Ia Tesema 1830, na malaga mai ai Sini Rikitone mai Ohaio i Niu Ioka faatasi ma Eteuati Paterika e feiloai ma le Perofeta o Iosefa Samita. E ui lava na le’i leva ona papatisoina Sini, ae sa le’i talitonu Eteuati i le taimi lena i le moni o le talalelei toefuataiina. Ina ua uma ona feiloai ma le Perofeta ma talanoa atu ia i latou sa iloaina o ia, sa talosagaina loa e Eteuati le Perofeta e papatiso o ia. I le amataga o Tesema 1830, a o lei papatisoina Eteuati Paterika, sa maua ai e Iosefa Samita le faaaliga o loo i le Mataupu Faavae ma Feagaiga 36. I le faaaliga na valaauina ma poloaiina ai e le Alii ia Eteuati Paterika e talai atu le talalelei.
I le ono masina mulimuli o le 1830, sa atili faateteleina ai sauaga e faasaga i le Ekalesia. Ia Tesema o le 1830 sa maua ai e Iosefa le faaaliga o loo i le Mataupu Faavae ma Feagaiga 37, lea na poloaiina ai e le Alii le Au Paia e tuua Niu Ioka ae faapotopoto atu i Ohaio.
Ua faamagalo e le Alii ia agasala a Eteuati Paterika ma valaauina o ia e talai atu le talalelei
Mafaufau i ni aitema e o faifeautalai ma ave e fesoasoani ia i latou e faataunuu ai la latou galuega.
Ata
atopau
O nisi o mea e manaomia muamua e faifeautalai a o lei mafai ona latou talai atu ma le mataalia le talalelei, e le mafai ona tuuina i totonu o se atopau. A o e suesueina le Mataupu Faavae ma Feagaiga 36, vaavaai mo nisi o mea e manaomia ma e ao ona faia muamua e se faifeautalai a o lei saunia o ia e auauna atu i se misiona.
I le Mataupu Faavae ma Feagaiga 36, ua valaauina e le Alii ia Eteuati Paterika e auauna atu i se misiona. Faitau le Mataupu Faavae ma Feagaiga 36:1, ma vaavaai mo le mea na ta’u atu e le Alii ia Eteuati Paterika a o le’i valaauina o ia e talai atu le talalelei.
I lau api talaaga mo le suesueina o tusitusiga paia, tusi ai pe aisea e te manatu ai e taua mo i latou uma o e ua valaauina e talai atu le talalelei ona salamo ma ia faamagaloina i a latou agasala. Mafaufau pe faapefea e le faamamaina mai agasala ona fesoasoani ia Eteuati Paterika e talai atu le talalelei “ma le leo e pei o se pu” (MF&F 36:1).
Faitau le faamatalaga lenei mai ia Elder Jeffrey R. Holland o le Korama a Aposetolo e Toasefululua, ma faailoga upu po o fasifuaitau e fesoasoani ia te oe ia malamalama pe aisea e taua mo i latou o e ua valaauina e talai atu le talalelei ona mama:
Ata
Elder Jeffrey R. Holland
“I le taua lenei i le va o le lelei ma le leaga, e le mafai ona outou taaalo mo le fili i soo se taimi lava e oo mai ai faaosoosoga, ona e faamoemoe lea e suti lelei mo le Faaola i le malumalu ma le taimi o le misiona e pei lava e leai se mea na tupu. E le mafai ona faia lena tulaga au uo talavou. E le ulagia le Atua.
“… E toetoe lava o tauvaga afeleti uma ou te iloa, e vaseina ai laina tuaoi i luga o le fola po o le malae lea e tatau ona tumau ai i totonu tagata tauva uma. Ia, ua vaseina foi e le Alii laina o le agavaa mo i latou ua valaauina e galulue faatasi ma Ia i lenei galuega. E leai se faifeautalai e le o mafai ona salamo mai ni agasala o feusuaiga po o gagana masoa po o le matamata i ata ponokalafi e faamoemoe e luiina isi ia salamo mai na mea! E le mafai ona e faia lena mea. O le a le faatasi le Agaga ma oe ma o le a apili na upu i lou faa’i a o e tautala atu ai. E le mafai ona outou malaga i ala ua ta’ua e Liae o ‘ala faasaina’ [1 Nifae 8:28] ma faamoemoe e taitai isi i le ‘ala lauitiiti ma le vaapiapi’ [2 Nifae 31:18] e le—mafai ona faia faapena” (“Ua Tauto i Tatou Uma,“ Ensign po o le Liahona, Nov. 2011, 45).
