Karaipiture
Heramana 10


Upoko 10

Ka hoatu e te Ariki ki a Nīwhai te mana hīri—Kua whakamanahia ia kia herea, ā, kia wetekina i runga i te whenua, ā, i runga anō i te rangi—Ka whakahau ia i te iwi kia rīpenetā, kia mate rānei—Ka kawea ia e te Wairua mai i tētahi whakaminenga ki tētahi atu whakaminenga. Takiwā 21–20 M.K.

1 Ā, i pahawa ake, nā, ka ara ake tētahi wehenga i waenganui i te iwi, nā konā wehewehe rātou i tērā taha me tērā taha, ā, ka haere i ō rātou ake huarahi, e mahue ana a Nīwhai ko ia anake, i a ia e tū ana i waenganui i a rātou.

2 Ā, i pahawa ake, nā, ka haere atu a Nīwhai i tōna huarahi ki tōna ake whare, e whakaaro ana ki ngā mea i whakakitea mai nei e te Ariki ki a ia.

3 Ā, i pahawa ake i a ia e whakaaro pēnei ana—e pēhia nuitia ana nā te whakarihariha o te iwi o Nīwhai, ā rātou mahi huna o te pōuritanga, me ā rātou kōhurutanga, me ā rātou pāhuatanga, me ngā hē katoa o ia āhua, o ia āhua—ā, i pahawa ake i a ia e whakaaro pēnei ana i tōna ngākau, nana, ka puta mai tētahi reo ki a ia e mea ana:

4 Kua manaakitia koe, e Nīwhai, mō ērā mea nāu nei i mahi; nā te mea kua kite au i tāu whakapuaki nei i te kupu i runga i te ngenge kore, kua hoatu nei e au ki a koe, ki tēnei iwi. Ā, kīhai koe i wehi i a rātou, ā, kīhai koe i whai atu ki te tiaki i tōu ake oranga, engari kua whai atu i tāku i pai ai, me te pupuri i aku whakahaunga.

5 Ināianei ā, nā te mea kua mahi koe i tēnei i runga i te ngenge kore, nana, māku koe e manaaki mō āke tonu atu; ā, māku koe e whakakaha i runga i te kupu, ā, i runga i te mahi, i runga i te whakapono, ā, i roto anō i ngā mahinga; āe rā, kia meatia pū anō ngā mea katoa ki a koe e rite ana ki tō kupu, nā te mea e kore koe e inoi mai mō ngā mea e tauaro ana ki tāku e pai ai.

6 Nana, ko koe a Nīwhai, ā, ko au te Atua. Nana, kei te whakapuaki atu au ki a koe i te aroaro o aku anahera, kia whaimana koe i runga i tēnei iwi, ā, ka pākia te whenua ki te matekai, me te urutā, me te whakangaromanga, e rite ana ki te whakarihariha o tēnei iwi.

7 Nana, ka hoatu ki a koe he mana, nā, ko ngā mea katoa e hīria nei e koe i runga i te whenua ka hīria i runga i te rangi; ā, ko ngā mea e wetekina ai e koe i runga i te whenua ka wetekina i runga i te rangi; ā pēnei, ka whaimana koe i runga i tēnei iwi.

8 Ā pēnei, mēnā ka kī atu koe ki tēnei temepara kia pakaru kia rua ngā wāhi, ka meatia.

9 Ā, mēnā ka kī atu koe ki tēnei maunga, Kia whakahoroa iho koe kia papatairite, ka meatia.

10 Ā nana, mēnā ka kī ake koe, nā, ka pākia tēnei iwi e te Atua, ka pahawa ake.

11 Ināianei ā nana, kei te whakahau au ki a koe, kia haere atu koe ki te whakapuaki atu ki tēnei iwi, nā, e ai tā te Ariki te Atua, koia te Mea Kaha Rawa: Ki te kore koutou e rīpenetā ka pākia koutou, tae noa atu ana ki te whakangaromanga.

12 Ā nana, i pahawa ianei ake, nā, i te kōrerotanga a te Ariki i ēnei kupu ki a Nīwhai, ka tū ia, ā, kāore ia i haere tonu atu ki tōna ake whare, engari ka hoki atu anō ki ngā whakaminenga kua whakamararatia atu i runga i te mata o te whenua, ā, ka tīmata ki te whakapuaki atu ki a rātou i te kupu a te Ariki kua kōrerotia nei ki a ia, e pā ana ki tō rātou whakangaromanga ki te kore rātou e rīpenetā.

13 Nana ināianei, ahakoa taua merekara nui i mea ai a Nīwhai i tana kōrerotanga atu ki a rātou e pā ana ki te matenga o tō rātou kaiwhakawā matua, i whakapakeke rātou i ō rātou ngākau, ā, kīhai i whakarongo ki ngā kupu a te Ariki.

14 Nō reira ka whakapuaki atu a Nīwhai ki a rātou i te kupu a te Ariki, e mea ana: Ki te kore koutou e rīpenetā e ai tā te Ariki, ka pākia koutou ki te whakangaromanga pū anō.

15 Ā, i pahawa ake, nā, i te wā i whakapuaki atu a Nīwhai ki a rātou i te kupu, nana, i whakapakeke tonu rātou i ō rātou ngākau, ā, kāore rātou i whakarongo ki āna kupu; nō reira ka taunu rātou i a ia, ā, ka whai ki te whakapā atu i ō rātou ringaringa ki runga ki a ia kia makaia atu ai ia e rātou ki roto i te whareherehere.

16 Engari nana, i a ia te mana o te Atua, ā, kāore i taea e rātou te kawe atu i a ia me te maka atu i a ia ki roto i te whareherehere, nā te mea i kahakina atu ia e te Wairua, ā, ka kawea atu i tō rātou aroaro.

17 Ā, i pahawa ake, nā, ka pēnei tana haere atu i te Wairua, mai i tētahi whakaminenga ki tētahi whakaminenga e whakapuaki atu ana i te kupu a te Atua, tae atu ana ki te wā kua whakapuaki atu ia ki a rātou katoa, kua tonoa atu rānei ki waenganui i te iwi katoa.

18 Ā, i pahawa ake, nā, kīhai rātou i whakarongo ki āna kupu; ā, ka tīmata ake ngā tautohetohenga, nā konā weherua ai rātou i a rātou anō, ā, ka tīmata ki te patu tētahi i tētahi ki te hoari.

19 Ā pēnei whakamutua ai te tau whitu ngahuru mā tahi o te whakahaeretanga a ngā kaiwhakawā i runga i te iwi o Nīwhai.