1 Hei aha koa, ka kore te makarotanga e rite ki tōna whakamamaetanga, i te wā i paku whakamamae ia i te whenua o Hepuruna, me te whenua o Napatari, ā, a muri ake i tino whakamamaetia rawatia ake mā te ara o te Moana Whero i tua atu o Hōrano i Kariri o ngā iwi.

2 Kua kitea te māramatanga nui e ngā tāngata i hīkoi ai i te pōuritanga; ko te hunga e noho ana i te whenua o te ātārangi o te mate, kua whiti te mārama ki runga i a rātou.

3 Kua whakarea koe i te iwi, ā, kua whakanuia te koa—e koa ana rātou i mua i a koe e ai ki te koa i te hauhakenga, ā, ānō nei ngā tāne e koa ana i a rātou e whakawehewehe ana i ngā parakete.

4 Nā, kua whati koe i te ioka o tana kawenga, me te rākau o tōna pokohiwi, te tokotoko o tōna kaiwhakapēhi.

5 Nā, e ai ana ngā whawhai katoa a te toa ki te ngangau rangirua, ā, ko ngā kākahu kua whakatītakatakahia i roto i te toto; engari ka pēnei tēnei ki te tahunga me te kai nā te ahi.

6 Nā, kua whānau mai ki a tātou he tamaiti, kua homai nei ki a tātou he tama; ā, kei runga i tōna pokohiwi ko te kāwana; ā, ka karangatia tōna ingoa, Mīharo, Kaiwhakatakoto Whakaaro, Te Atua Kaha Rawa, Te Matua Ora Tonu, Te Wheao o te Rongo.

7 Kāore he mutunga tō te whakanuitanga o te kāwana me te rongomau, i runga i te torōna o Rāwiri, ā, i runga i tōna kīngitanga hei whakahaua atu ia, ā, ki te whakapūmauhia ia i runga i te whakawākanga me te tika nō nāianei tonu atu, mō āke tonu atu pū anō. Mā te matangareka o te Ariki o ngā Mano tēnei e mahi.

8 Kua tuku te Ariki i tana kupu ki a Hākopa, ā, kua whakamāramatia i runga o Iharaira.

9 Ā, ka mōhio ngā tāngata katoa, ko Eparaima pū anō me ngā kainoho o Hamāria, e kī ana i runga i te whakapehapeha me te ngākau whakakake:

10 Kua taka iho ngā pereki, engari ka hanga mātou ki te kohatu tārai; kua poroa iho ngā hikamō, engari ka tīni mātou hei hīra.

11 Nō reira ka whakaarahia ake e te Ariki ngā hoariri o Rētini ki a ia, ā, ka whakakotahi i ōna hoariri;

12 Ko ngā Hiriana i mua me ngā Pirihitini i muri; ka horomia a Iharaira e rātou ki te māngai tūwhera. Nā tēnei katoa kāore tōna riri e tahuritia atu nei, engari e torona tonutia ana tōna ringa.

13 Nā te mea kāore te iwi e tahuri atu ki a ia e patua ana rātou, kāore rānei rātou e whai atu ai i te Ariki o ngā Mano.

14 Nō reira ka tapahia e te Ariki mai i Iharaira te upoko me te whiore, te peka me te wīwī i te rā kotahi.

15 Te kaumātua, ko ia te upoko; ā, ko te poropiti e whakaako teka ana, ko ia te whiore.

16 Nā, ka kōtiti rātou i ngā kaiārahi o tēnei iwi; ā, ka whakangaromia te hunga e ārahina ai e rātou.

17 Nō reira kāore he koa tō te Ariki i ā rātou taiohi tāne, kāore rānei he aroha mō ngā mea matua kore me ngā pouaru; nā te mea he ngutu kau, ā, he kaimahi kino rātou katoa, ā, he wairangi ngā kōrero a ngā māngai katoa. Nā tēnei katoa kāore tōna riri e tahuritia atu, engari e torona tonutia ana tōna ringa.

18 Nā, ka tahuna te whakariharihatanga ānō nei te ahi; ka horomia ngā tūmatakuru me ngā tātarāmoa, ā, ka kā anō i ngā rākau pūruru o te ngahere, ā, ka kake ake ānō nei te rerenga ake o te pawa.

19 Mā te riri o te Ariki o ngā Mano te whenua e whakapōurihia nei, ā, ka ai ngā tāngata ānō nei te kai nā te ahi; kāore tētahi tangata e tohu i tōna tuakana.

20 Ā, ka katohia e ia ki te ringa matau, ā, ka hiakai ia; ā, ka kai ia i te ringa mauī, ā, ka kore e mākona; ka kai ngā tāngata katoa i te kikokiko o tōna ake ringa—

21 Ko Manahe, ko Eparaima; ā, ko Eparaima, ko Manahe; ko rāua tahi ki a Hura. Nā tēnei katoa kāore tōna riri e tahuritia atu, engari e torona tonutia ana tōna ringa.