1 Ā, i pahawa ake, nā, ka meatia e kīngi Ramoni ana pononga kia tū atu ki te whakaatu atu mō ngā mea katoa i kite ai rātou e pā ana ki tēnei mea.

2 Ā, ka oti i a rātou te whakaatu atu mō ngā mea katoa i kite ai rātou, ā, i kite anō ia i tā Amona ū ki te tiaki i āna kāhui, me tōna kaha nui ki te tatau atu ki te hunga i whai nei ki te whakamate i a ia, i tino mīharo ia, ā, ka kī: Kāore e kore, he nui atu tēnei i te tangata. Nana, ehara rānei tēnei i te Wairua Nui e tonoa nei ngā whakawākanga nui ki runga i tēnei iwi, nā ā rātou kōhurutanga?

3 Ā, ka whakautu rātou i te kīngi, ā, ka kī: Ahakoa mēnā koia te Wairua Nui, he tangata rānei, kāore mātou i te mōhio; engari koinei ngā mea e mōhio nei mātou, e kore ia e taea e ngā hoariri o te kīngi te whakamate; e kore rānei ngā kāhui a te kīngi e taea ana e rātou te whakamarara atu i a ia e piri ana ki a mātou, nā tōna tino mōhio me tōna tino kaha; nō reira, e mōhio ana mātou he hoa ia ki te kīngi. Ināianei ā, E te kīngi, kāore mātou e whakapono ana he kaha nui tō te tangata, nā te mea e mōhio ana mātou kāōre ia e taea te patu.

4 Ināianei ā, i te rongonga a te kīngi i ēnei kupu, ka kī atu ia ki a rātou: E mōhio ana au ināianei ko te Wairua Nui ia; ā, kua heke iho ia i tēnei wā ki te tiaki i ō tātou oranga, kia kore ai au e whakamate i a koutou pērā i tāku ki ō koutou tuākana. Nā, koinei te Wairua Nui i kōrerotia ai e ō tātou tūpuna.

5 Nā, koinei te whakarerenga iho a Ramoni, kua riro nei i a ia i tōna matua, arā, tērā anō tētahi Wairua Nui. Ahakoa i whakapono rātou ki tētahi Wairua Nui, ā, i whakaaro rātou he tika ngā mea katoa e mahi ai rātou; Hei aha koa, ka tino wehi nui haere a Ramoni, i runga i te wehi kua hē ia i tana whakamate i āna pononga;

6 Nā te mea he tokomaha o rātou patua ai e ia mō ō rātou huānga i whakamarara ai i ā rātou kāhui i te wāi o ngā wai; ā, i patua pēneitia rātou nā te mea i whakamararatia atu ā rātou kāhui.

7 Nā, he mahi tērā nā ngā Rāmana te tū i te taha o ngā wai o Hepuha ki te whakamarara i ngā kāhui a te iwi, mā konā e taea ai e rātou te ā atu i ngā mea kua whakamararatia atu ki roto i tō rātou ake whenua, koia hoki tētahi ritenga pāhua i waenganui i a rātou.

8 Ā, i pahawa ake, nā, ka uia atu e Ramoni āna pononga, e mea ana: Kei hea tēnei tangata he kaha nui tōna?

9 Ā, ka kī atu rātou ki a ia: Nana, kei te whāngai ia i ngā hōiho. Nā, kua whakahaua e te kīngi āna pononga, i mua i tā rātou whakainutanga i ā rātou kāhui, kia whakaritea e rātou ō rātou hōiho me ō rātou hariata, ā, kia haria atu ia ki te whenua o Nīwhai; nā te mea i whakaritea tētahi hākari nui i te whenua o Nīwhai e te matua o Ramoni, koia te kīngi i runga i te whenua katoa.

10 Nā, i te rongonga a Ramoni i te whakarite a Amona i ōna hōiho me ōna hariata ka mīharo ia, nā te ū o Amona, e mea ana: Kāore e kore kīhai noa he pononga i waenganui i āku pononga katoa kua pēnei rawa te ū e rite ana ki tēnei tangata; nā te mea e mahara pū ana ia ki āku whakahaunga katoa kia whakamahia.

11 Nā, e mōhio rawa ana ahau ko te Wairua Nui tēnei, ā, e hiahia ana ahau kia tomo mai ia ki ahau, engari kāore ōku māia.

12 Ā, i pahawa ake, nā, ka oti i a Amona ngā hōiho me ngā hariata te whakarite mō te kīngi me āna pononga, ka tomo atu ia ki te kīngi, ā, ka kite ia kua rerekē te āhua o te kīngi; nō reira whano ia ka hoki atu i tōna aroaro.

