Sa faaauau pea ona faamautu atu e le Taulealea o Iosefa Samita na vaai o ia i se faaaliga, ma sa faaauau foi ona sauaina ai o ia. Ina ua 17 ona tausaga, i se tasi afiafi a o tatalo Iosefa, na faaali mai ai se agelu e igoa ia Moronae ma tautino mai, na i ai i le Atua se galuega e fai e Iosefa, e aofia ai le faaliliuga o se faamaumauga anamua sa tusia i luga o papatusi auro. A o faamalamalama mai le matafaioi a Iosefa i le Toefuataiga o le talalelei, sa sii mai e Moronae se vaega o valoaga mai le Tusi Paia, e aofia ai le valoaga a Malaki e uiga i le toe foi mai o Elia. O le aso na sosoo ai, na alu ai Iosefa Samita i le mauga lea na fai mai Moronae na tanumia ai papatusi auro. O iina sa ia maua ai ni isi faatonuga mai ia Moronae.
O loo tatalo Iosefa Samita mo se faamagaloga o ana agasala
I le aluga o le lesona o le aso, o le a e aoao atili ai e uiga i le taulealea o Iosefa Samita. Faitau le Iosefa Samita—Talafaasolopito 1:27–29, ma ia faatatau nei fuaiupu ia te oe lava.
Mafaufau loloto i tulaga ma lagona na oo i ai Iosefa Samita a’o talavou. E faapefea ona talitutusa ma tulaga ma lagona e fetaia’i ma oe?
I le Iosefa Samita—Talafaasolopito 1:28, na tusia ai e Iosefa e faapea, e ui sa le’i tausalaina o ia i se agasala matuia, ae sa le o taimi uma na amioa’i ai o ia i amioga a se tagata ua valaauina e le Atua. E mafai ona tatou aoaoina ni lesona taua mai mea na faia e Iosefa Samita e tali a’i i mea sese na ia faia.
Toe iloilo le faaiuga o le Iosefa Samita—Talafaasolopito 1:28, ona tusi lea i lau api talaaga mo le suesueina o tusitusiga paia le mea na faia e Iosefa Samita e tali a’i i mea sese na ia faia. Ma le isi, lisi se mataupu faavae se tasi pe lua ua e aoaoina mai i le faataitaiga a Iosefa.
O nisi o upumoni e mafai ona tatou aoaoina mai le Iosefa Samita—Talafaasolopito 1:28 o le: A tatou iloa a tatou agasala ma lagona ai le faanoanoa, e mafai ona tatou tatalo i le Tama Faalelagi mo se faamagaloga. E mafai ona tatou tatalo e iloa ai lo tatou tulaga i luma o le Atua.
Tali le fesili lenei i lau api talaaga mo le suesueina o tusitusiga paia: E mafai faapefea e le tatalo ia iloa lou tulaga i luma o le Atua ona fesoasoani ia te oe?
Faitau le aoaoga lenei mai ia Elder Neil L. Andersen o le Korama a Aposetolo e Toasefululua, ina ia malamalama lelei ai i le auala e mafai ai e tatalo ona fesoasoani tatou te iloa ai o tatou tulaga i luma o le Atua ma iloa ai suiga atonu e finagalo o Ia tatou te faia:
Ata
Elder Neil L. Andersen
“E faapefea ona tatou faia le faaiuga i le mea e tatau ona taulai atu i ai lo tatou salamo? … [E mafai ona tatou] faatoga atu ma le lotomaualalo i le Alii: ‘Le Tama e, o le a se mea E te finagalo ou te faia?’ E oo mai tali. Tatou te lagonaina suiga e tatau ona tatou faia. E ta’u mai e le Alii ia i tatou i o tatou mafaufau ma i o tatou loto.
“Ona faatagaina lea o i tatou e filifili: pe o le a tatou salamo, pe o le a tatou toso mai i lalo pupuni i o tatou faamalama e matala i le lagi?” (“Salamo… Ina ia ou Faamaloloina Outou,” Ensign po o le Liahona, Nov. 2009, 41).
Ia manatua e naunau le Tama Faalelagi e faamagalo i tatou a o faaaoga o tatou faatuatua ia Iesu Keriso ma faia mea e tatau ai e salamo ai i a tatou agasala.
A o tatalo Iosefa Samita mo le faamagaloga, na faaali mai le agelu o Moronae ia te ia. Faitau le Iosefa Samita—Talafaasolopito 1:30–32, ma taumafai e vaai faalemafaufau pe na faapei lenei aafiaga.
