Ɔfã 85
Nyikyerɛ a wɔnam Joseph Smith Nkɔnhyɛnyi no do dze mae, wɔ Kirtland, Ohio, Ɔberɛfɛw 27, 1832. Dɛm ɔfã yi fi krataa bi a Nkɔnhyɛnyi no kyerɛwee kɛmaa William W. Phelps a nna ɔtse Independence, Missouri. Ɔyɛ asɛmbisa binom no mbuae a ɔfa Ahotseweefo a wofi hɔ kɔɔr Zion a woenndzi mbrasɛm no dɛ wɔmfa hɔn egyapadze mbɔ afɔr no do a nna hɔn nsa nnkãa hɔn egyapadze dɛ mbrɛ Asɔr no ahyehyɛ ato hɔ no.
1–5, Zion egyapadze no, ɔwɔ dɛ wodua afɔrbɔ do wɔdze ma; 6–12, Obi a ɔyɛ otumfo na noho yɛ dzen na ɔdze Ahotseweefo no hɔn egyapadze bɛma hɔn wɔ Zion.
1 Ɔyɛ Ewuradze ne krakye a oeyi no esi hɔ no dwuma dɛ ɔkyerɛw abakɔsɛm, nye ndzɛmba biara a wɔyɛ no wɔ asɔr no mu wɔ Zion nye hɔn a wɔdze hɔn ahodze bɔ afɔr, nye hɔn a wɔnam mbra kwan do nya egyapadze fi bishop hɔ nyinara;
2 Nye hɔn bra mu nsɛm, nye hɔn gyedzi, nye hɔn edwuma so; nye hɔn a sɛ etuatsewfo nsa kã hɔn egyapadze wie a wɔtsew etua no so.
3 Otsia Nyame ne pɛ na ne mbrasɛm dɛ hɔn a wɔammfa afɔrbɔ egyapadze amma hɔn dɛ mbrɛ ne mbra a ɔdze ama no tse no, ama no nkorɔfo etua hɔn ebupɛn du dze esiesie hɔn ama woeetum egyina awerdzi na ogyahyew da no ano no, ɔnnsɛ dɛ wɔkyerɛw kã Nyankopɔn no nkorɔfo hɔn edzin ho.
4 Eso ɔnnsɛ dɛ wɔkyerɛw hɔn ebusuasantsen ho nsɛm wɔ asɔr n’abakɔsɛm nwoma no mu.
5 Ɔnnsɛ dɛ wɔkyerɛw hɔn edzin, anaadɛ hɔn egyanom edzin, anaadɛ hɔn mba edzin wɔ Nyankopɔn ne mbra nwoma no mu, Ewuradze na ɔse.
6 Nyew, dɛm na ndze tseaba no se, dza ɔwasa a ohwira adze nyina mu, na mpɛn pii sɛ ɔda noho edzi a, ɔma me mbiew wosow no se:
7 Na ɔbɛba dɛ Emi, Ewuradze Nyankopɔn, mobɔsoma otumfo na ɔhoɔdzenfo a tum kitsa ne nsamu na n’akataho yɛ kan, ɔno na onnyiewiei asɛm befi n’anomu epue; n’abadaa mu na nokwar nsubura wɔ, na ɔdze bɔtoto Nyankopɔn ne fie ndzɛmba esiado esiado, na oesiesie ahotseweefo a wobohu hɔn edzin nye hɔn egyanom edzin, nye hɔn mba edzin wɔ Nyankopɔn ne mbra nwoma no mu no hɔn egyapadze;
8 Ber a nyia Nyankopɔn frɛɛ no na oyii no tseen ne nsa suoo Nyankopɔn n’adakaa mu dze atseen no no obodua owu egyanmenaba mu ahwe ase, tse dɛ dua a asenaman egyanmenaba atsew esi mu.
9 Na hɔn a wɔnnkyerɛɛw hɔn edzin wɔ nkaa nwoma no mu nyinara nnkenya egyapadze biara wɔ dɛm da no mu, mbom wobotwa hɔn akyen, na wɔdze hɔn bɔfora ekyingyefo mu, beebi a sũ na asetwɛr wɔ.
10 Dɛm nsɛm ntsi, dɛ ma Ewuradze kã no ɔbɛhyɛ no mã so.
11 Na hɔn a wɔwɔ Asɔfodzi a Ɔkrɔn a woennhu hɔn edzin wɔ mbra nwoma no mu no, anaadɛ wɔatsew etua, anaadɛ woeyi hɔn efi asɔr no mu nye asɔfo nkakraba, anaadɛ asɔrmba no, dɛm da no worinnya egyapadze wɔ Ɔsorsornyi n’ahotseweefo no mu;
12 Dɛm ntsi, wɔbɛyɛ hɔn dɛ mbrɛ wɔdze yɛɛ asɔfomba no, dza wɔakyerɛw wɔ Ezra Nwoma, Tsir ebien, nkyekyɛmu eduosia biako na eduosia ebien no.