1 Ā, i pahawa ake, i koropiko rātou ki te Ariki, ā, ka haere tahi me au; ā, ka whakamahi mātou i ngā mahinga rākau whakamīharo. Ā, ka whakaatu mai te Ariki ki ahau mai i tētahi wā ki tētahi wā i te āhuatanga me mahi ai ahau i ngā rākau o te kaipuke.

2 Ināianei au, a Nīwhai, kāore i whakamahia ngā rākau i runga i te ritenga i ākona ai e te tangata, kāore hoki au i hanga ai i te kaipuke i runga i ritenga o te tangata; engari i hangaia ia e ahau i runga i te ritenga o te Ariki i whakaatu mai ai ki ahau; nā reira, ehara ia i runga i te ritenga o te tangata.

3 Ā, ko au, ko Nīwhai, i haere putuputu atu ai ki te maunga, ā, ka inoi putuputu atu ki te Ariki; nā reira te Ariki i whakaatu mai ai i ngā mea nui ki ahau.

4 Ā, i pahawa ake, i muri iho i taku whakaotinga i te kaipuke, e ai ki tā te kupu a te Ariki, ka kite atu ōku tuākana i tōna pai, ā, ko te whakamahinga anō hoki he nui rawa atu tōna pai; nā reira, i whakaiti anō rātou i a rātou anō i te aroaro o te Ariki.

5 Ā, i pahawa ake, i pā atu te reo o te Ariki ki tōku matua, kia ara ake mātou, ā, kia haere iho ki roto i te kaipuke.

6 Ā, i pahawa ake, i te aonga ake o te rā, i muri iho i tā mātou whakaritehanga i ngā mea katoa, he nui te hua rākau me ngā kikokiko nō te koraha, he nui anō te mīere me ngā ō e ai ki ērā i whakahau mai ai te Ariki ki a mātou, i haere iho mātou ki roto i te kaipuke, me ā mātou utanga katoa me ā mātou purapura, me ērā atu mea katoa i haria mai me mātou, tēnā me tēnā e ai ki tana pakeke; nā reira, i haere katoa iho mātou ki roto i te kaipuke, me ā mātou wāhine, me ā mātou tamariki.

7 Ā ināianei, kua whānau mai i ngā tama tokorua ā tōku matua i te koraha; i huaina te tōmua ko Hākopa, ko te tōmuri ko Hōhepa.

8 Ā, i pahawa ake, i muri iho i tā mātou haerenga katoatanga iho ki roto i te kaipuke, me te mauranga atu i a mātou ā mātou ō me ngā mea kua whakahaua nei mātou, ka rere atu mātou ki te moana, ā, ka āia whakamua atu e te hau whaka-te-whenua whakaari.

9 Ā, i muri iho i tā mātou āinga atu e te hau mō te takiwā o ngā rā maha, nana, i tīmata haere ōku tuākana me ngā tama a Ihimaera me ā rātou wāhine anō hoki ki te whakaharihari i a rātou anō, nā konā ka tīmata rātou ki te kanikani, me te waiata, me te kōrero whakarihariha, āe rā, ka wareware pū anō i a rātou nā tēhea mana rātou i kawe mai ai, āe rā, ka hīkina ake rātou i runga i te harehare nui.

10 Ā ko au, ko Nīwhai, ka tīmata ki te wehi nui kei riri mai te Ariki ki a mātou, me te patu i a mātou nā ō mātou mahi haututū, kia horomia ake mātou i ngā rire o te moana; nā reira ahau, a Nīwhai, i tīmata ki te kōrero atu ki a rātou i runga i te whaiwhakaaro nui; engari nana, i riri rātou ki ahau, e mea ana: Engari mātou e tuku kia noho ai tā mātou teina hei rangatira i runga i a mātou.

11 Ā, i pahawa ake, i kawea au e Rāmana rāua ko Remuere, ā, ka herea au ki ngā aho, ā, ka kaha tūkino rāua ki ahau; hei aha koa, i tukua tēnei e te Ariki kia whakakitea atu ai e ia tōna mana, hei whakatutukitanga i tana kupu i kōrerohia e ia e pā ana ki te hunga whakarihariha.

12 Ā, i pahawa ake, i muri iho i tā rāua herenga i a au nā konā kāore i taea e ahau te korikori, ko te kāpehu, kua whakaritea nei e te Ariki, ka mutu te mahi.

13 Nā reira, kāore rātou i mōhio ki hea whakahaere ai i te kaipuke, nā konā ara ake ai he tūpuhi nui, āe rā, he tūpuhi nui whakawehi, ā, ka āia whakamuritia mātou i runga i ngā wai mō te takiwā o ngā rā e toru; ā, ka mataku haere rātou kei toromi iho i te moana; hei aha koa kīhai rātou i wewete i ahau.

