Ko te Pukapuka a Heramana
He tuhituhinga mō ngā Nīwhai. Ko ā rātou pakanga me ngā tautohetohenga, me ā rātou tītorehanga. Me ngā poropititanga anō hoki a ngā poropiti tapu tokomaha, i mua i te haerenga mai a te Karaiti, e ai ki ngā tuhinga a Heramana, ko ia te tama a Heramana, e ai anō hoki ki ngā tuhinga a āna tama, tae noa iho anō ki te haerenga mai a te Karaiti. Ka whakatahuritia anō hoki ngā Rāmana tokomaha. He tuhinga mō tā rātou whakatahuritanga. He tuhinga mō te tika o ngā Rāmana, me te whakarihariha me ngā mōrikarika o ngā Nīwhai, e ai ki te tuhinga a Heramana me āna tama, tae noa iho ki te haerenga mai a te Karaiti, kua karangatia nei ko te pukapuka a Heramana, me ētahi atu mea.
Upoko 1
Ka eke a Pahorana te tuarua hei kaiwhakawā matua, ā, ka kōhurutia ia e Kihikumeni—Ka whakakapi a Pakumeni i te nohoanga whakawā—Ka ārahi a Koriatuma i ngā tauā Rāmana, ka riro i a Harahemara, ka whakamatea a Pakumeni—Ka hinga ngā Rāmana i a Moronaihā, ā, ka whakamau anō i a Harahemara, ā, ka patua a Koriatuma. Takiwā 52–50 M.K.
1 Ināianei ā nana, i pahawa ake i te tīmatanga o te tau whā ngahuru o te whakahaeretanga a ngā kaiwhakawā i runga i te iwi o Nīwhai, ka tīmata tētahi raruraru nui i waenganui i te iwi o ngā Nīwhai.
2 Nana rā, ka mate a Pahorana, ā, kua haere i te huarahi o te ao katoa; nō reira ka tīmata tētahi tautohetohenga whakapāwera e pā ana ki te rironga atu i a wai te nohoanga-whakawā i waenganui i ngā teina me ngā tuakana, ko rātou nei ngā tama a Pahorana.
3 Nā, koinei ō rātou ingoa i tautohetohe atu ai mō te nohoanga-whakawā, nā rātou anō hoki i mea ai i te iwi kia tautohetohe ai: ko Pahorana, ko Pānihi rātou ko Pakumeni.
4 Nā, ehara ēnei i te katoa o ngā tama a Pahorana (nā te mea he tokomaha āna), engari koinei te hunga i tautohetohe ai mō te nohoanga-whakawā; nō reira, i mea ai rātou kia toru ngā wehenga i waenganui i te iwi.
5 Hei aha koa, i pahawa ake ka whakataua a Pahorana e te reo o te iwi hei kaiwhakawā matua, ā, hei kāwana i runga i te iwi o Nīwhai.
6 Ā, i pahawa ake i a Pakumeni, i tana kitenga ake kīhai i taea e ia te rapu i te nohoanga-whakawā, ka tautoko atu ia i te reo o te iwi.
7 Engari nana, ka tino riri a Pānihi me taua wāhanga o te iwi e hiahia ana ki a ia hei kāwana mō rātou; nō reira, whano ka whakapoapoa atu ia i aua tāngata kia ara ake i runga i te haututū ki ā rātou teina.
8 Ā, i pahawa ake i a ia e tata pēnei ana, nana, ka kahakina atu ia, ā, ka whakawākia ia e rite ana ki te reo o te iwi, ā, ka whakataua ia kia mate; nā te mea i whakaohongia ake e ia te haututūtanga, ā, i whai atu ki te whakangaro i te herekoretanga o te iwi.
9 Nā, i te kitenga o te hunga hiahia kia tū ai ia hei kāwana mō rātou, nā, kua whakataua ia kia mate, nō reira riri ai rātou, ā nana, ka tonoa atu tētahi Kihikumene, tae atu pū anō ki te nohoanga-whakawā o Pahorana, ā, ka kōhurutia a Pahorana i a ia e noho ana i runga i te nohoanga-whakawā.
10 Ā, i arumia ia e ngā pononga a Pahorana; engari nana, tē taea e tētahi te hopu i a Kihikumene nā te tere o tana rerenga atu.
