Ia Iuni 1831, na maua ai e le Perofeta o Iosefa Samita faaaliga ua faamaumauina i le Mataupu Faavae ma Feagaiga 53–55. O faaaliga o loo i ai faatonuga a le Alii mo nisi o tagata o le Ekalesia o e sa nonofo i Ohaio, ae o le a le umi ae siitia atu i Misuri. I nei faaaliga na fetalai ai le Alii ia Sini Gilbert, Newel Knight, ma Viliamu W. Phelps, ma tuuina mai i ai faatonuga sa patino i o latou tofiga Faale-ekalesia ma a latou taleni.
Ua valaauina e le Alii ia Sini Gilbert e avea ma se toeaina ma malaga faatasi ma Iosefa Samita i Misuri
Ina ua iloa e Sini Gilbert e le’i i ai lona igoa i le lisi o faifeautalai na valaauina e malaga atu i Misuri (tagai i le MF&F 52:22–32), sa alu atu o ia i le Perofeta o Iosefa Samita ma fesili po o le a le mea e finagalo le Alii na te faia. Sa ole atu Iosefa i le Alii ma maua mai ai le faaaliga o loo i le Mataupu Faavae ma Feagaiga 53. I le faaaliga, na faatonuina ai e le Alii ia Uso Gilbert ina ia faauuina o se toeaina, ma ia avea ma se sui ia Epikopo Eteuati Paterika. O le matafaioi a Uso Gilbert i le avea ai ma se sui i le epikopo o loo faamatalaina atoatoa i le Mataupu Faavae ma Feagaiga 57:6–10, 15. Sa poloaiina foi e le Alii ia Sini e o i Misuri faatasi ma Iosefa Samita ma Sini Rikitone.
Mafaufau i le aafiaga lenei a se tamaitai talavou sa mafaufau po o le a le mea e finagalo le Alii na te faia:
“O Saina na maua ai e Aleisha Cramer le tali i ana tatalo. O le tali sa faigofie ae sa faigata foi ona faia i le taimi lava e tasi. Sa tatau ona ia lafoai ana miti o le olaga atoa, foi i le fale, ma ola i le olaga o se tagata aoga averesi i le kolisi. Sa faateia o ia i le tali, ae sa naunau o ia e fai le mea na ta’u mai e le Alii e fai.
“Na oo Aleisha … i le pito i luga i le avea ma se tagata taalo soka aupito sili ona lelei. Na ia ausia le tele o ana sini, ma agai atu i le avea ma se tasi o le au a tamaitai a le atunuu o le Iunaite Setete, na tuuina atu ai se avanoa e taalo ai le Ipu o le Lalolagi ma le Olimipeka o le 2004.
Ata
Aleisha Cramer
“Sa oo i ai o ia. Ae sa lei faafiafiaina ai o ia.
“’Sa ou mauaina mea uma,’ na fai mai ai Aleisha. ‘Sa ou maua se aiga lelei. Na i ai a’u uo. Sa ou aoga i le BYU. Sa lelei tele la’u taalo mo le au a le atunuu. Ae pe o le a ou galue pea agai atu i le au mo le Ipu o le Lalolagi ma lagonaina ai pea lenei lagona gaogao?’
“Ma, a’o i ai i Saina e taalo i faaaliga taaloga, sa ala ae Aleisha i se tasi o po ma le tagi. Sa ia lagonaina se lagona manaia o le mafanafana, ma le toamalie. ‘Ou te manatua le tuuina o lo’u lima i luga o lo‘u fatu, ona omai lea o nei mafaufauga uma: “E tatau ona e faamaamulu mai le au a le atunuu. E le lelei mo oe le soli o le aso Sapati. E leai se afaina o lou uia o se auala ese. O le a lelei mea uma.’” Sa ia faamatalaina le faatumulia i le Agaga, ma sa toe tupu foi lea aafiaga i nisi o po na sosoo ai.
“E ui lava sa avea o ia ma se tagata o le Ekalesia i lona olaga atoa, ae na faateteleina le fiafia o Aleisha i le talalelei. Sa ia faitauina ana tusitusiga paia e le itiiti ifo ma le 30 minute i aso uma, ma sa ia matauina na suia ana tatalo. Sa ia ole atu i le Alii mo le mea na Ia finagalo na te faia. Ma o Saina, na maua ai lana tali.
