1 Ināianei ā, i pahawa ake, nā, ka hoki atu a Arami i te whenua o Kiriona, nō muri iho i tana whakaako i te iwi o Kiriona i ngā mea maha tē taea te tuhi, kua whakapūmautia ngā tikanga o te hāhi, e rite ana ki tāna i mahi ai i mua i te whenua o Harahemara, āe rā, ka hoki atu ia ki tōna ake whare kia whakatā ai ia i āna mahi i mahia ai e ia.

2 Ā, ka whakamutua pēneitia te tau tuaiwa o te whakahaeretanga a ngā kaiwhakawā i runga i te iwi o Nīwhai.

3 Ā, i pahawa ake i te tīmatanga o te tau tuangahuru o te whakahaeretanga a ngā kaiwhakawā i runga i te iwi o Nīwhai, nā, ka wehe atu a Arami i reira kātahi ka hikipapa atu ki roto i te whenua o Mereki, i te taha uru o te awa o Hairona, i te taha uru anō e tata ana ki ngā rohe o te koraha.

4 Ā, ka tīmata ia ki te whakaako i te iwi i te whenua o Mereki e ai ki te ritenga tapu o te Atua, i karangatia ai ia; ā, ka tīmata ia ki te whakaako i te iwi puta noa i te whenua katoa o Mereki.

5 Ā, i pahawa ake, nā, ka haere mai ngā tāngata katoa ki a ia puta noa i ngā rohe katoa o te whenua kei te taha e tata ana ki te koraha. Ā, ka rumakina rātou puta noa i te whenua katoa;

6 Nā konā wehe atu ai ia i te otinga o ana mahi i Mereki, kātahi ka haere ai mō ngā rā e toru ki te taha raki o te whenua o Mereki; ā, ka tae atu ia ki tētahi pā i karangatia ai ko Amonaiha.

7 Nā, he tikanga anō nō te iwi o Nīwhai kia karangatia ō rātou whenua, me ō rātou pā, me ō rātou papakāinga, āe rā, ko ō rātou pā iti katoa anō hoki, ki te ingoa o te tangata tuatahi i nōhia ai ērā mea; ā, pēnei anō i te whenua o Amonaiha.

8 Ā, i pahawa ake, nā, i te taenga atu a Arami ki te pā o Amonaiha ka tīmata ia ki te kauhau atu i te kupu a te Atua ki a rātou.

9 Nā, kua kaha mau i a Hātana ngā ngākau o te iwi o te pā o Amonaiha; nō reira kīhai rātou i aro ki ngā kupu a Arami.

10 Hei aha koa i kaha mahi a Arami i roto i te wairua, e nonoke ana ki te Atua i runga i te inoi kaha, kia maringi iho tōna Wairua ki runga i te iwi i roto i te pā; kia tukuna e ia kia rumakina rātou e ia ki te rīpenetātanga.

11 Hei aha koa, i whakapakekehia e rātou ō rātou ngākau, e mea atu ana ki a ia: Nana, e mōhio ana mātou ko Arami koe; ā, e mōhio ana anō mātou ko koe te pirihi teitei i runga i te hāhi kua whakapūmautia e koe i ngā wāhi maha o te whenua, e ai ki ō tikanga; ā, ehara mātou nō tō hāhi, ā, kāore mātou i te whakapono i ngā tikanga e pērā rawa ana te heahea.

12 Ināianei ā, e mōhio ana mātou nā te mea ehara mātou nō tō hāhi kāore ō mana i runga i a mātou; ā, nāu anō te nohoanga-whakawā i tuku atu ki a Nīwhaihā; nō reira ehara koe i te kaiwhakawā matua i runga i a mātou.

13 Nā, i te wā i kōrero ai te iwi i tēnei, me te taringa turi ki āna kupu katoa, me te tāwai i a ia, me te tuwha ki runga i a ia, me te mea anō kia panaia atu ia ki waho i tō rātou pā, ka māwehe atu ia i reira kātahi ka hikipapa atu whakatepā kua karangatia ko Ārona.

14 Ā, i pahawa ake, nā, i a ia e haere ana ki reira, i te pēhia iho ia e te pōuri, e taumaha ana i ngā whakapātaritari nui me te auē nui o te wairua, nā te whakarihariha o te iwi kei roto nei i te pā o Amonaiha, i pahawa ake i a Arami e whakapēhia pēneitia ana e te pōuri, nana ka puta mai tētahi anahera o te Ariki ki a ia, e mea ana:

15 Kua manaakitia koe, e Arami; nō reira, e ara ake i tō māhunga kia hari, nā te mea e whaitake nui ana koe kia hari; nā te mea kua ū koe ki te pupuri i ngā whakahaunga a te Atua mai i te wā i whiwhi ai koe i tō karere tuatahi i a ia. Nana, ko au ia nāna i tuku ki a koe.