11 Ā, i haere atu ia ki te hunga nā rātou ia i tono, ā, ka uru katoa atu rātou ki roto i tētahi kawenata, āe rā, e oati ana i runga i tō rātou Kaihanga ora tonu, kia kore rawa rātou e whāki atu ki tētahi nā Kihikumene a Pahorana i kōhuru.
12 Nō reira, kāore i mōhiotia a Kihikumene i roto i te iwi o Nīwhai, nā te mea i whakaāhua kētia ia i te wā i kōhuru ai ia i a Pahorana. Ā, ko Kihikumene rātou ko tana ope, ko rātou i uru ai ki roto i tētahi kawenata ki a ia, ka whakauru atu rātou i a rātou anō ki waenganui i te iwi, i tētahi āhuatanga e kore nei rātou katoa e kitea ai; engari ka whakataua kia mate te hunga katoa i kitea ai.
13 Ināianei ā nana, kua whakatūria a Pakumeni, e rite ana ki te reo o te iwi, kia tū ai hei kaiwhakawā matua, ā, hei kāwana i runga i te iwi, hei whakahaere i muri iho i tana tuakana a Pahorana; ā, e rite ana ki tōna tikanga. Ā, i meatia katoatia ēnei i te tau whā ngahuru o te whakahaeretanga a ngā kaiwhakawā; ā, ka mutu te tau.
14 Ā, i pahawa ake i te tau whā ngahuru mā tahi o te whakahaeretanga a ngā kaiwhakawā, nā, kua whakahuihuia tahitia e ngā Rāmana tētahi tauā tini tē taea te tatau, ā, kua whakamaua rātou ki ngā hoari, me ngā hemita, me ngā kōpere, me ngā pere, me ngā ārai-māhunga, me ngā ārai uma, me ngā tūmomo puapua o ia āhua, o ia āhua.
15 Ā, ka heke iho anō rātou me kore pea e whawhai ki ngā Nīwhai. Ā, i ārahina rātou e tētahi tangata ko Koriatuma tōna ingoa; ā, he uri ia nō Harahemara; ā, he kaitītore ia mai i ngā Nīwhai; ā, he tangata kaitā ia, ā, he tangata mārohirohi ia.
16 Nō reira, te kīngi o ngā Rāmana, ko Tuparoto tōna ingoa, koia te tama a Amorono, e whakaaro ana nā te mea he tangata mārohirohi a Koriatuma, ka taea e ia te tū atu ki ngā Nīwhai, i runga i tōna kaha me tōna mātauranga nunui anō hoki, nā konā pea, mā te tono atu i a ia ka whaimana ia i runga i ngā Nīwhai—
17 Nō reira ka whakaoho ake ia i a rātou kia riri, ā, i whakahuihui tahi ia i ana tauā, ā, i whakatū a Koriatuma hei kaiārahi mō rātou, ā, ka meatia kia hīkoi atu rātou ki te whenua o Harahemara ki te whawhai ki ngā Nīwhai.
18 Ā, i pahawa ake, nā te nui o ngā tautohetohenga me ngā uauatanga i te kāwanatanga, kīhai i rahi ngā kaitiaki i te whenua o Harahemara; nā te mea kua whakaaro ake rātou kua kore e māia ngā Rāmana ki te haere mai ki te manawa o ō rātou whenua ki te whakaeke i taua pā nui o Harahemara.
19 Engari i pahawa ake, nā, i hīkoi atu a Koriatuma i te upoko o tana ope tauā mano tini, ā, ka huaki mai ki runga i ngā tāngata o te pā, ā, nā te tino tere o tā rātou hīkoi kīhai i taea e ngā Nīwhai te whakaemi ngātahi i ā rātou tauā.
20 Nō reira, ka haua iho e Koriatuma ngā kaitiaki i te tomokanga o te pā, ā, ka hīkoi whakamua atu me tana tauā katoa ki roto i te pā, ā, i patua e rātou ngā mea katoa i tū atu ai ki a rātou, nā konā riro ai i a rātou te pā katoa.
21 Ā, i pahawa ake i a Pakumeni, koia te kaiwhakawā matua, ka tahuti atu i te aroaro o Koriatuma, ki ngā taiapa pū anō o te pā. Ā, i pahawa ake, nā, ka patua ia e Koriatuma ki te taha o taiapa, nā konei mate ai ia. Ā, pēnei mutu ai ngā rā o Pakumeni.
22 Ināianei ā, i te kitenga ake o Koriatuma kua riro i a ia te pā o Harahemara, ā, i tana kitenga atu kua tahuti atu ngā Nīwhai i tana aroaro, ā, kua patua rātou, ā, kua kahakina atu rātou, ā, kua makaia ki roto i te whareherehere, me tana kite atu kua riro i a ia te pā kaha ake i te whenua katoa, ka māia tana ngākau nā konei whano ka whawhai atu ia ki te whenua katoa.
23 Ināianei ā, kīhai ia i noho roa i te whenua o Harahemara, engari i hīkoi atu ia me tētahi tauā nui whakatepā pū anō o Mōmona; nā te mea koia ko tōna hiahia kia haere whakamua atu me te haehae atu i reira ki te hoari, kia riro i a ia ngā wāhi whakateraki o te whenua.
24 Ā, e whakaaro ana kei te pokapū o te whenua tō rātou kaha nunui, nō reira ia hīkoi atu ai, tē whai wā rātou ki te whakahuihui tahi anō i a rātou hāunga ko ngā ope ririki; ā, i runga i tēnei āhuatanga i taka iho ai rātou ki runga i a rātou, ā, haua iho rātou ki te whenua.
25 Engari nana, ka whaikaha a Moronaihā ki runga i a rātou nā tēnei haerenga a Koriatuma i te pokapū o te whenua, hei aha koa te tokomahatanga o ngā Nīwhai i whakamatea ai.
26 Nana rā, i whakapae a Moronaihā kua kore e māia ngā Rāmana kia haere mai ai ki te pokapū o te whenua, engari ka whakaeke atu rātou ki ngā pā huri noa i ngā taha o te rohe pērā i tā rātou i mua; nō reira mea ai a Moronaihā kia tiakina aua wāhi e tata ana ki ngā rohe o te whenua e ā rātou tauā.
27 Engari nana, kāore ngā Rāmana i te matakū e rite ana ki tana hiahia, engari kua haere mai rātou ki te pokapū o te whenua, ā, kua riro i a rātou te pā matua koia ko te pā o Harahemara, ā, i te hīkoi rātou mā roto i ngā wāhi matua rawa o te whenua, e whakamate ana i ngā tāngata i runga i te parekura nunui, tāne mai, wahine mai, me ngā tamariki, e riro ana i a rātou ngā pā maha me ngā pā kaha maha.
28 Engari i te kitenga o Moronaihā i tēnei, ka tukuna wawetia e ia a Rīhai me tētahi ope tauā huri noa ki te haukoti i a rātou i mua i tā rātou taenga atu ki te whenua o Mōmona.
29 Ā i pēnei ia; ā, i haukotia rātou e ia i mua i tā rātou taenga atu ki te pā o Mōmona, ā, ka whawhai ki a rātou, nā konā tīmata ai tā rātou hoki atu ki te whenua o Harahemara.
30 Ā, i pahawa ake, nā, ka haukoti a Moronaihā i a rātou i tā rātou hokitanga atu, ā, ka whawhai ki a rātou, nā konā ka meinga hei whawhai nui rawa te whakaheke toto; āe rā, he tokomaha ngā mea i whakamatea ai, ā, i kitea anō hoki a Koriatuma i waenganui i te hunga kua whakamatea.
31 Ināianei ā, nana, kāore he huarahi e oma atu ai ngā Rāmana, i te taha raki, i te tonga rānei, i te rāwhiti rānei, i te uru rānei, i te mea kua karapotia rātou i ngā taha katoa e ngā Nīwhai.
32 Ā, pēnei kua panga e Koriatuma ngā Rāmana ki waenganui i ngā Nīwhai, nā konā kei roto rātou i te kaha o ngā Nīwhai, ā, ko ia ake anō kua whakamatea, ā, ka tukua iho ngā Rāmana e rātou anō ki roto i ngā ringaringa o ngā Nīwhai.
33 Ā, i pahawa ake, nā, ka riro anō i a Moronaihā te pā o Harahemara, ā, ka mea ia kia wehe atu ai ngā Rāmana kua mauheretia nei ki waho i te whenua i runga i te rangimārie.
34 Ā pēnei mutu ai te tau whā ngahuru mā tahi o te whakaheretanga a ngā kaiwhakawā.