1 Nana, e aku teina, kāore ianei koutou e mahara ana ki tā koutou pānuitanga i ngā kupu a te poropiti a Henohi, i kōrerotia nei ki te whare o Iharaira, e mea ana:

2 Whakarongo, E koutou te whare o Iharaira, me te whakarongo ki aku kupu, he poropiti nā te Ariki.

3 Nana rā, ko te kupu tēnei a te Ariki, māku koe e whakataurite, E te whare o Iharaira, kia rite ki tētahi rākau ōriwa whakatupu, i tīkina, ā, i whakatupuria e tētahi tangata i roto i tana māra wāina; ā, i tupu, ā, i pakari haere, ā, i pirau haere.

4 Ā, i pahawa ake, nā, i haere atu te rangatira o te māra wāina, ā, i kite ia i tā te rākau ōriwa pirau haeretanga; ā, ka kī ia: Māku ia e tapatapahi, māku anō ōna taha e keri, māku anō ia e whāngai, me kore pea e pihi ake ngā manga hou me ngā manga ngāwari, ā, kia kore e mate.

5 Ā, i pahawa ake, nā, i tapatapahia e ia, ā, i keria ngā taha, ā, i whāngaia e ia e ai ki tana kupu.

6 Ā, i pahawa ake, nā, i muri iho i ngā rā maha ka āhua paku tupu haere, ngā manga hou me ngā manga ngāwari; engari nana, i tīmata te matenga haeretanga o te kauru.

7 Ā, i pahawa ake, nā, i kitea tēnā e te rangatira o te māra wāina, ā, ka kī atu ia ki tana pononga: He pōuri nōku ka mate tēnei rākau; nā reira, haere me te whawhati i ngā manga nō tētahi rākau ōriwa ngahere, ā, haria mai nei ki ahau; ā, ka whawhati atu i aua manga kua tīmata tō reira memenge haeretanga atu, ā, ka makaia atu ērā e tāua ki roto i te ahi kia tahuna ai ērā.

8 Ā nana, e ai tā te Ariki o te māra wāina, he maha o ēnei manga hou me ēnei manga ngāwari ka tangohia atu e au, ā, māku e whakahono atu ki taku wāhi e pai ai; ā, kāore he raru ki ahau mēnā pū ia e mate ai te pakiaka o tēnei rākau, kia taea ai e ahau te rongoā mōku ngā hua o reira; nā reira, māku ēnei manga hou me ngā manga ngāwari e hari, ā, māku ēnā e whakahono atu ki taku wāhi e pai ai.

9 Haria e koe ngā manga nō te rākau ōriwa ngahere, me te whakahonoa mai ērā ki roto, hei whakakī i ō reira wāhi; ā, ka makaia atu ēnei manga kua whawhatia nei e ahau ki roto i te ahi kia tahuna ai, kia kaua e maumauria ai te whenua o tōku māra wāina.

10 Ā, i pahawa ake, nā, i mahia e te pononga a te Ariki o te māra wāina e ai ki te kupu a te Ariki o te māra wāina, ā, i whakahonoa iho ngā manga nō te rākau ōriwa ngahere.

11 Ā, ka meatia e te Ariki o te māra wāina kia keria ai ngā taha, ā, kia tapatapahia, ā, kia whāngaia, e mea ana ki tana pononga: He pōuri nōku ka mate tēnei rākau; nā reira, i mahi au i tēnei mea kia rongoā pea au i ngā pakiaka o reira kia kaua e mate, kia rongoā pea au i ēnā mōku.

12 Nā reira, haere i runga i tō huarahi; tirohia te rākau, ā, whāngaia, e ai ki aku kupu.

13 Ā, ka waiho ēnei e ahau ki te wāhi i raro rawa iho o tōku māra, ki te wāhi e pai ai ki ahau, kāore he tikanga ki a koe; ā, e meatia ana tēnei e ahau kia tiakina mōku anō ngā manga tupu o te rākau; waihoki, kia pūrangatia ai i reira e ahau he hua mō tērā tau, mōku ake anō; nā te mea he pōuri rawa ki ahau mēnā ka ngaro i ahau tēnei rākau me ō reira hua.

