Karaipiture
Arami 47


Upoko 47

Ka meinga a Amarikaia hei kīngi i runga i ngā Rāmana mā te tinihanga, te kōhuru me te whakangārahu—He kino ake, ā, he matakakā ake ngā kaitītore Nīwhai i ngā Rāmana. Takiwā 72 M.K.

1 Nā, ka hoki ake tātou ki te tuhinga mō Amarikaia me te hunga i tahuti tahi atu me ia ki roto i te koraha; nana rā, i mauria e ia te hunga i haere tahi atu me ia, kātahi ka haere ake ki te whenua o Nīwhai ki waenganui i ngā Rāmana, ā, i whakaohoohongia ake i ngā Rāmana kia riri ai ki te iwi o Nīwhai, nā konā tukuna atu ai te kīngi o ngā Rāmana tētahi whakapuakitanga puta noa i tōna whenua, ki waenganui i tōna iwi, kia whakahuihui ngātahi anō rātou kia haere ake ai ki te pakanga ki ngā Nīwhai.

2 Ā, i pahawa ake, nā, i te putanga atu o te whakapuakitanga puta noa ki waenganui i a rātou i tino wehi rātou; āe rā, i wehi rātou kei hē rātou ki tō rātou kīngi, ā, i wehi anō rātou ki te whawhai ki ngā Nīwhai kei riro atu ō rātou oranga. Ā, i pahawa ake, nā, kīhai rātou i whakaae, kīhai rānei te wāhi nui i whakaae, ki te whakarongo ki ngā whakahaunga a te kīngi.

3 Ināianei ā i pahawa ake, nā, i pukuriri te kīngi mō rātou i whakakeke; nō reira ka tukuna e ia te mana whakahau ki a Amarikaia ki runga i taua wāhanga o tana tauā i whakarongo ai ki ana whakahau, ā, ka whakahaua ia kia haere atu ai kia tōpana i a rātou ki te hāpai patu.

4 Nana ināianei, koinei te hiahia a Amarikaia; nā te mea he tangata tino muna hei mahi kino nō reira ia whakatakoto ai i te mahere i roto i tōna ngākau ki te tūraki i te kīngi o ngā Rāmana i tōna torona.

5 Ināianei ā, kua whiwhi ia ki te mana whakahau i runga i ērā wāhanga o ngā Rāmana i aro ai ki te kīngi; ā, ka whai ia kia paingia ai ia e te hunga kīhai nei i whakarongo ai; nō reira ka haere atu ia ki te wāhi i karangatia nei ko Onaira, nā te mea koinā te wāhi i tahuti atu ai ngā Rāmana katoa; nā te mea i kite ai rātou i te haerenga mai o te tauā, ā, e whakaaro ana i te haere mai rātou ki te whakamate i a rātou katoa, nō reira ka tahuti atu rātou ki Onaira, ki te wāhi hāpai patu.

6 Ā, kua whakatūria tētahi tangata hei kīngi, ā, hei kaiārahi i runga i a rātou, kua pūmau hoki tā rātou whakaaro pūkeke e kore nei rātou e whakatitia hei haere atu kia tū atu ai ki ngā Nīwhai.

7 Ā, i pahawa ake, nā, i huihui tahi rātou ki runga i te maunga i karangatia nei ko Anatipa, hei whakarite ki te whawhai.

8 Nā, kāore ō Amarikaia whakaaro ki te whawhai atu ki a rātou e rite ana ki ngā whakahaunga a te kīngi; engari nana, ko tana hiahia kē he rapu whakaaro pai i ngā tauā a ngā Rāmana, kia whakanōhia ai ia hei upoko mō rātou me te tūraki iho i te kīngi i tōna torona, ā, kia riro i a ia te kīngitanga.

9 Ā nana, i pahawa ake, nā, i meatia e ia kia whakatūria ō rātou teneti i te raorao e pātata ana ki te maunga o Anatipa.

10 Ā, i pahawa ake, nā, i te taunga ihotanga o te pō ka tonoa munahia atu e ia tētahi ope ki maunga Anatipa, e hiahia ana ki te kaiārahi o taua hunga i runga i te maunga, arā, ko Rehonoti tōna ingoa, kia haere iho ki te pūtake o te maunga, nā te mea i hiahia ia ki te kōrero ki a ia.

11 Ā, i pahawa ake, nā, i te whiwhinga o Rehonoti i tēnei karere kāore ōna māia kia haere iho ai ki te pūtake o te maunga. Ā, i pahawa ake, nā, ka tonoa tuaruatia e Amarikaia, e hiahia ana kia haere iho ia. Ā, i pahawa ake, nā, kīhai a Rehonoti i whakaae; ā, ka tonoa tuatorutia e ia.

12 Ā, i pahawa ake, nā, i te kitenga ake o Amarikaia tē taea e ia te tono mai i a Rehonoti kia puta ai i te maunga, ka haere ake ia ki te maunga, tata tae atu ana ki tō Rehonoti hōpuni; ā, ka tonoa tuawhātia tana karere ki a Rehonoti, e hiahia ana kia haere iho ia, ā, kia mauria ngātahitia anō hoki e ia ōna kaitiaki.

13 Ā, i pahawa ake, nā, i te haerenga ihotanga o Rehonoti me ōna kaitiaki ki a Amarikaia, nā, i hiahia a Amarikaia kia haere iho ia ki a ia i te pō, ā, kia karapotia ngā tāngata i ō rātou puni, ā, ko rātou nei te hunga i tukuna ai te mana whakahau ki a ia e te kīngi, ā, māna rātou e tuku ki roto i ngā ringaringa o Rehonoti, mehemea ka whakatūria ia (a Amarikaia) hei kaiārahi tuarua i runga i te tauā katoa.

14 Ā, i pahawa ake, nā, i haere iho mai a Rehonoti rātou ko ana tāngata, ā, ka karapotia ngā tāngata a Amarikaia, nā konei, kua karapotia rātou e ngā tauā a Rehonoti i mua i tā rātou ohonga ake i te tākiritanga o te ata.

15 Ā, i pahawa ake, nā, i tā rātou kitenga ake kua karapotia rātou, i inoi atu rātou ki a Amarikaia kia tukuna rātou kia uru atu ai ki ā rātou teina, kia kore ai rātou e whakangaromia ai. Nā, ko tēnei pū anō te mea i hiahia ai a Amarikaia.

16 Ā, i pahawa ake, nā, i tukuna e ia ana tāngata, he mea tauaro ki ngā whakahau a te kīngi. Nā, ko tēnei te mea i hiahia ai a Amarikaia, kia whakatutuki ai ia i āna i whakaaro ai hei tūraki iho i te kīngi i tōna torona.

17 Nā, ko te tikanga ia i roto i ngā Rāmana, mehemea ka whakamatea te kaiārahi matua, ka whakatūria te kaiārahi tuarua hei kaiārahi matua mō rātou.

18 Ā, i pahawa ake, nā, ka meatia e Amarikaia kia āta whāngai atu tētahi o ana pononga i te paitini ki a Rehonoti, ā, mate noa ia.

19 Nā, i te matenga o Rehonoti, ka whakatūria e ngā Rāmana a Amarikaia hei kaiārahi, ā, hei kaiwhakahau matua mō rātou.

20 Ā, i pahawa ake, nā, ka hīkoi atu a Amarikaia me ana tauā (nā te mea kua whiwhi ia i tāna i hiahia ai) ki te whenua o Nīwhai, ki te pā o Nīwhai, koia te pā matua.

21 Ā, ka puta mai te kīngi me ana kaitiaki ki te tūtaki i a rātou, nā te mea i whakaaro ia kua tutuki i a Amarikaia āna i whakahau ai, ā, kua whakaminea ngātahitia e Amarikaia tētahi tauā tino nui kia haere atu ai ki ngā Nīwhai ki te pakanga.

22 Engari nana, i te kīngi e puta mai ana ki te tūtaki i a ia, ka meatia e Amarikaia kia haere atu ana pononga ki te tūtaki i te kīngi. Ā, ka haere atu rātou, ā, ka tuohu iho i te aroaro o te kīngi, me te mea nei i te whakanui i a ia mō tōna mana nui.

23 Ā, i pahawa ake, nā, ka torona atu e te kīngi tōna ringa hei whakatū anō i a rātou, koinā te tikanga i roto i ngā Rāmana, hei tohu rangimārie, ko taua tikanga i tīkina mai ai i ngā Nīwhai.

24 Ā, i pahawa ake, nā, i te wā i whakatūria te tuatahi i te whenua, nana, ka werohia e ia tō te kīngi ngākau; ā, ka hinga iho ia ki te whenua.

25 Nā, ka tahuti atu ngā pononga a te kīngi; ā, ka pāorotia ake e ngā pononga a Amarikaia te whakaariki, e mea ana:

26 Nana, kua werohia te ngākau e ngā pononga a te kīngi, ā, kua hinga iho ia, ā, kua tahuti atu rātou; nana, haere mai kia kite ai.