14 Ā, i te rā tuawhā, kua āia whakamuritia mātou, ka kino haere rawa te tūpuhi.

15 Ā, i pahawa ake, whano mātou ka horomia ake i ngā rire o te moana. Ā, i muri iho i tā mātou āinga whakamuritanga i runga i ngā wai mō te takiwā o ngā rā e whā, ka tīmata ōku tuākana ki te kite atu i ngā whakawākanga a te Atua kua tau ki runga i a rātou, ā, me mate rātou ki te kore e rīpeneta i ā rātou mahi haututū; nā reira, i haere mai rātou ki ahau, ā, ka wetekina ngā aho kua mau nei ki ōku pona ringa, ā nana kua nui rawa atu tōna pupuhitanga; ā, ko ōku pona waewae anō i nui te pupuhitanga, ā, i nui rawa tō reira mamae.

16 Hei aha koa, i titiro ahau ki tōku Atua, ā, ka whakamoemiti atu au ki a ia i te roanga katoatanga o te rā; ā, kāore au i amuamu atu ki te Ariki nā ōku whakamamaetanga.

17 Ināianei ko tōku matua, a Rīhai, i kōrero ia i ngā mea maha ki a rāua, ki ngā tama anō hoki a Ihimaera; engari, nana, i nui ngā kupu whakawehiwehi i tā ai rātou ki tētahi e kōrero ai mōku; ā, ko ōku mātua kua pāngia i ngā tau, ā, kua mamae nui i te pōuri nā ā rāua tamariki, ka whakahekea rāua ki raro, āe rā, ki runga pū anō i ō rāua moenga-tūroro.

18 Nā tō rāua hinapōuri me tō rāua pōuri, me te haututū o ōku tuākana, i whakatatangia rāua kia kawea pūtia atu i waho i tēnei wā kia tūtaki ai i tō rāua Atua; āe rā, whano ka kawea iho ō rāua makawe hina kia takoto iho ki raro i te puehu; āe rā, whano pū anō ka makaia pōuritia rāua ki roto i te urupā wai.

19 Ā, ko Hākopa rāua ko Hōhepa anō hoki, e tamariki ana, e tika ana kia atawhaitia nuitia, i whakahinapōuri nā ngā whakamamaetanga o tō rāua whaea; ā, ko taku hoawahine anō hoki me ana roimata me ana inoi, ā, ko aku tamariki anō, kāore i whakangāwarihia ngā ngākau o ōku tuākana kia wetekina ai ahau e rāua.

20 Ā, karekau he mea hāunga ko te mana o te Atua, nāna rāua i whakawehi ki te whakangaromanga, i taea ō rāua ngākau te whakangāwari; nā reira, i tā rāua kitenga atu whano ka horomia ake i ngā rire o te moana ka rīpeneta rāua i te mea i mahi ai rāua, nā konā rāua i wewete i ahau.

21 Ā, i pahawa ake, i muri iho i tā rāua wewetetanga i ahau, nana, i tiki au i te kāpehu, ā, ka mahi ia ki tāku i hiahia ai. Ā, i pahawa ake, i inoi ahau ki te Ariki; ā, i muri iho i taku inoitanga ka tau ngā hau, ā, ka tau te tūpuhi, ā, he nui te āio.

22 Ā, i pahawa ake, nāku, nā Nīwhai, i ārahi te kaipuke, nā, ka rere anō mātou whaka-te-whenua whakaari.

23 Ā, i pahawa ake, i muri iho i tā mātou rere atu mō te takiwā o ngā rā maha ka tae atu mātou ki te whenua whakaari; ā, ka haere whakamua atu ki runga i te whenua, ā, ka whakatūria ō mātou tēneti; ā, ka huaina e mātou ko te whenua whakaari.

24 Ā, i pahawa ake, i tīmata mātou ki te ngaki i te whenua, ka tīmata anō mātou ki te whakatō katoa i ā mātou purapura ki roto i te whenua, i mauria mai nei e mātou mai i te whenua o Hiruharama. Ā, i pahawa ake, i nui rawa atu tō ēnā tupu; nā reira, i manaakitia nuitia mātou.

25 Ā, i pahawa ake, i kite mātou i runga i te whenua whakaari, i a mātou e haere ana i te koraha, nā, i reira ngā kararehe katoa o ia āhua, o ia āhua i te ngahere, ko te kau me te ōkiha, me te kaihe me te hoiho, me te koati me te koati mohoao, me ngā tū kararehe mohoao katoa, koinei hei painga mō te tangata. Ā, i kite mātou i ngā tūmomo oa katoa, ko te koura tahi, me te hiriwā, me te kapa.