Karaipiture
Arami 6


Upoko 6

Ka whakamākia te hāhi i Harahemara, ā, ka whakatikahia—Ka haere a Arami ki Kiriona ki te kauhau. Takiwā 83 M.K.

1 Ināianei ā, i pahawa ake, nā, i muri iho i tā Arami whakakapi i āna kōrero ki te iwi o te hāhi, kua whakapūmautia i te pā o Harahemara, i whakamanahia ngā pirihi me ngā ērata, mā te whakapākanga o ngā ringaringa e ai ki te ritenga o te Atua, hei tumuaki, ā, hei kaitirotiro i runga i te hāhi.

2 Ā, i pahawa ake, nā, ko ngā tāngata ehara nō te hāhi, ā, ko te hunga i rīpenetātia i ō rātou hara, ā, ka rumakina ki te rīpenetātanga, ā, ka whakawhiwhia ki roto i te hāhi.

3 Ā, i pahawa ake, nā, ko ngā tāngata nō te hāhi kīhai i rīpenetātia i ō rātou whakarihariha me te whakaiti i a rātou anō i mua i te aroaro o te Atua—ko tāku e kōrero nei ko te hunga i neke ake i te whakapehapeha o ō rātou ngākau—koia te hunga i whakaparahakotia, ā, kua mukua ō rātou ingoa, kia kore ai ō rātou ingoa e tatauria ai i waenganui i te hunga tika.

4 Ā, i tīmata pēnei rātou ki te whakapūmau i ngā tikanga o te hāhi i roto i te pā o Harahemara.

5 Nā, kei te hiahia ahau kia mārama ai koutou i tukuna noatia atu ai te kupu a te Atua ki te katoa, nā, kīhai i kaiponuhia ki tētahi te tikanga mō te huihui tahi i a rātou anō ki te whakarongo ki te kupu a te Atua.

6 Hei aha koa i whakahaua ngā tamariki a te Atua kia putuputu tā rātou huihui tahi i a rātou anō, me te hono tahi i roto i te nohopuku me te inoi kaha mō te oranga o ngā wairua o te hunga kīhai i mōhio ki te Atua.

7 Ināianei ā, i pahawa ake, nā, i te wā i mea ai a Arami i ēnei whakaritenga ka wehe atu i a rātou, āe rā, mai i te hāhi i roto i te pā o Harahemara, kātahi ka haere atu ki te taha rāwhiti o te awa Hairona, ki roto i te raorao o Kiriona, i hangaia i reira tētahi pā, i karangatia taua pā ko te pā o Kiriona, i tū ai taua pā i te raorao kua karangatia nei ko Kiriona, kua karangatia mō te tangata i whakamatea e te ringa o Neho ki te hoari.

8 Ā, ka haere a Arami, ā, ka tīmata ki te whakapuaki i te kupu a te Atua ki te hāhi i whakapūmauhia ai i te raorao o Kiriona, e ai ki te whakakitenga o te pono o te kupu kua kōrerotia e ōna tūpuna, e ai anō hoki ki te wairua o te poropititanga i roto i a ia, e ai ki te whakaaturanga o Ihu Karaiti, te tama a te Atua, ko ia e haere mai ai ki te hoko i tōna iwi i ō rātou hara, me te ritenga tapu i karangatia ai ia. Ā, kua tuhia pēneitia. Āmine.