“‘Ou te lei mauaina muamua ni lagona faapena, o le toamalie ma le mafanafana. Maimau pe ana mafai ona ou maua na ituaiga aafiaga i taimi uma e i ai ni a’u fesili. O mea uma na foliga mai na matua manino lava. Sa matuai fetaui lava.’
“Sa galue loa Aleisha e tusa ai ma le musumusuga sa ia mauaina. Sa ia fai mai, ‘Pe a e maua se musumusuga, e tatau ona mulimuli ai loa i le taimi lena. Ana faapea ou te fai atu, “Ioe, e sa‘o lena. Ae ou te manao lava e taalo i le Ipu o le Lalolagi, o lea o le a ou faia ai pe a uma,” atonu e le manuia ia mea e pei ona sa tatau ai.’ …
“O le le i ai i le au a le atunuu, na tuuina atu ai ia Aleisha le taimi e faataitai ai ni mea fou.” O le taimi lea sa amata ai ona tafao faamasani i se alii talavou sa aoaoina o ia e ta le kitara, ma sa la faaipoipo mulimuli ane i le malumalu.
“‘Ou te mautinoa sa saunia au mo lenei suiga e le mea na tupu i Saina. Sa ou faamamuluina se mea ae maua mai ai se mea e sili atu ona lelei,‘ o le tala lea a Aleisha.
“… E manao pea o ia e galue malosi, ae o le taimi nei o le a galue malosi mo lona lava aiga.
“O loo faalogo [Aleisha] i le faiaoga sili o faiaoga uma, o lona Tama Faalelagi, o le e mafai ona fesoasoani e taiala o ia ma tuu mai ia te ia faatonuga ma musumusuga. E pei ona fai mai Aleisha, ‘E silafia e le Alii i tatou taitoatasi. Mo a‘u lava, o se mea sili ona lelei lena o le iloa ma le i ai o se molimau e uiga i ai’“ (Janet Thomas, ”The Playmaker,“ New Era, Nov. 2003, 21, 23).
Mafaufau loloto i auala e mafai ona e maua ai le taitaiga mai le Alii e uiga i lou olaga.
Ua faatonu e le Alii ia Newel Knight e taitai atu le Au Paia Colesville i Misuri
Ia Aperila 1831, na taitaiina ai e Newel Knight se vaega o le Au Paia mai Colesville, Niu Ioka, e auai faatasi ma le Au Paia i Ohaio. Ia Me, na faatonuina ai e le Perofeta o Iosefa Samita ia Epikopo Eteuati Paterika ina ia faanonofo na tagata o le Au Paia i le laueleele i Tomasone, Ohaio, lea na osifeagaigaina (pe folafolaina) muamua mai e Leman Copley e tuuina mai mo lena faamoemoega. Sa latou totoina laauiti iina ma amata ona faia isi galuega faaleleia i luga o le fanua. Ae e ui lava na latou galulue faatasi e faaleleia le laueleele, sa amata ona latou mataū ma manao tele. Sa atili le faaletonu o lo latou tulaga ina ua toe foi mai Leman Copley mai lana misiona i le au Saaluu (tagai i le MF&F 49) ma amata ona faaluafesasi i lona faatuatua. Sa ia teena lana molimau tuputupua’e o le talalelei toefuataiina ma faatonuina le Au Paia e o ese mai le fanua. Sa ia tapa foi se totogi mai ia i latou e $60. Talu ai ona na solia e Leman lana feagaiga, o lea la na leai ai se mea e nonofo ai nei tagata o le Au Paia. Sa fesili atu Newel Knight ma isi i le Perofeta po o le a se mea e tatau ona latou faia.
Faitau le Mataupu Faavae ma Feagaiga 54:1–3, ma faailoga mea na finagalo le Alii e fai e nei tagata o le Au Paia, e fesoasoani e faaleleia ai lo latou tulaga. Ona mafaufau loloto lea i le fesili lenei: Aisea e te manatu ai o le a fesoasoani le salamo ma le lotomaualalo i nei tagata o le Au Paia?
