1 Ā ināianei ka kōrero au ki a koe, e Hōhepa, e taku pōtiki. Kua whānau mai koe i te koraha o aku whakamamaetanga; āe rā, i ngā rā o ōku pōuritanga nui i whānau mai ai koe i tō whaea.

2 Ā, kia whakatapu anō rā koa te Ariki i tēnei whenua mōu, koia he whenua tongarewa, hei tukunga ihotanga mōu, ā, hei tukunga ihotanga mō ō uri me ō tuākana, hei haumarutanga mōu āke, ake, ake, ki te mea ka pupuri koutou i ngā whakahaunga a te Mea Tapu o Iharaira.

3 Ā ināianei, e Hōhepa, e taku pōtiki, kua haria mai ki waho i te koraha o aku whakamamaetanga, kia manaaki anō rā koa te Ariki i a koe mō āke tonu atu, nā te mea kua kore e whakangaromia katoatia atu ō uri.

4 Nā te mea nana, ko koe te hua o ōku hope; ā, he uri ahau nā Hōhepa i kawea hereherehia atu i Īhipa. Ā, he nui ngā kawenata a te Ariki i mea ai ia ki a Hōhepa.

5 Nā reira, i kite pono mai a Hōhepa i ō tātou rā. Ā, i whiwhi ia i tētahi kupu whakaari nō te Ariki, nā, mai i ngā hua o ōna hope ka whakaara ake te Ariki te Atua i tētahi manga tika ki te whare o Iharaira; ehara i te Mīhaia, engari he manga ka whatia atu nei, hei aha koa, kia maumaharatia i roto i ngā kawenata a te Ariki, nā, ka whakakitea mai te Mīhaia ki a rātou i ngā rā whakamutunga, i te wairua o te mana, tae atu ana ki te kawenga i a rātou i te pōuritanga ki te māramatanga—āe rā, i te pōuritanga huna me te hereherenga ki te herekoretanga.

6 Nā te mea i whakaatu pono a Hōhepa, e mea ana: Mā te Ariki tōku Atua tētahi matakite e whakaara ake, koia hei matakite kōwhiria ki ngā hua o ōku hope.

7 Āe rā, i kī pono a Hōhepa: E pēnei ana tā te Ariki ki ahau: Māku tētahi matakite kōwhiria e whakaara ake i ngā hua o ō hope; ā, ka whakamihatia nuitia i waenganui i ngā hua o ō hope. Ā, ka hoatu tētahi whakahaunga e au ki a ia kia mahi ai ia i tētahi mahi mō ngā hua o ō hope, ōna tuākana, koia hei mea utu nui ki a rātou, tae atu pū anō ki te kawenga i a rātou ki te mātauranga o ngā kawenata kua meatia nei e ahau me ō rātou mātua.

8 Ā, ka hoatu au ki a ia tētahi whakahaunga kia kaua e mahi i tētahi mahi kē atu, hāunga ko ngā mahi ka whakahaua ia e ahau. Ā, māku ia e whakanui i te tirohanga a ōku karu; nā te mea māna aku mahi e mahi.

9 Ā, ka mārohirohi ia pērā ki a Mohi, koia kua kī au māku e whakaara ake ki a koutou, hei whakaputa i tōku iwi, E te whare o Iharaira.

10 Ā, ko Mohi tāku e whakaara ake ai, kia whakaputaina ai tō iwi i te whenua o Īhipa.

11 Engari māku tētahi matakite e whakaara ake i ngā hua o ō hope; ā, ka hoatu ki a ia e au he mana kia kawea whakamuahia mai ai tōku kupu ki ngā uri o ō hope—ā, ehara i te kawenga whakamuatanga o tōku kupu anake, e ai tā te Ariki, engari ki te whakapakepaketanga i a rātou ki taku kupu, koia ka riro whakamua kē atu ki waenganui i a rātou.

12 Nā reira, mā ngā hua o ō hope e tuhi; ā, mā ngā hua o ō Hura hope e tuhi; ā, koirā mea ka tuhia e ngā hua o ō hope, me ngā mea ka tuhia e ngā hua o ō Hura hope, ka tupu ngātahi, tae atu ana ki te whakapōauautanga i ngā whakaakoranga teka me te whakatakotoranga iho i ngā tautohetohenga, me te whakapūmautanga i te maungārongo ki waenganui i ngā hua o ō hope, me te whakamōhiotanga i a rātou ki te mātauranga o ō rātou mātua hei ngā rā whakamutunga, ki te mātauranga hoki o aku kawenata, e ai tā te Ariki.

