1 Engari, nana, i ngā rā whakamutunga, i ngā rā rānei o ngā Tauiwi—āe rā, nana ko ngā iwi katoa o ngā Tauiwi me ngā Hūrai anō hoki, ko ngā mea ka tau mai ki runga i tēnei whenua me te hunga kei runga i ērā atu whenua, āe rā, i runga pū anō i ngā whenua katoa o te ao, nana, ka haurangi rātou i te hara me ngā tūmomo āhuatanga mōrikarika katoa—

2 Ā, ina tae mai taua rā ka torohia mai e te Ariki o ngā Mano, ki te whatitiri me te rū whenua, ā, ki te haruru nui, ā, ki te paroro, ā, ki te tūpuhi, ā, ki te mura ahi o te ahi horohoro.

3 Ā, ko ngā iwi katoa e whawhai ai ki a Hīona, ā, e ngangare ai ki a ia, ka rite ki tētahi moemoeā nō tētahi whakakitenga pō; āe rā, ka pērā atu ki a rātou, kia rite anō ki tētahi tangata matekai e moemoeā ana, ā nana, ka kai ia engari ka oho ia, ā, kua kautahanga tōna wairua; kia rite rānei ki tētahi tangata matewai e moemoeā ana, ā nana, ka inu ia engari ka oho, ā nana e ngoikore ana ia, ā, e minamina ana tōna wairua; āe rā, ka pēnei pū anō ngā marea o ngā iwi e whawhai ai ki a Maunga Hīona.

4 Nana rā, ko koutou katoa e mahi kino ana, e tū koutou kia mīharo ai, nā te mea ka tangi atu koutou, ā, ka tangi; āe rā, ka haurangi koutou engari ehara i te waina, ka hūrorirori koutou engari ehara i te inu kaha.

5 Nana rā, kua maringi iho te Ariki i te wairua o te moe au ki runga i a koutou. Nana rā, kua kopia ō koutou karu, ā, kua whakaparahakotia ngā poropiti; me ō koutou kaiwhakahaere tikanga, ā, kua uhia e ia ngā matakite nā tō koutou kino.

6 Ā, ka pahawa ake, nā, ka mauria mai e te Ariki te Atua ki a koutou ngā kupu o tētahi pukapuka, ā, ko ngā kupu ērā a te hunga kua moe.

7 Ā nana, ka hīria te pukapuka; ā, kei roto i te pukapuka tētahi whakakitenga nō te Atua, mai i te ōrokotīmatanga o te ao tae atu ki tōna whakamutunga.

8 Nā reira, nā ngā mea kua hīria ake, kua kore ngā mea kua hīria ake e whakaputaina atu ai i te rā whakarihariha me ngā mōrikarika o te iwi. Nā reira ka kaiponuhia te pukapuka i a rātou.

9 Engari ka tukuna te pukapuka ki tētahi tangata, ā, māna ngā kupu a te pukapuka e tuku, koia ngā kupu o te hunga kua moe nei i te puehu, ā, māna ēnei kupu e tuku ki tētahi atu;

10 Engari kāore ia e tuku atu i ngā kupu kua hīria ake nei, kāore rānei ia e tuku atu i te pukapuka. Nā te mea ka hīria te pukapuka e te mana o te Atua, ā, ka mau tonu te whakakitenga kua hīria nei i pukapuka tae atu ana ki te wā e tika ana i tā te Ariki, kia puta mai ai; nana rā, ka whakakitea atu ngā mea katoa mai i te tūāpapa o te ao tae atu ki tōna whakamutunga.

11 Ā, ka tae mai te rā e pānuitia ai ngā kupu o te pukapuka kua hīria i runga i ngā tuanui whare; ā, ka pānuitia e te mana o te Karaiti; ā, ka whakakitea ki ngā tamariki a te tangata ngā mea katoa kua heipū i waenganui i ngā tamariki a te tangata me ngā mea e puta mai ai tae pū anō ki te whakamutunga o te ao.

12 Nā reira, hei taua rā e tukua ai te pukapuka ki te tangata kua kōrerotia nei e ahau, ka hunaia te pukapuka i ngā karu o te ao, nā, kua kore e kitea e ngā karu o ētahi hāunga ko ngā kaiwhakaatu tokotoru anake e tirohia ai ia, mā te mana o te Atua, hei āpiti atu i te tangata e tukua ai ki a ia te pukapuka; ā, ka whakaatu rātou i te pono o te pukapuka me ngā mea kei roto.

13 Ā, kāore tētahi atu e tirohia ai ia, hāunga ngā mea torutoru e ai tā te Atua e pai ai, hei whakaatu atu i tana kupu ki ngā tamariki a te tangata; nā, kua mea mai te Ariki ka kōrerohia ngā kupu a te hunga tika me te mea nei nā te hunga mate.

14 Nā reira, ka haere tonu tā te Ariki te Atua whakaputa mai i ngā kupu a te pukapuka; ā, mā te māngai o ngā kaiwhakaatu tokomaha e pai ai ki a ia e whakapūmautia ai e ia tana kupu; ā, auē te mate mō te hunga e whakaparahako i te kupu a te Atua!

15 Engari nana, ka pahawa ake, nā, ka kōrero atu te Ariki te Atua ki a ia, koia te tangata e tukuna ki a ia te pukapuka: Kawea ēnei kupu kāore nei i te hīri, ā, tukuna atu ki tētahi atu, kia whakaatuhia atu ērā e ia ki te hunga matatau, e mea ana: Tēnā koa, pānuitia tēnei. Ā, ka mea te hunga matatau: Kawea mai te pukapuka, ā, māku ēnā e pānui.