Faitau le Mataupu Faavae ma Feagaiga 54:6, ma faailoga se faamanuiaga na tuuina mai ia i latou o e tausia le feagaiga o le faapaiaina o a latou meatotino.
E faavae i aoaoga a le Alii i le Mataupu Faavae ma Feagaiga 54:1–6, faauma le mataupu faavae lenei: Afai tatou te tausia a tatou feagaiga ma usitai i poloaiga a le Alii, o le a tatou maua .
O faamanuiaga uma tatou te maua o se faatinoga lea o le alofa mutimutivale o le Alii. O se tasi o faataitaiga o le alofa mutimutivale o le Alii o le, pe a Ia faamagaloina a tatou agasala. Pe a tatou tausia feagaiga tatou te osia i le papatisoga ma usiusitai i poloaiga a le Atua, o le a le gata ina tatou maua le alofa mutimutivale i lenei olaga, ae o le a tuuina mai foi le alofa mutimutivale i le Faamasinoga Mulimuli.
Na aoao mai e Elder David A. Bednar o le Korama a Aposetolo e Toasefululua nisi o auala e tuuina mai ai e le Alii le alofa mutimutivale ia i tatou a’o tatou tausia a tatou feagaiga:
Ata
Elder David A. Bednar
“O le alofa mutimutivale o le Alii o ni faamanuiaga patino taitasi o le malosi, puipuiga, mautinoa, taitaiga, alofa ma le agalelei, faamafanafanaga, lagolagosua, ma meaalofa faaleagaga tatou te maua mai i le Alii o Iesu Keriso, ma maua mai ona o Ia, ma e ala mai foi ia te Ia. …
“… E le tupu faafuasei le alofa mutimutivale o le Alii, pe ua na o se mea foi e te’i lava ua tupu. O le faatuatua, usiusitai, ma le lotomaulalo e aumaia ai le alofa mutimutivale i o tatou olaga, ma o le tele lava o le taimi a le Alii e mafai ai ona tatou iloa ma faapelepele i nei faamanuiaga taua” (“O Le Alofa Mutimutivale o le Alii,” Ensign po o le Liahona, Me 2005, 99–100).
I lau api talaaga mo le suesueina o tusitusiga paia, tusi e uiga i nisi o faamanuiaga e te lagona ua tuuina mai e le Alii ia te oe talu ai nei, ona o lou faamaoni i au feagaiga ma le usiusitai i Ana poloaiga.
I le Mataupu Faavae ma Feagaiga 54:7–10 tatou te faitau ai, ina ua aveese fale o nei tagata o le Au Paia mai le fanua o Leman Copley, na poloaiina i latou e le Alii e malaga atu i Misuri. Sa tatau ona latou tofia se tagata e totogiina mea latou te faaaogaina i la latou malaga, ma ia galulue mo lo latou tausiga a’o nonofo ai iina seia oo ina saunia e le Alii se nofoaga latou te faamautu ai. Na fautuaina foi i latou ina ia onosai i puapuaga.
Ua valaauina e le Alii ia Viliamu W. Phelps e fesoasoani i le tusiaina ma le lolomiina o tusi ma mea e faaaoga a le Ekalesia
Mafaufau i nisi o au taleni po o tomai. Ona mafaufau lea i taleni po o tomai o loo i ai a se tasi o au uo. Ona o le eseese o o tatou gafatia, o lea e mafai ai ona tatou fesoasoani i le galuega a le Alii i auala eseese. E mafai ona faaaoga e le Atua a tatou taleni, tomai, ma gafatia e faamanuia ai Ana fanau. O Viliamu W. Phelps o se faataitaiga o lenei mataupu faavae. A o lei taunuu atu o ia i Katelani, Ohaio, sa ia faatauina mai se kopi o le Tusi a Mamona i le lua vaiaso talu ona ofoina mo le faatauina atu. O lenei mea na taitai atu ai i lona liliuga.