27 Ā, i pahawa ake, nā, i whakahaua e Amarikaia kia hīkoi atu ana tauā kia kite i ahatia ai te kīngi; ā, i tā rātou taenga atu ki te wāhi, me te kite i te kīngi e takoto ana i ōna toto, ka whakataruna a Amarikaia anō nei i te pukuriri ia, ā, ka mea: Ko ngā tāngata i aroha nei ki te kīngi, tukuna ia kia haere atu ai, me te whaiwhai i āna pononga kia whakamatea rātou.

28 Ā, i pahawa ake, nā, ko te hunga katoa i aroha nei ki te kīngi, i tā rātou rongonga i ēnei kupu, ka haere mai ki mua, ā, ka whaiwhai atu i ngā pononga a te kīngi.

29 Nā, i te kitenga ake o ngā pononga a te kīngi i te tauā e whaiwhai ana i a rātou, ka mataku anō rātou, ā, ka tahuti atu ki roto i te koraha, ā, ka whakawhiti atu ki roto i te whenua o Harahemara, ā, ka uru atu ki roto i te iwi o Amona.

30 Ā, ka hoki mai te tauā nāna nei rātou i whaiwhai, kua auare ake tā rātou whai atu i a rātou; ā, pēnei tā Amarikaia, nā tana tinihanga, rapunga i ngā ngākau o te iwi.

31 Ā, i pahawa ake i te aonga ake o te rā, ka tomo atu ia me āna tauā ki roto i te pā o Nīwhai, ā, ka riro i a ia te pā.

32 Ināianei ā, i pahawa ake i te rongonga o te kuini kua whakamatea te kīngi—nā te mea kua tonoa atu e Amarikaia tētahi ope ki te kuini kia whakamōhiotia atu ai ia kua whakamatea te kīngi e ana pononga, nā, kua whaiwhai tana tauā i a rātou, engari auare ake, ā, kua tahuti atu rātou—

33 Nō reira, i te rongonga a te kuini i tēnei karere ka tonoa atu a Amarikaia e ia, e hiahia ana kia tohua e ia ngā tāngata o te pā; ā, i hiahia anō ia kia kuhu atu ai ia ki a ia; ā, i hiahia anō ia kia mauria atu e ia ētahi kaiwhakaatu hei whakaatu atu e pā ana ki te matenga o te kīngi.

34 Ā, i pahawa ake, nā, ka mauria e Amarikaia taua pononga pū anō nāna te kīngi i whakamate, me te hunga katoa i reira tahi, ā, ka kuhu atu ki te kuini, ki te wāhi i noho ai ia; ā, i whakaatu atu rātou katoa ki a ia, nā, kua whakamatea te kīngi e ana pononga ake; ā, i kī anō rātou: Kua tahuti atu rātou; ehara rānei tēnei e whakaatu ai i tō rātou hē? Ā, pēnei tā rātou whakaatu atu ki te kuini e pā ana ki te matenga o te kīngi.

35 Ā, i pahawa ake, nā, ka whai a Amarikaia kia paingia ia e te kuini, ā, ka taumauhia ia e ia hei hoawahine māna; ā, pēnei nā tana tinihanga, me te āwhina o āna pononga māminga, ka riro i a ia te kīngitanga; āe rā, i whakaaetia ia hei kīngi puta noa i te whenua, ki waenganui i te iwi katoa o ngā Rāmana, ko rātou nei ngā Rāmana me ngā Remuere, me ngā Ihimaera, me ngā kaitītore katoa a ngā Nīwhai, mai i te whakahaeretanga a Nīwhai ā mohoa noa nei.

36 Nā, koinei kaitītore, i a rātou anō aua whakaakoranga me aua mātauranga pērā i ngā Nīwhai, āe rā, i te mea kua whakaakona i roto i taua mātauranga anō a te Ariki, hei aha koa, he mea rerekē te kōrero atu, kāore i roa te wā i muri i tā rātou tītorehanga atu ka meinga rātou hei mea pakeke ake, ā, hei mea taikaha, ā, hei mea mohoao, hei mea whakarihariha, ā, hei mea matakakā ake i ngā Rāmana—e inumia tahitia ana ki ngā whakarerenga iho a ngā Rāmana; e tuku ana i a rātou kia māngere, kia mahi ai i ngā tūmomo tūkari katoa; āe rā, e wareware katoa ana ki te Ariki tō rātou Atua.