16 Ā ināianei, ka kōrero rātou i tēnei nā te korōria o te ao, ā, kia whai taonga ai, ā, ehara i te mea mō te korōria o te Atua.

17 Ā, ka kī te tangata: Kāore e taea e au te hari mai i te pukapuka, nā te mea kua hīria ia.

18 Kātahi ka mea te hunga matatau: Kāore e taea e au te pānui i a ia.

19 Nā reira ka pahawa ake, nā, ka whakaputa atu anō te Ariki te Atua i te pukapuka me ōna kupu ki a ia kāore i te matatau; ā, ka mea te tangata kāore i te matatau: Ehara au i te matatau.

20 Kātahi ka mea te Ariki te Atua ki a ia: Kāore te hunga matatau e pānui i ēnā, nā te mea kua whakaparahakotia ēnā, ā, e taea ana e au tāku ake mahi te mahi; nā reira ka pānuitia e koe ngā kupu māku e tuku ki a koe.

21 Kaua e pā ki ngā mea kua hīria, nā, māku ēnā e kawe mai hei te wā e tika ana; nā, ka whakaatu atu au ki ngā tamariki a te tangata e taea ana e au tāku ake mahi te mahi.

22 Nā reira, ina mutu i a koe te pānui i ngā kupu kua whakahaua koe e ahau me tāu whiwhinga i ngā kaiwhakaatu kua whakaari nei au ki a koe, hei konā koe e hīri ake anō i te pukapuka, ā, ka hunaia ake ki ahau, kia tiaki au i ngā kupu kāore i pānuitia nei e koe, tae atu ana ki te wā e tika ana ki ahau i tōku ake mātauranga kia whakakitea atu ai ngā mea katoa ki ngā tamariki a te tangata.

23 Nana rā, ko te Atua ahau; ā, he Atua merekara ahau; ā, māku e whakaatu atu ki te ao he rite au inānahi, ināianei, ā, āke tonu atu; ā, kāore au e mahi ki waenganui i ngā tamariki a te tangata hāunga ia e ai tā tō rātou whakapono.

24 Ā, ka pahawa ake anō, nā, ka kī atu te Ariki ki te tangata māna e pānui ngā kupu e tukuna atu ai ki a ia:

25 Inā hoki rā e whakatata mai nei tēnei iwi ki ahau i tō rātou māngai, ā, ka whakahōnoretia au i ō rātou ngutu, engari he matara atu i a au ō rātou ngākau; ā, he mea whakaako tō rātou wehi ki ahau e ngā tikanga o te tangata—

26 Nō reira, ka haere tonu taku mahi merekara i waenganui i tēnei iwi, āe rā, he mahi nui whakamīharo, nā, ka mimiti te mātauranga o ō rātou ruānuku me ō rātou tangata matatau, ā, ka hunaia te māramatanga o ō rātou tangata mōhio.

27 Ā, auē te mate mō rātou e ngana hohonu ai ki te huna i ā rātou whakatakotoranga whakaaro mai i te Ariki! Ā, e mahi nei ā rātou mahinga i te pōuritanga; ā, ka kī rātou: Ko wai e kite nei i a tātou? Ā, e kī ana anō rātou: Kāore e kore ka kīa tāu hurihanga i ngā mea he rite ki te uku nā te kaihanga rīhi. Engari nana, māku e whakaatu atu ki a rātou, e ai tā te Ariki o ngā Mano, nā, e mōhio ana au i ā rātou mahinga katoa. Nā, ka kī ake rānei te mahi mō tōna kaihanga, kāore i hangaia ahau e ia? Ka kī ake rānei te mea kua taitapaia ki tōna kaitaitapa, kāore ōna māramatanga?

28 Engari nana, e ai tā te Ariki o ngā Mano: Māku e whakaatu atu ki ngā tamariki a te tangata, tēnā ko tēnei, he wā iti rawa ka tahuritia a Repanona hei māra whai hua; ā, ka kīa te māra whai hua he ngahere.

29 Ā, ka rongo te hunga turi i ngā kupu a te pukapuka, ā, ka kite ngā karu o te hunga kāpō i waho atu i te matapōrehutanga, ā, i te pōuritanga.

30 Ā, ka nui haere te hunga māhaki, ā, kei roto i te Ariki tō rātou koa, ā, ka koa te hunga rawakore i waenganui i ngā tāngata i te Mea Tapu o Iharaira.

31 Nā te mea he pono e ora ana te Ariki, ka kite rātou i te mea nanakia kua mōtī, ā, kua pau te mea whakahāwea, ā, kua hātepea atu te hunga mātakitaki katoa i te kino;

32 Ā, ko te hunga e whakatau i te tangata he kaihara mō te kupu kotahi, me te whakatakoto māhanga mō te tangata e whakatika tangata ana i te tomokanga, me te whakapeau i te hunga tika me te mea he mea kore noa iho.

33 Nō reira, ko te kupu tēnei a te Ariki, nāna nei a Aperahama i hoko, e pā ana ki te whare o Iharaira: E kore ianei a Hākopa e whakamā, e kore rānei e kōmā tōna mata.

34 Engari ina kite ia i āna tamariki, te mahi a ōku ringaringa, i tōna aroaro, ka whakatapua e rātou tōku ingoa, ā, ka whakatapua te Mea Tapu o Iharaira, ā, ka wehi anō ki te Atua o Iharaira.

35 Ka tae anō te hunga wairua kōtiti ki tētahi māramatanga, ā, ka ako te hunga amuamu i ngā whakaakoranga.