1 Ā ināianei au, a Hākopa, e kōrero nei ki a koutou, e aku teina aroha, e pā ana ki tēnei manga tika kua kōrerotia nei e au.

2 Nana rā, ko ngā kupu whakaari kua whiwhi nei tātou he kupu whakaari ki a tātou e ai ki tō te kikokiko; nā reira, ahakoa kua whakaatuhia mai nei ki ahau, nā, ka ngaro ō tātou tamariki tokomaha i te kikokiko nā te whakapono kore, hei aha koa, ka whaiaroha te Atua ki te tokomaha; ā, ka whakahokia ā tātou tamariki, kia haere mai ai rātou ki taua mea e hoatu ai ki a rātou te mātauranga pono o tō rātou Kaihoko.

3 Nā reira, pērā i tāku ki a koutou, kāore e kore me tika pū ia ko te Karaiti—nā, i te pō whakamutunga i kōrero nei te anahera ki ahau me pēnei tōna ingoa—ka haere mai ki waenganui i ngā Hūrai, ki waenganui i te hunga ko rātou nei te wāhi kino ake o te ao; ā, ka rīpekatia ia e rātou—nā konei e tika pū ana mā tō tātou Atua, ā, kāore he iwi atu anō i tēnei ao e rīpekatia ai tō rātou Atua.

4 Nā te mea mēnā ka mahia ngā merekara nui i waenganui i ērā atu iwi kua rīpenetā rātou, me te mōhio ko ia tō rātou Atua.

5 Engari nā ngā tohungatanga teka me ngā haututū, ka whakamārō te hunga i Hiruharama i ō rātou kakī ki a ia, kia rīpekatia ia.

6 Nā reira, nā ō rātou hara, whakangaromanga, matekaitanga, mate urutāhanga, ka tau iho te whakahekenga toto ki runga i a rātou; ā, ko te hunga e kore nei e whakangaromia atu, ka whakamararatia atu ki waenganui i ngā iwi katoa.

7 Engari nana, ko te kupu tēnei a te Ariki te Atua: Ina tae mai te rā e whakapono ai rātou i ahau, nā, ko au te Karaiti, hei reira ahau kua kawenatatia ai ki ō rātou mātua ka whakahokia rātou i te kikokiko, i runga i te whenua, ki ō rātou whenua tuku iho.

8 Ā, ka pahawa ake, nā, ka huihuia rātou mai i tā rātou whakamararatanga roa, mai i ngā moutere o te moana, ā, mai i ngā wāhi e whā o te ao; ā, ka nui ngā iwi Tauiwi i ōku karu, e ai tā te Atua, i te kawenga atu i a rātou ki ō rātou whenua tuku iho.

9 Āe rā, ka tū ngā kīngi Tauiwi hei matua atawhai ki a rātou, ā, ka meinga ō rātou kuini hei whaea atawhai; nā reira, he nui ngā whakaari a te Ariki ki ngā Tauiwi, nā te mea kua kōrerotia nei e ia, ā, ko wai e taea te tautohe atu?

10 Engari nana, ko tēnei whenua, tā te Atua, ka tū hei whenua tuku iho mō koutou, ā, ka manaakitia ngā Tauiwi i runga i te whenua.

11 Ā, ka tū tēnei whenua hei whenua herekore ki ngā Tauiwi, ā, kua kore he kīngi i runga i te whenua, hei ara ake ki ngā Tauiwi.

12 Ā, māku tēnei whenua e whakamaioro ki ērā atu iwi.

13 Ā, ka mate ia e whawhai ai ki a Hīona, tā te Atua.

14 Nā, ka mate ia e whakaara ake ai i tētahi kīngi ki ahau, nā te mea au, te Ariki, te kīngi o te rangi, ka tū hei kīngi mō rātou, ā, ka tū au hei rama mō rātou āke tonu atu, te hunga e whakarongo ai ki aku kupu.

