1 Nā, i pahawa ake i te tau toru ngahuru o te whakahaeretanga o ngā kaiwhakawā i runga i te iwi o Nīwhai, whai muri iho i tā Moronai whiwhi me tana pānui i te pukapuka a Heramana, i te tino koa rawa atu ia nā te oranga, āe rā, te waimārie nui kua riro i a Heramana, i te rironga mai anō i aua whenua kua riro atu.

2 Āe rā, ka whakaaturia atu ki tana iwi katoa, i roto i te whenua katoa huri noa i taua wāhi i reira ia, kia koa anō ai rātou.

3 Ā, i pahawa ake, nā, ka tuku wawe atu ia i tētahi pukapuka ki a Pahorana, e hiahia ana kia whakahuihui tāngata hei whakakaha i a Heramana, i ngā tauā rānei a Heramana, nā konā ia e pupuri ngāwari ai tērā wāhanga o te whenua i riro mai anō ai i a ia i te manaakitanga nui whakamīharo.

4 Ā, i pahawa ake i te tukunga atu a Moronai i tēnei pukapuka ki te whenua o Harahemara, ka tīmata anō ia ki te whakatakoto mahere e riro mai ai ērā atu kāinga me aua pā kua riro atu i ngā Rāmana mai i a rātou.

5 Ā, i pahawa ake, nā, i a Moronai e pēnei ana tana whakaritenga ki te whawhai atu ki ngā Rāmana, nana, kua whakaekea te iwi o Nīwhaihā, ko te hunga kua whakahuihuitia ngātahitia mai i te pā o Moronai me te pā o Rīhai me te pā o Moriatono e ngā Rāmana.

6 Āe rā, ko aua mea anō kua ākina atu kia tahuti atu ai i te whenua o Manati, me ngā whenua huri noa, kua whakawhiti mai, ā, kua hono atu ki ngā Rāmana i tēnei wāhi o te whenua.

7 Ā pēnei, he iwi tino tini noa atu rātou, āe rā, e whakawhiwhi kaha ana ia te rā, ia te rā, i runga i te whakahau a Amorono ka huaki mai rātou ki runga i te iwi o Nīwhaihā, ā, ka tīmata tā rātou patupatu i a rātou i runga i tētahi parekura nanakia.

8 Ā, he nui nō ā rātou tauā i meinga ai ngā mōrehu o te iwi Nīwhai kia tahuti atu i mua i a rātou; ā, ka haere mai rātou, ā, ka hono mai ki te tauā a Moronai.

9 Ināianei ā, i te mea kua whakaaro a Moronai kua tukuna atu he tāngata ki te pā o Nīwhaihā hei āwhina i te iwi ki te pupuri i te pā, ā, e mōhio ana he māmā ake te tiaki i te pā kei taka ki ngā ringaringa o ngā Rāmana i te whakahokiranga mai anō i a rātou, ka whakaaro ake ia ka māmā tā rātou pupuri i taua pā.

10 Nō reira ka puritia tana tauā katoa hei pupuri i aua wāhi kua whakahokia mai e ia.

11 Ināianei ā, i te kitenga ake o Moronai kua riro atu te pā o Nīwhaihā ka tino pōuri rawa ia, ā, ka rangirua haere, nā te whakarihariha o te iwi, mehemea rānei kāore rātou e taka ki ngā ringaringa o ō rātou tuākana.

12 Nā, koinei te āhua o āna rangatira nunui katoa. I rangirua rātou, i mīharo rātou nō te whakarihariha o te iwi, ā, pēnei nā te waimārie o ngā Rāmana i runga i a rātou.

13 Ā, i pahawa ake, nā, i te riri a Moronai ki te kāwanatanga, nā tā rātou whakaaro kore e pā ana ki te herekoretanga o tō rātou whenua.