16 Ā nana, kua tonoa au kia whakahaua koe kia hoki atu ai ki te pā o Amonaiha, me te kauhau atu anō ki te iwi o te pā; āe rā, kauhautia atu ki a rātou. Āe rā, me kī atu ki a rātou, ki te kore rātou e rīpenetā ka whakangaro te Atua i a rātou.

17 Nana rā, kei te rangahau rātou i tēnei wā kia taea ai e rātou te herekoretanga o te iwi te whakangaro, (nā e ai tā te Ariki) koia nei e rerekē ana ki ngā ture, me ngā whakawākanga, me ngā whakahaunga kua homai e ia ki tana iwi.

18 Nā, i pahawa ake, nā, i muri iho i tā Arami whiwhi i tana karere mai i te anahera a te Ariki ka hoki wawe atu ia ki te whenua o Amonaiha. Ā, ka tomo atu ia i te pā mā tētahi atu huarahi, āe rā, mā te huarahi ki te tonga o te pā o Amonaiha.

19 Ā, i a ia e tomo atu ana i te pā ka hiakai ia, ā, ka kī atu ia ki tētahi tangata: Māu e homai he kai ki tētahi pononga wairua iti a te Atua?

20 Ā, ka kī atu te tangata ki a ia: He Nīwhai ahau, ā, e mōhio ana ahau he poropiti koe nā te Atua, nā te mea ko koe te tangata i kōrerohia ai e tētahi anahera i tētahi whakakitenga: Māu hei whakawhiwhi. Nō reira, me haere tāua ki roto i tōku whare, ā, māku koe e whāngai; ā, e mōhio ana ahau he manaakitanga koe ki ahau me tōku whare.

21 Ā, i pahawa ake, nā, i whakawhiwhia ia e te tangata ki roto i tōna whare; ā, ko Amureke te ingoa o te tangata; ā, nāna ngā paraoa me ngā mīti i hora ai i mua i a Arami.

22 Ā, i pahawa ake, nā, i kai a Arami i te paraoa, ā, ka mākona; ā, ka manaakitia e ia a Amureke rātou ko tōna whare, ā, ka tuku whakawhetai ia ki te Atua.

23 Ā, i muri i tana kai, ā, mākona ana ia ka kī atu ia ki a Amureke: Ko Arami ahau, ko au te pirihi teitei i runga i te hāhi o te Atua puta noa i te whenua.

24 Ā nana, kua karangatia au kia kauhautia atu te kupu a te Atua ki waenganui i tēnei iwi katoa, e ai ki te wairua o te whakakitenga me te wairua o te poropititanga; ā, i konei au i tēnei whenua engari kīhai rātou i aro mai ki ahau, engari i panaia atu au ki waho, ā, whano au ka huri i tōku tuarā ki tēnei whenua mō āke tonu atu.

25 Engari nana, kua whakahaua ahau kia huri mai anō me te poropiti ki tēnei iwi, āe rā, me te whakaatu atu ki a rātou e pā ana ki ō rātou hara.

26 Ināianei ā, e Amureke, nā te mea kua whāngai mai koe i ahau, ā, kua tukuna au kia kuhuna atu tō whare, kua manaakitia koe; nā te mea i te hiakai au, nā te mea i nohopuku au mō ngā rā maha.

27 Ā, he maha ngā rā i noho ai a Arami i a Amureke i mua i tana tīmata ki te kauhau atu ki te iwi.

28 Ā, i pahawa ake, nā, ka tupu haere te kino o te iwi.

29 Ā, ka tau te kupu ki a Arami, e mea ana: Haere; me kī atu anō ki taku pononga a Amureke, haere atu me te poropiti ki tēnei iwi, e mea ana—E rīpenetā koutou, nā ko te kupu tēnei a te Ariki, ki te kore koutou e rīpenetā ka toro atu au ki tēnei iwi i runga i tōku riri; āe rā, e kore au e huri atu i tōku riri nanakia.

30 Ā, ka haere whakamua atu a Arami, i haere anō hoki a Amureke, ki waenganui i te iwi, ki te whakapuaki atu i te kupu a te Atua ki a rātou; ā, i kikī rātou i te Wairua Tapu.

31 Ā, i tukuna atu he mana ki a rāua, nā konā kīhai i taea rāua e ngā poka herehere; kāore rānei i taea rāua te whakamate e te tangata; hei aha koa kīhai rāua i whakamahi i tō rāua mana tae atu ki te wā i herea ai rāua e ngā herehere kātahi ka makaia ki roto i te whareherehere. Nā, i pēneitia kia whakaatu atu te Ariki i tōna mana ki a rātou.

32 Ā, i pahawa ake, nā, i haere whakamua atu rāua, ā, ka tīmata ki te kauhau atu me te poropiti atu ki te iwi, e ai ki te wairua me te mana i homai ai e te Ariki ki a rāua.