Ata
O Moronae o loo Faaali Mai ia Iosefa Samita i totonu o Lona Potu
Faitau le Iosefa Samita—Talafaasolopito 1:33, e su’e ai le savali a Moronae ia Iosefa Samita. Atonu e te manao e faailoga upu ma fasifuaitau o loo ta‘u mai ai na i ai i le Atua se galuega e fai e Iosefa Samita. Mafaufau loloto i ni lagona atonu na oo ia Iosefa a’o ia aoao i mea o le a faia e le Alii e ala mai ia te ia.
Na valoia e Moronae o le igoa o Iosefa Samita o le a “tauleleia ma tauleagaina i totonu o nuu uma” (Iosefa Samita—Talafaasolopito 1:33). I lau api talaaga mo le suesueina o tusitusiga paia, tusi ai e uiga i faamautinoaga ua e molimauina ua faaalia ai ua faataunuuina lenei valoaga.
Sa aoaoina foi e Moronae ia Iosefa Samita e uiga i le galuega o le a ia faataunuuina. Faitau le Iosefa Samita—Talafaasolopito 1:34–35, ma faailoa mai po o le a lena galuega.
I le Iosefa Samita—Talafaasolopito 1:36-42 tatou te faitau ai, sa sii mai e Moronae le tele o valoaga mai le Tusi Paia e faamalamalama mai ai, o le Toefuataiga o le talalelei o le a amataina. A o e faitauina nei fuaiupu, atonu e te manao e faailoga mau e faatatau i fasifuaitau o mau o loo ta‘ua.
Faitau le Iosefa Samita—Talafaasolopito 1:38-39. I le 1876 na faatonuina ai e Polika Iaga ina ia faaopoopoina upu a Moronae o loo i nei fuaiupu i le Mataupu Faavae ma Feagaiga e avea ma vaega 2. O lenei valoaga o le toe foi mai o Elia, o se tasi lea o faaaliga muamua lava na tuuina mai i lenei tisipenisione, ma o lona taua tele o loo faapea ona vaaia ai foi i le Feagaiga Tuai (Malaki 4:5–6), Feagaiga Fou (Luka 1:17), ma le Tusi a Mamona (3 Nifae 25: 5–6). Atonu e te manao e tusi nei mau faasino i talane o le Iosefa Samita—Talafaasolopito 1:38–39 ma le Mataupu Faavae ma Feagaiga 2.
Ata
Peresitene Henry B. Eyring
Na saunoa mai Peresitene Henry B. Eyring o le Au Peresitene Sili, e uiga ia Elia ma le mana o le perisitua o le a ia toefuataiina mai: “E taua le iloa o le mafuaaga na folafola mai ai le Alii e auina mai Elia. O Elia o se perofeta maoae sa i ai se mana maoae na tuuina atu ia te ia e le Atua. Sa ia te ia le mana sili ua tuuina mai e le Atua i Ana fanau: sa ia te ia le mana o faamauga, le mana e fusifusia ai i le lalolagi, ma fusifusia ai i le lagi” (“Hearts Bound Together,” Ensign, Me 2005, 78).
Faaaoga le faamalamalamaga a Peresitene Eyring e fesoasoani ia te oe, ia fai se aotelega o le uiga o le Mataupu Faavae ma Feagaiga 2:1 i au lava upu:
O le Mataupu Faavae ma Feagaiga 2:2 e faatatau i folafolaga na faia i tama. Na faamanino mai e Elder Bruce R. McConkie o le Korama a Aposetolo e Toasefululua, po o ai nei tama ma o a foi folafolaga na faia ia te i latou: “O ai ia tamā? O i latou o Aperaamo, Isaako ma Iakopo, o e na faia i ai folafolaga. O a ia folafolaga? O ia folafolaga o se faaauauga o le iunite o le aiga i le faavavau” (O le Mesia o le Meleniuma: O le toe sau faalua o le atalii o le tagata. [1982], 267).
Ata
Peresitene Iosefa Filitia Samita
E le gata i le faatatau atu i perofeta o le Feagaiga Tuai o Aperaamo, Isaako ma Iakopo, “o tamā,” e faatatau foi i isi, e pei ona faamalamalama mai e Peresitene Iosefa Filitia Samita: “O tamā o o tatou tuaa ua maliliu o e na maliliu e aunoa ma le avanoa e maua ai le talalelei, ae na latou mauaina le folafolaga o le a oo mai le taimi o le a tuuina atu ai ia i latou lena avanoa. O le fanau o i latou o loo ola nei, o e o loo saunia faamatalaga o gafa ma ē o loo faatinoina sauniga sui i totonu o malumalu“ (Doctrines of Salvation, ed. Bruce R. McConkie, 3 vols. [1954 – 56], 2:127).
Faaaoga le faamalamalamaga ua tuuina atu i luga, e fai ai se aotelega o le uiga o le Mataupu Faavae ma Feagaiga 2:2 i au lava upu:
Fai mai leMataupu Faavae ma Feagaiga 2:3 o le a faamaumauina atoa le lalolagi pe ana fai e le oo mai Elia. Na faamalamalama mai e Peresitene Iosefa Filitia Samita le mafuaaga o le a tupu ai lenei mea: “Aisea o le a faamaumauina ai le lalolagi? Aua afai e leai se sooga mau i le va o tama ma fanau—o le galuega lea mo e ua maliliu—o lona uiga o le a teena uma lava i tatou; o le a toilalo ma ma’uma’u atoa le galuega a le Atua” (Doctrines of Salvation, 2:122; tagai foi i le MF&F 128:17–18).
O nisi nei o faataitaiga o upumoni atonu ua e mauaina i le Mataupu Faavae ma Feagaiga 2:1–3. Faafetaui le upumoni i le fuaiupu talafeagai o loo aoao mai ai.
O le a auina mai e le Atua ia Elia e toefuatai mai le mana o faamauga i le lalolagi a’o le’i oo i le Afio Mai Faalua o Iesu Keriso.
E faavae i mea ua e aoaoina mai le Mataupu Faavae ma Feagaiga 2, tusi i lau api talaaga mo le suesueina o tusitusiga paia, ni nai fuaiupu e faamatala ai ou lagona e uiga i le taua o le toe foi mai o Elia.
I lau suesuega o le Mataupu Faavae ma Feagaiga 110 i se taimi mulimuli mai o lenei tausaga, o le a e iloa ai le ala na faataunuuina ai lenei valoaga ina ua toe foi mai Elia ma faaee le mana o faamauga i luga o le Perofeta o Iosefa Samita.
Ina ua uma ona aoao e Moronae ia Iosefa Samita e uiga i le toe foi mai o Elia, siiina mai isi valoaga e uiga i le Toefuataiga, ma tuuina mai nisi faatonuga e uiga i papatusi auro, ona alu ese lea o ia (tagai i le Iosefa Samita—Talafaasolopito 1:42–43). Faitau le Iosefa Samita—Talafaasolopito 1:44–45, ma faailoa mai mea na tutupu ina ua aluese Moronae.
Faitau le Iosefa Samita—Talafaasolopito 1:46–49, ma vaavaai mo le aofaiga o taimi na toe ta’u atu ai e Moronae lana savali ia Iosefa Samita. O le aofaiga, e faafia ona momoli mai e Moronae lana savali ia Iosefa Samita?
O le upumoni e tasi tatou te aoaoina mai i lenei mea o le, e masani ona toe ta’u faafia mai e le Alii ma Ana auauna ni aoaoga taua.
Mafaufau i tatalo o le faamanatuga. Aisea e faia soo ai i vaiaso taitasi i le upu i le upu? Mafaufau i aoaoga ua e faalogo o ta’ua soo mai i tusitusiga paia ma i taimi o konafesi aoao.
I lau api talaaga mo le suesueina o tusitusiga paia, lisi ai nisi o faataitaiga o aoaoga na e faalogo o ta’u faafia mai, ona faamatala mai lea pe aisea e te manatu ai, ua masani ai ona ta’u faafia mai e le Alii ma Ana auauna ia aoaoga. Ia mautinoa e faamatala mai pe mata o le a faapefea ona e faaaogaina lenei upumoni i lenei tausaga.
Ua alu Iosefa i le mauga ma maua ai faamaumauga, o le Urima ma le Tumema, ma le ufifatafata
O loo faamatala mai i leIosefa Samita—Talafaasolopito 1:50–51 ina ua uma ona ia ta’uina atu i lona tama e uiga i asiasiga mai ia Moronae, sa alu atu loa Iosefa i le mauga lea na tanumia ai papatusi auro.
Vaai faalemafaufau po o a ni ou lagona pe ana faapea o oe o Moronae, ma sa e asiasi mai ia Iosefa Samita, i le mavae ai o le silia ma le 1,400 tausaga o faatalitali mo le mauaina ma le faaliliuina o papatusi. A o e vaai faalemafaufau i lenei mea, faitau le Iosefa Samita—Talafaasolopito 1:52–54, ona tusi lea i lau api talaaga mo le suesueina o tusitusiga paia, pe faapei ni ou lagona e ono i ai i le taimi o lenei aafiaga.
O le lesona o le a sosoo ai, o le a e iloa ai le mea na tupu i le faaiuga o le vaitaimi e fa tausaga na faatalitali ai.
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia: