1 Ināianei ā, e taku tama, he paku kōrero anō tāku e pā ana ki te whakahokinga o ērā mea kua kōrerohia ake nei; nana rā, kua whakapeau ētahi i ngā karaipiture, ā, kua kōtiti kē rawa atu nā tēnei mea. Ā, e kite ana ahau i te āwangawanga tō hinengaro e pā ana ki tēnei mea. Engari nana, ka whakamāramahia atu tēnā ki a koe.

2 Ko taku kupu tēnei ki a koe, e taku tama, e tika ana te tikanga o tēnei whakahokinga ki tā te Atua tika; nā te mea e tika ana kia whakahokia ngā mea katoa ki ō rātou āhuatanga tika. Nana, e tika ana, ā, e tōtika ana, e rite ana ki te mana me te aranga o te Karaiti, nā, kia whakahokia te wairua o te tangata ki tōna tīnana, ā, kia whakahokia ngā wāhanga katoa o te tīnana ki a ia anō.

3 Ā, e tika ana ki tā te Atua tika, nā, kia whakawākia ngā tāngata katoa e rite ana ki ā rātou mahinga; ā, mehemea i pai ā rātou mahinga i tēnei oranga, ā, mehemea i pai anō ngā hiahia o ō rātou ngākau, ka whakahokia anōtia rātou, hei te rā whakamutunga, ki taua mea e pai ana.

4 Ā, mehemea e kino ana ā rātou mahi ka whakahokia ki a rātou he kino. Nō reira, ka whakahokia ngā mea katoa ki te āhuatanga tika, tēnā mea, tēnā mea ki tōna āhuatanga tūturu—ka whakaarahia ake te matemate ki te matekore, te poke ki te pokekore—ka whakaarahia ake ki te harikoa mutunga kore kia whiwhi ai ki te kīngitanga o te Atua, ki te pōuritanga mutunga kore rānei, kia whiwhi ai ki te kīngitanga o te rēwera, ko tētahi i tētahi ringa, ko tērā atu i tērā atu—

5 Ka whakaarahia ake tētahi ki te harikoa e rite nei ki ōna hiahia harikoa, ki te pai rānei e rite ana ki ōna hiahia pai; ā, ko tētahi atu, ki te kino e rite ana ki ōna hiahia kino; nā te mea kua hiahia ia ki te mahi kino mō te roanga o te rā, waihoki, ka whiwhi anō ia i tōna utu kino ina tau mai te pō.

6 Ā, e rite ana ki tērā atu ringa. Mehemea kua rīpenetā ia i ōna hara, ā, kua hiahia ki te tika tae noa atu ki te paunga ake o ōna rā, waihoki ka utua ia ki te tika.

7 Koinei te hunga kua hokona e te Ariki; āe rā koinei te hunga kua tangohia atu, kua whakaputaina atu i taua pō mutunga kore o te pōuritanga; ā, pēnei rātou tū ai, hinga ai rānei; nana rā, ko rātou ō rātou ake kaiwhakawā, ahakoa ki te mahi pai, ki te mahi kino rānei.

8 Nā, e kore e taea ngā tikanga a te Atua te whakarerekē; nō reira, kua whakaritea te huarahi mō te tangata e hiahia ai kia hīkoi i reira, ā, ka whakaorangia.

9 Ināianei ā nana, e taku tama, kaua e māia ki te mahi i tētahi atu hē ki tōu Atua i runga i ēnei āhuatanga o te akoranga, kua māia kē nei koe ki te mahi hē i mua.

10 Kaua e whakaaro, nā te mea kua kōrerohia e pā ana ki te whakahokinga, nā, ka whakahokia koe mai i te hara ki te harikoa. Nana, ko taku kupu tēnei ki a koe, kīhai rawa te whakarihariha i te harikoa.

11 Ināianei ā, e taku tama, ko ngā tāngata katoa i roto i tētahi āhuatanga māori, taku kupu rānei, i tētahi āhuatanga kikokiko, kei roto anō rātou i te au o te kawa me ngā herenga o te hē; kāore i a rātou te Atua i te ao, ā, kua haere kōtiti kē atu i tō te Atua āhua; nō reira, kei roto rātou i tētahi āhuatanga rerekē atu i te āhua o te harikoa.

12 Ināianei ā nana, ko te tikanga o te kupu whakahokinga ko te tangohanga atu i tētahi mea i tōna āhuatanga māori me te whakanoho iho ki roto ki tētahi āhuatanga kē atu, ki te whakanoho iho rānei i a ia ki roto ki tētahi āhuatanga e tauaro ana i tōna āhuatanga māori?

13 Auē, e taku tama, ehara tēnei i te tikanga; engari ko te tikanga o te kupu whakahokinga, arā, ko te whakahoki mai i te kino ki te kino, ngā hiahia kikokiko ki ngā hiahia kikokiko rānei, te āhua o te rēwera ki te āhua o te rēwera—te pai mō ērā mea e pai ana; te tika mō ērā mea e tika ana; te rite mō ērā mea e rite ana; te aroha mō ērā mea e aroha ana.

14 Nō reira, e taku tama, tirohia kia aroha atu koe ki ō tuākana; mahia tikahia, whakawākia tikahia, me te mahi pai i ngā wā katoa; ā, ki te mahi koe i ēnei mea katoa kātahi koe ka whiwhi i tō utu; āe rā, ka whakahokia te aroha ki a koe anō; ka whakahokia te tika ki a koe anō; ka whakahokia te whakawākanga tika ki a koe anō; ā, ka whakautua koe anō ki te pai.

15 Nā te mea ko tāu e tuku atu ka hoki mai anō ki a koe, ā, ka whakahokia; nō reira, ka whakahēngia rawatia te kaihara e te kupu, ā, kāore rawa tēnā e whakatika noa i a ia.