14 Ā, i pahawa ake, nā, i haere te Ariki o te māra i runga i tōna huarahi, ā, i hunaia ngā manga tupu o te rākau ōriwa whakatupu i ngā wāhi i raro rawa iho o te māra wāina, ētahi i tētahi, me ētahi atu i tētahi atu, e ai ki tōna hiahia me tāna i āhuareka ai.

15 Ā, i pahawa ake, nā, i pahure tētahi wā roa, ā, ka kī atu te Ariki o te māra wāina ki tana pononga: Haere mai, ka haere iho tāua ki raro iho o te māra wāina, kia mahi ai tāua i roto i te māra wāina.

16 Ā, i pahawa ake, nā, i heke iho te Ariki o te māra wāina, me tana pononga anō hoki, ki roto i te māra wāina ki te mahi. Ā, i pahawa ake, nā, i kī ake te pononga ki tōna māhita: Nana, titiro mai; tirohia te rākau.

17 Ā, i pahawa ake, nā, i titiro atu te Ariki o te māra wāina, ā, ka tirohia te rākau i whakahonoa iho ngā manga ōriwa ngahere; ā, kua pihi ake ia, ā, kua anga te hua i ngā hua. Ā, i tirohia e ia, nā, he pai ia; ā, i rite ō reira hua ki ngā hua tupu.

18 Ā, i kī atu ia ki te pononga: Nana, kua mau i ngā manga nō te rākau ngahere te wai o te pakiaka i reira, nā konā i nui ai te kaha i puta i te pakiaka i reira; ā, nā te nui o te kaha o te pakiaka i reira kua hua mai ngā manga ngahere i ngā hua whakatupu. Nā, mehemea kīhai tāua i whakahonohono iho i ēnei manga, kua mate te rākau i reira. Ināianei ā, nana, māku ngā hua maha e pūranga, ngā mea kua puta mai nei i te rākau i reira; ā, māku ō reira hua e pūranga ake mō tērā tau, mōku ake anō.

19 Ā, i pahawa ake, nā, i kī atu te Ariki o te māra wāina ki te pononga: Haere mai, ka haere iho tāua ki te wāhi i raro rawa iho o te māra wāina, ā, kia tirohia ai mehemea kāore rānei kua hua mai anō ngā manga tupu o te rākau i ngā hua maha, kia taea ai e ahau te pūranga ake i ō reira hua mō tērā tau, mōku ake anō.

20 Ā i pahawa ake, nā, i haere atu rāua ki te wāhi i hunaia ai e te māhita ngā manga tupu o te rākau, ā, i kī atu ia ki te pononga: Tirohia ēnei; ā, i tirohia e ia te tuatahi kua hua mai i ngā hua maha rawa; i kite anō ia he pai ēnā. Ā, i kī atu ia ki te pononga: Tangohia ētahi o ō reira hua, ā, pūrangatia mō tērā tau, kia tiakina ai mōku ake anō; nana rā, ko tāna i kī ai, mō tēnei wā roa au i whāngaia ai, ā, kua hua mai i ngā hua maha rawa.

21 Ā, i pahawa ake, nā, i kī atu te pononga ki tōna māhita: He aha koe i haere mai ai ki konei ki te whakatō i tēnei rākau, i tēnei manga rānei o te rākau? Nā te mea nana, ko te pito pōhara rawa ia i te whenua katoa o tō māra wāina.

22 Ā, i kī atu te Ariki o te māra wāina ki a ia: Kaua e whakatakoto whakaaro ki ahau; i mōhio au koia tētahi pito whenua pōhara; nā reira, i kī atu au ki a koe, nāku ia i whāngai mō tēnei wā roa, ā, kua kite koe kua hua mai i a ia ngā hua maha rawa.

