1 Ināianei ā i pahawa ake i te tau waru ngahuru mā ono, i te noho tonu ngā Nīwhai i roto i te whakarihariha, āe rā, i roto i te whakarihariha nui, i ngā Rāmana e ū kaha ana ki te pupuri i ngā whakahaunga a te Atua, e ai ki te ture a Mohi.

2 Ā, i pahawa ake i tēnei tau anō i reira tētahi Hamuera, he Rāmana, i haere mai ai ki roto i te whenua o Harahemara, ā, ka tīmata tana kauhau atu ki te iwi. Ā, i pahawa ake, nā, i kauhau ia, mō ngā rā maha, i te rīpenetātanga ki te iwi, ā, i makaia atu ia e rātou, ā, whano ia ka hoki ki tōna ake whenua.

3 Engari nana, ka tau mai te reo o te Ariki ki a ia, kia hoki anō ia, me te poropiti ki te iwi i ngā mea katoa e uru ai ki tōna ngākau.

4 Ā, i pahawa ake, nā, kāore rātou i tuku kia kuhu atu ia ki roto i tō rātou pā; nō reira ka haere ake ia, ā, ka piki ake ki runga i tō reira taiapa, ā, ka toro atu i tōna ringa, ā, ka karanga ake i runga i te reo kaha, ā, ka poropiti atu ki te iwi i ngā mea katoa i purua iho ai e te Ariki i tōna ngākau.

5 Ā, ka kī atu ia ki a rātou: Nana, ko au, ko Hamuera, ko tētahi Rāmana, e kōrero atu ana i ngā kupu a te Ariki e purua iho nei e ia ki roto i tōku ngākau; ā nana, kua purua e ia ki roto i tōku ngākau kia kī ake ai ki tēnei iwi, nā, kei te werewere iho te hoari o te tika ki runga i tēnei iwi; ā, e kore e pahemo atu ngā tau e whā rau i mua i te takanga iho o te hoari o te tika ki runga i tēnei iwi.

6 Āe rā, e tāria ana tēnei iwi e te whakangaromanga taumaha, ā, kāore e kore ka tau mai ki runga ki tēnei iwi, ā, kāore he mea kē atu e whakaora ai i tēnei iwi hāunga ko te rīpenetātanga me te whakapono ki te Ariki a Ihu Karaiti, kāore e kore ka haere mai ia ki roto ki tēnei ao, ā, ka mamae i ngā mea maha, ā, ka whakamatea mō tēnei iwi.

7 Ā nana, kua whakapuakina mai e tētahi anahera a te Ariki ki ahau, ā, nāna nei ngā rongo whakahari i mau mai ai ki tōku wairua. Ā nana, kua tonoa au ki a koutou ki te whakapuaki atu i tēnā ki a koutou anō hoki; kia whiwhi ai koutou i ngā rongo whakahari; engari nana kāore koutou i manako mai ki ahau.

8 Nō reira, e ai tā te Ariki: Nā te pakeketanga o ngā ngākau o te iwi o ngā Nīwhai, ki te kore rātou e rīpenetā ka muru au i tōku kupu i a rātou, ā, ka tangohia atu e au tōku Wairua i a rātou, ā, kāore au e tohu tonu i a rātou, ā, ka whakatahuri atu au i ngā ngākau o ō rātou tuakana kia riri ai ki a rātou.

9 Ā, e kore e pahemo atu ngā tau e whā rau i mua i taku mea kia patua rātou; āe rā, ka toro atu au ki a rātou ki taku hoari, ā, ki taku matekai, ā, ki taku urutā.

10 Āe rā, ka toro atu au ki a rātou i runga i taku riri nanakia, ā, i reira anō ētahi nō te whakatipuranga tuawhā e ora ai, nō ō koutou hoariri, kia kite ai i tō koutou whakangaromanga katoatanga; ā, kāore e kore ka tau mai tēnei ki te kore koutou e rīpenetā, e ai tā te Ariki; ā, mā te hunga nō te whakatipuranga tuawhā e toro iho ai tō koutou whakangaromanga.

11 Engari ki te rīpenetā koutou me te hoki atu ki te Ariki tō koutou Atua ka huri atu tōku riri, e ai tā te Ariki; āe rā, pēnei e ai tā te Ariki, ka manaakitia te hunga e rīpenetā, ā, e tahuri mai ki ahau, engari auē te mate mō te hunga e kore nei e rīpenetā.

12 Āe rā, auē te mate mō tēnei pā nui o Harahemara; nana rā, kua tohungia ia nā te hunga tika; āe rā, auē te mate mō tēnei pā nui, nā te mea kei te kite au, e ai tā te Ariki, he tokomaha i reira, āe rā, ko te wāhi nui ake o tēnei pā nui, e whakapakeke ai i ō rātou ngākau ki ahau, e ai tā te Ariki.

13 Engari ka manaakitia te hunga e rīpenetā ai, nā te mea māku rātou e tohu. Engari nana, me i kore te hunga tika e noho nei i tēnei pā nui, nana, kua mea au kia tau iho mai te ahi mai i te rangi hei whakangaromia ia.

