1 Nā, ka aroha te Ariki ki a Hākopa, ā, ka whiriwhiri tonu i a Iharaira, ā, ka whakatau iho i a rātou i tō rātou ake whenua; ā, ka whakahonoa ngā tangata kē ki a rātou, ā, ka piri ki te whare o Hākopa.

2 Ā, ka ārahina rātou e te iwi, ā, ka haria rātou ki tō rātou wāhi; āe rā, mai i tawhiti ki ngā pito whakamutunga o te ao; ā, ka hoki rātou ki ō rātou whenua whakaari. Ā, ka nohoia ērā e te whare o Iharaira, ā, mā ngā pononga tāne me ngā pononga wahine te whenua o te Ariki; ā, ka whakarau rātou i te hunga nāna nei rātou i whakarau; ā, ka whakahaere tikanga rātou i runga i ō rātou kaiwhakapēhi.

3 Ā, ka pahawa ake i taua rā, nā, ka tuku okiokinga te Ariki ki a koe, mai i tō pōuritanga, ā, mai i tō wehinga, ā, mai i tō hereherenga taumaha i konā koe i whakaponongatia.

4 Ā, ka pahawa ake i taua rā, nā, māu tēnei whakataukī e kawe ake ki te kīngi o Papurona, ā, ka kī ake: Nā te aha i mutu ai te kaiwhakapēhi, i mutu ai te pā kōura!

5 Kua whati te Ariki i te tokotoko o te hunga kino, ngā hepeta o ngā kaiwhakahaere tikanga.

6 Ko ia nāna te iwi i patu i runga i te pukuriri ki tētahi patunga tonutanga, ko ia nāna ngā iwi i whakahaere i runga i te riri, e whakahāweatia ana, ā, kāore tētahi e ārai atu.

7 Kei te okioki te ao katoa, ā, e ngū ana; pakaru mai ana te waiata.

8 Āe rā, e whakakoa ana ngā puakarimu ki a koe, me ngā hīra anō hoki o Repanona, e mea ana: Nō te mea kua whakatakotohia koe kāore tētahi kaitope i haere mai ki a tātou.

9 Kua whakaohongia te ao rēwera i raro mōu kia tūtaki ai ki a koe i tō haerenga mai; e whakatutūngia ake e ia te hunga mate mōu, ko te hunga rangatira katoa pū anō o te ao; kua whakaarahia ake mai i ō rātou torona ngā kīngi katoa o ngā iwi.

10 Ka kōrero rātou katoa me te kī atu ki a koe: Kua ngoikore anō koe pēnei i a mātou? Kua meinga koe kia rite ai ki a mātou?

11 Kua tōia iho tō korōria ki te rua kōiwi; kāore e rangona ana te tangi o āu hātere; kua whakawhārikitia te noke ki raro i a koe, ā, e uhia ana koe e ngā noke.

12 Nā te aha koe i taka ai i te rangi, E Rutiwha, te tama o te ata! Kua tapahia iho koe ki te papa, nō konā i whakangoikore ai i ngā iwi!

13 Nā, kua kī koe i tō ngākau: Ka kake ake au ki roto i te rangi, ka whakateiteitia tōku torona i runga ake i ngā whetū o te Atua; ka noho anō ahau i runga i te maunga o te whakaminenga, i ngā taha o te raki;

14 Ka kake ake au i runga ake i ngā tiketiketanga o ngā kapua; ka rite au ki te Mea Tike Rawa.

15 Heoi, ka tōia iho koe ki te ao rēwera, ki ngā taha o te rua.

16 Ko te hunga e kite ai i a koe, ka āta mātaihia koe, ā, ka āta tirohia atu koe, ā, ka kī ake: Ko te tangata tēnei nāna te whenua i whakaoioi, i whakangāueue i ngā kīngitanga?

17 Ā, i mea ai i te ao hei koraha, ā, i whakangaromia ngā pā o reira, ā, kāore i huakina te whare o āna herehere?

18 Ko ngā kīngi o ngā iwi, āe rā, ko rātou katoa, e takoto ana i te korōria, ko ia tangata o rātou i tōna ake whare.

19 Engari kua makaia atu koe i tō rua kōiwi ānō nei he manga mōrikarika, ā, ko te toenga o rātou kua whakamatea, kua werohia ki tētahi hoari, nā, e heke iho ana ki ngā kōhatu o te rua; ānō nei he tūpāpaku e takahia ana e te waewae.

20 Kāore koe e tanumia tahitia me rātou, nā te mea kua whakangaro koe i tō whenua, ā, kua whakamatea tō iwi; kua kore rawa te kākano o ngā kaimahi-kino e rongonuitia.

21 Whakaritea he parekura mō āna tamariki nō ngā hara o ō rātou matua, kia kore ai rātou e ara ake, kia kore rānei e nōhia te whenua, kia kore rānei e whakakapi i te mata o te whenua ki ngā pā.

22 Nā ka ara ake au ki a rātou, e ai tā te Ariki o ngā Mano, ā, ka hātepea atu te ingoa mai i Papurona, me te toenga, me te tama, me te irāmutu, e ai tā te Ariki.

23 Ka meinga anōtia ia e au hei kāinga mō te matuku, me ngā hārotoroto wai; ā, ka tahitahia ia e au ki te tahitahi o te whakangaromanga, e ai tā te Ariki o ngā Mano.

24 Kua kī taurangi te Ariki o ngā Mano, e mea ana: Inā tāku i whakaaro ai, ka pahawa pērā ake; ā, e pērā ana ki tāku i whakarite ai, ka tū pērā ia—

25 Nā, ka haria mai e au te Ahiriana ki roto i tōku whenua, ā, ka takahia ia e te waewae i runga i ōku maunga; kātahi tana ioka ka wehe atu i a rātou, ā, ka wehe atu tana pīkaunga i ōna pokohiwi.

26 Koinei te take kua whakaritea nei mō runga i te ao katoa; ā, koinei te ringa kua torona atu nei ki runga i ngā iwi katoa.

27 Nā, kua whakaritea e te Ariki o ngā Mano, ā, mā wai e whakakore? Ā, kei te torona tonutia atu tōna ringa, ā, mā wai ia e kaupare atu?

28 I puta tēnei matakitenga mate i te tau i mate ai a kīngi Ahata.

29 Kaua koe e whakakoa, Pirihitia katoa, nā te mea kua whatia tō te tangata tokotoko nāna koe i patu; nā, atu i tō te nākahi pū e puta mai ai tētahi neke, ā, ka ai tētahi nākahi rērere muramura tana hua.

30 Ā, ka kai te mātāmua o te rawakore, ā, ka takoto haumaru iho te hunga tuakoka; ā, māku tō pū e whakamate ki te hemokai, ā, māna tō toenga e whakamate.

31 E auē, E te kēti; hāmama, E te pā; e koe, Pirihitia katoa, kua memehatia; nā, ka rere mai tētahi pawa mai i te raki, ā, kāore tētahi e taratahi i ōna wā i whakataua.

32 He aha tā ngā karere o ngā iwi e whakautu atu? Nā, kua whakapōauau te Ariki i a Hīona, ā, ka whakawhirinaki te hunga rawakore o tōna iwi i a ia.