1 Ināianei ā i pahawa ake i te tau whitu ngahuru mā rua o te whakahaeretanga a ngā kaiwhakawā, nā, ka nui ake ngā tautohetohenga, nā konā hua ai ngā pakanga puta noa i te whenua katoa o te iwi o Nīwhai.

2 Ā, ko tēnei ope huna o ngā pāhua i mahi ai i ēnei mahi whakangaromanga me tēnei mahi whakarihariha. Ā, mau tonu tēnei pakanga mō te roanga ake o taua tau; ā, ka pērā tonu anō hoki mō te tau whitu ngahuru mā toru.

3 Ā, i pahawa ake, nā, i tēnei tau anō ka karanga ake a Nīwhai ki te Ariki, e mea ana:

4 E te Ariki, kaua e tukua kia whakangaromia tēnei iwi e te hoari; engari E te Ariki, tukua kia tau mai tētahi matekai i te whenua, ki te whakaoho ake i a rātou kia mahara ki te Ariki tō rātou Atua, ā, tērā pea ka rīpenetā rātou, ā, ka tahuri mai ki a koe.

5 Ā, ka pērātia anō, e rite ana ki ngā kupu a Nīwhai. Ā, i reira tētahi matekai nui i runga i te whenua, i waenganui i te iwi katoa o Nīwhai. Ā pēnei, i te tau whitu ngahuru mā whā ka mau tonu te matekai, ā, ka mutu te mahi whakangaro i runga i te hoari engari ka kino te matekai.

6 Ā, ka haere tonu tēnei mahi whakangaro i te tau whitu ngahuru mā rima. Nā te mea kua pākia te whenua kia maroke, ā, kāore i hua mai he kākano i te tau kākano; ā, kua pākia te whenua katoa, kei waenganui anō hoki i ngā Rāmana me ngā Nīwhai, nā konei pākia ai rātou kia matemate ngā tāngata manomano i roto i ngā wāhi kino ake o te whenua.

7 Ā, i pahawa ake, nā, ka kite te iwi whano ka mate rātou i te matekai, ā, ka tīmata rātou ki te mahara ki te Ariki tō rātou Atua; ā, ka tīmata tā rātou maumahara ki ngā kupu a Nīwhai.

8 Ā, ka tīmata tā te iwi inoi atu ki ō rātou kaiwhakawā matua me ō rātou kaiārahi, kia kī ake ai ki a Nīwhai: Nana, e mōhio ana mātou he tangata koe nō te Atua, nō reira karanga ake ki te Ariki tō tātou Atua kia tahuri atu tēnei matekai i a tātou, kei tutuki ngā kupu katoa nāu i kōrero mai e pā ana ki tō tātou whakangaromanga.

9 Ā, i pahawa ake, nā, ka kī atu ngā kaiwhakawā ki a Nīwhai, e rite ana ki ngā kupu i hiahia ai. Ā, i pahawa ake, nā, i te wā i kite ai a Nīwhai kua rīpenetā te iwi, ā, kua whakaiti rātou i a rātou anō i raro i te kahu taratara, ka karanga ake ia ki te Ariki, e mea ana:

10 E te Ariki, nana kua rīpenetā tēnei iwi; ā, kua tahia atu te ope o Karianato i waenganui i a rātou nā konā kua mate moa rātou, ā, kua huna hoki ō rātou mahere huna i te whenua.

11 Nā, E te Ariki, māu rā pea e tahuri atu tō riri i a rātou nā tā rātou whakaitinga, ā, kia mārie anō tō riri i runga i te whakangaromanga o aua tāngata kino nāu kē nei i whakangaro.

12 E te Ariki, māu rā pea e tahuri atu tō riri, āe rā, tō riri nanakia, ā, kia mea ai kia mutu tēnei matekai i te whenua.

13 E te Ariki, māu rā pea e whakarongo mai ki ahau, ā, kia meinga kia rite ki aku kupu, ā, kia tukuna mai te ua ki runga i te mata o te whenua, kia hua mai i a ia ōnu hua rākau, me ōna kākano i te tau kākano.