14 Engari nana, he whakaaro ki te hunga tika i tohungia ai ia. Engari nana, e tata mai ana te wā, e ai tā te Ariki, nā, ina makaia atu e koutou te hunga tika i waenganui i a koutou, kātahi koutou ka pakari mō te whakangaromanga; āe rā, auē te mate mō tēnei pā nui, nā te whakarihariha me ngā mōrikarika kei roto nei i a ia.

15 Āe rā, auē te mate mō te pā o Kiriona, nā te whakarihariha me ngā mōrikarika kei roto nei i a ia.

16 Āe rā, auē te mate mō ngā pā katoa huri noa i te whenua, e nōhia ana e ngā Nīwhai, nā te whakarihariha me ngā mōrikarika kei roto rā.

17 Ā nana, ka tau iho tētahi kanga ki runga i te whenua, e ai tā te Ariki o ngā Mano, he whakaaro ki ngā tāngata kei runga i te whenua, āe rā, nā tō rātou whakarihariha me ō rātou mōrikarika.

18 Ā, ka pahawa ake, e ai tā te Ariki o ngā Mano, āe rā, tō tātou Atua nui pono, nā, kāore te tangata e huna ake ai he taonga māna i te whenua e kite atu anō i ērā mea, nā te kanga nui o te whenua, hāunga mēnā he tangata tika ia, ā, ka hunaia ake ki te Ariki.

19 Nā te mea kei te hiahia au, e ai tā te Ariki, kia hunaia ake e rātou he taonga ki ahau; ā, ka kangaia te hunga e kore nei e hunaia ake ā rātou taonga ki ahau; nā te mea kāore he tangata e hunaia ake ana ā rātou taonga ki ahau hāunga ko te hunga tika; ā, ko te hunga e kore nei e hunaia ake āna taonga ki ahau, kua kangaia ia, me te taonga anō hoki, ā, e kore tētahi e whakahoki i ērā mea nā te kanga o te whenua.

20 Ā, ka tae mai te rā e huna ake ai ā rātou taonga, nā te mea kua whakatau iho ō rātou ngākau i runga i ngā taonga; ā, nā te mea kua whakatau iho ō rātou ngākau ki runga i ā rātou taonga, ā, ka hunaia ake ā rātou taonga i te wā e tahuti atu ai rātou i te aroaro o ō rātou hoariri; nā te mea e kore rātou e hunaia ake ērā mea ki ahau, ka kangaia rātou me ā rātou taonga anō hoki; ā, hei taua rā anō pākia ai rātou, e ai tā te Ariki.

21 Nana koutou, e te iwi o tēnei pā nui, ā, whakarongo mai ki aku kupu; āe rā, whakarongo ki ngā kupu e kōrero mai ana te Ariki; nana rā, e mea ana ia kua kangaia koutou nā ā koutou taonga, ā, kua kangaia hoki ā koutou taonga nā te mea e whakatau nei koutou i ō koutou ngākau ki runga i ērā mea, ā, kīhai koutou i whakarongo atu ki ngā kupu a te mea nāna i hoatu nei ērā mea ki a koutou.

22 Kāore koutou e maumahara ana ki te Ariki tō koutou Atua i roto i ngā mea nāna nei koutou i manaaki, engari e maumahara katoa ana koutou ki ā koutou taonga, tē whakawhetai atu ki te Ariki tō koutou Atua mō ērā mea; āe rā, kāore e aro ana ō koutou ngākau ki te Ariki, engari e pupuhi ana i runga i te whakapehapeha nui, ki te whakamanamana, ki te pupuhitanga nunui, te pūhaehae, te ngangare, te ngau tuarā, te whakatoi, me ngā kōhuru, me ngā kino katoa o ia āhua, o ia āhua.

23 Mō tēnei take i mea ai te Ariki te Atua kia tau iho ai tētahi kanga ki runga i te whenua, i runga anō hoki i ā koutou taonga, ā pēnei nā ō koutou kino.

24 Āe rā, auē te mate mō tēnei iwi, nā tēnei wā kua tae mai nei, e makaia atu ai e koutou ngā poropiti, kei te tāwai i a rātou, kei te ākina rātou ki te kōhatu, ā, kei te whakamate i a rātou, me te mahi i ngā tūmomo kino o ia āhua, o ia āhua ki a rātou, he pērā i tā rātou i ngā wā onamata.

25 Ināianei ā, ina kōrero koutou, ka kī ake koutou: Mehemea ō mātou rā i ngā rā o ō tātou tūpuna onamata, kua kore mātou i whakamatea ngā poropiti; kua kore mātou i ākina rātou ki te kōhatu, me te maka atu i a rātou ki waho.

26 Nana he kino ake koutou i a rātou; nā te mea e ora ana te Ariki, mēnā ka haere mai tētahi poropiti ki waenganui i a koutou me te whakapuaki ake ki a koutou i te kupu a te Ariki, e whakaatu nei i ō koutou nei hara me ō koutou kino, kua riri koutou ki a ia, ā, ka makaia atu ia ki waho, ā, ka whai atu koutou i ngā huarahi maha hei whakangaro i a ia; āe rā, ka kī ake koutou he poropiti teka ia, ā, he kaihara ia, ā, nō te rēwera, mōna i whakaatu i ā koutou mahinga e kino ana.