13 Ā, ka kī atu tētahi o ngā pononga a te kīngi ki a ia, Rapana! koina tēnei, ina whakamāoritia, e te kīngi kaha, e te kīngi nui rānei, e whakaaro ana rātou he kaha ō rātou kīngi; ā, pēnei tana kī atu ki a ia: Rapana, e hiahia ana te kīngi kia noho mai nei koe.

14 Nō reira ka tahuri atu a Amona i a ia anō ki te kīngi, ā, ka kī atu ki a ia: He aha tāu e pai ai kia meatia e ahau mōu, E te kīngi? Ā, kāore te kīngi i whakahoki kupu ki a ia mō te kotahi hāora, e ai ki tō rātou wā, nā te mea kāore ia i mōhio he aha tāna e kī atu ai ki a ia.

15 Ā, i pahawa ake, nā, ka kī atu anō a Amona ki a ia: He aha tōu hiahia ki ahau? Engari kīhai te kīngi i whakahoki kupu ki a ia.

16 Ā, i pahawa ake, nā, i te kī tonu a Amona i te Wairua o te Atua, nō reira i mōhio ia ki ngā whakaaro o te kīngi. Ā, ka kī atu ia ki a ia: I te mea kua rongo koe nāku i tiaki āu pononga me āu kāhui me taku whakamate i ō rātou huānga tokowhitu ki te kōtaha me te hoari, me te tapahi iho i ngā ringa o ērā atu, kia tiakina āu kāhui me āu pononga; nana, koinei te take i hua ai ō whakamīharotanga?

17 Ko taku kupu tēnei ki a koutou, nā te aha i pēnā ai te nui o āu mīharotanga? Nana, he tangata au, ā, ko au tō pononga; nō reira, māku e mahi tāu katoa e pai ai mēnā rānei he tika.

18 Nā, i te rongonga a te kīngi i ēnei kupu, ka mīharo anō ia, nā te mea i kite ia i āhei a Amona ki te mōhio ki ana whakaaro; engari ahakoa tēnei, i tūwhera a Ramoni i tōna māngai, ā, ka kī atu ki a ia: Ko wai rā koe? Ko koe taua Wairua Nui, e mōhio nei ki ngā mea katoa?

19 Ka whakautu atu a Amona, ā, ka kī atu ki a ia: Kāore.

20 Ā, ka kī atu te kīngi: Me pēhea koe e mōhio ai ki ngā whakaaro o tōku ngākau? E pai ana kia māia tō kōrero me te kōrero mai ki ahau e pā ana ki ēnei mea; me kōrero mai anō ki a au nā tēhea kaha koe i whakamate ai, ā, i tapahi iho ai i ngā ringa o ōku huānga nā rātou āku kāhui i whakamarara ai—

21 Ināianei ā, mēnā ka kōrero mai koe e pā ana ki ēnei mea, ahakoa he aha tāu e hiahia nei māku e tuku ki a koe; ā, mēnā rānei e whaitake ana, māku koe e tiaki ki aku tauā; engari e mōhio ana au he nui ake tō kaha i a rātou; hei aha koa, ahakoa he aha tō hiahia māku e tuku ki a koe.

22 Nā, he tangata matatau a Amona, heoi, kāore i te mōrearea, ka kī atu ia ki a Ramoni: Ka whakarongo mai koe ki aku kupu, mēnā ka kōrero atu au ki a koe nā tēhea kaha au e mahi ai i ēnei mea? Ā, koinei te mea e hiahia nei au i a koe.

23 Ā, ka whakautu te kīngi ki a ia, ā, ka kī: Āe rā, ka whakapono au ki āu kupu katoa. Ā, pēnei ia i hopukina ai ki te tinihanga.

24 Ā, ka tīmata tā Amona kōrero atu ki a ia i runga i te māia, ā, ka kī atu ki a ia: E whakapono ana rānei koe he Atua?

25 Ā, ka whakautu ia, ā, ka kī atu ki a ia: Kāore au i te mōhio he aha te tikanga o tērā.

26 Kātahi a Amona ka kī: E whakapono ana rānei koe he Wairua Nui?

27 Ā, ka kī ia, Āe rā.

28 Kātahi a Amona ka kī: Ko te Atua tēnei. Ā, ka kī atu anō a Amona ki a ia: E whakapono ana rānei koe ko tēnei Wairua Nui, koia te Atua, nāna nei ngā mea katoa i te rangi me te whenua i hanga?