Faitau le folasaga o le vaega mo le Mataupu Faavae ma Feagaiga 55, ma vaavaai mo se tasi o tomai po o gafatia o Viliamu W. Phelps. Ona faitau lea o le Mataupu Faavae ma Feagaiga 55:4, ma vaavaai mo se tasi o ana taleni. Na valaauina e le Alii ia Uso Phelps e faaaoga ana taleni ma tomai e fesoasoani ai i le tusiaina ma lolomiina o tusi ma mea e faaaoga a le Ekalesia i Misuri (tagai i le MF&F 55:5). O taumafaiga a Uso Phelps iina na faamanuiaina ai le Ekalesia i le tele o itu.
Ata
O Viliamu Phelps ma Iosefa Samita i le masini lolomi
Tali fesili nei i lau api talaaga mo le suesueina o tusitusiga paia:
Na faapefea ona e vaai o faaaoga e le Alii taleni ma gafatia o tagata e faamanuia ai isi?
O a ni auala e mafai ai e au taleni po o gafatia ona faamanuia ma siitia ai isi, ma faaagai ai i luma le galuega a le Alii?
Ua faaleaoga e le Alii le valaauga o le misiona a Ezra Thayre ma lapataia o ia e salamo
Tusi i lau api talaaga mo le suesueina o tusitusiga paia, e uiga i se tasi e te iloa sa ia faataatiaese se mea taua ia te ia ina ia mafai ona usitai i se poloaiga. (O faataitaiga e mafai ona aofia ai se tasi ua ositaulaga e auai i le Ekalesia, e alu i se misiona, po o le usiusitai i ni tulaga faatonuina faapitoa o le Ekalesia.)
O Ezra Thayre na tofia e nofo ma galulue faatasi ma Iosefa Samita le Matua i le faatoaga a Frederick G. Williams i Katelani, Ohaio. E faaopoopo atu i le galue i le faatoaga, sa fesoasoani foi Ezra e totogi se vaega o le aitalafu na nofoaitalafu ai i le fanua. Ina ua valaauina o ia i se misiona i Misuri faatasi ma Thomas B. Marsh (tagai i le MF&F 52:22), sa ia poloaiina se vaega o le fanua o le Ekalesia lea na ia manatu na aia i ai. Ona o lona popole i lona fanua ma tupe, sa le’i saunia ai Ezra Thayre e alu i lena misiona ina ua sauni Thomas, o lea na alu ai Thomas i le Perofeta o Iosefa Samita ma fesili i ai po o le a le mea e tatau ona ia faia.
I le faaaliga ua faamaumauina i le Mataupu Faavae ma Feagaiga 56, na faaleaogaina ai e le Alii le valaauga o le misiona a Ezra Thayre ma tofia se soa fou mo Uso Marsh. Ona lapatai mai lea o le Alii e uiga i le faamaualuga ma aoao le Au Paia, o loo tele ma anoanoai mea o loo Ia teuina mo i latou nai lo o fanua ma tupe.
Faitau le Mataupu Faavae ma Feagaiga 56:3–5, ma vaavaai mo le mea na tupu ona sa le’i saunia Ezra Thayre e o ma Thomas B. Marsh i Misuri. A o e faitau, atonu e fesoasoani le iloa o le upu aveesea o lona uiga o le toe aveesea po o le faaleaogaina. O le a le mea na aveesea ma ia Ezra ona sa le’i saunia o ia e o ma Uso Marsh?
O leMataupu Faavae ma Feagaiga 56:4 ua aoaoina i tatou e mafai e le Alii ona poloai pe aveesea se poloaiga pe a Ia silafia e tatau ai. Atonu e te manao e faailoga upu po o fuaitau o loo ta‘u mai ai lenei mataupu faavae.
O ni nai faataitaiga nei mai tusitusiga paia ma le talafaasolopito o le Ekalesia o le tuuina mai po o le faaleaogaina e le Alii o se poloaiga:
Ina ua uma ona ofoina atu e le Alii se tulafono maualuga atu ia Mose ma lona nuu, sa fouvale le fanauga a Isaraelu ma amata ona tapuai i se tamai povi auro. Ona tuuina mai lea i ai e le Alii se tulafono maualalo ane. (Tagai i le Faaliliuga a Iosefa Samita, Esoto 32:14; 33:20; 34:1–2 [i le faaopoopoga o le Tusi Paia].)