23 Ā, i pahawa ake, nā, i kī atu te Ariki o te māra wāina ki tana pononga: Titiro mai; nana kua whakatō au i tētahi atu manga anō hoki o te rākau; ā, e mōhio ana koe koinei tētahi pito whenua pōhara rawa ake i te tuatahi. Engari, tirohia te rākau. Nāku ia i whāngai mō tēnei wā roa, ā, kua hua mai i ngā hua maha rawa; nō reira, kohikohia, ā, pūrangatia mō tērā tau, kia whakapātakahia ai e ahau mōku ake anō.

24 Ā, i pahawa ake, nā, i kī atu te Ariki o te māra wāina ki tana pononga: Titiro mai, ā, tirohia he manga atu anō, kua whakatōkia e au; tirohia, nā, kua whāngaia anō hoki e ahau, ā, kua hua mai he hua.

25 Ā, i kī atu ia ki te pononga: Titiro mai, ā, kia tirohia ai te mea whakamutunga. Nana, kua whakatōkia tēnei e au ki tētahi pito whenua pai; ā, nāku i whāngai mō tēnei wā roa, ā, kua hua noa tētahi wāhi o te rākau i ngā hua whakatupu, ā, kua hua mai i tērā atu wāhi o te rākau ngā hua ngahere; nana, nāku tēnei rākau i whāngai pērā i ērā atu.

26 Ā, i pahawa ake, nā, i kī atu te Ariki o te māra wāina ki te pononga: Hutia atu ngā manga kāore i hua mai i ngā hua pai, ā, makaia ērā ki roto i te ahi.

27 Engari nana, i kī atu te pononga ki a ia: Kia tapatapahia e tāua, ā, kia keria ngā tahataha, ā, kia whāngaia tonutia mō tētahi wā poto, me kore pea ia e hua mai i ngā hua pai ki a koe, kia pūrangatia ake mō tērā tau.

28 Ā, i pahawa ake, nā, i whāngaia e te Ariki o te māra wāina rāua ko te pononga a te Ariki o te māra wāina i ngā hua katoa o te māra wāina.

29 Ā, i pahawa ake, nā, i pahure atu tētahi wā roa, ā, i kī atu te Ariki o te māra wāina ki tana pononga: Haere mai, ka haere iho tāua ki raro i te māra wāina, kia mahi anō ai tāua i roto i te māra wāina. Nana rā, e whakatata mai ana te wā, ā, meake puta mai ai te mutunga; nā reira, me pūranga ake e au he hua mō tērā tau, mōku ake anō.

30 Ā, i pahawa ake, nā, i haere iho te Ariki o te māra wāina rāua ko te pononga ki roto i te māra wāina; ā, i tae ki te rākau kua whatia atu nei ōna manga, ā, kua whakahonoa iho ngā manga ngahere ki roto; ā nana, i pēhipēhia te rākau e ngā tūmomo hua katoa.

31 Ā, i pahawa ake, nā, i kai te Ariki o te māra wāina i te hua, o ia tū, o ia tū e rite ana ki tōna tau. Ā, i kī atu te Ariki o te māra wāina: Nana, tēnei wā roa i whāngai ai tāua i tēnei rākau, ā, kua pūrangatia e au mōku ake anō ngā hua maha rawa mō tērā tau.

32 Engari nana, kua hua mai i ngā hua maha rawa i tēnei wā, ā, kāore tētahi mea e pai ana i reira. Ā nana, he nui ngā momo hua kino i reira; kāore he painga ōna ki ahau, ahakoa ā tāua mahi katoa; ināianei ā, e pōuri ana au ka ngaro i ahau tēnei rākau.

33 Ā, ka kī atu te Ariki o te māra wāina ki te pononga: Me aha tāua ki te rākau, kia tiaki anō au i ngā hua pai o reira mōku ake anō?

34 Ā, ka kī atu te pononga ki tōna māhita: Nana, nā te mea i whakahonohono iho koe i ngā manga nō te rākau ōriwa ngahere kua whakakahangia ngā pakiaka, nā, e ora ana ēnā, ā, kāore ēnā i mate; nā reira e kite ana koe, nā, e pai ana ēnā.