Mafaufau pe faapei lou faasoa atu o le talalelei i isi a’e ua e iloa lelei lava e te le’i ola i upumoni o loo e aoaoina atu. Ia, mafaufau laia pe faapei le faasoa atu o le talalelei i isi, ma le talitonuga lea e sau mai le faamamaina mai soo se mea sese e ala i le Togiola a Iesi Keriso.
Ata
Elder Jeffrey R. Holland
Na saunoa Elder Holland e uiga i le mea e mafai ona e faia nei ina ia mama ai mo le galuega faafaifeautalai: “Pe o ai lava oe ma pe o le a se mea na e faia, e mafai ona faamagaloina oe. O outou … taitoatasi e mafai ona lafoaia soo se solitulafono atonu o outou tauivi ai. O le vavega o le faamagaloga; o le vavega o le Togiola a le Alii o Iesu Keriso. Ae e le mafai ona outou faia e aunoa ma se tautinoga malosi i le talalelei, ma e le mafai ona outou faia e aunoa ma le salamo i le mea e manaomia ai. Ua ou talosagaina outou … ia mataalia ma ia mama. Pe a manaomia ai, ua ou talosagaina outou ia e mataalia ma ia e mama” (“Ua Tatou Tatou Uma,” 45).
Mafaufau loloto i mea e tatau ona e faia i le taimi nei ina ia e mama ai po o le ia tumau ai le mama.
Faitau le Mataupu Faavae ma Feagaiga 36:2–3, ma vaavaai mo le mea na folafola mai e le Alii e tuuina mai ia Eteuati Paterika, a’o lei auina atu o ia e talai atu le talalelei.
Ata
Peresitene Harold B. Lee
Sa faamalamalama mai e Peresitene Harold B. Lee le uiga o le fuaitau “O le a faaee loʼu lima i ou luga e ala i le lima o laʼu auauna o” o loo maua i le fuaiupu e 2: “O loo fetalai mai le Alii ii, a tuu e se tasi o Ana auauna faatagaina ona lima e ala i le pule i luga o le ulu o le tagata o loo faamanuiaina, e pei lava na tuu i luga e Ia Lava Ona aao faatasi ma i latou e faia lena sauniga. O lea e amata ai ona tatou vaaia le ala e faaali mai ai e Ia Lona mana i tagata e ala i Ana auauna o e ua Ia tuuina i ai ki o le pule” (Be Secure in the Gospel of Jesus Christ, Brigham Young University Speeches of the Year [Fep. 11, 1958], 6).
Atonu foi e aoga le iloa o le fuaitau “aoao atu ia te oe mea filemu o le malo” i le fuaiupu e 2 e faatatau i le musumusuga ma le taitaiga tatou te maua mai le Agaga Paia a o tatou ola i le talalelei.
Matau i le fuaiupu e 3 le mea na ta’u mai e le Alii ia te ia e fai, i mea na aoaoina ai o ia e le Agaga Paia.
Tali le fesili lenei i lau api talaaga mo le suesueina o tusitusiga paia: Aisea e te manatu e taua ai mo faifeautalai ona maua le Agaga Paia e avea ma a latou soa? A uma ona tali le fesili lenei, atonu e te manao e tusi e uiga i se taimi na aoaoina ai oe e le Agaga Paia i se mea e uiga i “mea filemu o le malo” (MF&F 36:2).
Ua tuuina mai e le Alii se poloaiga e faatatau ia i latou o e ua valaauina e talai atu le talalelei
Faitau le Mataupu Faavae ma Feagaiga 36:4–5, 7. Ia matau i nei fuaiupu, o loo fetalai le Alii i “toeaina o [Lana] ekalesia” (MF&F 36:7). A o e faitau, vaavaai mo se tiutetauave na tuuina mai e le Alii e umia le perisitua.
E faavae i luga o le mea na e faitauina i nei fuaiupu, faauma le mataupu faavae lenei e faatatau i le tiutetauave o le au perisitua uma i aso nei: Ua valaauina i latou e umia le Perisitua e .