27 Engari nana, ki te haere mai tētahi tangata ki waenganui i a koutou me te kī ake: Me pēnei, ā, kāore he hara; mahi pēnā, ā, kāore koutou e mate; āe rā, ka kī ake ia: Hīkoi i runga i te whakapehapeha o ō koutou ake ngākau; āe rā, hīkoi i runga i te whakapehapeha o ō koutou karu, me te mahi i ērā mea katoa e hiahia ana ō koutou ngākau—ā, ki te haere mai tētahi tangata ki waenganui i a koutou me te kī ake i tēnei, ka whiwhi koutou i a ia, ā, ka kī ake he poropiti ia.

28 Āe rā, ka whakanuia ia e koutou, ā, ka hoatu e koutou ā koutou taonga ki a ia; ka hoatu e koutou ā koutou kōura, ā koutou hiriwā, ā, ka whakakākahutia ia ki ngā kākahu utu nui; ā, nā te mea e kōrero whakapatipati ia ki a koutou, me te kī ake kei te pai ngā mea katoa, kātahi ka kore koutou e whakahē mōna.

29 Auē e koutou e te whakatipuranga kino parori kē; e koutou e te iwi pakeke, ā, e te iwi kakī mārō, ka pēhea te roa e manawanui ai te Ariki ki a koutou? Āe rā, ka pēhea te roa e tuku ai i a koutou kia ārahina atu ai e ngā kaiārahi kuare me ngā kaiārahi kāpō? Āe rā, ka pēhea te roa e kaha ake tā koutou whiriwhiri i te pōuritanga i tā koutou whiriwhiri i te māramatanga?

30 Āe rā, nana, kua tahuna kētia te riri o te Atua ki a koutou; nana, kua kangaia e ia te whenua nā tō koutou kino.

31 Ā nana, e tata mai ana te wā e kanga ai ia i ā koutou taonga, kia meinga ai hei mea pākehokeho, nā, e kore nei e taea ērā mea te pupuri; ā, tē taea ērā mea e koutou te pupuri anō i ngā rā o tō koutou rawakoretanga.

32 Ā, ka karanga ake koutou ki te Ariki i ngā rā o tō koutou rawakoretanga; ā, auare ake tā koutou karanga ake, nā te mea kua tae kē mai tō koutou whakangaromanga ki runga i a koutou, ā, kua tūturu tō koutou whakangaromanga; kātahi koutou ka tangi, ā, ka auē i taua rā, e ai tā te Ariki o ngā Mano. Kātahi koutou ka tangi, ā, ka mea:

33 Auē me i rīpenetā au, me i kore au i whakamate i ngā poropiti, me te ākina rātou ki te kōhatu, me te maka i a rātou ki waho. Āe rā, ka kī ake koutou i taua rā: Auē me i mahara tātou ki te Ariki tō tātou Atua i te rā i homai ai e ia ā tātou taonga, kātahi ka kore ērā mea i meinga kia pākehokeho e ngaro atu ai ērā mea i a tātou; nana rā, kua ngaro atu ā tātou taonga i a tātou.

34 Nana, ka whakatakotohia tētahi taputapu e tātou ki konei, ā, hei te aonga o te rā kua ngaro; ā nana, kua murua atu ō tātou hoari i a tātou i te rā kua rapua atu ērā mō te pakanga.

35 Āe rā, kua hunaia ake e tātou ā tātou taonga, engari kua pahuhu atu i a tātou, nā te kanga o te whenua.

36 Auē me i rīpenetā tātou i te rā i tau mai ai te reo o te Ariki ki a tātou; nana rā kua kangaia te whenua, ā, kua pākehokeho ngā mea katoa, ā, tē taea e tātou te pupuri ērā mea.

37 Nana, kua karapotia tātou e ngā nauwhea, āe rā, kua karapotia tātou e ngā anahera o te mea nāna i whai ki te whakangaro i ō tātou wairua. Nana, he nui ō tātou hē. E te Ariki, e kore ianei koe e taea te whakatahuri atu i tō riri i a mātou? Ā, ka pēnei tō koutou reo hei aua rā.

38 Engari nana, kua hipa atu ō koutou rā poropeihana; kua whakaroa atu koutou i te rā o tō koutou whakaoranga tae noa atu ki te wā kua takaroa rawa atu, ā, kua tūturu tō koutou whakangaromanga; āe rā, nā te mea kua whai atu koutou i ō koutou rā katoa i ērā mea tē taea te hopu; ā, kua whai atu i te hari i runga i te mahi kino, ko taua mea e tauaro ana ki te āhuatanga o taua tika kei roto nei i tō tātou Upoko Mau Tonu Nui.

39 Auē e koutou te iwi o te whenua, me whakarongo mai rā ki aku kupu! Ā, e inoi ake ana au kia tahuritia atu te riri o te Atua i a koutou, ā, kia rīpenetā koutou, ā, kia whakaorangia.