1 Ā, i pahawa ake i ngā rā o Ahata te tama a Iotama, te tama a Utia, te kīngi o Hura, nā, i haere ake a Retini, kīngi o Hiria, me Peka te tama a Remāria, kīngi o Iharaira, ki a Hiruharama ki te pakanga atu ki a ia, engari kīhai te wikitōria i taea ai ki a ia.

2 Ā, i kīa atu te whare o Rāwiri, e mea ana: He hoa tahi a Hiria ki a Eparaima. Ā, i whakaohongia tana ngākau, me te ngākau o tōna iwi, e pērā ana ki te oioitanga o ngā rākau o te ngahere i te hau.

3 Kātahi te Ariki ka kī atu ki a Īhāia: Haere whakamua atu kia tūtaki atu ki a Āhata, kōrua ko Hearatahupu tō tama, i te pito awa keri o tō runga puna wai i te huarahi i te pārae o te kaihoroi kākahu;

4 Ā, ka kī atu ki a ia: Kia mataara, ā, kia ngū; kaua e wehi, kaua rānei e ngākau-pāwera mō ngā whiore e rua nō ēnei ngotungotu e pawa ana, nā te mea ko te riri nui o Retini ki a Hiria, me tā te tama a Remāria.

5 Nā te mea kua whakatapeha kino nei a Hiria rātou ko Eparaima, me te tama a Remāria ki a koe, e mea ana:

6 Tukuna tātou kia haere ake ki a Hura me te whakatupu kino i a ia, ā, tukuna tātou kia pākaru atu ai hei wāhi i reira mō tātou, me te whakatū kīngi i tōna pokapū, āe rā, te tama a Tapeara.

7 Ko te kupu tēnei a te Ariki te Atua: E kore ia e tū, e kore rānei e pahawa ake.

8 Nā, ko te upoko o Hiria ko Ramahiku, ā, ko te upoko o Ramahiku, ko Retini; ā, i ēnei tau e torukoa me te rima ka pakaru a Eparaima kia kore ai ia hei iwi.

9 Ā, ko te upoko o Eparaima ko Hamāria, ā, ko te upoko o Hamāria ko tā Remāria tama. Ki te kore koutou e whakapono e kore pū anō koutou e whakapūmautia.

10 Waihoki, i kōrero anō te Ariki ki a Ahata, e mea ana:

11 Inoia tētahi tohu nā te Ariki tō Atua; inoia rānei i ngā hōhonutanga, i ngā ikeiketanga rānei o runga.

12 Engari i kī ai a Ahata: E kore au e inoi, e kore rānei au e whakawai i te Ariki.

13 Ā, ka kī ia: Whakarongo koutou ināianei, E te whare o Rāwiri; he mea iti ki a koutou kia whakahōhā ai i te tangata, engari ka whakahōhā koutou i tōku Atua anō hoki?

14 Nō reira, Ka tukuna e te Ariki ake tētahi tohu ki a koutou—Nana, ka hapū tētahi puhi, ā, ka whānau i tētahi tama, ā, ka huaina tōna ingoa ko Emanuera.

15 He pata me te mīere hei kai māna, nā, ka mōhio ia ki te whakakore i te kino me te whiriwhiri i te pai.

16 Nā, i mua i te mōhiotanga a te tamaiti kia whakakore ai i te kino me te whiriwhiri i te pai, ka whakarērea te whenua e mauāhara nei koe e ōna kīngi e rua.

17 Ka tō mai te Ariki ki runga i a koe, i runga anō i tō iwi, i runga anō i tō matua whare, ngā rā kāore i ahu mai i te rā i wehe atu ai a Eparaima i Hura, te kīngi o Ahiria.

18 Ā, ka pahawa ake i taua rā, nā, ka whakahihī te Ariki ki te ngaro kei te wāhi whakarunga o Ihipa, ki te pī anō hoki kei te whenua o Ahiria.

19 Ā, ka haere mai rātou, ā, ka whakatāngia katoatia rātou i ngā raorao mōwai, ā, i ngā kōhao o ngā toka, ā, i runga i ngā taratara katoa, ā, i runga i ngā urupuia rākau katoa.

20 I taua rangi anō ka heua e te Ariki ki tana heu kua utua nei, e rātou kei tua atu i te awa, e te kīngi o Ahiria, te upoko, me ngā huruhuru o ngā waewae; ā, ka heua anōtia te pāhau.

21 Ā, ka pahawa ake i taua rā, ka whāngai tētahi tangata i tētahi kūao kau me ngā hipi e rua;

22 Ā, ka pahawa ake, nā te nui o te waiū ka tukuna e rātou ka kai pata ia; nā, ka kainga e ngā tangata katoa te pata me te mīere kua mahue nei i roto i te whenua.

23 Ā, ka pahawa ake i taua rā, ka ai ngā wāhi katoa, i reira ngā waina kotahi mano mō ngā hiriwā kotahi mano, koia kē nei mō ngā tūmatakuru me ngā tātarāmoa.

24 He pere, he kōpere ā ngā tāngata ka haere ki reira, nā te mea ka riro haere te whenua katoa i te tūmatakuru, i te tātarāmoa.

25 Ā, me ngā puke katoa ka keria ki te karaone, ka kore te wehi ki te tūmatakuru me te tātarāmoa e haere mai ai; engari koinei mō te tukunga atu i te kau, me te takahitanga i ngā kau itiiti iho.