1 Tsie, na hwɛ, ndze bi a ɔsõ na tum wɔ mu fi sor retsẽa mu wɔ ase ha dze rokɔ asaase n’ano nyina, nyew, na ndze no ɔwɔ hɔ ma adasa, na ɔse—Hom nsiesie Ewuradze no kwan, hom mma n’atsempɔn ntsentsen.

2 Wɔdze Nyankopɔn n’ahenman ne nsaafee no ama nyimpa wɔ asaase do, na asɛmpa no bepirepirew efi hɔ akɔ asaase ano nyina, tse dɛ ɔbo bi a wɔnndze nsa twae fii bepɔw mu no bepirepirew ekesi dɛ ɔbɛtahye asaase nyina do.

3 Nyew, ndze bi retsea mu dɛ—Hom nsiesie Ewuradze no kwan, hom nsiesie Eguambaa no n’edzidzi, na hom nyɛ krado ntweɔn Ayeforkun no.

4 Hom mbɔ mpaa mma Ewuradze, hom mbɔ ne dzin krɔnkrɔn no, hom nda ndwuma nwanwa no edzi wɔ nyimpa mu.

5 Hom mfrɛ Ewuradze, ama n’ahendzi atserɛw wɔ asaase do, ama hɔn a wɔtse do no aagye, na hom nsiesie homho mfa mma nda a ɔreba no, no mu na Nyimpa Ba no besian dze sor aba asaase do efura n’enyimnyam a ɔhyerɛn no, ebehyia Nyankopɔn n’ahenman a ɔakyekyer no asaase do no.

6 Dɛm ntsi, hom mma Nyankopɔn n’ahenman no nnyin, ama ɔsor ahenman no aaba, ama ɔwo, O Nyankopɔn, aama wɔaahyɛ wo enyimnyam wɔ sor nye asaase, aama wɔaakã w’atamfo ahyɛ, na ɔwo na enyidzi, tum nye enyimnyam yɛ wodze afebɔɔ kesi afebɔɔ. Amen.