1 Nā, i pahawa ake i te tau tuaono o te whakahaeretanga a ngā kaiwhakawā i runga i te iwi o Nīwhai, kāore he tautohetohenga, he pakanga rānei i te whenua o Harahemara;

2 Engari i te mamae te iwi, āe rā, i te mamae nui i te ngaronga o ō rātou huānga, i te ngaronga anō hoki o ā rātou kāhui o ia tū, o ia tū, i te ngaronga o ō rātou māra kākano, kua takatakahia e te waewae, ā, i whakangaromia e ngā Rāmana.

3 Ā, i whaitake ngā tāngata katoa ki te tangi nā te nui o ō rātou mamae; ā, i whakapono rātou ko ngā whakawākanga ia a te Atua kua tonoa iho ki runga i a rātou nā ō rātou whakarihariha me ō rātou mōrikarika; nō reira kua whakaohokia rātou ki tētahi maharatanga mō tō rātou haepapa.

4 Ā, ka tīmata rātou ki te whakapūmau katoa i te hāhi; āe rā, he tokomaha ngā mea i rumakina ai i ngā wai o Hairona, ā, ka whakahonoa ki te hāhi o te Atua; āe rā, i rumakina e te ringa o Arami, kua whakatapua hei pirihi teitei i runga i te iwi o te hāhi, e te ringa o tōna matua a Arami.

5 Ā, i pahawa ake i te tau tuawhitu o te whakahaeretanga a ngā kaiwhakawā kua tata neke atu i te toru mano, rima rau ngā wairua kua whakahonoa e rātou anō ki te hāhi o te Atua, ā, ka rumakina. Ā, i pēnei te whakamutunga o te tau tuawhitu o te whakahaeretanga a ngā kaiwhakawā i runga i te iwi o Nīwhai; ā, hua tonu te rangimārie i taua wā katoa.

6 Ā, i pahawa ake i te tau tuawaru o te whakahaeretanga a ngā kaiwhakawā, nā, ka whakapehapeha haere te iwi o te hāhi, nā ō rātou taonga nui whakaharahara, me ā rātou hiraka papai, me ā rātou rīnena miro-pai, ā, nā ā rātou kāhui maha o ia tū, o ia tū, me ā rātou kōura, me ā rātou hiriwā, me ngā tūmomo mea utu nui katoa, kua whiwhi nei rātou i runga i tō rātou kaha ki te mahi; ā, nā ēnei mea katoa i nuku ake rātou i te whakapehapeha o ō rātou karu, nā te mea i tīmata tā rātou whakakākahu i ngā kākahu tino utu nui.

7 Nā, koinei te take i mamae nui ai a Arami, āe rā, ki te tokomaha anō hoki o te hunga i whakatapua e Arami hei kaiako, hei pirihi, hei erata i runga i te hāhi; āe rā, he tokomaha rātou i mamae nui i te pōuri mō te whakarihariha i kite ai rātou kua tīmata ki te uru mai ki waenganui i tō rātou iwi.

8 Nā te mea i kite ai rātou i runga i te pōuri nui, nā, kua tīmata te iwi o te hāhi kia neke ake i runga i te whakapehapeha o ō rātou karu, me te whakatau i ō rātou ngākau ki runga i ngā taonga me ngā mea tekateka o te ao, nā konā ka whakahāwea haere rātou, tētahi ki tētahi, ā, ka tīmata rātou ki te whakatoi i te hunga kīhai i hāngai ō rātou whakapono ki tō rātou hiahia, ā, ki ngā mea e āhuareka ana ki a rātou.

9 Ā pēnei, i tēnei te tau tuawaru o te whakahaeretanga a ngā kaiwhakawā, ka hua ake ngā tautohetohenga nui i waenganui i te iwi o te hāhi; āe rā, he pūhaehae, he totohe, he mauāhara, he whakatoinga, he whakapehapeha, he nui ake i te whakapehapeha o te hunga ehara nei nō te hāhi o te Atua.

10 Ā pēnei te whakamutunga o te tau tuawaru o te whakahaeretanga a ngā kaiwhakawā; he tūtukitanga-waewae nui te whakarihariha o te hāhi ki te hunga ehara nei nō te hāhi; ā pēnei tā te hāhi hē haere i tana kāneke whakamuatanga.

11 Ā, i pahawa ake i te tīmatanga o te tau tuaiwa, i kite a Arami i te whakarihariha o te hāhi, ā, i kite anō ia, nā, i te ārahina te hunga whakapono kore e ngā mahi a te hāhi mai i tētahi mahi kino ki tētahi atu, e kukume pēnei mai ana i te whakangaromanga o te iwi.

12 Āe rā, i kite anō ia he nui te rerekētanga i waenganui i te iwi, e neke ake ana ētahi i a rātou anō i runga i tō rātou whakapehapeha, e whakahāwea ana i ētahi atu, e huri tuarā ana ki te hunga hapa, ki te hunga kākahu kore me te hunga e hiakai ana, me te hunga e hiainu ana, me te hunga e tūroro ana, ā, e whakamamaetia ana.

13 Nā, he take auē nui tēnei i waenganui i te iwi, i ētahi atu e whakaiti ana i a rātou anō, e āwhina ana i te hunga e hiahia ana ki tā rātou āwhina, e pērā ana i tā rātou wāwāhi atu i ā rātou rawa ki te hunga rawakore me te hunga hapa, e whāngai ana i te hunga hiakai, ā, e manawanui ana ki ngā tūmomo whakamamaetanga katoa, mō te Karaiti te take, koia e haere mai ai e ai ki te wairua poropititanga;

14 E titiro atu ana ki taua rangi, e whakawhiwhi pēnei ana i tētahi murunga i ō rātou hara; e kikī ana i te hari nui nā te aranga o te hunga mate, e ai ki te hiahia me te mana me te whakaputanga o Ihu Karaiti mai i ngā here o te mate.

15 Ināianei ā, i pahawa ake a Arami, kua kitea ngā whakamamaetanga o ngā kaiaruaru māhaki a te Atua, me ngā whakatoinga kua pūrangatia ki runga i a rātou e te toenga atu o tana iwi, e kitea ana anō hoki ō rātou rerekētanga, ka tino pōuri haere ia; hei aha koa kīhai i mutu i te Wairua o te Ariki te āwhina i a ia.

16 Ā, ka whiriwhiri ia i tētahi ruānuku i waenganui i ngā erata o te hāhi, ā, ka hoatu mana ki a ia e rite ai ki te reo o te iwi, kia whaimana ai ia ki te hanga ture e hāngai ana ki ngā ture kua tukuna kētia, ā, kia whakahaerehia ērā e ai ki te whakariharihatanga me ngā hara o te iwi.

17 Nā, ko Nīwhaihā te ingoa o tēnei tangata, ā, ka whakataua ia hei kaiwhakawā matua; ā, ka noho ia i te nohoanga-whakawā ki te whakawā me te whakahaere i te iwi.

18 Nā, kīhai a Arami i tuku iho ki a ia te tūranga o te pirihi teitei i runga i te hāhi, engari i puritia tonutia e ia anō te tūranga o te pirihi teitei; engari nāna te nohoanga-whakawā i tuku ki a Nīwhaihā.

19 Ā, ka pēneitia e ia kia haere whakamua atu ia ki waenganui i tana iwi, ki waenganui i te iwi o Nīwhai, kia kauhau atu ia i te kupu a te Atua ki a rātou, kia whakaohokia ake rātou ki te maharatanga o tō rātou haepapa, ā, kia turakina iho, e te kupu a te Atua, te whakapehapeha katoa me te tinihanga me ngā tautohetohenga katoa i waenganui i tana iwi, kāore i kitea atu he huarahi kē hei whakahokia mai rātou hāunga mā te whakapēhi iho i runga i te whakaaturanga tika ki a rātou.

20 Ā pēnei, i te tīmatanga o te tau tuaiwa o te whakahaeretanga a ngā kaiwhakawā i runga i te iwi o Nīwhai, ka tukuna atu e Arami te nohoanga-whakawā ki a Nīwhaihā, ā, ka aro pūmau katoa ia ki te tohungatanga teitei o te ritenga tapu o te Atua, ki te whakaaturanga o te kupu, e ai ki te wairua o te whakakitenga me te poropititanga.