1 Ā, i pahawa ake, nā, i tā rātou whakapūmautanga i tētahi hāhi i te whenua, nā, ka hiahia a Ramoni kia haere tahi a Amona me ia ki te whenua o Nīwhai, kia whakamōhiotia atu ia ki tōna matua.

2 Ā, ka tau iho te reo o te Ariki ki a Amona, e mea ana: Kaua koe e haere ake ki te whenua o Nīwhai, nana rā, ka whai te kīngi i tō oranga; engari ka haere kē koe ki te whenua o Mironi; nana rā, kei te whareherehere tō tuakana a Arona, me Muroki hoki rātou ko Amana.

3 Nā, i pahawa ake, nā, i te wā i rongo ai a Amona i tēnei, ka kī atu ia ki a Ramoni: Nana, kei te whareherehere tōku tuakana me aku teina i Mironi, ā, ka haere ahau ki te whakaputa i a rātou.

4 Nā, ka kī atu a Ramoni ki a Amona: E mōhio ana ahau, i te kaha o te Atua e taea ana e koe ngā mahi katoa. Engari nana, ka haere tahi au me koe ki te whenua o Mironi; nā te mea he hoa nōku te kīngi o te whenua o Mironi, ko Anatiomono tōna ingoa; nō reira haere ai au ki te whenua o Mironi, kia whakapatipati au i te kīngi o te whenua, ā, māna ō teina e maka atu ki waho i te whareherehere. Nā, ka kī atu a Ramoni ki a ia: Nā wai koe i whakamōhio kei te whareherehere ō teina?

5 Ā, ka kī atu a Amona ki a ia: Kāore tētahi i whakamōhio mai ki ahau, hāunga ko te Atua; ā, ka kī mai ia ki ahau—Haere kia whakaputaina ai ō teina, nā te mea kei te whareherehere rātou i te whenua o Mironi.

6 Nā, i te wā i rongo ai a Ramoni i tēnei ka meatia e ia ana pononga kia whakaritea ai ōna hōiho me ōna hāriata.

7 Ā, ka kī atu ia ki a Amona: Haere mai, ka haere iho au me koe ki te whenua o Mironi, ā, ka inoi atu au i reira ki te kīngi kia makaia atu e ia ō teina ki waho i te whareherehere.

8 Ā, i pahawa ake, nā, i a Amona rāua ko Ramoni e haere ana ki reira, ka tūtaki rāua ki te matua o Ramoni, koia te kīngi i runga i te whenua katoa.

9 Ā, nana, ka kī mai te matua o Ramoni ki a ia: He aha koe i kore ai e haere mai ki te hākari i taua rā nui i whakatakoto hākari ai ahau mā āku tama, mā tōku iwi anō?

10 Ā, ka kī mai anō ia: Kei te haere kōrua ko tēnei Nīwhai, arā, tēnei tamaiti o tētahi kairūkahu ki hea?

11 Ā, i pahawa ake, nā, ka kōrero atu a Ramoni ki a ia mō te wāhi e haere nei rāua, nā te mea i te mataku ia kei hē ia i a ia.

12 Ā, i kōrero atu anō ia ki a ia mō ngā take katoa i takaroa ai ia i tōna ake kīngitanga, nā konā kīhai ia i haere atu ai ki tōna matua me te hākari i whakaritea ai e ia.

13 Ināianei ā, i te kōrerotanga atu a Ramoni i ēnei mea katoa ki a ia, nana, i te ohorere ia i te takariri o tana matua ki a ia, ā, ka mea: E Ramoni, kei te haere atu rānei koe ki te whakaputa i ēnei Nīwhai, ko rātou nei ngā tamaiti o tētahi kairūkahu. Nana, nāna ō tātou tūpuna i whānako; ināianei ā, kei te haere mai āna tamariki anō hoki ki waenganui i a tātou kia tinihangatia tātou e ō rātou māminga me ā rātou rūkahu, kia whānakotia anōtia ō tātou taonga.

14 Nā, ka whakahau te matua o Ramoni ki a ia kia whakamate ai ia i a Amona ki te hoari. Ā, ka whakahau anō ia ki a ia ki kaua e haere atu ia ki te whenua o Mironi, engari kia hoki atu rāua tahi ki te whenua o Ihimaera.

15 Engari ka kī atu a Ramoni ki a ia: E kore au e whakamate i a Amona, e kore rānei au e hoki atu ki te whenua o Ihimaera, engari ka haere au ki Mironi kia whakaputaina mai ngā teina o Amona, nā te mea e mōhio ana ahau he tangata tika, ā, he poropiti tapu rātou nā te Atua pono.

16 Nā, i te rongonga o tana matua i ēnei kupu, ka riri ia ki a ia, ā, ka unuhia tana hoari kia patua iho ia ki te whenua.

17 Engari ka tū atu a Amona, ā, ka kī atu ki a ia: Nana, kaua koe e whakamate i tō tama; hei aha koa, he pai ake tana hinganga i tō hinganga, nana rā, kua rīpenetā ia i ōna hara; engari mēnā ka hinga iho koe i tēnei wā, i roto i tō riri, kua kore e taea tō wairua te whakaora.

18 Hei āpiti anō, e tika pū ana kia atahanga koe; nā te mea mēnā ka whakamate koe i tō tama, koia he tangata hē kore, ka karanga ake tōna toto i te whenua ki te Ariki te Atua, kia ngakia ai te mate ki runga i a koe; ā, tērā pea ka ngaro tō wairua.

19 Nā, i te kōrerotanga atu a Amona i ēnei kupu ki a ia, ka whakautu ia, e mea ana: E mōhio ana au mēnā ka patu au i taku tama, nā, ka whakahekea te toto hē kore; nā te mea ko koe te mea kua whai atu kia whakangaromia ia.

20 Ā, ka toro atu ia i tana ringa ki te whakamate i a Amona. Engari i karo atu a Amona i āna hahautanga, ā, ka patua tana ringa kia kore ai e taea te whakamahi.

21 Nā, i te kitenga ake o te kīngi kua taea ia e Amona te patu, ka tīmata tana inoi atu ki a Amona kia tohua ai tōna oranga.

22 Engari ka hāpai ake a Amona i tana hoari, ā, ka kī atu ki a ia: Nana, māku koe e patu ki te kore koe e whakaae mai kia makaia atu aku teina ki waho i te whareherehere.

23 Nā, ko te kīngi, e wehi ana kei riro tana oranga, ka mea: Mēnā ka tohua au e koe māku e tuku atu ki a koe ngā mea katoa e tono ai koe, tae atu ki te hauruatanga o te kīngitanga.

24 Nā, i te kitenga a Amona kua whakaaweawetia te kīngi koroua e rite ana ki tana hiahia, ka kī atu ki a ia: Mēnā ka whakaae koe kia makaia atu ai ōku teina ki waho i te whareherehere, kia mau tonu anō i a Ramoni tōna kīngitanga, ā, kia kaua anō koe e riri tonu ai ki a ia, engari kia tukuna ia ki te mahi i tāna e pai ai ahakoa he aha rawa ngā mea e whakaaro ai ia, kātahi au ka tohu i a koe; ki te kore māku koe e patu ki te whenua.

25 Nā, i te kōrerotanga atu a Amona i ēnei kupu, ka hari haere te kīngi nā tōna oranga.

26 Ā, i tana kitenga atu kāore ō Amona hiahia ki te whakamate i a ia, ā, i tana kitenga atu i tōna aroha nui mō tana tama a Ramoni, ka tino mīharo ia, ā, ka mea: Nā te mea koinei tāu anake i tonoa ai, kia whakaputaina atu ō teina me te tuku i taku tama a Ramoni kia puritia tonutia tōna kīngitanga, nana, ka whakaae au ki a koe kia puritia tonutia e taku tama tōna kīngitanga mai i tēnei wā haere ake nei; ā, kāore au e whakahaere tonu i a ia—

27 Ā, ka whakaae anō au ki a koe kia makaia atu ō teina ki waho i te whareherehere, ā, kia haere mai rā koe koutou ko ō teina ki ahau ki roto i tōku kīngitanga; nā te mea ka tino nui taku hiahia kia kite ai au i a koe. Nā te mea i tino mīharo nui te kīngi i ngā kupu i kōrerotia ai e ia, i ngā kupu anō hoki i kōrerotia ai e tana tama a Ramoni, nō reira i te hiahia ia ki te ako i aua kupu.

28 Ā, i pahawa ake, nā, ka haere tonu a Amona rāua ko Ramoni i runga i tā rāua haere ki te whenua o Mironi. Ā, ka whakaarohia nuitia a Amona i te tirohanga a te kīngi; nō reira ka mauria mai ngā teina o Amona ki waho i te whareherehere.

29 Ā, i te wā i tūtaki a Amona ki a rātou ka tino pōuri rawa atu ia, nana rā, i te tahanga rātou, kua paea rawa ō rātou kiri nā te herenga ki ngā taura kaha. Ā, kua whakamamaetia ki te matekai, te matewai me ngā tūmomo whakamamaetanga katoa; hei aha koa i manawaroa rātou i roto i ā rātou whakamamaetanga.

30 Ā, i tūpono ake, ko tā rātou ara tātai kia taka iho ki ngā ringaringa o tētahi iwi mārō ake, ā, iwi kakī mārō ake; nō reira kīhai rātou i pai kia whakarongo ake ki ā rātou kupu, ā, kua makaia atu rātou e rātou, ā, kua pakipākia rātou, ā, kua āia atu rātou mai i tētahi whare ki tētahi whare, ā, mai i tētahi wāhi ki tētahi wāhi, tae atu ana ki tā rātou taenga atu ki te whenua o Mironi; ā, i mauhereheretia atu rātou i reira, kātahi ka makaia atu ki te whareherehere, ā, ka herea ki ngā taura kaha, ā, ka mau rātou i reira mō ngā rā maha, ā, ka whakaorangia e Ramoni rāua ko Amona.