Ata
faifeautalai i le faitotoa o le fale
Ata
Peresitene Thomas S. Monson
Na saunoa mai Peresitene Thomas S. Monson e uiga i lenei mataupu faavae: “Ou te toe ta’u atu le mea ua leva ona aoao mai e perofeta—o alii talavou uma e agavaa ma malolosi e tatau ona saunia e auauna atu i se misiona. O le galuega faafaifeautalai o se tiute faaleperisitua—o se matafaioi ua faamoemoe le Alii mai ia i tatou o ē ua mauaina mea e tele“ (A o Tatou Toe Potopoto Faatasi Ai,” Ensign po o le Liahona, Nov. 2010, 5–6).
O Epikopo ma peresitene o paranesi e galulue faatasi ma alii talavou ma tamaitai talavou e iloilo ai lo latou agavaa ma gafatia e auauna atu i le Alii o ni faifeautalai faamisiona. O nisi alii talavou e mafai ona tuusaunoaina mai le galuega faafaifeautalai ona o faafitauli o le soifua maloloina po o manaoga faapitoa. Ae peitai, i tulaga faapea e tatau ona faatumauina pea lo latou agavaa ma saunia i latou lava e auauna atu i le Alii i isi auala.
Toe faamanatu le Mataupu Faavae ma Feagaiga 36:5, 7 e vaai ai po o a mea e tatau ona faia muamua e i latou e umia le perisitua a o lei faauuina ma auina atu i latou e talai le talalelei.
Tali le fesili lenei i lau api talaaga mo le suesueina o tusitusiga paia: E mafai faapefea e se alii talavou ona faaali atu i le Alii e na te taliaina le poloaiga e talai atu le talalelei?
E ui lava o le galuega faafaifeautalai o se tiute faaleperisitua, ae e mafai foi ona auauna atu tamaitai talavou. Na saunoa Peresitene Thomas S. Monson: “O se upu ia te outou tuafafine talavou: e ui e le tutusa o outou tiutetauave faaleperisitua ma alii talavou e auauna atu faafaifeautalai faamisiona, e i ai foi lo outou sao taua o ni faifeautalai ma e matou te taliaina la outou auaunaga” (“A o Tatou Toe Potopoto Faatasi Ai,” 6).
Faitau le Mataupu Faavae ma Feagaiga 36:6, ma vaavaai mo le savali ua poloai mai le Alii i faifeautalai e aoao atu. O le fuaitau “ofu ua pisia i le tino” e faatatau i lavalava ua faaleagaina i faama‘i. I Isaraelu anamua, o na ituaiga lavalava sa susunuina e taofia ai le faama’i mai le pipisi. I le fuaiupu e 6, ua faatusaina ai e le Alii ia faama‘i i le agasala ma poloaiina i tatou e aloese mai soo se mea e fesootai ma le agasala.
E faapefea ona fesootai le savali o loo i le Mataupu Faavae ma Feagaiga 36:6 e tatau i faifeautalai ona folafola atu le salamo, i le saunoaga a Elder Holland e uiga i le auala e tatau ona saunia ai faifeautalai, o loo i le amataga o lenei lesona?
Faitau le Mataupu Faavae ma Feagaiga 36:8, ma vaavaai po o le a le mea na ta’u mai e le Alii ia Eteuati Paterika i le faaiuga o lenei faaaliga.
Ua poloai e le Alii Lana Ekalesia e faapotopoto i Ohaio
I masina seia oo atu i le taimi na malaga ai Eteuati Paterika e feiloai ia Iosefa Samita, sa faateteleina ai lava sauaga o le Au Paia i Niu Ioka. E latalata i le faaiuga o Tesema 1830, i ni nai vaiaso talu ona taunuu Sini Rikitone ma Eteuati Paterika i Niu Ioka, na maua ai e le Perofeta o Iosefa Samita se faaaliga lea na poloaiina ai e le Alii le Au Paia e o atu i Ohaio.
Faitau le Mataupu Faavae ma Feagaiga 37:1–4, ma vaavaai po o a sauniuniga na finagalo le Alii e fai e le Perofeta a’o lei alu atu o ia i Ohaio. Ia matau i le fuaiupu e 2 le mafuaaga na fetalai ai le Alii ia Iosefa Samita e alu e faamalolosi tagata o le ekalesia i Colesville, Niu Ioka.
O a ni mataupu faavae e uiga i le tatalo e mafai ona tatou aoao mai i nei fuaiupu?
I lau api talaaga o tusitusiga paia, tusi ai se mataupu faavae ua e aoaoina mai i le Mataupu Faavae ma Feagaiga 37:2 e uiga i le tatalo. Ia faamatala mai foi le mea o le a e faia e te galue ai i lenei mataupu faavae.
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia: