Karaipiture
Arami 60


Upoko 60

Ka komekome a Moronai ki a Pahorana e pā ana ki te whakaaro kore o te kāwanatanga ki ngā tauā—Ka tukuna te hunga tika e te Atua kia whakamatea—Me whakapau ngā Nīwhai i tō rātou kaha katoa me ō rātou mea katoa ki te whakaputa i a rātou anō i ō rātou hoariri—Ka whakatūpato a Moronai i te Kāwanatanga ka whawhai atu ia ki a rātou ki te kore rātou e tuku āwhina atu ki āna tauā. Takiwā 62 M.K.

1 Ā, i pahawa ake, nā, ka tuhi atu anō ia ki te kāwana o te whenua, ko Pahorana tērā, ā, koinei ngā kupu i tuhia ai e ia, e mea ana: Nana, e aro atu ana taku pukapuka ki a Pahorana, i te pā o Harahemara, ko ia te kaiwhakawā matua me te kāwana i runga i te whenua, ā, ki te hunga katoa kua kōwhiria mai nei e tēnei iwi hei kāwana, hei whakahaere i ngā āhuatanga o tēnei pakanga.

2 Nana rā, he kupu anō āku hei kōrerotanga atu ki a rātou mā runga i te kōrero whakahē; nana rā, e mōhio anō hoki koutou kua tohua koutou ki te whakahui ngātahi i ngā tāngata, me te whakamau i a rātou ki te hoari, ki te hemita, ki ngā tūmomo rākau whawhai o ia āhua, o ia āhua, me te tuku atu ki ngā Rāmana, ki ngā wāhi katoa o te whenua e haere mai ai rātou.

3 Ināianei ā nana, ko taku kupu tēnei ki a koutou, he maha ngā whakamamaetanga kua pā mai ki ahau, me aku tāngata anō hoki, me Heramana anō hoki me āna tāngata; āe rā, ko te matekai, te mateinu, me te ngenge, me ngā tūmomo whakamamaetanga katoa o ia āhua, o ia āhua.

4 Engari nana, mēnā koinei anake ō mātou whakamamaetanga kua kore mātou i komekome, kua kore rānei i amuamu.

5 Engari nana, he nui te parekura i waenganui i tō tātou iwi; āe rā, kua hinga ngā mea manomano i te hoari, ehara rānei i te pēnei me i tukua mai e koutou ki ā mātou tauā he kaha me te āwhina mō rātou. Āe rā, he nui tō whakaaro kore ki a mātou.

6 Ināianei ā nana, e hiahia ana mātou kia mōhio ai he aha te pūtake o tēnei whakaaro kore tino nanakia; āe rā, e hiahia ana mātou kia mōhio ai ki te pūtake o tō koutou āhuatanga whakaaro kore.

7 E āhei ana ianei i a koutou tēnei whakaaro, arā, te noho i runga i ō koutou torona i runga i tēnei āhuatanga tikanga whakaaro kore, i ō koutou hoariri e whakawhānui haere ana i ngā mahinga o te mate taiāwhio noa i a koutou? Āe rā, i a rātou e kōhuru ana i ō koutou teina manomano—

8 Āe rā, ko rātou nei kua titiro ake ki a koutou kia tiakina, āe rā, kua whakanohoia iho koutou i tētahi āhuatanga e āhei ai koutou te āwhina atu i a rātou, āe rā, kua tukuna pea e koutou he tauā ki a rātou, hei whakakaha i a rātou, ā, kua whakaorangia ngā mea manomano o rātou kei hinga i te hoari.

9 Engari nana, ehara tēnei i te katoa—kua kaiponu koutou i ō koutou ō i a rātou, nā konāhe tokomaha ngā mea kua whawhai atu, ā, kua maringi iho ō rātou toto, ō rātou oranga nā ngā hiahia nunui i a rātou mō te oranga o tēnei iwi; āe rā, kua pēneitia e rātou i te wā whano ka hemo i te matekai, nā tō koutou whakaaro kore tino nanakia ki a rātou.

10 Ināianei ā, e aku teina aroha—nā te mea e tika ana kia arohaina koutou; āe rā, e tika ana kia nui ake tō koutou tākaretanga hei whakaaro ki te oranga me te herekoretanga o tēnei iwi; engari nana, kua aro kore atu koutou ki a rātou nā konā kua tau iho ngā toto o ngā mea manomano ki runga i ō koutou māhunga hei rapu utu; āe rā, kua mōhio te Atua ki ā rātou karanga katoa, me ā rātou whakamamaetanga katoa—

11 Nana, i āhei i a koutou te whakaaro, arā, te noho i runga i ō koutou torona, ā, nā te painga whakaharahara o te Atua ka whakaputa noa i a koutou i runga i te noho noa iho? Nana, mehemea kua whakaarohia pēneitia kua auare ake tā koutou whakaaro.

12 E whakaaro ana koutou, nā te mea kua mate ā tātou teina tokomaha rawa atu, koia he mea nō tō rātou whakarihariha? Ko taku kupu tēnei ki a koutou, mehemea kua whakaaro pēnei koutou, kua auare ake tā koutou whakaaro; nā te mea ko taku kupu tēnei ki a koutou, he tokomaha ngā mea kua hinga i te hoari; ā nana he whakahēanga tēnā mō koutou;

13 Nā e tukuna ana e te Ariki te hunga tika kia whakamatea ai kia tau iho ai tōna tika me tōna whakawākanga ki runga i te hunga whakarihariha; nō reira ehara i te mea me whakaaro ake koutou kua ngaro te hunga tika nā te mea kua whakamatea rātou; engari nana, ka tomo atu rātou ki roto i te okiokinga o te Ariki tō rātou Atua.

14 Ināianei ā nana, ko taku kupu tēnei kia koutou, e hopohopo ana ahau kei tau iho mai ngā whakawākanga a te Atua ki runga i tēnei iwi, nā tō rātou kaha māngere, āe rā, ko te māngere pū anō o tō mātou kāwanatanga, me tō rātou whakaaro kore nanakia ki ā rātou teina, āe rā, ki te hunga kua whakamatea nei.

15 Nā, me i kore te kino i tīmata tuatahi mai ai i tō tātou upoko, kua taea e mātou te tū māia atu ki ō tātou hoariri kia kore ai rātou e whaikaha ki runga i a tātou.

16 Āe rā, me i kore te pakanga i pakaru iho mai i waenganui i a tātou; āe rā, me i kore ēnei tangata-kīngi, nā rātou nei te whakaheke toto nunui i waenganui i a tātou anō; āe rā, i taua wā i te tatau anō tātou ki a tātou anō, mehemea kua whakakotahi tātou i ō tātou kaha pērā i tā tātou i mua; āe rā, me i kore te hiahia ki te rapu kaha me te mana i rapua ai e aua tāngata-kīngi i runga i a tātou; me i pono ki te tikanga herekoretanga, me i whakakotahi mai ki a tātou, me te haere atu ki ō tātou hoariri, mahue te hāpai i ā rātou hoari ki a tātou, koia te pūtake whakaheke toto nunui i waenganui i a tātou anō; āe rā, me i haere atu tātou ki a rātou i runga i te kaha o te Ariki, kua whakamararatia atu ō tātou hoariri, nā te mea kua pērātia, e ai ki te whakatutukitanga i tana kupu.

17 Engari nana, i te haere mai ngā Rāmana ki runga i a tātou, e muru ana i ō tātou whenua, ā, kei te kōhuru rātou i tō tātou iwi ki te hoari, āe rā, ā tātou wāhine me ā tātou tamariki, waihoki e kahakina hereheretia atu ana ngā mea tokomaha, e mea ana i a rātou kia rongo ai i ngā tūmomo whakamamaetanga katoa, ā, pēnei nā te whakarihariha nunui o te hunga e whaiwhai ana i te kaha me te mana, āe rā, ko aua tāngata-kīngi anō.

18 Engari me aha au e kōrero atu anō ai e pā ana ki tēnei take? Nā te mea kāore mātou i te mōhio mēnā rānei kei te whaiwhai koutou anō i te mana. Kāore rānei mātou i te mōhio mēnā rānei he kaikaiwaiū anō hoki koutou ki tō whenua.

19 Kua whakaaro kore rānei koutou ki a mātou nā te mea kei te manawa koutou o tō tātou whenua, ā, kua karapotia nei e te whakahaumarutanga, nā konei kāore koutou e mea nei kia tukuna he kai ki a mātou, he tāngata anō hei whakakaha i ā tātou tauā?

20 Kua wareware i a koutou ngā whakahaunga a te Ariki tō koutou Atua? Āe rā, kua wareware i a koutou te hereheretanga o ō tātou tūpuna? Kua wareware i a koutou ngā wā maha kua whakaputaina mai tātou i ngā ringaringa o ō tātou hoariri?

21 E whakaaro ana rānei koutou ka whakaputa tonu te Ariki i a tātou, i a tātou e noho ana i runga i ō tātou torona, ā, kāore nei e whakamahi i ērā mea kua homai nei e te Ariki ki a tātou?

22 Āe rā, ka noho hakurara koutou i a koutou e karapotia ana e aua hunga manomano, āe rā, me ngā tekau mano, e noho hakurara ana anō hoki, ahakoa he manomano ngā tāngata huri noa i ngā rohe o te whenua e hingahinga ana i te hoari, āe rā, e taotū ana, ā, e toto ana?

23 E whakaaro ana rānei koutou ka titiro iho mai te Atua ki runga i a koutou me te mea nei he hē kore i a koutou e noho noa iho ana me te tirotiro i ēnei mea? Nana ko taku kupu tēnei ki a koutou, Kāo. Nā, kei te hiahia au kia mahara anō koutou i mea ai te Atua, nā, ka horoia tō roto oko i te tuatahi, kātahi ka horoia tō waho oko anō hoki.

24 Ināianei ā, ki te kore koutou e rīpeneta i tā koutou i mea ai, ā, kia tīmata te tū ake me te mahi, me te tuku mai i ngā kai me ngā tāngata ki a mātou, ā, ki a Heramana anō hoki, kia taea e ia te tautoko i aua wāhi o te whenua kua whakahokia mai e ia, ā, kia taea e tātou te whakahoki mai i te toenga atu o ō tātou kāinga i ēnei wāhi, nana ka tika anō kia kaua e tautohetohe tonu atu ki ngā Rāmana tae atu ki te wā kua horoia tuatahitia tō roto oko, āe rā, ko te upoko pū anō o tō tātou kāwanatanga.

25 Ā, ki te kore koutou e whakaae mai ki taku pukapuka, ā, kia puta mai me te whakaatu mai ki ahau i tētahi wairua tūturu o te herekoretanga, me te tākare ki te whakakaha me te whakatūwatawata i ō tātou tauā, me te tuku kai atu ki a rātou hei oranga mō rātou, nana māku ētahi o āku tāngata herekore e mahue mai nei hei pupuri i tēnei wāhanga o tō tātou whenua, ā, ka mahue i ahau te kaha me ngā manaakitanga o te Atua ki runga i a rātou, kia kore ai rātou e taea ai e tētahi atu mana—

26 Ā, ko tēnei nā tō rātou whakapono nui, me tā rātou manawaroa i ō rātou whakamamaetanga—

27 Ā, ka haere atu au ki a koutou, ā, mehemea he tangata kei waenganui i a koutou he hiahia tōna ki te herekoretanga, āe rā, mēnā rānei he korakora o te herekoretanga e toe ana, nana ka whakatupu ngangaretanga i waenganui i a koutou, tae atu ana ki te wā ka mate moa te hunga e hiahia ana ki te rapu i te kaha me te mana.

28 Āe rā, nana, kāore au e wehi ana i tō koutou kaha me tō koutou mana, engari e wehi ana au i tōku Atua; ā, ka hāpai ake au i tōku hoari e rite ana ki āna whakahaunga hei tiaki i te kara o tōku whenua, ā, i te mea nā ō koutou hara i aituā nui ai mātou.

29 Nana ko te wā tēnei, āe rā, kua tae mai te wā, nā, ki te kore koutou e whakaoho i a koutou anō hei tiaki i tō koutou whenua me ā koutou mea nohinohi, kua iriiri te hoari o te tika ki runga i a koutou; āe rā, ka taka iho ki runga i a koutou, ā, ka toro atu ki a koutou i runga i te whakangaromanga katoatanga.

30 Nana, e tatari ana ahau mō tā koutou āwhina; ā, ki te kore koutou e tuku āwhina mai hei oranga mō mātou, nana, ka haere atu au ki a koutou, i te whenua pū anō o Harahemara, ā, ka patua koutou ki te hoari, nā konā ka kore ō koutou mana hei whakawheauau i te kāneke whakamuatanga o tēnei iwi i roto i te kara o te herekoretanga.

31 Nana rā, kāore te Ariki e tuku kia ora koutou, ā, kia pakari haere koutou i roto i ō koutou hara hei whakangaro i tana iwi tika.

32 Nana, e whakaaro ana rānei koutou ka tohu te Ariki i a koutou, ā, ka puta mai anō i runga i te whakawākanga ki ngā Rāmana, i te mea nā ngā whakarerenga iho a ō rātou tūpuna i ahu mai ai tō rātou mauāhara, āe rā, kua tōaitia e te hunga kua tītore atu i a tātou, i a koutou e haututū ana he mea nā tō koutou aroha ki te korōria me ngā mea tekateka o te ao?

33 E mōhio ana rānei koutou kei te takahi koutou i ngā ture o te Atua, ā, e mōhio ana koutou e takahia ana ērā e koutou i raro i ō koutou waewae. Nana, e mea ana te Ariki ki ahau: Mehemea kāore te hunga kua whakataua e koutou hei kāwana e rīpenetā i ō rātou hara me ō rātou hē, ka haere ake koutou ki te whawhai ki a rātou.

34 Ināianei ā nana, ko au, a Moronai, kua akiakina, e ai ki te kawenata kua mea nei au ki te pupuri i ngā whakahaunga a tōku Atua; nō reira e hiahia ana au kia pūmau koutou ki te kupu a te Atua, me te tuku wawe ki ahau i ō koutou ō me ā koutou tāngata, ā, ki a Heramana anō hoki.

35 Ā nana, ki te kore koutou e pēnei ka haere wawe atu au ki a koutou; nana rā, kāore te Atua e tuku kia mate mātou i te hiakai; nō reira ka homai e ia ā koutou kai ki a mātou, ahakoa mēnā ka meatia i runga i te hoari. Nā, tirohia kia tutuki koutou i te kupu a te Atua.

36 Nana, ko Moronai ahau, tō koutou kaiwhakahau matua. Kāore au e whai atu ana i te mana, engari kia turakina iho ia ki raro. Kāore au e whaiwhai i te hōnore o te ao, engari ki te korōria o tōku Atua, me te herekoretanga me te oranga o tōku whenua. Ā pēnei ka whakakōpani au i taku pukapuka.