenga o ngā mea i kitea ai, ā, i rangona ai; nā reira, kāti anō māku ngā mea kua tuhia nei e ahau; ā, kua tuhi ahau i tētahi wāhanga iti noa mō ngā mea i kite ai ahau.

29 Ā, e whakaaturia ana e ahau i kite ahau i ngā mea i kite ai tōku matua, ā, nā te anahera pū anō a te Ariki i whakamōhio mai i ēnā ki ahau.

30 Ā, hei konei whakamutu ai ahau aku kōrero e pā ana ki ngā mea i kite ai au i ahau e kahakina atu ana i te Wairua; ā, ahakoa kāore i tuhia katoatia ngā mea i kite ai au, he pono ngā mea kua tuhia nei e ahau. Ā, koia anō tēnei. Āmine.