29 Ā, ka kī ia: Āe rā, kei te whakapono au nāna ngā mea katoa i te whenua i hanga; engari kāore au i te mōhio ki ngā rangi.

30 Ā, ka kī atu a Amona ki a ia: Ko te rangi te wāhi e nohonei te Atua me ana anahera tapu katoa.

31 Ā, ka kī atu a Ramoni: Kei runga ake tēnā i te whenua?

32 Kātahi a Amona ka kī: Āe rā, kei te titiro iho ia ki ngā tamariki katoa a te tangata; ā, e mōhio ana ia ki ngā whakaaro katoa me ngā hiahia o te ngākau; nā te mea he mea hanga aua mea katoa e tōna ringa mai i te orokotīmatanga.

33 Ā, ka kī atu a Ramoni: E whakapono ana au ki ngā mea katoa nāu nei i kōrero. Kua tonoa mai rānei koe e te Atua?

34 Kātahi a Amona ka kī: He tangata au; ā, i te tīmatanga i hangaia te tangata kia rite ki te āhua o te Atua, ā, kua karangatia au e tōna Wairua Tapu ki te whakaako i ēnei mea ki tēnei iwi, kia kukume ai i a rātou ki tētahi mātauranga o taua mea e tika ana, ā, e pono ana.

35 Ā, kei roto i ahau tētahi wāhi o taua Wairua e noho ana, e tuku mātauranga nei, ā, e tuku kaha nei ki ahau kia rite nei ki tōku whakapono me ōku hiahia kei roto nei i te Atua.

36 Nā, i te kōrerotanga ake a Amona i ēnei kupu, ka tīmata ia i te orokohanganga rā anō o te ao, i te hanganga anō o Arama, ā, ka kōrerohia atu ki a ia ngā mea katoa e pā ana ki te takanga o te tangata, ā, ka tākina e ia, ā, ka whakatakotoria ki mua i a ia ngā tuhinga me ngā karaipiture tapu o te iwi, kua kōrerotia nei e ngā poropiti, tae iho ana ki te wā i wehe atu ai tō rātou matua, a Rīhai, i Hiruharama.

37 Ā, i whakahuatia atu anō e ia ki a rātou (nā, ko te kīngi rātou ko āna pononga anō hoki) ngā haerenga katoa a ō rātou tūpuna i te koraha me ō rātou whakamamaetanga katoa i te matekai me te matewai me ō rātou uauatanga, i te aha, i te aha.

38 Ā, i whakahuatia anōtia e ia ki a rātou ngā mea e pā ana ki ngā tutūtanga a Rāman rāua ko Remuere, me ngā tama a Ihimaera, āe rā, i whakahuatia atu e ia ngā tutūtanga katoa ki a rātou; ā, i whakamāramatia atu e ia ki a rātou ngā tuhinga katoa me ngā karaipiture mai i te wā i wehe atu ai a Rīhai i Hiruharama tae noa iho ki tēnei wā.

39 Engari ehara tēnei i te katoa; nā, i whakamāramatia atu e ia ki a rātou te mahere o te hokonga, i whakaritea mai nei mai i te tūāpapatanga o te ao; ā, i whakamōhiotia anō hoki e ia ki a rātou e pā ana ki te haerenga mai a te Karaiti, ā, nāna ngā mahinga katoa a te Ariki i whakamōhio atu ki a rātou.

40 Ā, i pahawa ake, nā, whai muri iho i tana kōrerotanga atu i ēnei mea katoa me te whakamārama atu i ēnā mea ki te kīngi, nā, ka whakapono te kīngi ki āna kupu katoa.

41 Ā, ka tīmata ia ki te karanga ake ki te Ariki, e mea ana: E te Ariki, kia aroha mai koe; e rite nei ki tō aroha nunui kua aroha atu na koe ki te iwi o Nīwhai, pērātia mai rā ki runga i ahau me tōku iwi.

42 Ināianei ā, i tana kōrerotanga i tēnei, ka hinga iho ia ki te papa, me te mea nei kua mate ia.

43 Ā, i pahawa ake, nā, ka mauria atu ia e āna pononga ki tana hoawahine, ā, ka whakatakotoria iho ia ki runga i tētahi moenga; ā, ka takoto ia me te mea nei kua mate ia mō ngā rā e rua me ngā pō e rua; ā, ka tangihia ia e tāna hoawahine, e āna tama, me āna tamāhine i runga i ngā ritenga o ngā Rāmana, e tangihia nuitia ana tōna matenga.