14 E te Ariki, i whakarongo koe ki aku kupu i te wā i kī ai au, Tukua mai he matekai, kia mutu ai te urutā o te hoari; ā, e mōhio nei au māu anō, i tēnei wā pū anō, e whakarongo ki aku kupu, nā te mea nāu i kī ai: Ki te rīpenetā tēnei iwi māku rātou e tohu.

15 Āe rā, E te Ariki, kei te kite koe kua rīpenetā rātou, nā te matekai me te urutā me te whakangaromanga kua tau ki runga i a rātou.

16 Ināianei ā, E te Ariki, māu rā pea e tahuri atu tō riri, me te whakamātau anō mēnā rānei ka mahi rātou ki a koe? Ā, ki te pērā rawa, E te Ariki, ka āhei koe ki te manaaki i a rātou e rite ana ki āu kupu kua kōrerotia nei e koe.

17 Ā, i pahawa ake i te tau whitu ngahuru mā ono i tahuri atu te Ariki i tōna riri i te iwi, ā, ka meinga te ua kia heke iho ai ki runga i te whenua, nā konā hua mai ai i ōna hua rākau i te tau o ōna hua rākau. Ā, i pahawa ake, nā, ka hua mai ai i ōna kākano i te tau o ōna kākano.

18 Ā nana, i hari te iwi, ā, ka whakakorōriatia e rātou te Atua, ā, kua kī katoa te mata katoa o te whenua i te hari; ā, kāore tonu rātou i whai ki te whakangaro i a Nīwhai, engari i whakaarohia ia e rātou hei poropiti nui, he tangata anō nō te Atua, kua homai ki a ia he mana nui, he kaha nui e te Atua.

19 Ā nana, kāore i iti iho tō Rīhai, tana teina, mātauranga e pā ana ki ngā mea o te tika.

20 Ā pēnei i pahawa ake, nā, ka whaiora haere anō te iwi o Nīwhai i te whenua, ā, ka tīmata tā rātou hangahanga ake i ō rātou wāhi tītōhea, ā, ka tīmata tā rātou tokomaha haere me tā rātou whakawhānui haeretanga, tae atu ana ki te wā i kapi te mata katoa o te whenua i a rātou, whakateraki atu, whakatetonga atu, mai i te moana uru ki te moana rāwhiti.

21 Ā, i pahawa ake, nā, ka mutu te tau whitu ngahuru mā ono i te rangimārie. Ā, ka tīmata te tau whitu ngahuru mā whitu i runga i te rangimārie; ā, ka horapa haere te hāhi puta noa i te mata o te whenua katoa; ā, nō te hāhi te wāhi nui o te iwi, o ngā Nīwhai me ngā Rāmana; ā, i nui rawa te rangimārie i te whenua; ā, ka mutu pēnei te tau whitu ngahuru mā whitu.

22 Hei āpiti anō i mau tonu te rangimārie i te tau whitu ngahuru mā waru, hāunga ētahi tautohetohenga e pā ana ki ngā tikanga kua whakatakotoria iho e ngā poropiti.

23 Ā, ka tīmata ngā ngangare nui i te tau whitu ngahuru mā iwa. Engari i pahawa ake i a Nīwhai rāua ko Rīhai, me ō rāua teina tokomaha i mōhio ai e pā ana ki ngā tikanga pono, he mea nā ngā whakakitenga maha ia rā, ia rā, nō reira i kauhau atu rātou ki te iwi, nā konā whakamutu ai rātou i ā rātou ngangaretanga i taua tau anō.

24 Ā, i pahawa ake i te tau waru ngahuru o te whakahaeretanga a ngā kaiwhakawā i runga i te iwi o Nīwhai, i reira ētahi kaitītore nō te iwi o Nīwhai, kua haere atu ai ki ngā Rāmana i ngā tau i mua, ā, kua tangohia ake ki runga i a rātou te ingoa o ngā Rāmana, me ētahi atu anō hoki o ngā uri o ngā Rāmana, kua whakaohokia ake e rātou ki te riri, e aua kaitītore rānei, nō reira tīmata ai rātou i tētahi pakanga ki ō rātou huānga.

