1 Ā, i pahawa ake i te tau rima ngahuru mā whā he maha ngā tītorehanga i roto i te hāhi, ā, he tautohetohe anō hoki i roto i te iwi, nā konei ka nui te whakaheke toto.

2 Ā, ka whakamatea te wāhi haututū, ā, ka āia atu rātou ki waho i te whenua, ā, ka haere atu rātou ki te kīngi o ngā Rāmana.

3 Ā, i pahawa ake, nā, ka ngana rātou ki te whakaoho ake i ngā Rāmana kia pakanga ki ngā Nīwhai; engari nana, he mataku rawa ngā Rāmana, nā konā kīhai rātou i pai ki te whakarongo ki ngā kupu a aua kaitītore.

4 Engari i pahawa ake i te tau rima ngahuru mā ono o te whakahaeretanga a ngā kaiwhakawā, i reira ētahi kaitītore i wehe atu ai i ngā Nīwhai ki ngā Rāmana; ā, i tutuki tā rātou i waenganui i ērā atu tāngata ki te whakaohooho ake i a rātou ki ngā Nīwhai; ā, i te whakariterite rātou i taua tau katoa mō te pakanga.

5 Ā, i te tau rima ngahuru mā whitu ka heke iho mai rātou ki te whawhai ki ngā Nīwhai, ā, ka tīmata rātou ki te mahi whakamate; āe rā, nā konā i te tau rima ngahuru mā waru o te whakahaeretanga a ngā kaiwhakawā ka tutuki tā rātou rirohanga i te whenua o Harahemara; āe rā, ko ngā whenua katoa anō hoki, tae atu pū anō ki te whenua e pātata atu ana ki te whenua o Mōmona.

6 Ā, kua āia atu ngā Nīwhai me ngā tauā a Moronaihā ki roto i te whenua o Mōmona;

7 Ā, i reira rātou whakatūwatawata ai mō ngā Rāmana, mai i te moana uru, tae atu ana ki te rāwhiti; kotahi tonu te rā hei haerenga mō tētahi Nīwhai, i runga i te rārangi i whakatūwatawatahia ai e rātou, ā, i whakatūria ai ā rātou tauā hei tiaki i tō rātou whenua ki te raki.

8 Ā pēnei, ka riro ngā mea katoa nō ngā Nīwhai i roto nei i te whenua whakatetonga ki aua kaitītore nō ngā Nīwhai, i runga i te āwhinatanga a tētahi tauā nui a ngā Rāmana. Ā, kua meatia ēnei katoa i te tau rima ngahuru mā waru, mā iwa anō o te whakahaeretanga a ngā kaiwhakawā.

9 Ā, i pahawa ake i te tau ono ngahuru o te whakahaeretanga a ngā kaiwhakawā, ka tutuki a Moronaihā me āna tauā i tā rātou rironga mai i ngā wāhi maha o te whenua; āe rā, kua riro mai anō i a rātou ngā pā kua taka atu ki ngā ringaringa o ngā Rāmana.

10 Ā, i pahawa ake i te tau ono ngahuru mā tahi o te whakahaeretanga a ngā kaiwhakawā ka tutuki i a rātou te whakamau mai anō i te haurua o ō rātou mea katoa.

11 Nā, me i kore tā ngā Nīwhai whakarihariha me tā rātou mōrikarika i waenganui i a rātou; āe rā, i waenganui i te hunga i whakapuaki nei nō te hāhi o te Atua kua kore tēnei matenga me tēnei parekura nui i tūpono ki a rātou.

12 Ā, he mea nā te whakapehapeha o ō rātou ngākau, nā ō rātou taonga tino nui, āe rā, nā tā rātou whakapēhi i te hunga rawakore, e kaiponu ana i ā rātou kai i te hunga hiakai, e kaiponu ana ō rātou kākahu i te hunga tahanga, ā, e papaki ana i te pāpāringa o ō rātou huānga, e whakatoi ana i ngā mea tapu, e whakakore ana i te wairua o te poropititanga me te whakakitenga, e kōhuru ana, e pāhua ana, e rūkahu ana, e tāhae ana, e mahi pūremu ana, e oho ake ana i ngā tautohetohenga nui, ā, e wehe atu ana ki roto i te whenua o Nīwhai, ki waenganui i ngā Rāmana—

13 Ā, nā tēnei tō rātou whakarihariha nui, me ā rātou kupu whakamanamana i runga i tō rātou ake kaha, kua mahue rātou i roto i tō rātou ake kaha; nō reira kīhai rātou i kake, engari kua whakamamaetia, ā, kua pākia, ā, kua āia atu ki mua i ngā Rāmana, tae atu ana ki te wā kua tata ngaro atu i a rātou ō rātou whenua katoa.