I le taimi o le galuega a le Faaola i le lalolagi, sa Ia ta‘u atu i le au Aposetolo e talai atu i na o tagata Iutaia lava (tagai i le Mataio 10:5). E lei leva ona maliu le Faaola, ae maua e Peteru se faaaliga, na oo i le taimi e talai atu ai le talalelei i tagata o atunuu uma (tagai i le Mataio 28:19).
I lenei tisipenisione na poloaiina ai e le Alii nisi o le Au Paia anamua e faia autaunonofo. Sa faigata i le Perofeta o Iosefa Samita ma le toatele o isi taitai lenei poloaiga, ae sa latou usitai lava i ai. I tausaga mulimuli ane, ina ua mavae ona maua se faaaliga, na tuuina mai ai e Peresitene Uilifoti Uitilafi se faamatalaga tusitusia—o le Manifeso—lea na taliaina e le Ekalesia o le faatonuga ma le noataga i le aso 6 o Oketopa, 1890. O lenei mea na taitai atu ai i le faamutaina o autaunonofo i le Ekalesia (tagai i le Folafolaga Aloaia 1).
Faitau le Mataupu Faavae ma Feagaiga 56:8–11, ma vaavaai po o le a le mea na poloaiina e le Alii ia Ezra Thayre e fai ina ua uma ona faaleaogaina lona valaauga o le misiona. O le mea na lelei ai, sa filifili Ezra e salamo, ma o le fitu masina mulimuli ane, sa toe valaauina ai o ia e auauna atu o se faifeautalai faatasi ma Thomas B. Marsh (tagai i le MF&F 75:31).
Ua lapataia e le Alii le Au Paia e uiga i le matapeʼapeʼa ma loto faamaualuluga
E manatu nisi o tagata o le faamaualuga o se uiga e na o loto o tagata mauoloa e maua i ai. Ae peitai, e le o taimi uma e moni ai lenei manatu, e pei ona o le a e iloaina i fuaiupu nei.
Faitau le Mataupu Faavae ma Feagaiga 56:16–17, ma vaavaai pe faapefea ona faaalia se loto le salamo i se tagata e mauoa ma i se tagata e mativa. Mafaufau e faailoga mea e te mauaina. Mafaufau loloto pe aisea e avea ai le faamaualuga ma le faaloloto o se uiga masani o tagata mauoa ma tagata matitiva.
Faitau le Mataupu Faavae ma Feagaiga 56:18, ma vaavaai mo le faamatalaga a le Alii o loto ma agaga o i latou o le a faamanuiaina. Faaaoga vaefaamatalaga ina ia malamalama ai i nisi o upu na faaaoga e le Alii.
Ata
Elder D. Todd Christofferson
Na aoao mai e Elder D. Todd Christofferson o le Korama a Aposetolo e Toasefululua: “A e sailia le faamanuiaga o le liua, e mafai ona e ofoina atu i le Alii le meaalofa o lou loto momomo po o le loto salamo, ma lou agaga nutimomoia po o le agaga usitai. O le mea moni lava, o le ofoina atu lea o oe lava—o le a lava le tulaga o e i ai ma pe o le a foi le ituaiga tagata ua avea ai oe“ (”Pe a Liua Mai Oe,“ Ensign, Me 2004, 12).
Faitau le Mataupu Faavae ma Feagaiga 56:19–20, ma vaavaai mo faamanuiaga na folafola mai e le Alii ia i latou e loto maualalalo. Atonu e mafai ona fesoasoani lou iloa o le “taui” a le Alii, o lona uiga o le a Ia totogia mea lelei uma ma mea leaga uma ua faia.
Tali fesili nei i lau api talaaga mo le suesueina o tusitusiga paia:
E faapefea ona faatusatusa faamanuiaga na faamatalaina i le Mataupu Faavae ma Feagaiga 56:18–20 agai i le fanua ma tupe ia na popole i ai Ezra Thayre ma isi uluai tagata o le Au Paia?
O a ni mea e mafai ona e faia ina ia maua ai le ituaiga loto lea o le a mauaina faamanuiaga na lisiina i nei fuaiupu?
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia: