1 Ā, i phawa ake, nā, i te wā i mutu ai te tau ono ngahuru mā rua o te whakahaeretanga a ngā kaiwhakawā, kua heipū ake ēnei mea katoa, ā, kua meinga ngā Rāmana, ko te wāhi nui o rātou, he iwi tika, nā konā nui ake ai tō rātou tika i tō ngā Nīwhai, nā tā rātou ū, nā tā rātou pūmau i roto i te whakapono.

2 Nana rā, he maha ngā Nīwhai i reira kua meinga hei tangata pakeke, hei tangata rīpenetā kore, ā, hei tangata kino whakaharahara, nā konā whakaparahako ai rātou i te kupu a te Atua me ngā kauhautanga katoa me ngā poropititanga katoa i tau ai ki waenganui i a rātou.

3 Hei aha koa, he nui te hari o te iwi i roto i te hāhi nā te whakatahuritanga o ngā Rāmana, āe rā, nā te hāhi o te Atua, kua whakapūmauhia i waenganui i a rātou. Ā, ka whakahoahoa tahi rātou ki a rātou, ā, ka hari tētahi me tētahi, ā, ka kī katoa i te hari.

4 Ā, i pahawa ake, nā, ka heke iho mai ngā Rāmana tokomaha ki roto i te whenua o Harahemara, ā, ka whakapuaki atu ki te iwi o ngā Nīwhai i ngā āhuatanga o tā rātou whakatahuritanga, ā, ka akiaki atu i a rātou kia whakapono, ā, kia rīpenetā.

5 Āe rā, he tokomaha ngā mea i kauhau atu ai i runga i te kaha me te mana nui, ki te kukumetanga iho i ngā mea tokomaha o rātou ki roto i te hōhonutanga o te whakaiti, kia noho ai hei kaiaru māhaki a te Atua rāua ko te Reme.

6 Ā, i pahawa ake, nā, ka haere ngā Rāmana tokomaha ki te whenua whakateraki; ā, ka haere anō hoki a Nīwhai rāua ko Rīhai ki roto i te whenua whakateraki, ki te kauhau atu ki te iwi. Ā, pēnei mutu ai te tau ono ngahuru mā toru.

7 Ā nana, ka mau te rangimārie puta noa i te whenua, nā konā haere atu ai ngā Nīwhai ki roto i ngā wāhi katoa o te whenua i pai ai ki a rātou, ahakoa kei waenganui i ngā Nīwhai, i ngā Rāmana rānei.

8 Ā, i pahawa ake, nā, ka haere anō hoki ngā Rāmana ki ngā wāhi katoa i pai ai ki a rātou, ahakoa kei waenganui i ngā Rāmana, kei waenganui rānei i ngā Nīwhai; ā pēnei tā rātou whakawhitiwhititanga noatanga tētahi ki tētahi, ki te hokohoko, ki te mahi taonga, e rite ana ki ō rātou hiahia.

9 Ā, i pahawa ake, nā, ka tino whairawa haere rātou, ko ngā Rāmana me ngā Nīwhai; ā, he nui rawa ā rātou koura, me ā rātou hiriwā, me ngā maitai utu nui katoa o ia āhua, o ia āhua, kei te whenua ki te tonga me te whenua ki te raki.

10 Nā, kua karangatia te whenua ki te tonga ko Rīhai, ā, ko te whenua ki te raki ko Mureke, he mea tiki mai i te tama a Herekia; nā te mea i haria mai a Mureke ki roto i te whenua ki te raki e te Ariki, ā, ko Rīhai ki roto i te whenua ki te tonga.

11 Ā nana, i reira ngā koura katoa o ia āhua, o ia āhua i ēnei whenua e rua, me ngā hiriwā, me ngā oa o ia āhua, o ia āhua; ā, he tautōhito anō hoki i reira, i mahi ai i ngā momo oa katoa, ā, nā rātou anō i tahu; ā pēnei rātou i whairawa haere ai.

12 Ka ranea tā rātou whakatupu kākano, i te raki, ā, i te tonga hoki; ā, ka whakakake nuitia rātou, i te raki me te tonga. Ā, ka tokomaha haere rātou, ā, ka tino pakari haere i runga i te whenua. Ā, he maha ā rātou kāhui o ia āhua, o ia āhua i whakatupuria ai e rātou, āe rā, he maha anō ngā kūao mōmona.

13 Nana ka mahi, ā, ka miro ā rātou wāhine, ā, ka hanga i ngā kahu katoa o ia āhua, o ia āhua, ki te rīnena miro pai me ngā kahu katoa o ia āhua, o ia āhua, hei whakakākahu i ō rātou tahangatanga. Ā pēnei pāhemo atu ai te tau ono ngahuru mā whā i runga i te rangimārie.

14 Ā, he nui anō tō rātou hari me tō rātou rangimārie i te tau ono ngahuru mā rima, āe rā, he maha ngā kauhautanga me ngā poropititanga e pā ana ki ērā e puta mai ai. Ā pēnei pāhemo atu ai te tau ono ngahuru mā rima.

15 Ā, i pahawa ake i te tau ono ngahuru mā ono o te whakahaeretanga a ngā kaiwhakawā, nana, ka kōhurutia a Hetorama e tētahi ringa huna i a ia e noho ana i runga i te nohoanga-whakawā. Ā, i pahawa ake i taua tau anō, ko tana tama, kua whakataua e te iwi i muri i a ia, ka kōhurutia anō hoki ia. Ā pēnei mutu ai te tau ono ngahuru mā ono.

16 Ā, i te tīmatanga o te tau ono ngahuru mā whitu ka tīmata anō tā te iwi kino haeretanga.

17 Nana rā, kua roa te wā i manaakitia rātou e te Ariki ki ngā taonga o te ao, nā, kīhai rātou i whakaohokia ake ki te riri, ki ngā pakanga, ki te whakaheke toto rānei; nō reira ka tīmata tā rātou whakatau iho i ō rātou ngākau ki runga i ā rātou taonga; āe rā, ka tīmata tā rātou whai atu ki te rapu taonga me kore pea rātou e neke ake ai tētahi i runga i tētahi atu; nō reira tīmata ai tā rātou meatanga i ngā kōhuru huna, me te whānako me te pāhua, kia whai taonga ai rātou.

18 Ināianei ā nana, he ope aua kaikōhuru me aua kaipāhua i whakatūria ai e Kihikumene rāua ko Kariatono. Ināianei ā kua pahawa ake, nā, he tokomaha i reira, i waenganui pū anō i ngā Nīwhai, nō te ope o Kariatono. Engari nana, he nui kē atu rātou i roto i ngā wāhi tino kino o ngā Rāmana. Ā, i karangatia rātou ko ngā kaipāhua me ngā kaikōhuru a Kariatono.

19 Ā, nā rātou te kaiwhakawā a Hetorama i kōhuru, me tana tama, i a rāua i te nohoanga-whakawā; ā nana, kīhai rātou i kitea.

20 Ināianei ā i pahawa ake, nā, i te kitenga ake a ngā Rāmana he kaipāhua kei waenganui i a rātou, ka tino pōuri rawa rātou; ā, ka whakapau katoa i ō rātou kaha katoa ki te whakangaro atu i a rātou i te mata o te whenua.

21 Engari nana, ka whakaohokia ake e Hātana ngā ngākau o te wāhi nui o ngā Nīwhai, nā konā whakakotahi rātou ki aua ope kaipāhua, ā, ka uru atu rātou ki roto i ā rātou kawenata me ā rātou oati, kia tiaki rātou tētahi i tētahi i roto i ngā uauatanga katoa e tau ai ki runga i a rātou, kia kaua rātou e whakawhiua mō ā rātou kōhurutanga, me ā rātou pāhuatanga, me ā rātou tāhaetanga.

22 Ā, i pahawa ake, nā, i a rātou ō rātou tohu, āe rā, ko ā rātou tohu huna, me ā rātou kupu huna; ā, pēnei kia mōhio ai ki te teina kua uru atu ki roto i te kawenata, nā, ahakoa he aha te mea kino e mahia ai e tana teina kua kore ia e ahatia e tana tuakana, e te hunga rānei nō tēnei ope, kua uru atu ki roto i tēnei kawenata.

23 Ā pēnei e kōhuru ai rātou, e pāhua ai, e tāhae ai, ā, e mahi ai i ngā pūremu me ngā whakarihariha katoa o ia āhua, o ia āhua, e tauaro ana ki ngā ture o tō rātou whenua me ngā ture anō hoki o tō rātou Atua.

24 Ā, ko ngā mea nō tō rātou ope e hura atu ai ki te ao i ō rātou whakarihariha me ō rātou mōrikarika, ka whakawākia, ehara i te mea e rite ana ki ngā ture o tō rātou whenua, engari e rite ana ki ngā ture o tō rātou whakarihariha, i homai nei ki a rātou e Kariatono rāua ko Kihikumene.

25 Nana ināianei, koinei oati huna me ēnei kawenata huna i whakahaua ai e Arami ki tana tama kia kaua e tukua atu ki te ao, kei whakamahia hei mea e kukume iho ai i te iwi ki te whakangaromanga.

26 Nana ināianei, kīhai ēnei oati me ēnei kawenata i puta ai ki a Kariatono mai i ngā tuhinga i tukua iho ai ki a Heramana; engari nana, kua whakaurua ērā ki roto i te ngākau o Kariatono e taua mea anō nāna nei ō tātou mātua tuatahi i whakawai ki te kai i te hua i rāhuitia.

27 Āe rā, ko taua mea anō i whakangārahu tahi ai me Keina, nā, mehemea ka kōhuru ia i tana teina a Apera kua kore e hura atu ki te ao. Ā, ka whakangārahu tahi me Keina me āna kaiaru i taua wā tonu haere ake nei.

28 Hei āpiti anō ko taua mea anō nāna i whakauru ki roto i ngā ngākau o te iwi ki te hanga i te pourewa mā tōna tiketike e tae atu ai rātou ki te rangi. Ā, ko taua mea anō nāna nei te iwi nō taua pourewa i ārahi mai ki tēnei whenua; nāna anō i whakawhānui atu i ngā mahinga pōuri me ngā mōrikarika i runga i te mata o te whenua, tae atu ana ki tana kukumetanga iho i te iwi ki tētahi whakangaromanga katoatanga, ā, ki tētahi ao rēwera mutunga kore.

29 Āe rā, ko taua mea anō nāna i whakauru ki roto i te ngākau o Kariatono kia mahi tonu ai i te mahi o te pōuri, me te kōhuru huna; ā, kua kawea mai i te tīmatanga o te tangata tae noa mai ki tēnei wā.

30 Ā nana, ko ia anō te kaitito o ngā hara katoa. Ā nana, kei te kawe tonu nei ia i āna mahinga pōuri me āna kōhurutanga huna, ā, kei te tuku iho i ā rātou whakangārahu, me ā rātou oati, me ā rātou kawenata, me ā rātou whakaritenga kino whakarihariha, mai i tētahi whakatipuranga ki tētahi whakatipuranga e rite ana ki tāna rapu i ngā ngākau o ngā tamariki a te tangata.

31 Ināianei ā nana, kua kaha nui tana pupuri i runga i ngā ngākau o ngā Nīwhai; āe rā, nā konā tino kino haere ai rātou; āe rā, kua tahuri atu te wāhi nui o rātou i te huarahi o te tika, ā, kua takatakahia e rātou ngā whakahaunga a te Atua, ā, tahuri atu ana ki ō rātou ake huarahi, ā, ka hangaia ake e rātou mō rātou anō he whakapakoko i ā rātou kōura me ā rātou hiriwā.

32 Ā, i pahawa ake, nā, ka tau iho ēnei kino katoa ki a rātou i roto i ngā tau ruarua noa, nā konā tau mai ai te nuinga o aua mea ki runga i a rātou i te tau ono ngahuru mā whitu o te whakahaeretanga a ngā kaiwhakawā i runga i te iwi o Nīwhai.

33 Ā, ka tupu haere rātou i ō rātou hē i te tau ono ngahuru mā waru anō hoki, i runga i te pōuri nui me te auē nui o te hunga tika.

34 Ā pēnei kite ai tātou i te tīmatatanga o tā ngā Nīwhai memehā atu i te whakapono kore, ā, ka tupu ake i te whakarihariha me te mōrikarika, i ngā Rāmana e tīmata ana ki te tino tupu i runga i te mātauranga o tō rātou Atua; āe rā, ka tīmata rātou ki te pupuri i āna ture me āna whakahaunga, me te hīkoi i runga i te pono me te tōtika i tōna aroaro.

35 Ā pēnei kite ai tātou i te tīmatanga o tā te Wairua o te Ariki māwehe atu i ngā Nīwhai, nā te whakrihariha me te pakeketanga o ō rātou ngākau.

36 Ā pēnei kite ai tātou ka tīmata te Ariki ki te riringi iho i tōna Wairua ki runga i ngā Rāmana, nā tō rātou ngāwari me tō rātou hiahia ki te whakapono i āna kupu.

37 Ā, i pahawa ake, nā, ka aruaru ngā Rāmana i te ope kaipāhua o Kariatono; ā, i kauhau atu rātou i te kupu a te Atua ki waenganui i te wāhi tino kino o rātou, nā konā whakangaromia katoatia ai tēnei ope kaipāhua i waenganui i ngā Rāmana.

38 Ā, i pahawa ake i tērā atu taha, nā, ka whakakaha ngā Nīwhai i a rātou, ā, ka tautoko i a rātou, e tīmata ana i te wāhi tino kino o rātou, tae noa atu ana ki te wā kua kapi whānuitia atu e rātou te whenua katoa o Nīwhai, ā, kua whakakōtiti kē i te wāhi nui o te hunga tika tae noa ki tā rātou hekenga iho ki te whakapono ki ā rātou mahinga me te whiwhi tahi ki ā rātou taonga parakete, me te hono tahi ki a rātou i roto i ā rātou kōhurutanga huna me ā rātou whakakotahitanga.

39 Ā pēnei tā rātou whiwhi i te whakahaeretanga katoa o te kāwanatanga, nā konā takatakahia ai e ō rātou waewae, me te papaki, me te haehae, me te tahuri i ō rātou tuarā i te hunga rawakore me te hunga māhaki, me ngā kaiaru whakaiti a te Atua.

40 Ā pēnei kite ai tātou i tō rātou āhuatanga he mea whakawehi, e pakari haere ana mō tētahi whakangaromanga mau tonu.

41 Ā, i pahawa ake, nā, pēnei mutu ai te tau ono ngahuru mā waru o te whakahaeretanga a ngā kaiwhakawā i runga i te iwi o Nīwhai.