35 Ā, i pahawa ake, nā, i kī atu te Ariki o te māra wāina ki tana pononga: Kāore he painga tō te rākau mōku, ā, kāore he painga tō ngā pakiaka o reira mōku ki te hua tonu mai i ngā hua kino.

36 Hei aha koa, e mōhio ana au he pai ngā pakiaka, ā, mō tōku ake tikanga anō nāku ēnā i tiaki; ā, nā tō ēnā kaha nui kua hua mai ā mohoa noa nei, mai i ngā manga ngahere, he hua pai.

37 Engari nana, kua tupu ngā manga ngahere, ā, kua popoki i ngā pakiaka o reira; ā, nā te mea kua popoki ngā manga ngahere i ngā pakiaka o reira kua hua mai i ngā hua kino maha; ā, nā te mea kua hua mai i ngā hua kino maha kei te kite koe kua anga tōna matenga; ā, meake ka pakari, kia makaia atu i te ahi, ki te kore tāua hei tiaki i a ia.

38 Ā, i pahawa ake, nā, i kī atu te Ariki o te māra wāina ki tana pononga: Ka haere iho tāua ki te wāhi i raro rawa iho o tōku māra, kia kite ai mehemea kua hua mai i ngā manga tupu anō he hua kino.

39 Ā, i pahawa ake, nā, i haere iho rāua ki ngā wāhi i raro rawa iho o te māra wāina. Ā, i pahawa ake, nā, i kite rāua kua kino anō ngā hua o ngā manga tupu; āe rā, te tuatahi me te tuarua, ā, tae atu ana ki te mea whakamutunga; ā, kua kino haere katoa.

40 Ā, kua pōkia te wāhi o te rākau i hua ai i ngā hua pai e ngā hua ngahere o te mea whakamutunga, nō konā rawa, ka memenge te manga, ā, ka mate.

41 Ā, i pahawa ake, nā, i tangi te Ariki o te māra wāina, ā, ka kī atu ki te pononga: He aha kē atu anō nāku mō tōku māra wāina?

42 Nana, i mōhio au ko ngā hua katoa o te māra wāina, hāunga ia ēnei, kua kino haere. Ā, ināianei ko ēnei mea kua hua mai i ngā hua pai i mua, kua kino haere anō hoki; ā, ināianei kāore he painga tō ngā rākau katoa o tōku māra wāina hāunga ia ko te tua me te maka ki roto i te ahi.

43 Ā, tirohia tēnei mea whakamutunga, kua memenge atu tōna manga, i whakatōkia e ahau ki te pito pai o te whenua; āe rā, ki te wāhi pai rawa ake i ērā atu wāhi katoa o te whenua o tōku māra wāina.

44 Ā, i kite koe, nā, i tua iho au i te mea i pēhipēhia ai tēnei pito o te whenua, kia whakatō ai au i tēnei rākau i tōna wāhi i reira.

45 Ā, i kite anō koe i hua mai he hua pai i tētahi wāhi o te rākau o reira, ā, i hua mai tētahi wāhi o reira he hua ngahere; ā, nā te mea kīhai au i huhuti atu i ngā manga o reira me te maka atu ki roto i te ahi, nana, kua warea e ēnā te manga pai, nā, kua memenge atu ia.

46 Ināianei ā, nana, ahakoa ā tāua poipoitanga katoa i taku māra wāina, kua kino haere ngā manga o reira, kāore he hua pai e hua ai i a ia; ā, i tūmanako au kia tiakina, kia pūrangatia ake he hua mō tērā tau, mōku ake anō. Engari, nana, kua meinga ēnā kia rite ki te rākau ōriwa ngahere, ā, kāore tō ēnā painga hāunga kia tuakina, ā, kia makaia ki roto i te ahi; ā, he pōuri nōku ka ngaro i ahau ēnā.