14 Engari nana, he maha ngā mea i kauhau atu ai a Moronaihā ki te iwi nā tō rātou kino, me Nīwhai rāua ko Rīhai anō hoki, ko rāua nei ngā tama a Heramana, i kauhau atu i ngā mea maha ki te iwi, āe rā, i poropiti atu i ngā mea maha ki a rātou e pā ana ki ō rātou hē, ā, me ngā mea anō e puta ai ki a rātou ki te kore rātou e rīpenetā i ō rātou hara.

15 Ā, i pahawa ake, nā, i rīpenetā rātou, ā, i a rātou ka rīpenetā nei ka tīmata tā rātou kake.

16 Nā, i te kitenga a Moronaihā kua tīmata tā rātou rīpenetā ka ngana ia ki te ārahi atu i a rātou mai i tētahi wāhi ki tētahi wāhi, ā, mai i tētahi pā ki tētahi pā, tae atu ana ki te wā kua whakamau anō rātou i te kotahi-haurua o ā rātou rawa me te kotahi-haurua o ō rātou whenua katoa.

17 Ā, pēnei mutu ai te tau ono ngahuru mā tahi o te whakahaeretanga a ngā kaiwhakawā.

18 Ā, i pahawa ake i te tau ono ngahuru mā rua o te whakahaeretanga a ngā kaiwhakawā, nā, kāore i taea e Moronaihā te whakamau i ētahi atu mea i runga i ngā Rāmana.

19 Nō reira ka whakarere rātou i tā rātou whakaritenga ki te whakamau anō i te toenga atu o ō rātou whenua, nā te tokomaha hoki o ngā Rāmana kīhai rawa i āhei i ngā Nīwhai te whaimana ki runga i a rātou; nō reira ka meinga e Moronaihā āna tauā katoa hei tiaki i aua wāhi kua riro mai nei i a ia.

20 Ā, i pahawa ake, ka wehi nui ngā Nīwhai i te nui o te tokomahatanga o ngā Rāmana, kei taea rātou, ā, kei takatakahia iho, ā, kei patua, ā, kei whakangaromia.

21 Āe rā, ka tīmata tā rātou mahara ki ngā poropititanga a Arami, me ngā kupu anō hoki a Mōhia; ā, ka kite rātou he iwi kakī mārō rātou, ā, kua whakakorehia e rātou ngā whakahaunga a te Atua;

22 Ā, kua whakapeautia, ā, kua takahia e ō rātou waewae ngā ture a Mōhia, ērā mea rānei kua whakahau te Ariki kia hoatu ai ki te iwi; ā, kua kite rātou kua whakananua ō rātou ture, ā, kua meinga rātou he iwi whakarihariha, nā konā kua kino rātou pērā pū anō i ngā Rāmana.

23 Ā, nā tō rātou kino kua memeha haere te hāhi; ā, ka tīmata tā rātou whakapono kore i te wairua poropititanga me te wairua whakakitenga anō; ā, ka titiro kanohi ki te kanohi ngā whakawākanga a te Atua ki a rātou.

24 Ā, ka kite anō rātou kua ngoikore haere rātou, pērā i ō rātou tuākana, arā, ko ngā Rāmana, ā, kīhai tonu te Wairua o te Ariki i tiaki i a rātou; āe rā, kua wehe atu i a rātou nā te mea kāore te Wairua o te Ariki e noho ai i roto i ngā temepara tapu kore—

25 Nō reira mutu ai tā te Atua tiaki i a rātou i runga i tōna kaha whakamīharo, i tōna kaha kāore nei tōna rite, nā te mea kua taka iho rātou ki roto i tētahi āhuatanga whakapono kore, i tētahi āhuatanga whakarihariha; ā, ka kite anō rātou kua tokomaha rawa atu ngā Rāmana i a rātou, ā, ki te kore rātou e piri ki te Ariki te Atua kāore e kore ka ngaro rawa rātou.

26 Nana rā, ka kite rātou he rite te nui o te kaha o ngā Rāmana ki te nui o tō rātou kaha, āna, tangata ki te tangata. Ā, pēnei kua taka iho rātou ki roto i tēnei hē nui; āe rā, pēnei kua ngoikore haere rātou, nā tō rātou hē, i te takiwā o ngā tau ruarua.