15 Nā reira, nā tēnei take, kia whakaea ai i ōku kawenata kua meatia atu ki ngā tamariki a te tangata, ka meatia nei e ahau ki a rātou i a rātou i te kikokiko, me tika pū ia taku whakangaro i ngā mahinga pōuriuri, me ngā kōhuru, me ngā mea mōrikarika.

16 Nā reira, ko ia e whawhai ana ki a Hīona, Hūrai mai, Tauiwi mai, herehere mai, herekore mai, tāne mai, wahine mai, ka mate; nā te mea ko rātou te wahine puremu o te ao; nā te mea ko te hunga kāore e tautoko ana i ahau he hoariri ki ahau, tā te Atua.

17 Nā, ka whakaea au i ōku whakaari kua meatia nei e au ki ngā tamariki a te tangata, ērā ka meatia e au ki a rātou i a rātou i te kikokiko—

18 Nā reira, e aku teina aroha, ko te kupu tēnei a tō tātou Atua: Māku ō koutou uri e whakamamae ki te ringa o ngā Tauiwi; hei aha koa, ka whakangāwari au i ngā ngākau o ngā Tauiwi, kia rite ai rātou ki tētahi matua ki a rātou; nā reira, ka manaakitia ngā Tauiwi, ā, ka taua ngātahitia rātou me te whare o Iharaira.

19 Nā reira, ka whakatapungia tēnei whenua ki ō uri, ā, ki te hunga e taua ngātahitia me ō uri, āke tonu atu, nā ko tō rātou whenua tuku iho; nā, he whenua kōwhiria, tā te Atua ki ahau, i runga i ērā atu whenua, nā reira ka meinga ahau ngā tāngata katoa e noho ana i reira kia koropiko ai ki ahau, tā te Atua.

20 Ā ināianei, e aku teina aroha, kitea ana kua homai nei e tō tātou Atua aroha ki a tātou he mātauranga nui e pā ana ki ēnei mea, kia mahara tātou i a ia, me te whakatakoto iho i ō tātou hara, ā, kaua e tuohu i ō tātou upoko, nā te mea kāore tātou i te makaia atu; hei aha koa, kua āia atu tātou ki waho i tō tātou whenua tuku iho; engari kua ārahina tātou ki tētahi whenua pai ake, nā te mea kua whakamahia e te Ariki te moana hei ara mō tātou, ā, kei runga tātou i tētahi moutere o te moana.

21 Engari he nui ngā whakaari a te Ariki ki te hunga kei runga i ngā moutere o te moana; nā reira i te mea e kīa nei ko ngā moutere, me tika pū ia he maha ake i tēnei, ā, kua nohoia anōtia nei e ō tātou tuākana.

22 Nana rā, kua ārahina atu e te Ariki te Atua mai i te whare o Iharaira mai i tētahi wā ki tētahi wā, e ai ki tōna hiahia me tōna kaingākau. Ā nana ianei, e maumahara ana te Ariki i ngā mea katoa kua whatia atu, nā reira e maumahara anō ia i a tātou.

23 Nō reira, kia hari ō koutou ngākau, me te mahara e wātea ana koutou ki te mahi mō koutou ake anō—ki te whiriwhiri i te huarahi o te matenga mau tonu, i te huarahi rānei o te oranga tonutanga.

24 Nā reira, e aku teina aroha, houhia e koutou te rongo ki tā te Atua hiahia, ā, kaua ki te hiahia o te rēwera me te kikokiko; me te mahara, hei muri i tā koutou hohou rongo ki te Atua, nā, mā roto anake, mā te atawhai o te Atua koutou e whakaorangia ai.

25 Nā reira, mā te Atua rā koutou e whakaara ake i te mate mā te mana o te aranga, ā, mai i te matenga mau tonu anō hoki mā te mana o te whakamārietanga, kia whakawhiwhia koutou ki roto i te kīngitanga mutunga kore o te Atua, kia whakamoemititia ia mā tōna atawhai atua. Āmine.