47 Engari, he aha kē atu anō nāku mō taku māra wāina? kua tangatanga rānei tōku ringa, kīhai i whāngaia e au? Kāo, kua whāngaia e au, ā, kua keria ngā taha, ā, kua tapatapahia, ā, kua ruiruia ki te wairākau; ā, kua torongia atu tōku ringa mō te roanga katoa o te rā, ā, e tata mai ana te mutunga. Ā, he mea pōuri ki ahau me tua katoa iho ngā rākau katoa o tōku māra wāina, me te maka iho ki roto i te ahi kia tahuna ai. Ko wai ia nāna nei taku māra wāina i whakakino?

48 Ā, i pahawa ake, nā, i kī atu te pononga ki tōna māhita: Ehara ianei i te tiketiketanga o tō māra wāina—kāore ianei ngā manga o reira kia popoki i ngā pakiaka e pai ana? Ā, nā te mea kua popoki ngā manga i ngā pakiaka o reira, nana, i tere ake tōna tupu i tō te kaha o ngā pakiaka, i riro anō te kaha ki konā anō. Nana, ko tāku, ehara koinei rānei te take kua kino haere ngā rākau o tō māra wāina?

49 Ā, i pahawa ake, nā, i kī atu te Ariki o te māra wāina ki te pononga: Ka haere iho tāua kia tua iho ai i ngā rākau o te māra wāina me te maka iho ki roto i te ahi, kia kore ai e pēhipēhi i te whenua o tōku māra wāina, nā te mea nāku ngā mea katoa i mahi. He aha kē atu anō nāku mō tōku māra wāina?

50 Engari, nana, i kī atu te pononga o te Ariki o te māra wāina: Tohungia ia mō tētahi wā poto anō.

51 Ā, i kī ake te Ariki: Āe rā, māku ia e tohu mō tētahi wā poto anō, nā te mea he pōuri nōku ka ngaro i a au ngā rākau o tōku māra wāina.

52 Nā reira, kia tīkina e tāua ētahi manga o ēnei kua whakatōkia e ahau ki ngā wāhi i raro rawa iho o tōku māra wāina, ā, ka whakahonoa iho ēnā e tāua ki te rākau i ahu mai ai ēnā; ā, ka huhuti tāua mai i te rākau ēnā manga ko ōna hua he kawa rawa atu, ā, ka whakahonoa iho ngā manga tupu o te rākau ki te wāhi o reira.

53 Ā, māku tēnei e mahi kia kore ai te rākau e mate, me kore pea, e tiakina ai ngā pakiaka o reira mōku ake anō.

54 Ā, nana, kei te ora tonu nei ngā pakiaka o ngā manga tupu o te rākau kua whakatōkia e au ki ngā wāhi katoa e pai ai ki ahau; nā reira, kia tiakina ai mō toku ake tikanga, māku e tango i ngā manga o tēnei rākau, ā, māku ēnā e whakahono iho ki konā. Āe rā, māku e whakahono iho ki konā ngā manga nō te rākau whaea, kia tiakina anōtia ai ngā pakiaka mōku ake anō, nā, ina pakari rawa ēnā ka hua mai pea i ngā hua pai mōku, ā, ka whai korōria anō au i tōku māra wāina.

55 Ā, i pahawa ake, nā, i tangohia e rāua mai i te rākau tupu kua ngahere haere nei, ā, i whakahono iho ki ngā rākau tupu, kua ngahere haere nei anō hoki.

56 Ā, i tangohia anōtia mai i ngā rākau tupu kua ngahere haere nei, ā, i whakahonoa iho ki tō ēnā rākau whaea.

57 Ā, i kī atu te Ariki o te māra wāina ki te pononga: Kaua e huhuti i ngā manga ngahere i ngā rākau, hāunga ēnā e tino kawa rawa atu ana; ā, ka whakahonoa iho ki reira e ai ki tāku i kī ai.

58 Ā, ka whāngai anō tāua i ngā rākau o te māra wāina, ā, ka tapatapahia ake hoki ngā manga o reira; ā, ka huhuti mai i ngā rākau i ērā manga kua pakari, ngā mea me mate, ā, ka makaia ki roto i te ahi.