25 Ā, ka mahi kōhuru rātou, ā, ka mahi pāhua rātou; kātahi ka hoki rātou ki roto i ngā maunga, ki roto i te koraha me ngā wāhi huna, e huna ana i a rātou anō kia kore ai rātou e kitea, e whiwhi āpitihanga ana ki ō rātou tokomahatanga ia te rā, ia te rā, i te mea i reira ētahi kaitītore i haere atu ai ki a rātou.

26 Ā pēnei, nāwai rā, āe rā, i roto i ngā tau ruarua, ka meinga rātou hei ope pāhua nui whakaharahara; ā, i kimi rātou i ngā mahere huna o Karianato; ā pēnei ka meinga rātou hei kaipāhua nā Karianato.

27 Nana ināianei, he nui te whakararuraru i mahia nei e ēnei kaipāhua, āe rā, he nui te whakangaromanga anō i roto i te iwi o Nīwhai, i roto anō hoki i ngā Rāmana.

28 Ā, i pahawa ake, nā, i tika tā rātou whakamutu i tēnei mahi whakangaromanga; nō reira tonoa atu ai tētahi tauā o ngā tāngata mārohirohi ki roto i te koraha, ā, i runga hoki i ngā maunga kia rapua ai tēnei ope kaipāhua, me te whakangaro i a rātou.

29 Engari nana, i pahawa ake i taua tau anō ka āia atu rātou ki ō rātou ake whenua. Ā pēnei mutu ai te tau waru ngahuru o te whakahaeretanga a ngā kaiwhakawā i runga i te iwi o Nīwhai.

30 Ā, i pahawa ake i te tīmatanga o te tau waru ngahuru mā tahi, ka haere atu anō rātou ki te whawhai ki tēnei ope kaipāhua, ā, ka whakangaro i ngā mea tokomaha; ā, kua torongia anō hoki rātou ki te whakangaromanga nui.

31 Ā, ka meinga anō rātou kia hoki atu i te koraha me ngā maunga ki ō rātou ake whenua, nā te tokomaha rawa o aua kaipāhua i muia ai ngā maunga me te koraha.

32 Ā, i pahawa ake, nā, ka mutu pēnei tēnei tau. Ā, ka nui haere anō ngā kaipāhua, ā, ka pakari haere, nā konā whakatumatuma ai rātou i ngā tauā katoa o ngā Nīwhai, me ō ngā Rāmana anō hoki; ā, ka mea anō rātou kia tau iho te wehi nui ki te iwi, ki runga i te mata katoa o te whenua.

33 Āe rā, he maha hoki ngā wāhi i haere ai rātou, ā, i nui tā rātou mahi whakangaromanga ki reira; āe rā, he tokomaha i whakamatea, ā, i kahakina hereheretia atu ētahi atu ki roto i te koraha, āe rā, tērā noa ake ā rātou wahine me ā rātou tamariki.

34 Nā, i whakaohokia anōtia te iwi e tēnei kino nui, i tau ai ki runga i te iwi nā tō rātou kino, ki te mahara ki te Ariki tō rātou Atua.

35 Ā pēnei mutu ai te tau waru ngahuru mā tahi o te whakahaeretanga a ngā kaiwhakawā.

36 Ā, i te tau waru ngahuru mā rua ka tīmata anō tā rātou wareware ki te Ariki tō rātou Atua. Ā, i te tau waru ngahuru mā toru ka tīmata tā rātou pakari haeretanga i te kino. Ā, i te tau waru ngahuru mā whā kāore rātou i whakatika i ā rātou mahinga.

37 Ā, i pahawa ake i te tau waru ngahuru mā rima ka pakari ake tā rātou haere i runga i tō rātou whakapehapeha, me tō rātou whakarihariha; ā pēnei i te pakari haere anō rātou mō te whakangaromanga.

38 Ā pēnei mutu ai te tau waru ngahuru mā rima.