13 Ā, mā roto i te ngoikoretanga ia e whakakahangia ai, hei taua rā e tīmata ai aku mahi i waenganui i aku iwi katoa, tae atu ana ki te whakahokinga mai i a koe, E te whare o Iharaira, e ai tā te Ariki.

14 Ā, i pēnei te poropititanga a Hōhepa, e mea ana: Nana, ka manaakitia taua matakite e te Ariki; ā, ka whakapōauautia rātou e whai ana ki te whakangaro i a ia; nā te mea ko tēnei kupu whakaari, kua whiwhi nei ahau i te Ariki, mō ngā hua o ōku hope, ka whakatutukihia. Nana, e tino mōhio ana ahau ki te whakatutukitanga i tēnei kupu whakaari;

15 Ā, ka huaina tōna ingoa mōku; ā, koia nei te ingoa o tōna matua. Ā, ka rite tahi ia ki ahau; nā te mea, ka kawea whakamuahia mai nei e te Ariki ki tōna ringa ake, mā te mana o te Ariki e kawe ai tōku iwi ki te whakaoranga.

16 Āe rā, i pēnei te poropititanga a Hōhepa: E tino mōhio ana ahau ki tēnei mea, pēnei pū anō ki taku mōhio ki te kupu whakaari a Mohi; nā te mea kua kī mai te Ariki ki ahau, māku ō uri e tiaki āke, ake, ake.

17 Ā, kua kī mai te Ariki: Māku he Mohi e whakaara ake; ā, māku he mana e tuku ki a ia i tētahi tokotoko; ā, māku he whakawākanga e hoatu ki a ia mā roto i te tuhituhinga. Hei aha koa e kore au e whakatangatanga i tōna arero, kia nui ai ana kōrero, nā te mea e kore au e whakamārohirohi i a ia mā roto i te kōrerotanga. Engari māku taku ture e tuhituhi atu ki a ia, mā te matihao o tōku ake ringa; ā, māku tētahi kaikōrero e whakarite māna.

18 Ā, i kī mai anō te Ariki ki ahau: Māku e whakaara ake ki ngā hua o ō hope; ā, māku tētahi kaikōrero e whakarite māna. Ā, māku, nana, māku e hoatu ki a ia kia tuhi ai ia i ngā tuhinga mō ngā hua o ō hope, ki ngā hua o ō hope; ā, mā te kaikōrero a ō hope e whakapuaki ai.

19 Ā, ko ngā kupu ka tuhia e ia, ko ngā kupu e tika ana ki taku mōhiotanga me riro whakamua atu ki ngā hua o ō hope. Ā, ka pēnāhia me i karanga ake ngā hua o ō hope ki a rātou mai i te puehu; nā te mea e mōhio ana ahau ki tō rātou whakapono.

20 Ā, ka karanga rātou mai i te puehu; āe rā, ko te rīpenetātanga pū anō ki ō rātou tuākana, hei muri iho pū anō i te pahuretanga o ngā whakatupuranga maha i a rātou. Ā, ka pahawa ake, ka rere atu tā rātou karanga, e ai pū anō ki te māramatanga o ā rātou kupu.

21 Nā tō rātou whakapono ā rātou kupu e riro whakamua ai i tōku māngai ki ō rātou tuākana ko rātou ngā hua o ōku hope; ā, ko te ngoikoretanga o ā rātou kupu e whakakahangia ai e ahau i tō rātou whakapono, tae atu ana ki te maharatanga i taku kawenata i mea ai ahau ki ō mātua.

22 Ā ināianei, nana, e taku tama a Hōhepa, nā tēnei āhuatanga i poropiti ai tōku matua onamata.

23 Nā reira, nā tēnei kawenata e manaakitia nei koe; nā te mea e kore ō uri e whakangaromia, nā te mea ka whakarongo rātou ki ngā kupu o te pukapuka.

24 Ā, ka ara ake tētahi mea mārohirohi i waenganui i a rātou, ka nui ana mahi pai, ā-kupu, ā-mahi hoki, hei taputapu i ngā ringaringa o te Atua, i te whakapono nui, kia mahi ai i ngā mea whakamīharo nui, me te mahi i tērā mea e nui ana i te tirohanga a te Atua, tae atu ana ki te whakapahawatanga i ngā whakahokinga nui ki te whare o Iharaira, ki ngā uri o ōku tuākana anō hoki.

25 Ā ināianei, kua manaakitia koe, e Hōhepa. Nana, he nohinohi koe; nā reira whakarongo ki ngā kupu a tō tuakana, a Nīwhai, ka pērāhia ki a koe e ai pū anō ki ngā kupu kua kōrerotia nei e au. Maumaharatia ngā kupu a tō matua e mate ana. Āmine.