59 Ā, ka meatia tēnei e au, me kore pea, ngā pakiaka o reira e whai kaha ai nā tō ēnā painga; ā, nā te whakawhitiwhitinga i ngā manga, kia taea ai te kino e te pai.

60 Ā, nā konā i tiakina ai e au ngā manga tupu me ngā pakiaka tupu o reira, ā, kua whakahonoa iho anō ngā manga tupu ki tō ēnā rākau whaea, ā, kua tiakina ngā pakiaka o tō ēnā rākau whaea, nā, me kore pea, ngā rākau o tōku māra wāina e hua mai anō i ngā hua pai; ā, kia whai koa anō ai au i ngā hua o tōku māra wāina, ā, me kore pea, kia rahi rawa atu tōku koa mōku i tiaki ngā pakiaka me ngā manga o te hua tuatahi—

61 Nā reira, haere atu, me te karanga atu ki ngā pononga, kia kaha rawa tā tātou mahi i te māra wāina, kia whakarite tātou i te huarahi, kia whakaputaina mai ai anō e au te hua tupu, ko te hua tupu nei he pai, ā, he nui noa atu tōna utu i ō ērā atu hua katoa.

62 Nā reira, ka haere tātou me te mahi i runga i tō tātou kaha mō tēnei wā whakamutunga, nā te mea, nana te mutunga e tata mai ana, ā, koinei te wā whakamutunga e tapatapahi au i tōku māra wāina.

63 Whakahonoa iho ngā manga; tīmataria i te mea tōmuri kia tōmua ai, ā, kia tōmuri ai ngā mea tōmua, ā, keria ngā taha o ngā rākau, kōhure mai, māhuri mai, te tōmua me te tōmuri; ā, te tōmuri me te tōmua, kia whāngaia ngātahitia ai anō mō te wā whakamutunga.

64 Nā reira, keria ngā taha o ēnā, tapahia ēnā, me te ruirui anō ki runga i ēnā te wairākau, mō te wā whakamutunga, nā te mea kei te tata mai te wā. Ā, ki te tupu pēnei ngā mea whakahono, me te hua mai i ngā hua tupu, kātahi koe ka whakarite i te huarahi mō ēnā, kia tupu ai ēnā.

65 Ā, i ngā rākau e pihi ake ana mā koutou ngā manga e hua ai i ngā hua kawa e whakawātea atu, e ai ki te kaha o ngā mea pai me te rahi o reira; ā, e kore koutou e whakawātea atu i ngā mea kino o reira i te wā kotahi, kei kaha rawa ngā pakiaka o reira mō te whakahono, ā, ka mate te mea whakahono o reira, ā, ka ngaro i a au ngā rākau o tōku māra wāina.

66 Nā te mea he pōuri nōku ka ngaro i ahau ngā rākau o tōku māra wāina; nā reira mā koutou ngā mea kino e whakawātea atu kia rite ki te āhuatanga o tā ngā mea pai tupu, kia taurite ai te kaha o te kauru me te pakiaka, kia tae atu ki te wā e taea ai te kino e te pai, ā, kia tuakina iho te kino me te makaia iho ki roto i te ahi, kia kore ai e pēhia e ēnā te whenua o tōku māra wāina; ā, ka pēnei taku tahinga atu i te kino i taku māra wāina.

67 Ā, māku anō ngā manga o te rākau tupu e whakahono iho ki te rākau tupu;

68 Ā, māku ngā manga o te rākau tupu e whakahono iho ki ngā manga tupu o te rākau; ā, ka pēnei anō taku whakahuihui i ngā manga, kia hua ai i ngā hua tupu, ka kotahi anō ēnā.

69 Ā, ka makaia atu ngā mea kino, āe rā, ki waho pū anō i te whenua o tōku māra wāina; nana rā, māku tōku māra wāina e tapatapahi mō tēnei wā anake.

70 Ā, i pahawa ake, nā, i tonoa atu e te Ariki o te māra wāina tana pononga; ā, ka haere te pononga me te mahi i tā te Ariki i whakahau ai ki a ia, ā, i haria mai ētahi atu pononga; ā, he mea ruarua noa rātou.

71 Ā, i kī atu te Ariki o te māra wāina ki a rātou: Haere, me te mahi i tōku māra wāina, i runga i tō koutou kaha. Nana rā, koinei te wā whakamutunga māku e whāngai tōku māra wāina; nā te mea kua tata tae mai te mutunga, ā, e wawe mai ana te wā; ā, ki te mahi koutou i runga i tō koutou kaha me au ka whai koa koutou i ngā hua māku e pūranga ake mōku ake anō mō te wā meake ka tae mai.

72 Ā, i pahawa ake, nā, i haere ngā pononga me te mahi i runga i tō rātou kaha; ā, i mahi tahi anō te Ariki o te māra wāina me rātou; ā, i whakarongo katoa rātou ki ngā whakahaunga a te Ariki o te māra wāina i roto i ngā mea katoa.

73 Ā, ka tīmata anō te māra wāina ki te whai hua tupu; ā, i tīmata anō ngā manga tupu ki te tupu me te tino matomato; ā, i tīmata te huhuti i ngā manga ngahere me te makaia atu; ā, i whakataurite rātou i te pakiaka kia rite tonu ki te kauru, e ai ki tō reira kaha.

74 Ā, i pēnei tā rātou mahinga, i runga i te ū katoa, e ai ki ngā whakahaunga katoa a te Ariki o te māra wāina, tae atu ana ki te makanga atu i ngā mea kino ki waho i te māra wāina, ā, i tiakina mōna ake anō, nā, kua meinga anō ngā rākau ko te hua tupu; ā, i meinga ēnā kia rite ki te tīnana kotahi; ā, i whakapātakahia e te Ariki o te māra wāina mōna ake anō te hua tupu, koinei te mea utu nui rawa ki a ia mai i te tīmatanga.

75 Ā, i pahawa ake, nā, i te wā i kite atu te Ariki o te māra wāina kua pai ana hua, ā, kāore tonu tana māra wāina i te kino, i karangatia ake āna pononga, ā, ka kī atu ki a rātou: Nana, mō tēnei wā whakamutunga tātou i whāngai ai tōku māra wāina; ā, kei te kite koe kua mahi au i tāku i pai ai; ā, kua whakapātaka au i ngā hua tupu, he mea pai ia, he pērā pū anō ia ki tō te tīmatanga. Ā, e manaakitia nei koe; nā te mea, nā tō ū ki te mahi tahi me au i roto i tōku māra wāina, ā, kua puritia aku whakahaunga, ā, kua whakahokia mai anō ki ahau te hua tupu, nā konā kāore tonu taku māra wāina i te kino, ā, kua makaia atu ngā mea kino, nana, ka koa tahi tāua nā ngā hua o tōku māra wāina.

76 Nana rā, ka pūrangatia mōku ake anō ngā hua o tōku māra wāina mō tētahi wā roa, koia nei e wawe mai ana; ā, mō te wā whakamutunga nāku tōku māra wāina i whāngai, me te tapatapahi, me te keri i ngā taha, me te ruirui i te wairākau; nā reira māku ngā hua e pūranga mōku ake anō, mō tētahi wā roa, e ai ki tāku kua kōrerotia ake nei e au.

77 Ā, ina tae mai te wā e kuhu mai anō ngā hua kino ki roto i tōku māra wāina, kātahi au ka meatia te whakahuihui i ngā mea pai me ngā mea kino; ā, māku ngā mea pai e tiaki mōku ake anō, ā, ka makaia atu ngā mea kino ki roto i tōna ake wāhi. Ā, kātahi nei ka tae mai te tau me te whakamutunga; ā, ka meinga e au tōku māra wāina kia tahuna ai ki te ahi.